Lʉvonekelo
Amamenyu agilongola
1
1 Ʉlʉ lwʉ lʉvonekelo lwa Yɨɨsʉ Kɨlɨsitia ʉlwʉ ʉNgʉlʉve aampye pakʉta avavonie avavombi va mwene ʉgwʉ kʉ wɨgane wa Ngʉlʉve galɨ piipi ʉkʉhʉmɨla.
ɄYɨɨsʉ aagavoniitse ago kʉ mbombi va mwene ʉYohana,
kʉ nzɨla jya nsuungʼwa va mwene.b
2 Namwene ʉYohana akooleletsa tsyoni itsʉ aatsiweene.
Itso tsʉ kulongwi tsa limenyu lya Ngʉlʉve nʉ wooleletsi wa Yɨɨsʉ Kɨlɨsiti.
3 Lɨno,
inʼgatalʉsu ʉmuunu ʉvɨ ikʉvɨmbɨla avampelela amamenyu ga malago agavɨgilwe ʉmʉ,
ikange vagatalʉsu valya avikʉgapʉlɨka nʉ kʉgavɨɨka,
manya ʉnsɨkɨ gwa kʉvombeka ago gʉhegelye.
Ʉlʉpembetso
4 Ɨkɨtabu ɨkɨ ndɨvɨgile ʉne ndɨ Yohana.
Ndikʉvavɨgɨla nyɨ vaanu va mipelela lekelakʉpamato (7) gya mu kɨlʉnga kya kʉ Asiya.
Ʉlʉhʉngʉ nʉ lʉnotsehetso ʉlwihʉma kwa Ngʉlʉve,
ʉvɨ aalepwo,
ʉvɨ pwale ikange ʉvɨ aliitsa,
lʉveetsage nʉʉnyie.
Ikange lʉveetsage nʉʉnyie ʉlʉhʉngʉ nʉ lʉnotsehetso ʉlwihʉma kʉ Mepo lekelakʉpamatoc itsilɨ pavʉlongolo pa kɨnyalwangʉla kya mwene kya Lʉdeeva,
5 nʉ kʉhʉma kwa Yɨɨsʉ Kɨlɨsiti.
Ʉjʉ vɨ mwoleletsi va jɨlweli,
vɨ ntatsi ʉkʉtsʉʉka,
ikange vɨ Nkʉlʉdeeva va vakʉlʉdeeva vooni va kɨlʉnga.
ɄYɨɨsʉ Kɨlɨsiti atʉganile,
ikange kʉ nzɨla jya nkisa gwa mwene atʉvopwe mu mbiivi tsiitu.
6 Vɨ aatʉpelile ʉkʉva Lʉdeeva lwa mwene kange vateeketsi va Ngʉlʉve ʉDadaaje.
Ʉwɨɨmɨkiwa nʉ vʉtavʉlɨlwa silɨ nʉ Yɨɨsʉ Kɨlɨsiti sikutsooni na sikutsooni!
Ameni!
7 Ndolage!
Ʉmwene aliitsa mu mavɨngo!
Na vaanu vooni valambona,
valambona naveene valya avaammomile nʉ nʼgoha.
d
Avaanu va sivʉmbʉkʉ syoni valalɨlaga
pa kulongwi tsa mwene.
Jɨlweli! Ameni.
8 ɄNtwa ʉNgʉlʉve ʉNyamaka Gooni itsova iita,
“Ʉne neene Alufa ikange neene Omega.”
e Ʉmwene vɨ aalepwo,
vɨ pwale,
ikange vɨ aliitsa.
ɄYohana ikʉmbona ʉKɨlɨsiti mu mbonekelo
9 Ʉne neene Yohana,
ndɨ mwɨdɨkinʼjiinyo ikange neene ndɨlɨ paninie nʉʉnyie pa kulongwi jya kʉnkonga ʉYɨɨsʉ Kɨlɨsiti mu vʉkʉvɨlwa na mu Lʉdeeva lwa mwene na mu lwɨjʉmɨɨlɨtso.
