Ʉvʉlongotsi wa myaka elufu
20
1 Pwʉ ndɨkambona ʉnsuungʼwa mpamato ikwika ʉkʉhʉma kʉkyanya.
Aale nɨ sungulu jya liguli lya kʉ lwongometso nʉ nyololo ʉmbaha mu kɨvoko kya mwene.
2 Pwʉ akajiibata ɨnyato jɨlya,
ɨnyandalwe jya katale ɨjitambʉlwa mbʉlɨlɨtsi ikange Setano.
Akajɨkʉnga kʉ nsɨkɨ gwa myaka elufu (1,000).
3 Ʉnsuungʼwa ʉjwa akajɨtaaga mu liguli lya lwongometso,
akadɨnda nʉ kʉvɨɨka ɨkɨkolekelo pa ndyango gwa kwingilila ʉkwa.
Aavombile ewo pakʉta ɨnyato ɨjyo jɨlagelaga ikange ʉkʉsisyova isivʉmbʉkʉ sya vaanu pa nsɨkɨ gwa myaka elufu mamato.
Lɨno wʉ ɨmyaka ɨgyo gɨlʉtɨngʼiinie jɨladɨndʉlɨlwa ikange,
kʉ nsɨkɨ nsupi vʉvʉle.
4 Pwʉ ndɨkasivona isitaamilo sya vʉtwa na valya ʉwʉ vaasitaamye.
Avaanu avo vakapeewa ʉvʉtavʉlɨlwa wa kʉhɨga.
Ikange ndɨkatsivona inumbula tsa vaanu valya avaabudilwe pa kulongwi jya kʉhʉmya ʉwooleletsi wa Yɨɨsʉ na pa kulongwi jya kʉpʉlɨsa ɨlimenyu lya Ngʉlʉve.
Avo wʉ navɨɨsajage kʉ kɨkanu kɨlya na kʉ kɨhwani kya kyene,
pange kwʉpɨlɨla ɨkɨmanyilo pa mbʉmɨla tsa veene,
pange pa sivoko sya veene.
Avo vakatsʉʉka,
vakava valongotsi paninie nʉ Kɨlɨsiti kʉ myaka elufu.
5 Ʉvʉtsʉʉka ʉwa wʉ vʉtatsi ʉwʉ ʉNgʉlʉve aavatsʉʉsiitse avaanu.
Avange vooni avaasue navaatsʉʉke ʉkʉsikila pa nsɨkɨ gwa myaka elufu.
6 Vagatalʉsu siitso ikange vavalatse avo vooni ʉwʉ valaava mu vʉtsʉʉka ʉvʉtatsi.
Ʉvʉswe wa vɨɨlɨa navʉlaave na maka kʉ veene avo.
Valaava vateeketsi va Ngʉlʉve nʉ Kɨlɨsiti,
ikange valalongotsaaga paninie nave kʉ myaka elufu.
Ʉkʉdɨndʉlɨlwa, ʉvʉsyovi nʉ kʉtaagwa kwa Setano
7 Wʉ ɨmyaka elufu gɨsilile,
aladɨndʉlɨlwa ʉSetano ʉkʉhʉma mu kɨkʉngwa kya mwene.
8 Pwʉ alahʉma kʉnzi,
alatengʉla ʉkʉvasyova avaanu va mbasu tsyoni nni tsa kɨlʉnga vave valʉgʉ va Ngʉlʉve.
Isivʉmbʉkʉ isyo silatambʉlwagwa Gogu na Magogu.
b ɄSetano alavalʉndamania paninie avo kʉ vʉsumbe wa ligoha.
Valaava vongosu ndʉ nsekelewe gwa mu lʉkanzimbale lwa nyanza.
9 Valagenda mu kɨlʉnga kyoni,
valaniengetela ʉvʉtaamo wa vavalatse nʉ vʉtsenge wa Ngʉlʉve ʉwʉ avʉganile.
Napeene,
ʉmwoto gʉliika ʉkʉhʉma kʉkyanya nʉ kʉvanyianya.
10 Ʉmwene ʉSetano ʉvɨ aavasyovaga,
alataagwa mu lisiva lya mwoto gwa maganga ga salufa agiviika.
Ʉmwa mwʉ kɨlɨmwo ɨkɨkanu kɨlya nʉ nyamalago ʉlya ʉva vʉnuasi,
aveene avo valakʉvɨlwagwa pakɨlo na pamuunyi,
sikutsooni na sikutsooni.
Ʉvʉhɨgi wa kʉ vʉsililo wa kɨlʉnga
11 Pwʉ ndɨkakɨvona ɨkɨnyalwangʉla ɨkɨvaha ɨkɨvalasu ɨkya Lʉdeeva,
nʉʉlya ʉvɨ akɨtaamye.
Ɨkɨlʉnga nʉ vʉtandaatse sikahega ngʼaningʼaani pavʉlongolo pa mwene,
nasyavoneke ikange.
12 Pwʉ ndɨkavavona avaswe,
avɨɨmɨkiwa na vibedwa,
vɨmile pavʉlongolo pa kɨnyalwangʉla kya Lʉdeeva.
Sikadɨndʉlwa isitabu ʉmwʉ tsivɨgilwe imbombo tsa vaanu vooni.
Ikange kɨkadɨndʉlwa ɨkɨtabu ɨkɨnge,
ɨkɨtabu ɨkyo kyale kya wʉʉmi.
Pwʉ ʉNgʉlʉve akavahɨga avaswe ʉkʉkongana nʉ lʉgendo lwa veene,
ndʉwʉ lwavɨgilwe mu sitabu isyo.
13 Ɨnyanza jɨkahʉmya kʉnzi avaswe avaale ʉmwa.
Kʉ vʉswe na kʉ vʉtsʉʉka sikahʉmya kʉnzi avaswe avaale ʉkwa.
ɄNgʉlʉve akavahɨga vooni ʉkʉkongana nʉ lʉgendo lwa veene.
14 Pwʉ ʉvʉswe na kʉ vʉswe sikataagwa mu lisiva ɨliviika ʉmwoto.
Ɨlisiva ɨlyo ɨliviika ʉmwoto wʉ vʉswe wa vɨɨlɨ.
15 Ʉmuunu ʉvaveetsaga ʉvɨ ɨlitaawa lya mwene nalyavoneke mu kɨtabu kya wʉʉmi,
akataagwa mu lisiva ɨlyo ɨliviika ʉmwoto.