Avooleletsi vavɨlɨ
11
1 Ʉnsuungʼwa akaama ɨlilanzi ɨlyale ʉta nsaga gwa sahabu gwa kʉgelela ʉvʉtale.
Pwʉ ndɨkavʉʉlwa,
“Ʉbɨhage ʉkagele ʉvʉvaha wa Vʉtaamo ʉVʉvalatse wa Ngʉlʉve nɨ kɨteekelelo kya weene,
ʉkavale nɨ mbalɨlo jya vaanu avikɨsaja ʉmwa.
2 Napeene,
ʉleke ʉkʉgela ʉvʉvaha wa Lʉvanza lwa Vanyapanzia ʉlʉlɨ kʉnzi kʉ Vʉtaamo ʉVʉvalatse wa Ngʉlʉve,
ʉlwakʉva ʉlwene ʉlwa vapeevilwe avaanu avatava Vayahudi.
Naveene valavʉkadaga ʉvʉtsenge ʉvʉvalatse ɨmyetsi isitsigo sinni na gɨvɨlɨ (42).
3 Nʉʉne ndɨlavapa ʉvʉtavʉlɨlwa avooleletsi vango vavɨlɨ ʉwʉ aveene valapʉlɨsaaga ɨlimenyu lya Ngʉlʉve isigono ɨelufu mamato ɨmileevʉlʉ gɨvɨlɨ ni sitsigo ntanato (1,260).
Valaswala ɨmisabwa gya magunila pa kʉvonia ʉlʉsʉsʉvalo.”
4 Avooleletsi avo gyʉ mibɨkɨ gya mizeituni gɨvɨlɨ ni sidʉlɨkɨlo sivɨlɨ sya nyaale isilɨ pavʉlongolo pa Ngʉlʉve,
ʉNtwa va kɨlʉnga.b
5 Ɨngave ʉmuunu ʉvaveetsaga inogwa ʉkʉvalematsa avo,
ʉmwoto guhʉmaga mu milomo gya veene nʉ kʉvavejanga avalʉgʉ va veene.
Wʉ jɨlaava ewo kʉ muunu ʉvaveetsaga ʉvɨ alanogwa ʉkʉvalematsa,
alaaswa.
6 Ava valɨ nawo ʉvʉtavʉlɨlwa wa kʉsiga ɨsula jɨleke ʉkʉtima mu sigono syoni isyʉ aveene vitsova amalago.
Ikange valɨ nawo ʉvʉtavʉlɨlwa wa kʉhambʉla amagasi gooni gave nkisa nʉ kʉpela isivojeela isilɨ pongosu mu kɨlʉnga ʉkʉkongana ndʉwʉ vinogwa.
7 Wʉ vamalile ʉkʉtsova ʉwooleletsi wa veene,
ɨkɨkanu ɨkyʉ kɨlahʉma mu liguli lya kʉ lwongometso kɨlalwitsaga navo.
Ɨkyo kɨlavalema nʉ kʉvabuda.
8 Ɨmisimba gya veene gɨlaava mu nzɨla ɨmbaha jya vʉtsenge ʉvʉvaha ʉwʉ kʉ sumbo vutambʉlwa Sodoma nɨ Misili.
Apo pwʉ peene vaantovelye pa kɨdamingʼanie ʉNtwa va veene ʉYɨɨsʉ Kɨlɨsiti.
9 Avaanu va sikolo syoni na va sivʉmbʉkʉ syoni na va nzovele tsyoni na va silʉnga syoni,
valagɨvona ɨmisimba gya veene kʉ sigono sidatu nɨ ligavo lipamato mu magavo gavɨlɨ ga kɨgono,
ikange navalɨɨdɨkɨle ʉkʉgɨsɨɨla mu vʉguli.
10 Avaanu vooni avitaama mu kɨlʉnga valahovoka nʉ kʉluluutila nʉ kwokelanila pa kulongwi jya vʉswe wa vooleletsi avo vavɨlɨ.
Valavombaga ewo,
ʉlwakʉva avanyamalago avo vaavapeetsaga ʉvʉkʉvɨlwa avaanu avo avitaama mu kɨlʉnga ʉmʉ.
