ƗYelusalemu ɨɨmya
21
1 Pwʉ ndɨkavʉvona ʉvʉtandaatse ʉvʉpya nɨ kɨlʉnga ɨkɨpya.
Ʉvʉtandaatse vʉlya ʉvʉtatsi nɨ kɨlʉnga kɨlya ɨkɨtatsi syahegile,
najyene ɨnyanza najyavepwo ikange.
2 Ndɨkavʉvona ʉvʉtsenge ʉvʉvalatse,
ɨYelusalemu ɨɨmya,
vukwika ʉkʉhʉma kʉkyanya kwa Ngʉlʉve.
Ʉvʉtsenge ʉwa waanotsiiwe vʉnonu ʉngata mmɨnza ʉvɨ avaanu vannotsiitse pa nsɨkɨ gwa vʉtegʉlanie.
3 Pwʉ ndɨkapʉlɨka ɨlimenyu ɨlivaha ʉkʉhʉma pa kɨnyalwangʉla kya Lʉdeeva lɨkata,
“Lola!
Ʉvʉtaamo wa Ngʉlʉve vʉlɨ paninie na vaanu.
Itaamaga paninie navo,
viveetsaga vaanu va mwene,
nʉ mwene iveetsaga Ngʉlʉve va veene.
4 Ʉmwene alavapulusa inyihotsi tsa veene tsyoni.
Ʉvʉswe navʉlaavepwo ikange,
pange lʉvavo,
pange kʉlɨla,
pange lʉkuuto,
manya itsa katale tsilʉtɨngʼiinie!”
5 Pwʉ ʉNgʉlʉve,
ʉmwene ʉvɨ aataamile pa kɨnyalwangʉla kya Lʉdeeva akata,
“Lola,
ndikʉgavɨɨka gooni gave mapya.”
Ikange akata,
“Vɨga ikulongwi itsi,
ʉlwakʉva amamenyu aga mahʉʉvɨlwa ikange ga jɨlweli!”
6 Akata,
“Gamalile ʉkʉvombeka!
Ʉne neene Alufa ikange neene Omega,
Vʉtengʉlɨlo nʉ Vʉmalɨlo.
Ʉmuunu ʉvɨ alɨ nɨ kyʉmɨlwa ndɨlampa amagasi ga kʉnywa ga vʉvʉle ʉkʉhʉma mu sidwivudwivu sya magasi agikʉvapa avaanu ʉwʉʉmi.
7 Ʉlya ʉvɨ ikʉtsilesa ingelo alʉʉpɨlɨla ago,
nʉʉne ndɨlaava Ngʉlʉve va mwene,
namwene alaava mwana vango.
8 Lɨno avaanu avadwatsi nʉ wʉ navikwɨdɨka na valami na vabudi na valigu na vahavi nʉ wʉ vikɨsaja kʉ mingʉlʉve,
na vanuasi vooni,
ʉvʉtaamo wa veene vʉlaava mu lisiva lɨlya ɨlya mwoto gwa maganga ga salufa.
Ʉwa wʉ vʉswe wa vɨɨlɨ.”
9 Pwʉ mpamato mu vasuungʼwa valya lekelakʉpamato (7) avaale ni bakʉli tsilya lekelakʉpamato itsyale nʉ vʉvejangi lekelakʉpamato wa vʉmalɨlo,
akiitsa nʉ kʉmbʉʉla ʉne akata,
“Wiitse!
Pwʉ ʉne ndikʉkʉvonia ʉmmɨnza ʉvɨ itegʉlwa,
ʉmwehe va Kakolo!”
10 ɄMepo ʉMbalatse akannyitsila,
pwʉ ʉnsuungʼwa akannyɨlɨka kʉ kɨdugala ɨkɨtale siitso.
Akambonia ʉne ʉvʉtsenge ʉvʉvalatse wa Yelusalemu,
vukwika ʉkʉhʉma kʉkyanya kwa Ngʉlʉve.
11 Waangʼaalaga kʉ wɨɨmɨkiwa wa Ngʉlʉve.
Ɨlilangamuli lya weene lyale ndɨ lya liganga lya lʉtogo ikange ʉngata yasipia ikange ʉngata kyovo.
12 Ʉvʉtsenge ʉwa waatsʉngʉtiilwe nʉ lʉvɨgob ʉlʉvaha ikange lʉtale,
ʉlʉnya milyango kɨtsigo na gɨvɨlɨ (12).
Ɨmilyango ɨgyo gyaloleelwagwa na vasuungʼwa kɨtsigo na vavɨlɨ.
Pa milyango gyoni paavɨgilwe ɨlitaawa lipamato pamato mu galya amataawa ga sivʉmbʉkʉ kɨtsigo na sivɨlɨ sya Vaisilahɨli.
13 Imbasu tsyoni tsyale nɨ milyango gɨdatu gɨdatu:
ʉlʉvasu lwa Kʉvʉhʉmo wa Litsʉva,
ɨmilyango gɨdatu,
ʉlʉvasu lwa Kʉnena,
ɨmilyango gɨdatu,
ʉlʉvasu lwa Kʉsika,
ɨmilyango gɨdatu nʉ lʉvasu Kʉvʉseemo wa Litsʉva,
ɨmilyango gɨdatu.
