Ʉlʉgasi lwa magasi ga wʉʉmi
22
1 Pwʉ ʉnsuungʼwa akambonia ʉne ʉlʉgasi ʉlʉnya magasi agikʉvapa avaanu ʉwʉʉmi ʉgwʉ gaale mavalasu ʉngata kyovo.
Ago gaahʉmaga pa kɨnyalwangʉla kya Lʉdeeva kya Ngʉlʉve nʉ Kakolo.
2 Ʉlʉgasi ʉlwa lʉlɨkwika ʉkʉgendela pa nsevo ʉmbaha gwa vʉtsenge.
Mu mbasu tsyoni tsa lʉgasi ʉlwa gyalepwo ɨmibɨkɨ ɨgikʉvapa avaanu ʉwʉʉmi.
Ɨgyo gihʉʉpa iseke gidumingʼania ɨmyetsi gyoni kɨtsigo na gɨvɨlɨ (12) mu mwaka.
Amaani ga gyene inʼgoda gwa kʉponia avaanu va sivʉmbʉkʉ syoni.
3 Nakɨlaavemwo mu vʉtsenge ʉwa ɨkɨɨnu ɨkɨveetsaga ɨkɨkootoliiwe nʉ Ngʉlʉve.
Ɨkɨnyalwangʉla kya Lʉdeeva kya Ngʉlʉve nɨ kya Kakolo kɨlaavemwo mu vʉtsenge ʉwa.
Avavombi va mwene valɨsajaga kʉ mwene.
4 Valalola kʉmiiho kʉ mwene,
nɨ litaawa lya mwene lɨlavɨgwa pa mbʉmɨla tsa veene.
5 Ɨkɨlo najɨlaavepwo ikange,
navalalondage ʉkʉva nʉ lʉmuli lwa nyaale pange lwa litsʉva,
manya ʉNtwa ʉNgʉlʉve alavamulikilaga,
naveene valalongotsaaga sikutsooni na sikutsooni.
6 Ʉnsuungʼwa akambʉʉla akata,
“Amamenyu aga mahʉʉvɨlwa ikange ga jɨlweli ikange ga kwɨdɨkiwa.
ɄNtwa ʉNgʉlʉve ʉvɨ ikʉvapa avanyamalago ʉMepo ʉMbalatse va mwene,
ansuungʼile ʉnsuungʼwa va mwene avavonie avavombi va mwene ʉgwʉ wɨgane wa Ngʉlʉve giitse gahʉmɨle kɨtsila kʉkeeletsa.”
Ʉkʉkilivuka kwa Yɨɨsʉ Kɨlɨsiti
7 ɄYɨɨsʉ iita,
“Pʉlɨhɨtsi!
Ndikwitsa ngʼaningʼaani.
Inʼgatalʉsu ʉlya ʉvɨ ikʉgiibata amamenyu ga malago ʉgwʉ galɨ mu kɨtabu ɨkɨ.”
8 Ʉne ndɨ Yohana,
ndyatsiweene nʉ kʉtsipʉlɨka itsi tsyoni.
Wʉ ndɨpʉliike nʉ kʉtsivona ndɨkagwa kɨvʉgudamo paasi pa silʉnde sya nsuungʼwa ʉjwa ʉvɨ aamboniaga aga pakʉta ndyɨsaje kʉ mwene.
9 Lɨno ʉmwene akambʉʉla akata,
“Ɨlekelwe ʉkʉvomba ewo!
Ʉne ndɨlɨ mbombi vʉvʉle ndʉʉve na vɨɨdɨkivanino ʉwʉ vanyamalago na vooni ʉwʉ vikʉgiibata amamenyu agalɨ mu kɨtabu ɨkɨ.
Wɨsajage kwa Ngʉlʉve!”
10 Ikange akata,
“Ʉleke ʉkʉsiha kʉvʉtiitu amamenyu ga malago ʉgwʉ galɨ mu kɨtabu ɨkɨ,
ʉlwakʉva ʉnsɨkɨ gwa kʉvombeka ago gʉhegelye.
