ɄKakolo na vaanu va mwene
14
1 Pwʉ ndɨkambona ʉKakolo ɨmile pa kɨdugala kya Sayuni,
a paninie na vaanu avaelufu ʉndeevʉlʉ mpamato isitsigo sinni na vanni (144,000).
Pa mbʉmɨla tsa vaanu avo,
paavɨgilwe ɨlitaawa lya Kakolo nɨ lya Dadaaje.
2 Ndɨkapʉlɨka ɨlimenyu ʉkʉhʉma kʉkyanya,
ʉngata limenyu lya magasi mongosu,
ikange kwakulumaga ʉngata nzasi.
Ɨlimenyu ɨlyo ɨlyʉ ndyapʉliike lyale ʉta kʉkuuta kwa magombu wʉ avaanu vitova.
3 Vɨɨmbaga ʉlwɨmbo ʉlʉpya pavʉlongolo pa kɨnyalwangʉla kya Lʉdeeva na pavʉlongolo pa sipeliwa sinni na pavʉlongolo pa vanzagɨla.
Naavepwo ʉjyʉnge ʉvaaweesiitse ʉkʉmanyila ʉlwɨmbo ʉlwa,
apeene valya avaelufu ʉndeevʉlʉ mpamato isitsigo sinni na vanni ʉwʉ vaagomboliiwe mu kɨlʉnga.
4 Avo wʉ vaanu ʉwʉ navɨlamiitsi lʉsiku mu vʉligu,
b ʉlwakʉva vavalatse.
Ava wʉ vikʉnkonga ʉKakolo ʉkʉveetsaga ʉkwʉ ilʉta.
Ava vaagomboliiwe ʉkʉhʉma mu vaanu,
ikange vavyʉta siinu sya vʉlʉvʉso kwa Ngʉlʉve na kwa Kakolo.
5 Navaavoneke vitsova ʉvʉnuasi lʉsiku,
manya vagolosu.
Avasuungʼwa vadatu vitsova ikulongwi ʉkʉhʉma kwa Ngʉlʉve
6 Ndɨkambona ʉnsuungʼwa ipʉlʉlʉka pagati pa vʉtandaatse.
Aale nɨ Livangɨli lya sikutsooni na sikutsooni.
Alɨkʉlʉmbɨlɨla kʉ vaanu avitaama mu kɨlʉnga,
isivʉmbʉkʉ syoni,
ni nzovele tsyoni ni sikolo syoni.
7 Akatsova kʉ limenyu ɨlivaha akata,
“Mwɨsajage kwa Ngʉlʉve nʉ kʉnʼginia,
ʉlwakʉva ʉnsɨkɨ gwa mwene gwa kʉvahɨga avaanu gʉsiike.
Mwɨsajage kʉ mwene ʉvɨ aapelile kʉkyanya nɨ kɨlʉnga nɨ nyanza ni sidwivudwivu sya magasi.”
8 Ʉnsuungʼwa ʉjyʉnge ʉva vɨɨlɨ akakonga,
akata,
“Vʉgue paasi!
Vʉgue paasi lwoni ʉvʉtsenge wa Babeli,
c vʉlya ʉvʉvaha ʉvʉlʉti!
Ʉvʉtsenge ʉwa vʉvanywesiitse avaanu va sivʉmbʉkʉ syoni ɨdivai ɨngʼali,
ɨdivai ɨjyo wʉ vʉligu wa weene.”
9 Ʉnsuungʼwa ʉjyʉnge ʉva daatu akakonga,
akatsova kʉ limenyu ɨlivaha akata,
“Ʉmuunu ʉvaveetsaga ʉvɨ jiikɨsaja kʉ kɨkanu na kʉ kɨhwani kya kyene,
nʉ kwʉpɨlɨla ɨkɨmanyilo pa mbʉmɨla jya mwene,
evo pa kɨvoko kya mwene,
10 ʉjwa alaanywa ɨdivai ɨngʼali ɨjyʉ lwʉ lʉviipo lwa Ngʉlʉve.
Ɨdivai ɨjyo jɨnotsiiwe kɨtsila kʉhanza na magasi mu kɨkombe kya lʉviipo lwa mwene.
Ʉmwene ʉNgʉlʉve alaviingitsa mu vʉkʉvɨlwa wa mwoto gwa maganga ga salufa agiviika siitso,
pavʉlongolo pa vasuungʼwa avavalatse na pavʉlongolo pa Kakolo.
