Avaanu vikwɨmba ʉlwɨmbo lwa Moose nʉ lwa Kakolo
15
1 Pwʉ ndɨkakɨvona ɨkɨmanyilo ɨkɨnge kʉkyanya,
kɨvaha ikange kya kʉdega.
Ndɨkavavona avasuungʼwa lekelakʉpamato (7) avaale ni sivojeela lekelakʉpamato sya kʉ vʉmalɨlo.
Isivojeela lekelakʉpamato isyo,
wʉ vʉsililo wa ligoga lya Ngʉlʉve.
2 Ndɨkakɨvona ɨkɨɨnu ʉta nyanza jya kyovo,
jɨhanziine nʉ mwoto.
Ndɨkavavona avaanu valya ʉwʉ vaakɨlemile ɨkɨkanu kɨlya nɨ kɨhwani kya kyene nɨ mbalɨlo jya litaawa lya kyene.
a Avaanu avo vɨɨmile kʉ lʉkanzi lwa nyanza jya kyovo kʉnʉ vibiite amagombu ʉgwʉ aavapye ʉNgʉlʉve.
3 Vɨɨmbaga ʉlwɨmbo lwa Moose,
b ʉmbombi va Ngʉlʉve nʉ lwɨmbo lwa Kakolo,
valɨkʉta,
“Ʉve vɨ Ntwa vɨ Ngʉlʉve vɨ Nyamaka Gooni,
vɨ nʼgolosu ikange vɨ mmʉʉgʉ,
imbombo tsyako tsʉ mbaha,
ikange tsa kʉdega siitso!
Ʉve vɨ Nkʉlʉdeeva va kɨlʉnga,
inzɨla tsyako tsa vʉgolosu,
ikange tsa jɨlweli!
4 Ʉve vɨ Ntwa,
avaanu vooni pavanogye ʉkwɨsaja kwave!
Ikange vooni pavanogye ʉkʉkʉginia!
Ʉve vɨ mwene ʉlɨ mbalatse!
Isivʉmbʉkʉ syoni silakwitsila nʉ kwɨsaja kwave,
ʉlwakʉva imbombo tsyako itsa vʉgolosu tsivoneka.”
Ibakʉli lekelakʉpamato tsa lʉviipo lwa Ngʉlʉve
5 Wʉ galʉtɨngʼiinie ago,
ndɨkavʉvona kʉkyanya ʉVʉtaamo ʉVʉvalatsec wa Ngʉlʉve,
ʉwʉ lyʉ liheema lya mwene lya wooleletsi,
lɨdɨndʉliiwe.
6 Pwʉ avasuungʼwa valya lekelakʉpamato ʉwʉ vaale ni sivojeela lekelakʉpamato vakahʉma mu Vʉtaamo ʉVʉvalatse wa Ngʉlʉve.
Avo vaaswalile ɨmisabwa gya kitani ɨgyʉ gyangʼaalaga nɨ mikanda gya sahabu pa sipambaga sya veene.
7 Pwʉ ɨkɨpeliwa kɨpamato mu sipeliwa silya sinni kɨkavapa avasuungʼwa avo lekelakʉpamato ibakʉli lekelakʉpamato tsa sahabu itsʉ tsyadɨgile ʉlʉviipo lwa Ngʉlʉve,
ʉvɨ mwʉmi sikutsooni na sikutsooni.
8 Mu Vʉtaamo ʉVʉvalatse wa Ngʉlʉve mukadɨga ɨlyosi ɨlyʉ lyahʉmiine nʉ wɨɨmɨkiwa na maka ga Ngʉlʉve.
Naavepwo ʉvɨ aaweesiitse ʉkwingila mu Vʉtaamo ʉVʉvalatse wa Ngʉlʉve ʉkʉsikila kʉ vʉmalɨlo wʉ sisilile isivojeela lekelakʉpamato sya vasuungʼwa avo lekelakʉpamato.