ɄKakolo imamaalʉla ɨkɨkolekelo kya lekelakʉpamato
8
1 ɄKakolo akamamaalʉla ɨkɨkolekelo kya lekelakʉpamato (7).
Pwʉ kʉkava mye kʉkyanya kʉ nsɨkɨ ʉngata gwa ligavo lipamato mu magavo gavɨlɨ ga kavalɨlo.
2 Ndɨkavavona avasuungʼwa lekelakʉpamato ʉwʉ vikwɨma pavʉlongolo pa Ngʉlʉve.
Avasuungʼwa avo vakapeewa ingalape lekelakʉpamato.
3 Pwʉ ʉnsuungʼwa ʉjyʉnge akiitsa akɨɨma pavʉlongolo pa kɨteekelelo,
akava ibiite mu kɨvoko ɨbakʉli jya sahabu jya kʉvombela ʉlʉtuungʼilitso.
Akapeewa isya kʉtuungʼilitsa syongosu pakʉta ahʉmye paninie ni nyɨsajo tsa vavalatse vooni pa kɨteekelelo kya sahabu ɨkɨlɨ pavʉlongolo pa kɨnyalwangʉla kya Lʉdeeva.
4 Ɨlyosi lya siinu sya kʉtuungʼilitsa lɨkatuungʼa pavʉlongolo pa Ngʉlʉve paninie ni nyɨsajo tsa vavalatse ʉkʉhʉma mu kɨvoko kya nsuungʼwa.
5 Pwʉ ʉnsuungʼwa ʉjwa akatoola ɨbakʉli ɨjyo,
akadɨtsa ʉmwoto gwa pa kɨteekelelo,
akalahɨɨla mu kɨlʉnga.
Kʉkahʉmɨla ɨnzasi,
ʉlwʉjɨɨlo nɨ kɨlindima kya kɨlʉnga.
6 Pwʉ avasuungʼwa avo lekelakʉpamato avaale ni ngalape lekelakʉpamato vakɨsaavʉla pakʉta vatsitove.
Avasuungʼwa vanni vitova ingalape tsa veene
7 Ʉnsuungʼwa ʉntatsi akatova ɨngalape jya mwene.
Pwʉ ɨsula jya maganga nʉ mwoto isihanzɨlɨngʼiine nʉ nkisa,
sikataagwa mu kɨlʉnga.
Pwʉ ɨligavo lipamato mu magavo gadatu ga kɨlʉnga lɨkapya lɨkakoboka.
Ɨligavo lipamato mu magavo gadatu ga mibɨkɨ nʉ lʉhamba lʉkapya lʉkakoboka.
8 Ʉnsuungʼwa va vɨɨlɨ namwene akatova ɨngalape jya mwene.
Pwʉ ɨkɨɨnu ɨkɨvyʉta kɨdugala ɨkɨvaha ɨkiviika ʉmwoto,
kɨkataagwa mu nyanza.
Pwʉ ɨligavo lipamato mu magavo gadatu ga nyanza lɨkava nkisa.
9 Sikaswa ɨligavo lipamato mu magavo gadatu ga sipeliwa isyʉmi isilɨ mu nyanza.
Ikange ɨligavo lipamato mu magavo gadatu ga meeli tsa mu nyanza lɨkanangɨka.
10 Pwʉ ʉnsuungʼwa va daatu akatova ɨngalape jya mwene.
Lola,
ʉlʉtondwe ʉlʉvaha ʉlwamulikaga siitso ʉngata livʉngʉʉtɨla lya mwoto lʉkagwa ʉkʉhʉma kʉkyanya.
Lʉkagwa pa ligavo lipamato mu magavo gadatu ga ngasi,
na mu ligavo lipamato mu magavo gadatu ga sidwivudwivu sya magasi.
11 Ɨlitaawa lya lʉtondwe ʉlwa,
vaateetsaga,
“Vʉkali.”
Pwʉ ɨligavo lipamato mu magavo gadatu ga magasi lɨkaandʉka lɨkava ndʉ vʉkali wa likelaakela.
Avaanu vongosu vakaswa wʉ vanyue amagasi ago,
ʉlwakʉva gaandwike gakava makali siitso.
12 Namwene ʉnsuungʼwa va nni akatova ɨngalape jya mwene.
Baaho ɨligavo lipamato mu magavo gadatu ga litsʉva nɨ ligavo lipamato mu magavo gadatu ga mwetsi nɨ ligavo lipamato mu magavo gadatu ga nondwe sikavejangwa,
gakava ngʼiisi.
Pwʉ ɨmuunyi jɨkajatsa ʉlʉmuli ɨligavo lipamato mu magavo gadatu,
najyene ɨkɨlo vʉle vʉle.
13 Ndɨkalola kʉkyanya,
ndɨkapʉlɨka ɨlimenyu lya ngasimula mamato ɨjyagʉlʉkaga pagati pa vʉtandaatse.
Jɨkooveela jɨkata,
“Vasue vʉvʉle!
Vasue vʉvʉle!
Vasue vʉvʉle avaanu avitaama mu kɨlʉnga pa tsilya itsilɨ pa kʉhʉmɨla kʉ veene wʉ avasuungʼwa avange avo vadatu vitova ingalape tsa veene.”