11 Lɨno ʉnsɨkɨ gwa sigono sidatu nɨ ligavo lipamato mu magavo gavɨlɨ ga kɨgono wʉ gʉlʉtɨngʼiinie,
ʉmwʉja gwa wʉʉmi ʉgwahʉmile kwa Ngʉlʉve gʉkaviingila,
pwʉ aveene vakɨɨma.
Avaanu vakadwada siitso wʉ vaweene vatsʉʉkile.
12 Pwʉ avanyamalago vavɨlɨ avo vakapʉlɨka ɨlimenyu ɨlivaha ʉkʉhʉma kʉkyanya likʉvavʉʉla liita,
“Mutoge kʉnʉ!”
Pwʉ aveene vakatoga kʉkyanya mu livɨngo wʉ avalʉgʉ va veene vikʉvalola.
13 Pa nsɨkɨ ʉgwa kʉkava ɨkɨlindima ɨkɨvaha,
ʉlʉvasu lʉpamato mu magavo kɨtsigo (10) ga vʉtsenge lʉkamamuka.
Avaanu avaelufu lekelakʉpamato (7,000) vakaswa kʉ kɨlindima ɨkyo.
Avaanu avaasigye vakadwada siitso,
vakamwɨmɨka ʉNgʉlʉve va kʉkyanya.
14 Ʉvʉvejangi wa vɨɨlɨ vʉlʉtɨngʼiinie,
ʉvʉvejangi wa daatu vʉlɨ piipi ʉkwitsa.
Ʉnsuungʼwa va lekelakʉpamato itova ɨngalape jya mwene
15 Pwʉ ʉnsuungʼwa va lekelakʉpamato (7) akatova ɨngalape jya mwene.
Ndɨkapʉlɨka ʉlwoveelo kʉkyanya,
lwita,
“ɄLʉdeeva lwa mu kɨlʉnga
lʉvye Lʉdeeva lwa Ntwa ʉNgʉlʉve viitu
paninie nʉ Kɨlɨsiti va mwene,
ʉmwene ʉNtwa alaava Nkʉlʉdeeva sikutsooni na sikutsooni.”
16 Naveene avanzagɨla isitsigo sivɨlɨ na vanni (24) ʉwʉ vitaama mu sitaamilo sya veene sya vʉtwa pavʉlongolo pa Ngʉlʉve,
vakɨgwisa kɨvʉgudamo,
vakɨsaja kʉ mwene ʉNgʉlʉve,
17 vakata,
“Tukʉkʉsaana ʉve,
vɨ Ntwa vɨ Ngʉlʉve vɨ Nyamaka Gooni,
vɨ ʉlɨpwo ikange vɨ waalepwo,
manya ʉvoniitse amaka gaako amalʉti,
nʉ kʉtengʉla ʉkʉlongotsa.
18 Avaanu avanyapanzi vaale nʉ lʉviipo,
lɨno pwʉ gʉsiike ʉnsɨkɨ gwa lʉviipo lwako.
Ʉnsɨkɨ gʉsiike ʉgwa kʉvahɨga avaswe,
nʉ gwa kʉvookela avavombi vaako avanyamalago,
avavalatse na valya avikʉlyɨmɨka ɨlitaawa lyako,
avɨɨmɨkiwa na vaanu avibedwa.
Ikange ʉnsɨkɨ gʉsiike ʉgwa kʉvavejanga avo ʉwʉ vivejanga ɨkɨlʉnga.”
19 Pwʉ ʉVʉtaamo ʉVʉvalatse wa Ngʉlʉve ʉvʉlɨ kʉkyanya vʉkadɨndʉka.
Ɨlisandʉka lya Lwɨdɨngʼanoc lya Ngʉlʉve lɨkavoneka mu Vʉtaamo ʉVʉvalatse wa Ngʉlʉve ʉwa.
Kʉkahʉmɨla ʉlʉmuli lwa nzasi,
ʉlwʉjɨɨlo,
ɨkɨlindima nɨ sula ɨmbaha jya maganga.