11 Pwʉ ʉvɨ ivomba imbiivi agendelelage ʉkʉvomba imbiivi,
ʉvɨ indami agendelelage ʉkʉva indami.
Ʉvɨ ivomba itsa vʉgolosu agendelelage ʉkʉvomba itsa vʉgolosu,
ikange ʉvɨ imbalatse agendelelage ʉkʉva mbalatse.”
12 ɄYɨɨsʉ iita,
“Pʉlɨhɨtsi!
Ndikwitsa ngʼaningʼaani paninie nʉ lʉhombo ʉlwʉ ndɨlavahomba vooni ʉkʉkongana nʉ lʉgendo lwa veene.
13 Ʉne neene Alufa ikange neene Omega,
Vʉtengʉlɨlo nʉ Vʉmalɨlo.”
14 Vagatalʉsu avo aviisuka ɨmisabwa gya veene,
pakʉta vave nʉ vʉtavʉlɨlwa wa kʉlya iseke tsa mʼbɨkɨ ʉgukʉvapa avaanu ʉwʉʉmi,
nʉ kwɨdɨkiwa ʉkwingila mu vʉtsenge ʉkʉgendela mu milyango gya weene.
15 Napeene,
imbwa,
avahavi,
avaligu,
avabudi,
avikɨsaja kʉ mingʉlʉve na vooni avinogwa ʉkʉtsova ʉvʉnuasi,
valataama kʉnzi kʉ vʉtsenge.
16 “Ʉne ndɨ Yɨɨsʉ,
ndɨnsuungʼile ʉnsuungʼwa vango kukwoleletsa ikulongwi itsi kʉ mipelela.
Ʉne neene indela,
ikange neene va lʉjungu lwa nkʉlʉdeeva ʉDavʉdi.
Ʉne neene litondwe lɨlya ɨlimulika siitso pavʉsiku.”
17 ɄMepo ʉMbalatse nʉ mwene ʉvɨ itegʉlwa viita,
“Wiitsage!”
Pwʉ namwene ʉvaveetsaga ʉvɨ ipʉlɨka amamenyu aga ateetsage,
“Wiitsage!”
Namwene ʉvɨ alɨ nɨ kyʉmɨlwa iitse,
ʉvɨ inogwa amagasi agikʉvapa avaanu ʉwʉʉmi,
iitse ʉʉpɨlɨle kɨtsila kʉhombela.
Amamenyu ga kʉmalɨla
18 Ndikʉvapavɨla avaanu vooni avipʉlɨka amamenyu ga malago agalɨ mu kɨtabu ɨkɨ ʉkʉta:
Ɨngave ʉmuunu ʉvaveetsaga ikwongeletsa ɨkɨɨnu ɨkɨveetsaga mu mamenyu aga,
ʉNgʉlʉve namwene alamwongeletsa ʉlʉvʉngʉ ʉlʉvɨgilwe mu kɨtabu ɨkɨ.
19 Ikange ʉmuunu ʉvaveetsaga angahetse ɨkɨɨnu ɨkɨveetsaga mu malago agalɨ mu kɨtabu ɨkɨ,
ʉNgʉlʉve namwene alahetsa ʉvʉtaamo wa mwene mu vʉtsenge ʉvʉvalatse.
Ikange ʉmuunu ʉjwa nalaalye iseke tsa mʼbɨkɨ gʉlya ʉgukʉvapa avaanu ʉwʉʉmi.
Ikulongwi tsa vʉtsenge ʉwa nʉ mʼbɨkɨ ʉgwa tsivɨgilwe mu kɨtabu ɨkɨ.
20 Ʉvɨ ikwoleletsa amamenyu aga iita,
“Jɨlweli ndikwitsa ngʼaningʼaani.”
Ameni.
Wiitsage vɨ Ntwa vɨ Yɨɨsʉ!
21 Ʉlʉhʉngʉ lwa Ntwa ʉYɨɨsʉ,
lʉveetsage nʉʉnyie nyɨ vooni.