ɄKakolo imamaalʉla isikolekelo ntanato
6
1 Pwʉ ndɨkambona ʉKakolo wʉ imamaalʉla ɨkɨkolekelo kɨpamato.
Ndɨkapʉlɨka ɨkɨpeliwa kɨpamato mu silya sinni wʉ kitsova kʉ limenyu ɨlikuluma ʉngata nzasi kiita,
“Itsaga kʉnʉ!”
2 Ndɨkajɨvona ɨfalaasi ɨmbalasu nʉ muunu ataamile pakyanya pa jyene.
Ʉmwene ʉvɨ ɨɨtogile pakyanya pa jyene aale nʉ vʉpɨnde.
Akapeewa ʉlʉdingʼulilo lwa vʉlongotsi.
Pwʉ akahʉma apo ʉndesaligoha ʉjwa pakʉta alʉte kugendelela ʉkʉlesa ɨligoha.
3 ɄKakolo ʉjwa akamamaalʉla ɨkɨkolekelo kya vɨɨlɨ.
Pwʉ ndɨkapʉlɨka kɨlya ɨkɨpeliwa kya vɨɨlɨ kiita,
“Itsaga kʉnʉ!”
4 Jɨkahʉmɨla ɨfalaasi ɨnduungʼu,
nʉ mwene ʉvɨ ɨɨtogile akapeewa ʉvʉtavʉlɨlwa wa kʉhetsa ʉlʉnotsehetso mu kɨlʉnga pakʉta avaanu vabudanage.
Namwene akapeewa ɨlipanga ɨlivaha.
5 ɄKakolo ʉjwa akamamaalʉla ɨkɨkolekelo kya daatu.
Pwʉ ndɨkapʉlɨka kɨlya ɨkɨpeliwa kya daatu kiita,
“Itsaga kʉnʉ!”
Ndɨkajɨvona ɨfalaasi ɨniitu,
nʉ mwene ʉvɨɨtogile aale nɨ kɨgelelo mu sivoko sya mwene.
6 Ndɨkapʉlɨka ɨlimenyu ʉngata lya muunu pagati pa sipeliwa isyo sinni liita,
“Ɨkɨbaba kɨpamato kya ngano kʉ dinalia mamato,
ni sibaba sidatu sya ngongilweb kʉ dinali mamato,
napeene ʉleke ʉkʉvejanga amafuta pange ɨdivai.”
7 ɄKakolo ʉjwa akamamaalʉla ɨkɨkolekelo kya nni.
Pwʉ ndɨkapʉlɨka kɨlya ɨkɨpeliwa kya nni kiita,
“Itsaga kʉnʉ!”
8 Ndɨkajɨvona ɨfalaasi ɨnyanyeke.
Ʉmwene ʉvɨɨtogile pakyanya pa jyene ɨlitaawa lya mwene aale vɨ Vʉswe,
pwʉ ʉlʉdeeva lwa kʉ vʉswe lʉkankonga kʉnsana.
Avo vakapeewa ʉvʉtavʉlɨlwa wa kʉvabuda avaanu ɨligavo lipamato mu magavo ganni ga vaanu va mu kɨlʉnga.
Vaapeevilwe ʉvʉtavʉlɨlwa wa kʉvabuda kʉ nzɨla jya lipanga,
ɨnzala,
ʉvʉtamu,
na kʉ nzɨla jya sikanu isikali sya mu kɨlʉnga.
9 ɄKakolo ʉjwa akamamaalʉla ɨkɨkolekelo kya haano.
Pwʉ ndɨkatsivona inumbula tsilya tsa vaanu paasi pa kɨteekelelo.
Avaanu avo wʉ vaahɨnzilwe kʉ nongwa jya kʉlyɨdɨka ɨlimenyu lya Ngʉlʉve na kʉ nongwa jya wooleletsi ʉwʉ vaahʉmyaga.
10 Avaanu avo vakalɨla kʉ lwoveelo vakata,
“Gwe Mbaha vɨ Nyamaka Gooni,
vɨ mbalatse ikange mmʉʉgʉ,
vupʉlɨkɨlaga ʉkʉsikila ndali ʉkʉvahɨga nʉ kʉlʉmbɨla kʉ vaanu avitaama mu kɨlʉnga kʉ nongwa jya kʉduuda ʉnkisa gwitu?”
11 Pwʉ vooni vakapeewa ɨmisabwa ɨmivalasu.
Ikange vakavʉʉlwa ʉkʉta,
vapʉlɨkɨlage kʉ nsɨkɨ ndebe,
ʉkʉsikila ʉpwʉ ɨmbalɨlo jya vavombivajyavo na vɨɨdɨkivajyavo jikwɨlanila.
Avo wʉ jʉvibudwa ndʉwʉ vaabudilwe aveene.
12 ɄKakolo ʉjwa akamamaalʉla ɨkɨkolekelo kya ntanato (6).
Pwʉ ndɨkapʉlɨka ɨkɨlindima ɨkɨvaha kya kɨlʉnga.
Ɨlitsʉva lɨkava litiitu ʉngata ligunila ɨlɨnotsiiwe ʉkʉhʉmana nʉ lwage ʉlʉtiitu,
ʉmwetsi gwoni gʉkava inʼduungʼu ʉngata nkisa.
13 Inondwe tsikagwa mu kɨlʉnga ʉngata seke tsa nkʉjʉ tsiigwa paasi wʉ ʉmʼbɨkɨ gwa tsyene gupuulwa nʉ nkuluguuto.
14 Ʉvʉtandaatse vʉkajaganika ndʉ kʉgujika kwa likalataasi.
Isidugala syoni ni silʉnga isilagasu isilɨ pagati pa nyanza sikahega apoonu pa syene.
15 Pwʉ avakʉlʉdeeva va mu kɨlʉnga,
avanyivaha,
avavaha va vasikali,
avamosu,
avaanu avanya maka,
na vaanu avange vooni,
avavanda na vatava vavanda vooni,
valɨkwɨsiha mu maguli na paasi pa maganga amatale ga mu sidugala.
16 Avo vooni valɨkʉsivʉʉla isidugala na maganga,
valɨkʉta,
“Mutʉhemukile,
mutʉsihe,
aleke ʉkʉtʉvona ʉNgʉlʉve ʉvɨ ataamile pa kɨnyalwangʉla kya Lʉdeeva.
Ikange mutʉsihe ʉkʉhʉma kʉ lʉviipo lwa Kakolo.
17 Lola,
ɨkɨgono ɨkɨvaha kya lʉviipo lwa veene kɨsiike.
Veeni ʉvɨ iweesa ʉkwɨma?”