Ʉmwakʉsaatʉlɨla imanyiiso tsa vʉnuasi ni tsa lweli
4
1 Vagane vango,
avanyamalago vongosu va vʉnuasi vahʉmye mu kɨlʉnga.
Pwʉ lɨno,
muleke ʉkʉvɨɨdɨka avaanu vooni vooni ʉwʉ viita valɨ nʉ Mepo va Ngʉlʉve.
Apeene mulolaniage vʉnonu ʉkʉta ʉmuunu ilongotsiwa nʉ Mepo va Ngʉlʉve evo baako.
2 Ɨnzɨla jya kʉlʉmanya ʉkʉta ʉmuunu ilongotsiwa nʉ Mepo va Ngʉlʉve jyʉ ɨjɨ:
Ʉmuunu ʉvaveetsaga ʉvɨ ikwɨdɨka nʉ kwɨpaala ʉkʉta ʉYɨɨsʉ vɨ Kɨlɨsiti,
iitsile mu kɨlʉnga,
akava nʉ mmana ndʉ muunu,
ʉjwa vɨ mwene ilongotsiwa nʉ Mepo va Ngʉlʉve.
3 Lɨno ʉmuunu ʉvaveetsaga ʉvɨ nikʉmwɨdɨka ʉYɨɨsʉ ndavʉle,
nilongotsiwa nʉ Mepo va Ngʉlʉve.
Ʉmuunu ʉjwa ilongotsiwa nʉ mepo va ntavangwa va Kɨlɨsiti.
Nʉʉnyie,
mupʉliike ʉkʉta ʉmepo ʉjwa ikwitsa,
lɨno itsile mu kɨlʉnga.
4 Lɨno vaana vango,
ʉnyie mulɨ vɨɨdɨki va Ngʉlʉve,
muvalesiitse avanyamalago avo va vʉnuasi,
ʉlwakʉva ʉMepo va mwene alɨ mu nʼgati mwanyie.
Ʉmwene alɨ na maka ʉkʉlʉtɨɨlɨla ʉmepo ʉvɨ ikʉvalongotsa avaanu ʉwʉ navikʉmwɨdɨka ʉNgʉlʉve.
5 Avanyamalago avo va vʉnuasi va mu kɨlʉnga,
vitsova itsa mu kɨlʉnga,
naveene avaanu va mu kɨlʉnga navikʉmwɨdɨka ʉNgʉlʉve,
vikʉvapʉlɨka avo.
6 Lɨno ʉwe tʉlɨ vɨɨdɨki va Ngʉlʉve.
Ʉmuunu ʉvɨ ammanyile ʉNgʉlʉve,
ikʉtʉpʉlɨka ʉwe,
namwene ʉmuunu ʉvɨ nammanyili ʉNgʉlʉve,
nikʉtʉpʉlɨka ʉwe.
Ʉmwa mwʉ tukʉlʉmanyila ʉkʉsaatʉla avaanu ʉwʉ vilongotsiwa nʉ Mepo va jɨlweli,
na valya avilongotsiwa nʉ mepo va vʉnuasi.
Ʉlʉgano lwa Ngʉlʉve
7 Vagane vango,
tʉgananage,
ʉlwakʉva ʉlʉgano lwihʉma kwa Ngʉlʉve.
Ʉmuunu ʉvaveetsaga ʉvɨ avaganile avanine,
aholilwe nʉ Ngʉlʉve,
ikange vɨ ammanyile ʉNgʉlʉve.
8 Lɨno ʉmuunu ʉvɨ nikʉvagana avanine,
nammanyili ʉNgʉlʉve,
ʉlwakʉva ʉNgʉlʉve vɨ lʉgano.
9 ɄNgʉlʉve jyʉmwene aavoniitse ʉlʉgano lwa mwene kwawe kʉ nzɨla jya kʉnsuungʼa ʉMwana va mwene ʉlʉdɨɨga mu kɨlʉnga ʉmʉ,
pakʉta ʉwe tʉkave ʉwʉʉmi wa sikutsooni ʉkʉgendela mu mwene.
