Avɨɨdɨki va Ngʉlʉve vivɨɨkwa ɨkɨmanyilo
7
1 Wʉ galʉtɨngʼiinie ago,
ndɨkavavona avasuungʼwa vanni,
vɨmile mu mbasu inni tsa kɨlʉnga.
Avasuungʼwa avo valɨkʉsiga ɨmepo ɨjyahɨpaga ʉkʉhʉma imbasu inni tsa kɨlʉnga pakʉta jɨleke ʉkʉhɨpa mu kɨlʉnga pange mu nyanza pange kʉ mʼbɨkɨ ʉgʉveetsaga.
2 Ndɨkambona ʉnsuungʼwa ʉjyʉnge itoga ʉkʉhʉma Kʉvʉhʉmo wa Litsʉva ʉvɨ aale nɨ kɨkolekelo kya Ngʉlʉve ʉvɨ mwʉmi.
Akavavʉʉla kʉ limenyu ɨlivaha avasuungʼwa valya vanni ʉwʉ vaapeevilwe amaka ga kʉvejanga ɨkɨlʉnga nɨ nyanza,
3 akata,
“Muleke ʉkʉvejanga ɨkɨlʉnga evo ɨnyanza evo ɨmibɨkɨ ʉkʉsikila ʉpwʉ twimala ɨmbombo jya kʉvɨɨka ɨkɨmanyilo kya kɨkolekelo kʉ vavombi va Ngʉlʉve viitu,
pa mbʉmɨla tsa veene.”
4 Pwʉ ndɨkapʉlɨka ɨmbalɨlo jya veene ʉwʉ vaavɨɨkilwe ɨkɨmanyilo kya kɨkolekelo ʉkʉhʉma mu sivʉmbʉkʉ syoni sya Vaisilahɨli,
avaanu avaelufu ʉndeevʉlʉ mpamato isitsigo sinni na vanni (144,000).
5 Avaanu va kɨvʉmbʉkʉ kya Yuuda avaelufu kɨtsigo na vavɨlɨ (12,000),
ava kɨvʉmbʉkʉ kya Lubeni avaelufu kɨtsigo na vavɨlɨ,
ava kɨvʉmbʉkʉ kya Gadi avaelufu kɨtsigo na vavɨlɨ,
6 ava kɨvʉmbʉkʉ kya Asheli avaelufu kɨtsigo na vavɨlɨ,
ava kɨvʉmbʉkʉ kya Nafutali avaelufu kɨtsigo na vavɨlɨ,
ava kɨvʉmbʉkʉ kya Manasi avaelufu kɨtsigo na vavɨlɨ,
7 ava kɨvʉmbʉkʉ kya Simioni avaelufu kɨtsigo na vavɨlɨ,
ava kɨvʉmbʉkʉ kya Lawi avaelufu kɨtsigo na vavɨlɨ,
ava kɨvʉmbʉkʉ kya Isakali avaelufu kɨtsigo na vavɨlɨ,
8 ava kɨvʉmbʉkʉ kya Zabuloni avaelufu kɨtsigo na vavɨlɨ,
ava kɨvʉmbʉkʉ kya Yusufu avaelufu kɨtsigo na vavɨlɨ,
ava kɨvʉmbʉkʉ kya Benyamini avaelufu kɨtsigo na vavɨlɨ.
Ɨlipʉga ɨlivaha lya vaanu va silʉnga syoni
9 Wʉ galʉtɨngʼiinie ago,
ndɨkakɨvona ɨkɨpʉga ɨkɨvaha kya vaanu ʉwʉ nakʉli ʉviweesa ʉkʉvala.
Avaanu ʉkʉhʉma mu silʉnga syoni ni sivʉmbʉkʉ syoni ni sikolo syoni ni nzovele tsyoni,
vɨmile pavʉlongolo pa kɨnyalwangʉla kya Lʉdeeva na kʉvʉlongolo kwa Kakolo.
Vaaswalile ɨmisabwa ɨmivalasu ikange viibiite amasaasi ga mitende.
10 Valɨkwɨlanga kʉ limenyu ɨlivaha valɨkʉta,
“Ʉvʉpoki wihʉma kwa Ngʉlʉve viitu,
ʉmwene ʉvɨ itaama pa kɨnyalwangʉla kya mwene kya Lʉdeeva,
na kwa Kakolo.”
11 Avasuungʼwa vooni vɨɨmile imbasu tsyoni tsa kɨnyalwangʉla kya Lʉdeeva ni tsa vanzagɨla ni tsa sipeliwa sinni.
Pwʉ vakɨgwisa kɨvʉgudamo pavʉlongolo pa kɨnyalwangʉla kya Lʉdeeva nʉ kwɨsaja kwa Ngʉlʉve,
12 vakata,
“Ameni!
Ʉlʉginio nʉ vʉdwadwa nʉ lʉhala,
nʉ lʉsaano nʉ wɨɨmɨkiwa na maka ni ngʉsu,
silɨ nʉ Ngʉlʉve viitu sikutsooni na sikutsooni.
Ameni!”
13 Impamato mu vanzagɨla avo akambʉʉtsa ʉne akata,
“Avaanu ava ʉwʉ vaswalile ɨmisabwa ɨmivalasu wʉ vaani?
Vahʉmile ndaku?”
14 Ndɨkamwanda ndɨkata,
“Gwe ntwa,
ʉve veeve ʉlʉmanyile.”
Pwʉ ʉmwene akata,
“Ava wʉ vaanu ʉwʉ vahʉmile mu vʉkʉvɨlwa ʉvʉvaha.
Aveene vasukile ɨmisabwa gya veene nʉ kʉgɨpelela gɨve mivalasu mu nkisa gwa Kakolo.a
15 Ɨkɨ kyʉ mene valɨ pavʉlongolo pa kɨnyalwangʉla kya Lʉdeeva kya Ngʉlʉve.
Vikʉmbombela ʉNgʉlʉve pakɨlo na pamuunyi mu Vʉtaamo ʉVʉvalatse wa Ngʉlʉve.
Pwʉ ʉlya ʉvɨ ataamile pa kɨnyalwangʉla kya Lʉdeeva,
alaava paninie na veene,
alavadɨɨma.
16 Najɨlavavave nzala lʉsiku,
pange kʉvavona kyʉmɨlwa.
Ɨlitsʉva nalɨlavanyianye lʉsiku pange kʉviitsila amasuke amakali agaveetsaga,
17 manya ʉKakolo ʉvɨ alɨ pa kɨnyalwangʉla kya Lʉdeeva alavadɨɨmaga,
ʉmwene alavahɨlɨkaga kʉ sidwivudwivu sya magasi ʉgwʉ gikʉvapa avaanu ʉwʉʉmi.
Ikange ʉNgʉlʉve alavapulusa ʉlwihotsi lwoni mu miiho ga veene.”