ɄKakolo itoola ɨkɨtabu
5
1 Pwʉ ndɨkakɨvona ɨkɨtabu mu kɨvoko kya kʉndyo kyʉlya ʉvɨ aataamile pa kɨnyalwangʉla kya Lʉdeeva.
Ɨkɨtabu ɨkyo kyavɨgilwe mu nʼgati na kʉnzi nʉ kʉgadɨkwa ni sikolekeloa lekelakʉpamato (7).
2 Ndɨkambona ʉnsuungʼwa ʉnya maka,
ivʉʉtsa kʉ limenyu ɨlivaha iita,
“Veeni ʉvɨ anogelanie ʉkʉmamaalʉla isikolekelo sya kɨtabu ɨkɨ nʉ kʉkɨdɨndʉla?”
3 Naalepwo ʉmuunu nʉ mpamato kʉkyanya,
mu kɨlʉnga pange kʉ vʉtsʉʉka,
ʉvɨ aanogelanie ʉkʉkɨdɨndʉla ɨkɨtabu ɨkyo evo ʉkʉkɨlola mu nʼgati.
4 Pwʉ ʉne ndɨkatengʉla ʉkʉlɨla siitso,
ʉlwakʉva nandyambone ʉmuunu ʉvaveetsaga ʉvɨ aanogelanie ʉkʉkɨdɨndʉla ɨkɨtabu pange ʉkʉkɨlola mu nʼgati.
5 Pwʉ,
mpamato mu valya avanzagɨla akambʉʉla akata,
“Ʉleke ʉkʉlɨla!
Lola,
ʉNgalamu va kɨvʉmbʉkʉ kya Yuuda,
ʉkʉhʉma mu lʉjungu lwa nkʉlʉdeeva ʉDavʉdi,
b vɨ mwene alesiitse ɨligoha.
Ʉmwene vɨ anogelanie ʉkʉmamaalʉla isikolekelo isyo lekelakʉpamato nʉ kʉdɨndʉla ɨkɨtabu ɨkyo.”
6 Pwʉ ndɨkambona pa kɨnyalwangʉla kya Lʉdeeva ʉKakoloc ʉvɨ aavonekaga ʉta ahɨnzilwe,
ɨmile.
Aatsʉngʉtiilwe ni sipeliwa isyo sinni,
paninie na vanzagɨla.
Aale ni sʉga lekelakʉpamato na miiho lekelakʉpamato,
d ʉgwʉ ageene ago tsʉ Mepo lekelakʉpamato tsa Ngʉlʉvee itsʉ aatsisuungʼile mu kɨlʉnga kyoni.
7 Akiitsa kutoola ɨkɨtabu ɨkyo ʉkʉhʉma mu kɨvoko kya kʉndyo kyʉlya ʉvɨ aataamile pa kɨnyalwangʉla kya Lʉdeeva.
8 Wʉ atoolile ɨkɨtabu ɨkyo,
isipeliwa silya sinni paninie na vanzagɨla valya isitsigo sivɨlɨ na vanni (24) vakɨgwisa kɨvʉgudamo kʉvʉlongolo kwa Kakolo.
Vooni vaale na magombu ni bakʉli tsa sahabu itsʉ vaadɨtsiitse isya kʉnuungʼilitsa.
Isya kʉnuungʼilitsa isyo tsʉ nyɨsajo tsa vavalatse.
9 Pwʉ valɨkwɨmba ʉlwɨmbo ʉlʉpya valɨkʉta,
“Ʉnogelanie ʉve ʉkʉtoola ɨkɨtabu ɨkyo
nʉ kʉmamaalʉla isikolekelo sya kyene.
Lola,
waahɨnzilwe,
pwʉ kʉ nzɨla jya nkisa gwako ʉkanʼgombolela ʉNgʉlʉve,
avaanu ʉkʉhʉma mu sivʉmbʉkʉ syoni na mu nzovele tsyoni,
ikange ʉkʉhʉma mu sikolo syoni na mu silʉnga syoni.
10 Ʉkavapela vave Lʉdeeva lwa Ngʉlʉve ikange vateeketsi va mwene,
vambombelage ʉNgʉlʉve viitu,
nʉ kʉva valongotsi mu kɨlʉnga.”
11 Pwʉ ndɨkalola,
ndɨkapʉlɨka ɨlimenyu lya vasuungʼwa vongosu avaakɨtsʉngʉtye ɨkɨnyalwangʉla kya Lʉdeeva ni sipeliwa sinni na vanzagɨla valya isitsigo sivɨlɨ na vanni.
Ɨmbalɨlo jya vasuungʼwa jyale avaelufu na vaelufu.
12 Valɨkwɨmba kʉ limenyu ɨlivaha valɨkʉta,
“ɄKakolo ʉvɨ aahɨnzilwe
anogelanie ʉkwʉpɨlɨla amaka nʉ vʉmosu
nʉ lʉhala ni ngʉsu
nʉ wɨɨmɨkiwa nʉ vʉdwadwa nʉ lʉginio!”
13 Pwʉ,
ndɨkapʉlɨka isipeliwa syoni isya kʉkyanya ni sya mu kɨlʉnga ni sya kʉ vʉtsʉʉka ni sya mu nyanza sikwɨmba siita,
“Ʉmwene ʉvɨ ataamile pa kɨnyalwangʉla kya Lʉdeeva
nʉ Kakolo
vanogelanie ʉkwʉpɨlɨla ʉlʉginio
nʉ wɨɨmɨkiwa nʉ vʉdwadwa na maka gooni
sikutsooni na sikutsooni.”
14 Pwʉ isipeliwa isyo sinni sikata,
“Ameni.”
Naveene avanzagɨla avo isitsigo sivɨlɨ na vanni vakɨgwisa kɨvʉgudamo nʉ kwɨsaja.