11 Ɨlyosi lya mwoto ʉgʉlapela ʉvʉkʉvɨlwa lɨlatogaga kʉkyanya sikutsooni na sikutsooni.
Navalagatalʉke pakɨlo pange pamuunyi,
avo vooni avikɨsaja kʉ kɨkanu ɨkyo na kʉ kɨhwani kya kyene nʉ wʉ vakyʉpɨlye ɨkɨmanyilo kya litaawa lya kyene.”
12 Pa kulongwi itso apo pwʉ panogye avavalatse vave vaanu avalɨ nʉ lwɨjʉmɨɨlɨtso,
avaanu ʉwʉ vikonga indagɨlo tsa Ngʉlʉve nʉ kʉmwɨdɨka ʉYɨɨsʉ.
13 Pwʉ ndɨkapʉlɨka ɨlimenyu ʉkʉhʉma kʉkyanya,
lɨkata,
“Vɨga ndee!
Vagatalʉsu avaanu valya ʉwʉ ʉkʉhʉma lɨno viiswa wʉ vikʉmwɨdɨka ʉNtwa.”
Ʉmwene ʉMepo ʉMbalatse iita,
“Tsa jɨlweli!
Valagatalʉka ʉvʉkʉvɨlwa wa veene,
ʉlwakʉva imbombo tsa veene inonu itsʉ vaavombile tsilakʉmbʉkwa.”
Ʉvʉbeni wa siinu sya mu kɨlʉnga
14 Pwʉ kʉmbele ndɨkalɨvona ɨlivɨngo ɨlivalasu.
Pakyanya pa livɨngo ɨlyo paale nʉ muunu ʉvɨ aale ʉta vɨ Mwana va Muunu.
d Aaswalile ʉlʉdingʼulilo lwa sahabu pa ntwe nʉ kwibata ʉmmaage gwa kʉbenela ʉgʉnya wʉʉge mu kɨvoko kya mwene.
15 Ʉnsuungʼwa ʉjyʉnge akahʉma mu Vʉtaamo ʉVʉvalatse wa Ngʉlʉve,
akambʉʉla kʉ limenyu ɨlivaha ʉlya ʉvɨ aataamile mu livɨngo akata,
“Ngʼaningʼaani,
toola ʉmmaage gwako ʉbɨhage ʉkabene,
manya ʉnsɨkɨ gwa mbene gʉsiike,
isiinu sya kʉbena mu kɨlʉngae sidʉlwike.”
16 Pwʉ ʉmwene ʉvaataamile mu livɨngo akiisa ʉmmaage gwa mwene mu kɨlʉnga nʉ kʉkɨbena ɨkɨlʉnga.
17 Ʉnsuungʼwa ʉjyʉnge akahʉma mu Vʉtaamo ʉVʉvalatse wa Ngʉlʉve wa kʉkyanya.
Namwene aale nʉ mmaage gwa kʉbenela ʉgʉnya wʉʉge.
18 Pwʉ ʉnsuungʼwa ʉjyʉnge ʉmwɨmɨɨlɨtsi va mwoto gwa pa kɨteekelelo,
akahʉma pa kɨteekelelo.
Akambʉʉla kʉ limenyu ɨlivaha ʉnsuungʼwa ʉlya ʉvaale nʉ mmaage ʉgʉnya wʉʉge akata,
“Toola ʉmmaage gwako ʉgʉnya wʉʉge,
ʉbene ɨmisogoti gya zabibu,
f manya izabibu mu misogoti ɨgyo tsidʉlwike.”
19 Pwʉ ʉnsuungʼwa ʉjwa akiisa ʉmmaage gwa mwene mu kɨlʉnga,
akakegeta isogoti tsa zabibu itsilɨ mu kɨlʉnga.
Wʉ akegiite,
akatsivɨɨka mu liguli ɨlivaha lya kʉhʉʉtsɨla izabibu.
Ɨliguli ɨlyo lwʉ lʉviipo lwa Ngʉlʉve.gh
20 Vakahʉʉtsa izabibu mu liguli ɨlyo ɨlyale kʉnzi kʉ vʉtsenge.
Pwʉ ʉnkisa gʉkahʉma mu liguli ɨlyo,
gʉkapela ʉnkoka ʉmbaha ʉgwʉ ʉkwika paasi gwale mita mamato nɨ ligavo lipamato mu magavo gavɨlɨ ga mita nʉ vʉtale gwale ikilomita ɨmileevʉlʉ gɨdatu (300).