Ʉlʉhekelo lwa vʉtegʉlanie kʉkyanya
19
1 Wʉ galʉtɨngʼiinie ago,
ndɨkapʉlɨka ɨlimenyu ʉngata limenyu lya kɨpʉga ɨkɨvaha kya vaanu kʉkyanya viita,
“Haleluya!
a
ɄNgʉlʉve vɨ Mpoki viitu. Ʉlʉginio na maka sya Ngʉlʉve viitu.
2 Lola,
ʉvʉhɨgi wa mwene wa jɨlweli,
ikange wa vʉgolosu.
Ammɨgile ʉnʼdala ʉndigu ʉndʉti,
ʉlya ʉvɨ aakɨjatsiitse ɨkɨlʉnga kʉ vʉligu wa mwene.
Ambombye itsa kʉlʉmbɨla kʉ nongwa jya kʉduuda ʉnkisa gwa vavombi va mwene ʉNgʉlʉve!”
3 Ikange vakatsova vakata,
“Haleluya!
Ɨlyosi lya mwoto ʉgukobosa ʉvʉtsenge ʉwa,
litoga kʉkyanya sikutsooni na sikutsooni!”
4 Avanzagɨla isitsigo sivɨlɨ na vanni (24) vakasugama paninie ni sipeliwa sinni,
vakɨsaja kʉ mwene ʉNgʉlʉve ʉvɨ alɨ pa kɨnyalwangʉla kya Lʉdeeva vakata,
“Ameni!
Haleluya!”
5 Pwʉ ɨlimenyu lɨkapʉlɨkɨka ʉkʉhʉma pa kɨnyalwangʉla kya Lʉdeeva lɨkata,
“Munʼginiage ʉNgʉlʉve viitu,
ʉnyie nyɨ vavombi va mwene nyɨ vooni,
nyɨ vooni nyɨ mukɨsaja kʉ mwene,
nyɨ vɨɨmɨkiwa na nyɨ mubedwa.”
6 Pwʉ ndɨkapʉlɨka ʉngata limenyu lya kɨpʉga ɨkɨvaha kya vaanu,
ikange ʉngata kʉsaatɨɨla kwa lʉgasi ʉlʉvaha pa salala,
ikange ʉngata kʉkuluma kwa lijasi lɨkata,
“Haleluya!
ɄNgʉlʉve ʉNtwa viitu ʉNyamaka Gooni ilongotsa!
7 Tʉhekelage nʉ kʉluluutila nʉ kʉnʼginia,
ʉlwakʉva ʉnsɨkɨ gwa vʉtegʉlanie wa Kakolo gʉsiike,
ikange ʉvɨ itegʉlwa ɨtetengʼiinie.
8 Apeevilwe ʉkʉswala ɨmisabwa ɨmivalasu ɨminonu,
ɨgyʉ minyogotasu ikange ɨgyʉ gingʼaala.”
Ɨmisabwa ɨmivalasu ɨminonu ɨgyo,
tsʉ mbombo tsa vʉgolosu tsa vavalatse.
9 Pwʉ ʉnsuungʼwa akambʉʉla ʉne akata,
“Vɨga aga:
‘Vagatalʉsu valya ʉwʉ vɨlangilwe kʉ lʉhekelo lwa vʉtegʉlanie wa Kakolo!’ ”
Ikange akambʉʉla akata,
“Ago gwʉ mamenyu ga jɨlweli ga Ngʉlʉve.”
10 Pwʉ ʉne ndɨkagwa kɨvʉgudamo pavʉlongolo pa silʉnde sya mwene pakʉta ndyɨsaje kʉ mwene.
Lɨno ʉmwene akambʉʉla akata,
“Ɨlekelwe ʉkʉgaha ewo!
Ʉne ndɨlɨ mbombi vʉvʉle ndʉʉve na vɨɨdɨkivanino.
Twɨ vooni tukwibata ʉwajɨlweli ʉwʉ ooleliitse ʉYɨɨsʉ.
Wɨsajage kwa Ngʉlʉve!
Lola,
ʉwajɨlweli ʉwʉ ʉYɨɨsʉ ooleliitse,
gwʉ maka agikʉvalongotsa avanyamalago.”
