Ʉnsuungʼwa ʉva haano itova ɨngalape jya mwene
9
1 Namwene ʉnsuungʼwa ʉva haano akatova ɨngalape jya mwene.
Pwʉ ndɨkalʉvona ʉlʉtondwe ʉlwahʉmile kʉkyanya lwigwa pa kɨlʉnga.
Ʉlʉtondwe ʉlwa lʉkapeewa ɨsungulu jya liguli lya kʉ lwongometso.
2 Lʉkadɨndʉla ɨliguli lya kʉ lwongometso.
Pwʉ ɨlyosi lɨkatuungʼa ʉkʉhʉma mu liguli ɨlyo,
lɨkava ʉngata lyosi lya litanuli ɨlivaha.
Pwʉ ɨlitsʉva nʉ vʉtandaatse sikagubikwa nɨ lyosi ɨlyo,
kʉkava ngʼiisi.
3 Ɨkɨvale kɨkahʉmɨla mu lyosi ɨlyo,
nʉ kʉhamba mu kɨlʉnga.
Kyapeevilwe amaka nda galya aga singomilevʉli.
4 Ikange kɨkapeewa ʉlʉlagɨlo ʉkʉta kɨleke ʉkʉvejanga ʉlʉhamba ʉlʉveetsaga,
amaani agaveetsaga,
pange ɨmibɨkɨ ɨgɨveetsaga.
Apeene kɨvalematsaage avaanu valya avavʉla kɨmanyilo kya kɨkolekelo kya Ngʉlʉve pa mbʉmɨla tsa veene.
5 Ikange ɨkɨvale ɨkyo kɨkapeewa ʉlʉlagɨlo ʉkʉta kɨleke ʉkʉvabuda avaanu avo,
apeene kɨvapelelage ʉvʉkʉvɨlwa kʉ nsɨkɨ gwa myetsi gɨhaano.
Ʉlʉvavo lwa kʉluma lwa kyene lwale ʉngata lʉvavo lwa kʉlumwa ni singomilevʉli.
6 Isigono isyo silaava sikwitsa,
avaanu valalondaga ʉvʉswe,
lɨno navalavʉvone lʉsiku.
Gʉlanogaga ʉkʉswa,
lɨno ʉvʉswe vʉlakɨmbɨla.
7 Ɨmihana gya kɨvale ɨkyo gyale ʉta falaasi itsʉ vatetengʼiinie ʉkʉbɨha natso kʉ ligoha.
Pa mitwe gya kyene paale ʉta ndingʼulilo tsa vʉlongotsi itsa sahabu.
Ikange kʉmiiho kʉ kyene kwale ʉngata vaanu.
8 Kyale ni nzwɨlɨ ʉngata nzwɨlɨ tsa vadala,
amiino ga kyene gaale ʉngata miino ga ngalamu.
9 Mu sipambaga sya kyene kyaswalile isisigakɨpambagaa ʉta sisigakɨpambaga sya kyʉma.
Amapapatɨlo ga kyene galɨkʉpʉlɨkɨka ʉngata kʉkuuta kwa mageleti ga falaasi nyongosu itsinyila ʉkʉlʉta kʉ ligoha.
10 Kyale nɨ mikɨla ʉngata gya singomilevʉli kange gyahomaga ʉngata mitwinyo.
Mu mikɨla ɨgyo mwale na maka ga kʉvalematsa avaanu kʉ nsɨkɨ gwa myetsi gɨhaano.
11 Kyale nʉ nkʉlʉdeeva ʉvɨ aale insuungʼwa va kʉ liguli lya kʉ lwongometso.
Ɨlitaawa lya mwene kʉ Kɨebulaniya vɨ Abadoni na kʉ Kɨyunaani vɨ Apolioni,
kwʉ kʉta ʉMbejangi.
12 Lola,
ʉvʉvejangi ʉvʉtatsi vʉlʉtɨngʼiinie,
vʉsigye ʉvʉvejangi ʉvʉnge vʉvɨlɨ ʉvukwitsa.
Ʉnsuungʼwa ʉva ntanato itova ɨngalape jya mwene
13 Pwʉ ʉnsuungʼwa ʉva ntanato (6) akatova ɨngalape jya mwene.
Ndɨkapʉlɨka ɨlimenyu ɨlyahʉmaga mu sʉga inni tsa kɨteekelelo kya sahabu ɨkɨlɨ pavʉlongolo pa Ngʉlʉve.
14 Ɨlimenyu ɨlyo lɨkambʉʉla ʉnsuungʼwa va ntanato ʉvɨ aale nɨ ngalape lɨkata,
“Vavopole avasuungʼwa vanni ʉwʉ vaakʉngilwe pa lʉgasi ʉlʉvaha lwa Eufulati.”
15 Pwʉ ʉnsuungʼwa ʉjwa akavavopola avasuungʼwa avo vanni.
Avasuungʼwa avo vaamalile ʉkʉvɨɨkwa pa kulongwi jya kavalɨlo ako,
na pa kulongwi jya kɨgono ɨkyo na pa kulongwi jya mwetsi ʉgwa nʉ mwaka ʉgwa ʉkʉta vabude avaanu va ligavo lipamato mu magavo gadatu.
16 Ndɨkapʉlɨka ɨmbalɨlo jya sipʉga sya vasikali avikɨtoga ifalaasi.
Vaale imilioni ɨmileevʉlʉ gɨvɨlɨ (200,000,000).
17 Mu mbonekelo itso ndyatsiweene ifalaasi na vasikali avikɨtoga pakyanya pa tsyene.
Mu sipambaga sya veene,
vaale ni sisigakɨpambaga isiduungʼu ʉta mwoto,
isinge sya buluu ʉta vʉtandaatse ʉvʉvalye,
isinge sya manzaano ʉta kɨbiliti.
Ikange ɨmitwe gya falaasi itso gyale ʉta mitwe gya ngalamu.
Mu milomo gya tsyene mulɨkʉhʉma ʉmwoto,
ɨlyosi nɨ salufa.b
18 Ʉmwoto,
ɨlyosi nɨ salufa,
isyo syʉ sidatu wʉ vʉvejangi ʉwʉ waahʉmaga mu milomo gya falaasi itso.
Ikange,
syʉ syene syabudile avaanu va ligavo lipamato mu magavo gadatu.
19 Amaka ga falaasi itso gaale mu milomo gya tsyene na mu mikɨla gya tsyene.
Ɨmikɨla gya tsyene gyale nɨ mitwe ʉta gya nzoka,
ɨgyo gyʉ gyavalematsaaga avaanu.
20 Napeene,
avaanu avaasigye,
ʉwʉ navaaswe mu vʉvejangi ʉwa,
vakabeela ʉkʉpela imbiivi tsa veene.
Vakagendelela ʉkwɨsaja kʉ mingʉlʉve na kʉ sihwani sya sahabu ni sya ndalama ni sya kyʉma ni sya maganga ni sya mibɨkɨ.
Isihwani isyo silemwa ʉkʉlola pange ʉkʉpʉlɨka pange ʉkʉgenda.
21 Ikange navaapele imbiivi tsa vʉbudi wa veene,
itsa vʉhavi wa veene,
itsa vʉligu wa veene ni tsa vʉhɨɨtsi wa veene.