14 Ʉlʉvɨgo lwa vʉtsenge ʉwa lwale na maganga ga waalo kɨtsigo na gavɨlɨ.
Mu maganga ago gaavɨgilwe amataawa kɨtsigo na gavɨlɨ ga vapositili va Kakolo.
15 Ʉnsuungʼwa ʉjwa ʉvɨ aatsovile nʉʉne aale nʉ nsaga gwa sahabu gwa kʉgelela ʉvʉtale.
Aasumbilwe ʉkʉpima ʉvʉvaha wa vʉtsenge ʉwa,
ɨmilyango gya weene nʉ lʉmato lwa weene.
16 Ʉvʉtsenge ʉwa waahwaniine imbasu tsyoni inni,
mu vʉtale na mu sikɨgɨ sya weene.
Pwʉ ʉnsuungʼwa akapima ʉvʉtsenge ʉwa kʉ nzɨla jya nsaga gwa mwene.
Akavona ʉvʉtale ni sikɨgɨ nɨ kyɨmo ʉngata silɨ kilomita avaelufu vavɨlɨ nɨ mileevʉlʉ gɨnni (2,400).
17 Akapima ʉnʼgingi gwa lʉmato lwa weene,
akavona gʉlɨ ni mita isitsigo ntanato (60) ʉkʉkongana nɨ kɨpimo kya vʉmuunu ɨkyʉ ʉnsuungʼwa aapimilaga.
18 Ʉlʉmato ʉlwa lwatsengilwe na maganga ga yasipi,
ʉweene ʉvʉtsenge waatsengilwe kʉ sahabu ɨnonu ɨjyavonekaga ʉta kyovo.
19 Ʉlwʉtʉ lwa lʉmato ʉlwa lwadingʼuliilwe na maganga aga naaga ga lʉtogo.
Ɨliganga ɨlitatsi lya pa waalo lyale yasipi ɨnduungʼu,
ɨlya vɨɨlɨ lyale yakuti buluu,
ɨlya daatu lyale kalukedoni ɨnyanyeke,
ɨlya nni lyale sumalidi nyalʉbogaaboga.
20 Ikange ɨliganga lya haano lyale salidoniki inya vʉdingʼulanie wongosu,
ɨlya ntanato (6) lyale akiki ɨnduungʼu,
ɨlya lekelakʉpamato (7) lyale kilisolito ɨmanzaano,
ɨlya nnaana (8) lyale zabalajadi ɨnyalʉbogaaboga,
ɨlya budikakʉpamato (9) lyale topasi ɨmanzaano,
ɨlya kɨtsigo (10) lyale kilisopulaso ɨnyalʉbogaaboga,
ɨlya kɨtsigo na kɨpamato (11) lyale yasinto ɨbuluu nɨ lya kɨtsigo na sivɨlɨ (12) lyale ametisito ɨnyavʉvengi.
21 Nagyene ɨmilyango kɨtsigo na gɨvɨlɨ gyanotsiiwe na maganga ga lʉtogo kɨtsigo na gavɨlɨ.
Nʉ gʉnge gwanotsiiwe kʉ liganga ɨlilʉti ɨlivalasu lipamato.
Ɨnzɨla ɨmbaha jya vʉtsenge ʉwa jyanotsiiwe kʉ sahabu ɨnonu ɨjyavonekaga ʉngata kyovo.
22 Nandyavʉvone ʉVʉtaamo ʉVʉvalatse wa Ngʉlʉve mu vʉtsenge ʉwa,
manya ʉNtwa ʉNgʉlʉve ʉNyamaka Gooni nʉ Kakolo vaale wʉ Vʉtaamo ʉVʉvalatse wa Ngʉlʉve wa vʉtsenge ʉwa.
23 Ʉvʉtsenge ʉwa navumulikwa nɨ litsʉva pange nʉ mwetsi,
manya ʉwɨɨmɨkiwa wa Ngʉlʉve vukʉvamulikila ikange ɨnyaale jya weene vɨ Kakolo.
24 Pwʉ avaanu va sivʉmbʉkʉ syoni,
valagendaga mu lʉmuli lwa weene na vakʉlʉdeeva va silʉnga syoni valahɨlɨkaga ʉwɨɨmɨkiwa wa veene.
25 Ɨmilyango gya vʉtsenge ʉwa gɨlaveetsaga midɨndʉle ʉmuunyi gwoni,
manya ʉmwa najɨlaavemwo ɨkɨlo.
26 Avaanu va sivʉmbʉkʉ syoni valahɨlɨkaga ʉlʉginio nʉ wɨɨmɨkiwa wa veene mu vʉtsenge ʉvʉ.
27 Lɨno nakɨlaavepwo ɨkɨveetsaga ɨkɨkolelanie ɨkɨliingila ʉmwa,
pange ʉmuunu ʉvaveetsaga ʉvivomba itsilɨ mwiko nʉ kʉtsova ʉvʉnuasi.
Apeene valiingila valya veene ʉwʉ amataawa ga veene gaavɨgilwe mu kɨtabu kya wʉʉmi kya Kakolo.