Ʉkʉmamulwa kwa vʉtsenge wa Babeli
18
1 Wʉ galʉtɨngʼiinie ago,
ndɨkambona ʉnsuungʼwa ʉjyʉnge ikwika ʉkʉhʉma kʉkyanya,
ʉvɨ aale nʉ vʉtavʉlɨlwa ʉvʉlʉti.
Ɨkɨlʉnga kɨkamulikwa nɨ lilangamuli lya mwene.
2 Akɨɨlanga kʉ limenyu ɨlivaha akata,
“Vʉgue paasi!
Vʉgue paasi lwoni ʉvʉtsenge wa Babeli,
vʉlya ʉvʉvaha!
Lɨno vʉvye vʉtaamo wa mingʉlʉve ni mepo imbiivi,
vʉvye vʉtaamo wa sidege syoni isinyala,
ikange wa sikanu isinyala ikange isisʉʉle.
3 Lola,
isivʉmbʉkʉ syoni sigaalile kʉ divai ɨngʼali jya vʉligu wa vʉtsenge ʉwa.
Na vakʉlʉdeeva va silʉnga isyo valigwipe nave.
Naveene avivomba ʉvʉtsuluusi va mu kɨlʉnga vakavile ʉvʉmosu
ʉkʉhʉma mu kʉhelesyʉka kwa mwene.”
4 Kʉmbele ndɨkapʉlɨka ɨlimenyu ɨlɨnge ʉkʉhʉma kʉkyanya liita,
“Hegi mu vʉtsenge ʉwa ʉnyie nyɨ vaanu vango,
pakʉta muleke ʉkwɨhanza mu mbiivi tsa weene,
nʉ kʉhanzwa najyʉnyie mu vʉvejangi wa weene.
5 Lola,
imbiivi tsa weene mbaha siitso,
ikange tsisiike kʉkyanya.
ɄNgʉlʉve akʉmbʉhiitse imbiivi tsa weene.
6 Muvʉvombele ʉvʉtsenge ʉwa ʉkʉkongana nʉ mwʉ ʉweene vʉkavavombye avaanu avange,
mulʉmbɨle pa kɨgelelo kya kʉlʉmbɨla kavɨlɨ kʉ galya ʉgwʉ vʉkavombile kʉ vaanu avange.
Mu kɨkombe kya weene ɨkyʉ vʉkavahanzɨlɨhiitse,
mwʉ ʉnyie muvʉhanzɨlɨhɨtse kavɨlɨ.
7 Muvʉpelele ʉvʉkʉvɨlwa nʉ kʉvʉlematsa mu numbula ʉkʉhʉmana nʉ kwɨginia kwa weene,
ʉkʉkongana nʉ kʉhelesyʉka kwa weene,
manya vukɨginia mu numbula jya weene wiita,
‘Ʉne nditaama pa kɨnyalwangʉla kyango nʉ kʉlongotsa ndʉ nkʉlʉdeeva ʉnʼdala.
Ʉne nandɨlɨ nswɨle,
ikange nandɨlaave nʉ lʉsʉsʉvalo lʉsiku!’
8 Pa kulongwi itso jʉvupeewa ʉvʉvejangi wa weene kʉ kɨgono kɨpamato.
Jʉvupeewa ʉvʉtamu,
ʉlʉsʉsʉvalo nɨ nzala.
Ikange jʉvuvejangwa nʉ mwoto,
manya ʉNtwa ʉNgʉlʉve,
ʉmwene ʉvɨ ikʉvʉhɨga alɨ na maka.”
9 Avakʉlʉdeeva va silʉnga syoni ʉwʉ valigwipe nʉ kʉhelesyʉka nawo,
valavʉkuutila nʉ kʉlɨla inyihotsi wʉ vikʉlɨvona ɨlyosi lya vʉtsenge ʉwa wʉ vupyɨlɨlɨla.
10 Valɨɨma kʉvʉtale ʉlwakʉva valadwadaga ʉvʉkʉvɨlwa wa weene.
Valalɨlaga valateetsaga,
“Ʉswe vʉvʉle,
ʉswe vʉvʉle ʉve Babeli,
vɨ vʉtsenge ʉvʉvaha ikange ʉvʉnya maka!
Kʉ nsɨkɨ gwa kavalɨlo kapamato vʉvʉle ʉvʉhɨgi waako vʉsiike.”
11 Naveene avatsuluusi va silʉnga syoni valalɨlaga nʉ kwɨlʉmbʉsa,
ʉlwakʉva nakʉli ʉmuunu ʉvaveetsaga ʉvɨ igʉla isiinu sya veene.
12 Kwʉ kʉta nakʉli ʉvɨ igʉla isiinu sya veene isya sahabu,
isya siliva,
isya maganga ga lʉtogo ni nyambo tsa lʉtogoa nɨ misabwa ɨmivalasu ɨminyogotasu nɨ misabwa gya langi jya vʉvengi nɨ halili nɨ misabwa ɨmiduungʼu ni sikongʼolo sya mibɨkɨ ɨginuungʼilila ni sikongʼolo sya sʉga tsa nzʉngwa ni sya mibɨkɨ gya lʉtogo siitso ni sya kyʉma ni shaba ni malumalu.
