Ɨkɨkanu ɨkyahʉmile mu nyanza
13
1 Ndɨkakɨvona ɨkɨkanu kihʉma mu nyanza.
Ɨkɨkanu ɨkyo kyale ni sʉga kɨtsigo (10) nɨ mitwe lekelakʉpamato (7).
Ikange mu sʉga tsa kyene kyaswalile indingʼulilo kɨtsigo tsa lʉdeeva ikange pa mitwe gya kyene paale na mataawa ga kʉnʼdʉka ʉNgʉlʉve.
2 Ɨkɨkanu ɨkyo ɨkyʉ ndyakɨweene kyale ʉngata liduuma.
Isilʉnde sya kyene syale ʉngata silʉnde sya dubu,
a ʉndomo gwa kyene gwale ʉta ndomo gwa ngalamu.
Pwʉ ɨnyato jɨkakɨpa ɨkɨkanu ɨkyo amaka ga jyene nɨ kɨtaamilo kya jyene kya vʉtwa nʉ vʉtavʉlɨlwa ʉvʉlʉti.
3 Ndɨkavona ʉntwe gwa kɨkanu ɨkyo mpamato mu gɨlya lekelakʉpamato gʉlɨ nʉ vʉlemale wa kʉswa,
lɨno ʉvʉlemale ʉwa vʉkapona.
Ɨkɨlʉnga kyoni kɨkadega nʉ kʉkonga kʉ kɨkanu ɨkyo.
4 Avaanu vooni vakatengʉla ʉkwɨsaja kʉ nyato ɨjyo ʉlwakʉva jyakɨpye ɨkɨkanu ɨkyo ʉvʉtavʉlɨlwa wa jyene.
Ikange valɨkwɨsaja kʉ kɨkanu ɨkyo,
valɨkʉta,
“Veeni ʉvihwananitswa nɨ kɨkanu ɨkɨ?
Ikange veeni ʉviweesa ʉkʉlwa ɨligoha nɨ kyene?”
5 Ɨkɨkanu ɨkyo kɨkatavʉlɨlwa ʉkʉtsova amamenyu ga kwɨginia nʉ kʉnʼdʉka ʉNgʉlʉve.
Kɨkapeewa ʉvʉtavʉlɨlwa kʉ nsɨkɨ gwa myetsi isitsigo sinni na gɨvɨlɨ (42).
6 Pwʉ kɨkatengʉla ʉkʉnʼdʉka ʉNgʉlʉve,
nʉ kʉdʉkɨla ɨlitaawa lya mwene nʉ vʉtaamo wa mwene na vange vooni avitaama kʉkyanya.
7 Ikange kɨkatavʉlɨlwa ʉkʉlwa na vavalatse nʉ kʉvalema.
Kɨkapeewa ʉvʉtavʉlɨlwa kʉ sivʉmbʉkʉ syoni na kʉ sikolo syoni na kʉ nzovele tsyoni na kʉ silʉnga syoni.
8 Pa nsɨkɨ ʉgʉliitsa avaanu vooni avitaama mu kɨlʉnga valɨsajaga kʉ kyene.
Avo wʉ valya vooni ʉwʉ ʉkʉhʉma pa vʉtengʉlɨlo wa kɨlʉnga,
amataawa ga veene nagaavɨgwe mu kɨtabu kya wʉʉmi kya Kakolo,
ʉlya ʉvɨ aahɨnzilwe.
9 Ʉvɨ ipʉlɨka,
vɨ apʉlɨkage.
10 Ɨngave ʉmuunu avɨɨkɨliilwe ʉkʉgalʉlwa,
ʉjwa alagalʉlwa.
Ʉmuunu ʉvavɨɨkɨliilwe ʉkʉbudwa kʉ nzɨla jya lipanga,
ʉjwa alabudwa kʉ nzɨla jya lipanga.
Apo pwʉ panogye avɨɨdɨki va Ngʉlʉve vave nʉ lwɨjʉmɨɨlɨtso nʉ lwɨdɨko.
Ɨkɨkanu ɨkyahʉmile mu kɨlʉnga
11 Ndɨkakɨvona ɨkɨkanu ɨkɨnge kitoga pakyanya,
ʉkʉhʉma paasi pa mmanga.
Ɨkyo kyale nʉ tʉsʉga tʉvɨlɨ ʉngata twa kyana kya ngʼolo,
lɨno kɨlɨkʉtsova ʉngata nyato.
12 Kɨlɨkʉvʉvombela ʉvʉtavʉlɨlwa wooni wa kɨkanu kɨlya ɨkɨtatsi pa vʉtuuni wa kyene.
Pwʉ kɨkakyʉmɨɨlɨtsa ɨkɨlʉnga na vooni avitaama ʉmwa ʉkʉta vɨsajage kʉ kɨkanu ɨkɨtatsi,
ɨkyʉ ʉvʉlemale wa kyene wa kʉkɨbuda waaponile.
13 Kɨkavomba isidego isivaha,
nʉ kwisa ʉmwoto ʉkʉhʉma kʉkyanya ʉkwitsa mu kɨlʉnga pamiiho ga vaanu.
14 Kɨlɨkʉvasyova valya avitaama mu kɨlʉnga kʉ sidego silya isyʉ kyapeevilwe ʉkʉsivomba pavʉlongolo pa kɨkanu ɨkɨtatsi.
Kɨkalagɨla ʉkʉta vakɨnotsehetse ɨkɨhwani kya kɨkanu ɨkyo,
kɨlya ɨkyale nʉ vʉlemale wa lipanga lɨno kɨkava kyʉmi.
15 Ɨkɨkanu kya vɨɨlɨ kɨkapeewa ʉvʉtavʉlɨlwa wa kʉpuulila ʉmwʉja mu kɨhwani kɨlya ɨkya kɨkanu ɨkɨtatsi,
pakʉta ɨkɨhwani ɨkyo kɨweese ʉkʉtsova.
Ikange ɨkɨhwani ɨkyo kɨbudage vooni ʉwʉ navikɨsaja kʉ kyene.
16 Nakyene ɨkɨkanu kya vɨɨlɨ kɨlɨkʉvʉʉmɨɨlɨtsa vooni,
avɨɨmɨkiwa na vaanu avibedwa,
avamosu na vagatsu,
avavanda na vatava vavanda,
ʉkʉta vavɨɨkwe ɨkɨmanyilo pa sivoko sya veene sya kʉndyo evo pa mbʉmɨla.
17 Ikange kɨkalagɨla ʉkʉta ʉmuunu ʉvaveetsaga alemwagwe ʉkʉgʉla nʉ kʉgʉtsa,
kwene ɨngave alɨ nɨ kɨmanyilo ɨkyo.
Ɨkɨmanyilo ɨkyo lyale litaawa lya kɨkanu kɨlya ɨkɨtatsi,
evo ɨmbalɨlo jya sopelo tsa litaawa lya kyene.b
18 Apo pwʉ pannogye ʉmuunu ave nʉ lʉhala.
Ʉvaveetsaga ʉvɨ alɨ nʉ lʉhala,
avalage ɨmbalɨlo jya kɨkanu ɨkyo,
ʉlwakʉva mbalɨlo jya muunu.
c Ɨmbalɨlo jya kyene jwɨjɨ,
ɨmileevʉlʉ ntanato isitsigo ntanato na ntanato (666).