Ʉnʼdala nɨ nyato
12
1 Kʉmbele kɨkavoneka ɨkɨmanyilo ɨkɨvaha kʉkyanya.
Aalepwo ʉnʼdala ʉvɨ aaswalile ɨlitsʉva,
ʉmwetsi gwale pa silʉnde sya mwene,
ikange kʉ ntwe gwa mwene aaswalile ʉlʉdingʼulilo lwa vʉlongotsi ʉlʉnya nondwe kɨtsigo nɨ vɨlɨ (12).
2 Ʉnʼdala ʉjwa aale nʉ vʉtsito,
akalɨla ʉlwakʉva aavawaagwa ʉlʉvavo lwa kʉhola ʉmwana.
3 Ikange kɨkavoneka ɨkɨmanyilo ɨkɨnge kʉkyanya.
Jɨkavepwo ɨnyato ɨmbaha ɨnduungʼu.
Ɨnyato ɨjyo jyale nɨ mitwe lekelakʉpamato (7) ni sʉga kɨtsigo,
ʉntwe nʉ ntwe gwale nʉ lʉdingʼulilo.
4 Ʉnkɨla gwa jyene gwakwegaga ɨligavo lipamato mu magavo gadatu ga nondwe tsa kʉkyanya nʉ kʉtsigwisa mu kɨlʉnga.
Ɨnyato ɨjyo jɨkɨɨma pavʉlongolo pa nʼdala ʉjwa ʉvɨ inogwa ʉkʉhola ʉmwana,
pakʉta angahole,
jɨlye ʉmwana va mwene.
5 Pwʉ ʉnʼdala ʉjwa akahola ʉmwana ʉnʼdɨɨmi,
ʉvɨ alalongotsaaga avaanu va sivʉmbʉkʉ syoni kʉ nsaga gwa kyʉma.
Ʉmwana va mwene akatoolwa ʉkʉbɨha kwa Ngʉlʉve,
pa kɨnyalwangʉla kya mwene kya Lʉdeeva.
6 Ʉnʼdala ʉjwa akanyilila kʉ lʉkɨnga ʉkwʉ ʉNgʉlʉve annotsehiitse,
ʉkʉta andoleelage ʉkwa kʉ nsɨkɨ gwa sigono ɨelufu mamato ɨmileevʉlʉ gɨvɨlɨ ni sitsigo ntanato (1,260).
7 Pwʉ kʉkava nɨ ligoha ʉkʉ kʉkyanya.
ɄMikaɨlia na vasuungʼwa va mwene vakalwa nɨ nyato ɨjyo,
najyene jɨkalwa na veene paninie na vasuungʼwa va jyene.
8 Lɨno ɨnyato ɨjyo na vasuungʼwa va jyene vakalemwa,
ikange pa vʉtaamo wa veene napavoneke kʉkyanya.
9 ɄMikaɨli na vasuungʼwa va mwene vakajɨtaaga mu kɨlʉnga ɨnyato ɨjyo paninie na vasuungʼwa va jyene.
Ɨnyato ɨjyo jyʉ nyandalwe jya katale,
ɨjyʉ vɨ ntavangwa ikange Setano,
ʉvɨ ikʉkɨsyova ɨkɨlʉnga kyoni.
10 Pwʉ ndɨkapʉlɨka ɨlimenyu ɨlivaha ʉkʉhʉma kʉkyanya liita,
“Lɨno,
ʉNgʉlʉve viitu avapokile avaanu va mwene!
Lɨno avoniitse amaka ga mwene nʉ kʉlongotsa ndʉ nkʉlʉdeeva!
Ikange ʉKɨlɨsiti va mwene avoniitse ʉvʉtavʉlɨlwa wa mwene!
Lola,
ʉMikaɨli na vasuungʼwa va mwene
vantaagile paasi ʉmbʉʉlɨlɨtsi va vɨɨdɨkivajiitu.
Ʉmwene ʉvɨ ikʉvavʉʉlɨla kwa Ngʉlʉve viitu,
pakɨlo na pamuunyi.
11 Naveene vakandema kʉ nzɨla jya nkisa gwa Kakolo,
na kʉ nzɨla jya limenyu ɨlyʉ voolelaga.
Avo navaavɨɨkɨlage ʉntɨma ʉwʉʉmi wa veene,
ikange navaadwadage ʉkʉswa.
12 Lɨno pwʉ hekelagi,
ʉnyie nyɨ va kʉkyanya,
na nyɨ mutaama ʉmwa!
Lɨno,
ʉswe vʉvʉle vɨ kɨlʉnga nɨ nyanza!
Lola,
ʉSetano ikile kwanyie nʉ lʉviipo ʉlʉvaha siitso,
alʉmanyile ʉkʉta alɨ nʉ nsɨkɨ nsupi vʉvʉle.”
13 Wʉ ɨnyato ɨjyo jɨweene ʉkʉta vajɨtaagile mu kɨlʉnga,
jɨkagilivinda kʉ nʼdala ʉvɨ aammolile ʉmwana ʉnʼdɨɨmi.
14 Napeene,
ʉnʼdala ʉjwa akapeewa amapapatɨlo gavɨlɨ ga ngasimula ɨmbaha,
pakʉta apululuke,
alʉte kʉ lʉkɨnga ʉkwʉ ʉNgʉlʉve annotsehiitse.
Apo jiiloleelwagwa kʉ myaka gɨdatu nɨ ligavo lipamato mu magavo gavɨlɨ ga mwaka,
kʉvʉtale nɨ nyato ɨjyo.
15 Ɨnyato jɨkadwivusa amagasi mongosu ʉngata lʉgasi lʉvaha ʉkʉhʉma mu ndomo gwa jyene,
kʉnsana kʉ nʼdala ʉjwa,
pakʉta ʉlʉgasi ʉlwa lʉnʼdwivilitse.
16 Lɨno ɨkɨlʉnga kɨkantanga ʉnʼdala.
Kɨkabungula ʉndomo gwa kyene,
kɨkamila ʉlʉgasi ʉlwa ʉlwahʉmile mu ndomo gwa nyato ɨjyo.
17 Pwʉ ɨnyato jɨkambiipila siitso ʉnʼdala ʉjwa,
jɨkahega nʉ kʉbɨha kwilwa ɨligoha na vaana ʉwʉ vaasigye ava nʼdala ʉjwa.
Avaana avo wʉ valya avikʉtsiibata indagɨlo tsa Ngʉlʉve nʉ kʉhʉmya ʉwooleletsi wa Yɨɨsʉ Kɨlɨsiti.
18 Pwʉ ɨjyene ɨnyato jɨkɨɨma mu nsekelewe gwa nyanza.