Ʉnʼdala ʉndigu ʉndʉti
17
1 Pwʉ mpamato mu valya avasuungʼwa lekelakʉpamato (7) avaale ni bakʉli lekelakʉpamato akannyɨlanga akata,
“Wiitse apa,
ʉne ndikʉkʉvonia ʉkʉvʉngwa ʉkwʉ jiipeewa ʉnʼdala ʉndigu ʉndʉti.
Ʉmwene ʉjwa vɨ vʉtsenge ʉvʉtsengilwe kʉ lʉkanzi lwa magasi amongosu.
2 Avakʉlʉdeeva va mu kɨlʉnga valigwipe nave,
naveene avitaama mu kɨlʉnga vagaalile ɨdivai ɨngʼali.
Ɨdivai ɨjyo wʉ vʉligu wa mwene.”
3 ɄMepo ʉMbalatse akannyitsila.
Pwʉ ʉnsuungʼwa akammɨmba nʉ kʉnnyɨlɨka kʉ lʉkɨnga.
Ʉkʉ ndɨkambona ʉnʼdala ɨtogile pa kɨkanu ɨkɨduungʼu.
Ɨkɨkanu ɨkyo kyavɨgilwe imbasu tsyoni amataawa ga kʉnʼdʉkɨla ʉNgʉlʉve.
Kyale nɨ mitwe lekelakʉpamato ni sʉga kɨtsigo (10).
4 Ʉnʼdala ʉjwa aaswalile ɨmisabwa ɨgya langi jya vʉvengi nɨ miduungʼu.
Ikange akava ɨtondowe ni sahabu,
amaganga ga lʉtogo ni nyambo tsa lʉtogo.
a Mu kɨvoko kya mwene iibiite ɨkɨkombe kya sahabu ɨkyadɨgile imbombo itsilɨ mwiko ni siinu isinyala sya vʉligu wa mwene.
5 Aavɨgilwe pa mbʉmɨla jya mwene,
ɨlitaawa lya kʉvʉtiitu ɨlɨ,
ʉbabeli ʉndʉti,
ʉvanyina va valigu
ni mbombo itsilɨ mwiko itsa mu kɨlʉnga.
6 Ndɨkambona ʉnʼdala ʉjwa agaalile ʉnkisa gwa vavalatse va Ngʉlʉve nʉ nkisa gwa vaanu avooleletsaaga ikulongwi tsa Yɨɨsʉ.
Wʉ ndɨmbwene ndyadegile siitso.
7 Lɨno ʉnsuungʼwa akambʉʉla ʉne akata,
“Ʉladegaga!
Ʉne ndikʉkʉvʉʉla itsa kʉvʉtiitu itsa nʼdala ʉjwa nɨ kɨkanu ɨkyo ɨkɨmpɨmbile ɨkɨlɨ nɨ mitwe lekelakʉpamato ni sʉga kɨtsigo.
8 Ɨkɨkanu ɨkyo ɨkyʉ ʉkɨweene kyale kyʉmi,
lɨno kɨsue.
Kɨlahʉma mu liguli lya kʉ lwongometso,
napeene ʉNgʉlʉve alakɨvejanga.
Tsa jɨlweli,
avaanu vooni ʉwʉ amataawa ga veene nagaavɨgwe mu kɨtabu kya wʉʉmib ʉkʉhʉma ʉpwʉ ʉNgʉlʉve aapelile ɨkɨlʉnga,
valadega.
Valadega wʉ vikʉkɨvona ɨkɨkanu ɨkyo ɨkyʉ pa vʉtengʉlɨlo kyale kyʉmi,
lɨno kɨsue napeene ʉnsɨkɨ ʉgʉliitsa kɨlavoneka ikange!
9 “Lɨno apo pwʉ panogye ʉkʉva nʉ lʉhala!
Ɨmitwe lekelakʉpamato ɨgyo,
syʉ sidugala lekelakʉpamato isyʉ ʉnʼdala ʉjwa itaamila.
Ikange ɨmitwe ɨgyo wʉ vakʉlʉdeeva lekelakʉpamato.
10 Mu vakʉlʉdeeva avo lekelakʉpamato,
vahaano vasue.
Impamato igendelela ʉkʉlongotsa,
ʉjyʉnge ʉjwa akaanale ʉkwitsa.
Alaava itengʉla,
wɨgane wa Ngʉlʉve ave nkʉlʉdeeva kʉ nsɨkɨ nsupi.
11 Ɨkɨkanu ɨkɨduungʼu ɨkyale kyʉmi,
lɨno kɨsue,
vɨ nkʉlʉdeeva va nnaana (8).
Ʉjwa inninie va valya lekelakʉpamato,
ikange namwene alavejangwa nʉ Ngʉlʉve.
12 Isʉga itso kɨtsigo itsʉ ʉtsiweene,
wʉ vakʉlʉdeeva ʉwʉ vapitsiige navatengwili ʉkʉlongotsa.
Lɨno valapeewa ʉvʉtavʉlɨlwa wa kʉlongotsa kʉ nsɨkɨ gwa kavalɨlo kapamato paninie nɨ kɨkanu ɨkyo.
13 Avakʉlʉdeeva avo kɨtsigo vooni vapʉlɨngʼiine ʉkʉvomba ɨkɨɨnu kɨpamato.
Vapʉlɨngʼiine ʉkʉkɨpa ɨkɨkanu ɨkyo amaka nʉ vʉtavʉlɨlwa wa veene wooni.
14 Avo valalwitsaga ɨligoha nʉ Kakolo,
napeene ʉKakolo alavalema ʉlwakʉva ʉmwene vɨ Ntwa va vatwa ikange vɨ Nkʉlʉdeeva va vakʉlʉdeeva.
Ʉmwene alaava paninie na vaanu va mwene ʉwʉ aavɨɨlangile nʉ kʉvahala nʉ kʉvavɨɨka vave vakongi va mwene vahʉʉgʉ.”
15 Ʉnsuungʼwa akambʉʉla ʉne ikange,
akata,
“Amagasi galya ʉgwʉ ʉkagaweene palya ʉpwʉ itaama ʉnʼdala ʉndigu ʉndʉti,
syʉ sipʉga sya vaanu va sivʉmbʉkʉ syoni ni nzovele tsyoni.
16 Isʉga itso kɨtsigo itsʉ ʉkatsiweene nɨ kɨkanu kɨlya,
wʉ vakʉlʉdeeva avalansʉʉla ʉnʼdala ʉndigu ʉjwa.
Valatoola isiinu syoni isyʉ alɨ nasyo nʉ kʉndeka asuuliike.
Valaalya ɨnyama jya mwene nʉ kʉnyianya amasigalɨlo ga mwene mu mwoto.
17 ɄNgʉlʉve jyʉmwene vɨ avapye ɨlisaago lipamato mu numbula tsa veene ʉkʉta vakɨpe ɨkɨkanu ɨkyo amaka ga veene ga kʉlongotsa ʉgwʉ vakaale nago.
Avo valavombaga ndavʉle ʉkʉsikila pa nsɨkɨ gʉlya ʉgwʉ galavombeka amamenyu ʉgwʉ ʉNgʉlʉve aatsovile.
18 Ʉnʼdala ʉlya ʉvɨ ʉkambwene,
wʉ vʉtsenge vʉlya ʉvʉvaha ʉvʉlɨ na maka kʉ vakʉlʉdeeva va mu kɨlʉnga.”