Ndyakʉngilwe mu kɨlʉnga ɨkɨlɨ pagati pa nyanza ɨkitambʉlwa Patimo pakʉva ndyalʉmbɨlɨlaga ɨlimenyu lya Ngʉlʉve nʉ kwoleletsa ikulongwi tsa Yɨɨsʉ Kɨlɨsiti.
10 ɄMepo ʉMbalatse aannyikye pa litsʉva lya Ntwa,
ndɨkapʉlɨka ɨlimenyu ʉngata lya ngalape kʉnsana kwane.
11 Ɨlimenyu ɨlyo lyambʉʉlile lɨkata,
“Aga gooni ʉgwʉ vukʉgavona,
ʉvɨge mu kɨtabu.
Wʉ ʉvɨgile,
ʉhɨlɨke ɨkɨtabu ɨkyo kʉ mipelela lekelakʉpamato (7) ɨgya mu vʉtsenge wa Efeso,
Similina,
Pegamo,
Fiyatila,
Sadi,
Filadelufiya,
nʉ wa Laodikiya.”
12 Pwʉ ndɨkagalamuka pakʉta ndɨmbone ʉvɨ aatsovaga nʉʉne.
Wʉ ndɨgalamwike,
ndɨkasivona isidʉlɨkɨlo sya nyaale sya sahabu lekelakʉpamato.
13 Pagati pa sidʉlɨkɨlo sya nyaale isyo,
ndɨkambona ʉmuunu ʉvaale ʉta vɨ Mwana va Muunu,
f aswalile ɨkanzo ɨnale nʉ kwɨpinya ʉnkanda gwa sahabu pa kɨpambaga.
14 Kʉ ntwe aale ni nzwɨlɨ imbalasu ʉngata lwage,
ikange ʉngata ngʼaala ɨmbalasu,
amiiho ga mwene gaalengadɨkaga ʉngata mwoto.
15 Isilʉnde sya mwene syangʼaalaga ʉngata kyʉma ɨkyʉ vakɨvaliitse mu litanuli,
g ikange ɨlimenyu lya mwene lyale ʉta lwoveelo lwa magasi mongosu agikwika pa salala.
16 Mu kɨvoko kya mwene kya kʉndyo aale ni nondwe lekelakʉpamato nɨ lipanga ɨlɨnya wʉʉge kʉnʉ na kʉnʉ,
lɨkahʉma mu ndomo gwa mwene.
Kʉmiiho kʉ mwene kʉlɨkʉngʼaala ʉngata litsʉva ɨlimulika siitso.
17 Wʉ ndɨmbwene,
ndɨkagwa pa silʉnde sya mwene ndʉ muunu ʉvɨ asue.
Pwʉ akannyibata nɨ kɨvoko kya mwene kya kʉndyo akata,
“Ʉladwadaga!
Ʉne neene Vʉtengʉlɨlo ikange neene Vʉmalɨlo.
18 Ʉne ndɨlɨ mwʉmi.
Lola,
ʉne neene ndyasue,
lɨno ndɨlɨ mwʉmi sikutsooni na sikutsooni.
Ʉne ndɨlɨ natso isungulu tsa kʉ vʉsweh ni tsa kʉ vʉtsʉʉka.i
19 “Pwʉ lɨno,
ʉvɨge tsyoni itsʉ ʉtsiweene,
itsilɨpwo lɨno,
natsyene tsilya itsikwitsa.
20 Inondwe lekelakʉpamato itsʉ ʉtsiweene ndibiite mu kɨvoko kyango kya kʉndyo,
wʉ vasuungʼwaj va mipelela gɨlya lekelakʉpamato.
Ikange isidʉlɨkɨlo sya nyaale sya sahabu lekelakʉpamato isyʉ ʉsiweene,
gyʉ mipelela ɨgyo lekelakʉpamato.”