13 Ikange nakʉli ʉvigʉla ʉnʼdalasiini,
b ihiliki,
isiinu sya kʉnuungʼilitsa,
ɨmanemane,
ʉvʉbani,
ɨdivai,
amafuta ga zeituni,
ʉvʉhevete ʉvʉnonu,
ɨngano,
isenga,
ingʼolo,
ifalaasi,
amageleti na vavanda.
Tsa jɨlweli,
vaagʉtsaaga nava vaanu.
14 Avatsuluusi valateetsaga,
“Ʉvʉkavi wooni ʉwʉ gwanogaga vʉjagile,
ʉvʉmosu ni siinu isikakʉvɨɨkaga ʉvonekage ʉnyogotye sijagile.
Nʉkaweese ʉkʉsivona ikange!”
15 Avatsuluusi avo avaakavaga ʉvʉmosu ʉkʉhʉma mu vʉtsenge ʉwa,
valɨɨma kʉvʉtale ʉlwakʉva valadwadaga ʉvʉkʉvɨlwa wa weene.
Valalɨlaga nʉ kwɨlʉmbʉsa,
16 valatsovaga valateetsaga,
“Ʉswe vʉvʉle!
Ʉswe vʉvʉle vɨ vʉtsenge ʉvʉvaha!
Wɨɨtsooveliitse ʉkʉswala ɨmisabwa ɨminonu ɨmivalasu gya kitani,
nɨ gya langi jya vʉvengi,
nɨ miduungʼu.
Ʉve wɨɨtondovolaga kʉ sahabu
na maganga ga lʉtogo ni nyambo tsa lʉtogo!c
17 Lɨno ʉvʉmosu ʉwa wooni woongomitswe kʉ kavalɨlo kapamato vʉvʉle!”
Ikange avaanu vooni aavalongotsaaga imeeli,
naveene avaagendaniaga navo,
na vooni avaavombaga ɨmbombo mu nyanza,
vakɨɨma kʉvʉtale.
18 Wʉ vikʉlɨvona ɨlyosi lya mwoto ʉgwakobosaaga ʉvʉtsenge,
vakooveela kʉ limenyu ɨlivaha vakata,
“Nakʉgelili ʉkʉvekwo lʉsiku ʉvʉtsenge ʉvʉnge ʉvʉvaha ndʉ vʉtsenge ʉvʉ!”
19 Valɨkwɨtikulila ʉlʉsumbed kʉ mitwe gya veene kʉnʉ vilɨla nʉ kwɨlʉmbʉsa valɨkʉta,
“Ʉswe vʉvʉle!
Ʉswe vʉvʉle vɨ vʉtsenge ʉvʉvaha!
Ʉvʉtsenge ʉwʉ vooni avalɨ ni meeli,
vakavile ʉvʉmosu ʉkʉhʉma mu vʉmosu waako.
Lɨno ʉvʉtsenge wooni vʉpye kʉ nsɨkɨ gwa kavalɨlo kapamato vʉvʉle!
20 Hekelagi ʉnyie nyɨ va kʉkyanya,
kʉ nongwa jya kʉvejangɨka kwa weene.
Hekelagi ʉnyie nyɨ vɨɨdɨki va Ngʉlʉve,
ʉnyie nyɨ vapositili nʉʉnyie nyɨ vanyamalago!
Lola,
ʉNgʉlʉve avʉhɨgile kʉ galya ʉgwʉ waavavombye ʉnyie!”
21 Pwʉ ʉnsuungʼwa mpamato ʉvɨ alɨ na maka akahʉʉsa ɨliganga ɨlɨhwaniine nʉ lwala,
akalahɨɨla mu nyanza.
Akatsova akata,
“Wʉ jɨlaava ewo kwave vɨ vʉtsenge wa Babeli,
ʉlataagwa kʉ maka nʉ kʉjaga lwoni.
22 Ʉkʉkuuta kwa magombu nʉ kwa lwɨmbo,
ʉkʉkuuta kwa siwɨɨwɨ nʉ kwa ngalape,
nakʉlapʉlɨkɨke lʉsiku mu nʼgati mwave ʉmwa.
Nalaavepwo ʉponzi ʉvaveetsaga,
ʉvɨ alavoneka ikange mwave ʉmwa.
Nakwene ʉkʉkuuta kwa lwala nakʉlapʉlɨkɨke lʉsiku mwave.
23 Ʉlʉmuli lwa nyaale nalʉlavoneke ikange kwave.
Ikange ɨlimenyu lya lʉhekelo lwa ntegʉlanʼdala nɨ lya mmɨnza ʉvɨ itegʉlwa,
nalɨlapʉlɨkɨke lʉsiku kwave.
Avatsuluusi vaako vaale vavaha mu kɨlʉnga.
Ikange kʉ nzɨla jya vʉhavi waako isivʉmbʉkʉ syoni syasyovilwe!
24 ɄNgʉlʉve aahʉmiitse ʉlʉvʉngʉ kʉ vʉtsenge ʉwa
ʉlwakʉva ʉmwa gwalemwo ʉnkisa gwa vanyamalago
nʉ gwa vavalatse nʉ gwa vaanu vooni,
ʉwʉ vaabudilwe mu kɨlʉnga.”