16
1 Ndɨkapʉlɨka ɨlimenyu ɨlivaha ʉkʉhʉma mu Vʉtaamo ʉVʉvalatse wa Ngʉlʉve,
likʉvavʉʉla avasuungʼwa avo lekelakʉpamato (7) liita,
“Bɨhagi,
mukaduude ibakʉli itso lekelakʉpamato tsa lʉviipo lwa Ngʉlʉve mu kɨlʉnga.”
2 Pwʉ ʉnsuungʼwa ʉntatsi akalʉta akaduuda ɨbakʉli jya mwene pakyanya pa kɨlʉnga.
Amavʉlatsi agidwatsa ikange agivava siitso,
gakaviibata vooni avaale nɨ kɨmanyilo kya kɨkanu kɨlya na valya avɨɨsajaga kʉ kɨhwani kya kyene.
3 Pwʉ ʉnsuungʼwa va vɨɨlɨ akaduuda ɨbakʉli jya mwene mu nyanza.
Najyene ɨnyanza jɨkava nkisa gwene ʉngata nkisa gwa muunu ʉvɨ asue.
Pwʉ isipeliwa syoni isyʉmi mu nyanza sikaswa.
4 Pwʉ ʉnsuungʼwa va daatu akaduuda ɨbakʉli jya mwene mu ngasi na mu sidwivudwivu sya magasi,
nasyene sikaandʉka sikava nkisa.
5 Pwʉ ndɨkapʉlɨka ʉnsuungʼwa ʉmwɨmɨɨlɨtsi va magasi iita,
“Gwe vɨ Mbalatse,
vɨ ʉve pwʉle,
ikange vɨ waalepwo!
Ʉve veeve nʼgolosu,
pwʉ lɨno ʉhɨgile aga.
6 Avaanu avo vaaduudile ʉnkisa gwa vavalatse na vanyamalago,
lɨno naveene ʉvapye ʉnkisa vanywe.
Vanogelanie ʉkʉvombelwa ndavʉle!”
7 Pwʉ ndɨkapʉlɨka ɨlimenyu ʉkʉhʉma pa kɨteekelelo liita,
“Tsa jɨlweli,
Vɨ Ntwa vɨ Ngʉlʉve vɨ Nyamaka Gooni!
Ʉvʉhɨgi waako wa vʉgolosu
ikange wa jɨlweli!”
8 Pwʉ ʉnsuungʼwa ʉlya ʉva nni akaduuda ɨbakʉli jya mwene pa litsʉva.
Ɨlitsʉva lɨkapeewa amaka ga kʉvanyianya avaanu kʉ mwoto gwa lyene.
9 Pwʉ avaanu vakanyianywa siitso nʉ lʉtsʉva.
Vakanʼdʉka ʉNgʉlʉve,
ʉmwene ʉvɨ alɨ na maka pa kulongwi tsa vʉvejangi ʉwa.
Vakabeela ʉkʉpela imbiivi tsa veene nʉ kʉnʼginia ʉNgʉlʉve.
10 Pwʉ ʉnsuungʼwa va haano akaduuda ɨbakʉli jya mwene pa kɨnyalwangʉla kya kɨkanu kɨlya.
Ɨngʼiisi jɨkagwa mu lʉdeeva lwa mwene,
avaanu valɨkwɨlʉma indimi tsa veene kʉ nongwa jya lʉvavo lwa veene.
11 Vakanʼdʉka ʉNgʉlʉve va kʉkyanya kʉ nongwa jya lʉvavo lwa veene na mavʉlatsi ga veene.
Napeene,
navaalaate imbombo tsa veene imbiivi.
12 Pwʉ ʉnsuungʼwa va ntanato (6) akaduuda ɨbakʉli jya mwene mu lʉgasi ʉlʉvaha ʉlutambʉlwa Eufulati.
Amagasi ga lwene gakʉʉma,
pakʉta ɨnzɨla jya vakʉlʉdeeva avihʉma Kʉvʉhʉmo wa Litsʉva jɨnotsiwe.
13 Pwʉ ndɨkatsivona imepo imbiivi idatu itsivyʉta mantangʼaniʉla.
Imepo itso tsyahʉmaga mu ndomo gwa nyato jɨlya na mu ndomo gwa kɨkanu kɨlya ɨkɨtatsi na mu ndomo gwa kɨkanu kɨlya ɨkya vɨɨlɨ ɨkyʉ vɨ nyamalago va vʉnuasi.
14 Itso tsʉ mepo tsa mingʉlʉve itsivomba isidego.
Tsʉ tsyene tsilʉta kʉ vakʉlʉdeeva va kɨlʉnga kyoni nʉ kʉvalʉndamania paninie pa kulongwi jya ligoha,
pa kɨgono kɨlya ɨkɨlʉti ɨkyʉ ʉNgʉlʉve ʉNyamaka Gooni alavahɨga avaanu vooni.
15 ɄYɨɨsʉ akatsova akata,
“Pʉlɨhɨtsi!
Ʉne ndikwitsa kʉ nzɨla jya lʉkenyemuko ʉngata ndyasi!
Inʼgatalʉsu ʉmuunu ʉvɨ itaama miiho nʉ kʉswala ɨmisabwa gya mwene pakʉta aleke ʉkʉgenda asuuliike nʉ kʉkotsa isoni.”
16 Pwʉ imepo itso tsikavalʉndamania avakʉlʉdeeva avo ni sipʉga sya vasikali va veene apoonu ʉpwʉ kʉ Kɨebulaniya viita Halimagedoni.a
17 Pwʉ ʉnsuungʼwa va lekelakʉpamato akaduuda ɨbakʉli jya mwene mu vʉtandaatse.
Ɨlimenyu ɨlivaha lɨkapʉlɨkɨka ʉkʉhʉma pa kɨnyalwangʉla kya Lʉdeeva mu Vʉtaamo ʉVʉvalatse wa Ngʉlʉve,
lɨkata,
“Ʉvʉmalɨlo vʉsiike!”
18 Kʉkava ʉlʉmuli lwa nzasi nʉ kwʉjɨɨla nɨ kɨlindima ɨkɨvaha kya kɨlʉnga ɨkyʉ nakɨgelili ʉkʉhʉmɨla lʉsiku ʉkʉhʉma pa vʉtengʉlɨlo ʉpwʉ ʉNgʉlʉve aampelile ʉmuunu.
19 Pwʉ ʉvʉtsenge ʉwa ʉvʉvaha vʉkɨgava imbasu idatu.
Naweene ʉvʉtsenge ʉvʉveetsaga mu sivʉmbʉkʉ sya vaanu syoni vʉkanangɨka.
ɄNgʉlʉve navʉsaamwe ʉvʉtsenge ʉvʉvaha wa Babeli.
Akavʉnywesa ɨkɨkombe kya divai ɨngʼali jya lʉviipo lwa mwene ʉlʉvaha.
20 Isilʉnga isilagasu syoni isilɨ pagati pa nyanza sikajaganika,
nasyene isidugala nasyavoneke ikange.
21 Ɨsula ɨnya maganga amavaha jɨkavatimila avaanu.
Ɨliganga lipamato pamato,
mu maganga ago,
lyale nʉ vʉtsito wa kilo isitsigo sihaano (50).
Pwʉ aveene avaanu vakanʼdʉka ʉNgʉlʉve pa kulongwi tsa vʉnangi wa sula ɨjyo ɨnya maganga.
Tsa jɨlweli,
ʉvʉnangi wa sula ɨjyo ɨnya maganga waale vʉvaha siitso.