ɄYohana ikʉmbona ʉNgʉlʉve ataamile pa kɨnyalwangʉla kya mwene
4
1 Wʉ galʉtɨngʼiinie ago,
ndɨkagʉvona ʉndyango ʉgʉdɨndwike kʉkyanya.
Ikange ndɨkapʉlɨka ɨlimenyu lɨlya ɨlyʉ ndyapʉliike pa vʉtengʉlɨlo ɨlyakuutaga ʉngata ngalape.
a Lɨkatsova nʉʉne,
lɨkata,
“Togaga wiitse kʉnʉ pakʉta ndɨkʉvonie galya ʉgwʉ wɨgane wa Ngʉlʉve giitse gahʉmɨle ʉnsɨkɨ ʉgʉliitsa.”
2 Baaho,
ʉMepo ʉMbalatse akannyitsila,
ndɨkakɨvona ɨkɨnyalwangʉla kya Lʉdeeva kɨvɨɨkilwe kʉkyanya nʉʉlya ʉvakɨtaamye.
3 Ʉlya ʉvɨ aataamile pa kɨnyalwangʉla ɨkyo aangʼaalaga ʉngata liganga lya yasipi nɨ lya akiki.
Ʉlʉkangiiga ʉlwangʼaalaga ʉngata sumalidi,
b lwakɨtsʉngʉʉtye ɨkɨnyalwangʉla ɨkyo.
4 Ikange isitaamilo isitsigo sivɨlɨ na sinni (24) sikakɨtsʉngʉʉtɨla ɨkɨnyalwangʉla ɨkyo ɨkya Lʉdeeva.
Mu sitaamilo isyo vaataamile avanzagɨla ʉwʉ vaaswalile ɨmisabwa ɨmivalasu ni ndingʼulilo tsa vʉlongotsi itsa sahabu pa mitwe gya veene.
5 Pa kɨnyalwangʉla ɨkyo ɨkya Lʉdeeva paahʉmɨlaga ʉlʉmuli lwa nzasi nʉ lʉbabatsʉko lwa jyene ʉlwakulumaga.
Ikange pavʉlongolo pa kɨnyalwangʉla ɨkyo tsyaviikaga inyaale lekelakʉpamato (7) tsa sahabu,
itsʉ itsyene tsʉ Mepo lekelakʉpamato tsa Ngʉlʉve.c
6 Ikange pavʉlongolo pa kɨnyalwangʉla ɨkyo paale ʉngata nyanza jya kyovo,
paalengadɨkaga ʉngata liganga ɨlingʼaala siitso.
Mu mbasu tsyoni tsa kɨnyalwangʉla ɨkyo ɨkya Lʉdeeva,
syalepwo isipeliwa sinni isyʉmi.
Syale na miiho mongosu kʉvʉlongolo na kʉnsana.
7 Ɨkɨpeliwa ɨkɨtatsi kyahwaniine nɨ ngalamu,
ɨkya vɨɨlɨ kyahwaniine nɨ kɨgwada ɨkɨgida,
ɨkya daatu,
kʉmiiho kʉ kyene,
kwahwaniine nʉ muunu,
ɨkya nni kyahwaniine nɨ ngasimula ɨjipululuka.
8 Isipeliwa isyo sinni,
nɨ kɨnge kyale na mapapatɨlo ntanato (6) na miiho mongosu mu mbasu tsyoni.
Ʉnsɨkɨ gwoni,
nasigatalʉka ʉkwɨmba.
Sikwɨmba siita,
“Vɨ Mbalatse,
vɨ Mbalatse,
vɨ Mbalatse,
vɨ Ntwa vɨ Ngʉlʉve vɨ Nyamaka Gooni,
vɨ ʉve waalepwo,
vɨ pwʉle nalɨ lɨno,
ikange vɨ ʉliitsa.”
9 Isipeliwa silya sinni syanʼginiaga,
syamwɨmɨkaga nʉ kʉnsaana ʉvɨ aataamile pa kɨnyalwangʉla kya Lʉdeeva,
ʉvɨ alɨkwo sikutsooni na sikutsooni.
Ʉnsɨkɨ gwoni ʉpwʉ ʉNgʉlʉve aaginiwaagwa ni sipeliwa isyo,
10 naveene avanzagɨla avo isitsigo sivɨlɨ na vanni vaasugamaga pavʉlongolo pa mwene nʉ kwɨsaja kʉ mwene ʉvɨ alɨkwo sikutsooni na sikutsooni.
Ikange valɨkʉmmʉmɨhɨtsa indingʼulilo tsa veene pavʉlongolo pa kɨnyalwangʉla kʉnʉ vitsova viita,
11 “Ʉnogelanie ʉve vɨ Ntwa vɨ Ngʉlʉve viitu,
ʉkwʉpɨlɨla ʉlʉginio,
ʉwɨɨmɨkiwa na maka,
manya veeve waapelile isiinu syoni.
Isyo syapelilwe ikange pwʉsile ʉkʉkongana nʉ vʉnogwe waako.”