Ʉvɨtogile pa falaasi ɨmbalasu
11 Kʉmbele,
ndɨkavona kʉkyanya kʉdɨndwike,
ʉkwa ndɨkajɨvona ɨfalaasi ɨmbalasu,
nʉ muunu ʉvɨ ɨɨtogile aatambʉlwagwa vɨ “Mmʉʉgʉ” ikange vɨ “Jɨlweli.”
Ʉjwa vɨ ihɨga nʉ kʉlwa ɨligoha kʉ vʉgolosu.
12 Amiiho ga mwene gaale ʉta lʉlimbo lya mwoto,
ikange aaswalile indingʼulilo nyongosu kʉ ntwe.
Aavɨgilwe ɨlitaawa ɨlyʉ nakʉli ʉmuunu ʉvalɨmanyile,
apeene jyʉmwene mwene.
13 Aaswalile ʉnsabwa ʉgwʉ valoviike mu nkisa.
Ɨlitaawa lya mwene ʉjwa vɨ “Limenyu lya Ngʉlʉve.”
14 Isipʉga sya vasikali va kʉkyanya valɨkʉnkonga kʉnʉ vɨtogile ifalaasi imbalasu ikange vaaswalile ɨmisabwa ɨmivalasu ɨminonu gya kitani.
15 Mu ndomo gwa mwene lɨkahʉma ɨlipanga ɨlɨnya wʉʉge.
Kʉ nzɨla jya lipanga ɨlyo alavalema avaanu va sivʉmbʉkʉ syoni.
“Ʉmwene vɨ alavalongotsaaga kʉ nzɨla jya nsaga gwa kyʉma”b nʉ kʉkama ɨdivai ɨngʼali mu liguli lya kʉkamila izabibu.
Ɨliguli ɨlɨ lyʉ lya lʉviipo ʉlʉvaha lwa Ngʉlʉve ʉNyamaka Gooni.
16 Mu nsabwa gwa mwene,
pananena pa lisugamilo lya kʉndyo,
pavɨgilwe ɨlitaawa ɨlɨ,
ʉnkʉlʉdeeva va vakʉlʉdeeva ikange ʉntwa va vatwa.
17 Pwʉ ndɨkambona ʉnsuungʼwa mpamato ɨmile pa litsʉva.
Akɨɨlanga kʉ limenyu ɨlivaha nʉ kʉsivʉʉla isidege syoni isyagʉlʉkaga mu vʉtandaatse akata,
“Mwitse!
Mulʉndamane paninie pa lʉhekelo ʉlʉvaha lwa Ngʉlʉve.
18 Mwitse!
Mulye ɨmihana gya vakʉlʉdeeva nɨ gya vavaha va vasikali na vaanu avanya maka nɨ gya falaasi na vaanu ʉwʉ vikɨtoga pa tsyene.
Mwitse!
Mulye ɨmihana gya vaanu vooni,
avavanda na vatava vavanda,
avɨɨmɨkiwa na vibedwa.”
19 Ndɨkakɨvona ɨkɨkanu kɨlya ɨkɨtatsi paninie na vakʉlʉdeeva va silʉnga syoni ni sipʉga sya vasikali va veene valʉndamiine paninie.
Vaalʉndamiine pakʉta valwitsage nʉʉlya ʉvɨ aataamile pa falaasi paninie nɨ kɨpʉga kya vasikali va mwene.
20 Ɨkɨkanu ɨkyo kɨkiibatwa paninie nʉ nyamalago va kyene va vʉnuasi ʉvɨ aavombile isidego kʉvʉlongolo kʉ kyene.
Kʉ nzɨla jya sidego sya mwene isyo,
aavasyovaga valya avaale ni simanyilo sya kɨkanu ɨkyo,
nʉ wʉ vɨɨsajaga kʉ kɨhwani kya kyene.
Ɨkɨkanu ɨkyo paninie nʉ nyamalago ʉjwa vakataagwa wʉ vapitsiige vʉʉmi,
mu lisiva lya mwoto ʉmwʉ amaganga ga salufa giviika.
21 Avasikali va veene vakabudwa kʉ nzɨla jya lipanga ɨlyahʉmile mu ndomo gwa mwene ʉvɨɨtogile pa falaasi.
Isidege syoni sikiiguta wʉ silie inyama itso.