10 Ʉlʉ lwʉ lʉgano,
ʉkʉta naweewe twɨ twanʼganile ʉNgʉlʉve,
apeene ʉmwene vɨ aatʉganile ʉwe.
Ɨkɨ kyʉ mene akansuungʼa ʉMwana va mwene,
ave neekelo pakʉta ahetse imbiivi tsiitu nʉ kʉtʉsajania nʉ Ngʉlʉve.
11 Vagane vango,
ɨngave ʉNgʉlʉve aatʉganile ʉwe ndavʉle,
patʉnogye ʉkʉta najyʉwe tʉgananage.
12 Nakʉli ʉmuunu ʉvaveetsaga ʉvɨ ambwene ʉNgʉlʉve lʉsiku.
Lɨno ɨngave tuganana,
pwʉ ʉNgʉlʉve iiva itaama mu vʉhange nʉʉwe,
ikange ʉlʉgano lwa mwene lukwɨlanila kwawe.
13 Tʉlʉmanyile ʉkʉta tutaama mu vʉhange nʉ Ngʉlʉve,
namwene ʉNgʉlʉve itaama mu vʉhange nʉʉwe,
ʉlwakʉva atʉpye ʉMepo va mwene.
14 Ʉwe tʉlolile nʉ kʉvoolelela avange ʉkʉta ʉDaada ʉNgʉlʉve aansuungʼile ʉMwana va mwene mu kɨlʉnga,
pakʉta ave Mpoki va vaanu.
15 Ʉmuunu ʉvaveetsaga ʉvɨ ikwɨdɨka ʉkʉta ʉYɨɨsʉ vɨ Mwana va Ngʉlʉve,
ʉNgʉlʉve itaama mu vʉhange nʉ mwene,
namwene itaama mu vʉhange nʉ Ngʉlʉve.
16 Lɨno,
ʉwe tʉlʉmanyile nʉ kwɨdɨka ʉkʉta ʉNgʉlʉve atʉganile.
ɄNgʉlʉve vɨ lʉgano.
Ʉmuunu ʉvaveetsaga ʉvɨ itaama mu lʉgano,
vɨ itaama mu vʉhange nʉ Ngʉlʉve,
ʉNgʉlʉve namwene itaama mu vʉhange nʉ mwene.
17 Kʉ nzɨla ɨjyo,
ʉNgʉlʉve ivɨɨka ʉlʉgano lwa mwene mu nʼgati mwawe,
pakʉta tʉve na maka mu kɨgono kya kʉhɨgwa ʉlwakʉva ʉvʉtaamo wiitu mu kɨlʉnga ʉmʉ,
vʉlɨngʼiine nʉ mwʉ ʉYɨɨsʉ aataamaga.a
18 Apalɨ nʉ lʉgano pavʉla lʉdwado,
manya ʉlʉgano lwa lweli luhetsa ʉlʉdwado lwoni.
Ʉvʉhɨgi wʉ vuvɨɨka avaanu ʉkʉta vadwadage.
Ʉmuunu ʉvaveetsaga ʉnya lʉdwado,
ʉlʉgano lwa Ngʉlʉve nalʉkwɨlaniili mu nʼgati mu mwene.
19 Ʉwe tʉlɨ nʉ lʉgano ʉlwakʉva ʉNgʉlʉve vɨ aatalile ʉkʉtʉgana ʉwe.
20 Ɨngave ʉmuunu iita anʼganile ʉNgʉlʉve kʉnʉ ikʉnsʉʉla ʉlʉkololwe,
innuasi.
Tʉlʉmanyile innuasi ʉlwakʉva ʉmuunu ʉvɨ nanʼganili ʉlʉkololwe ʉvɨ ikʉmbona na miiho,
nakaweese ʉkʉnʼgana ʉNgʉlʉve ʉvɨ nikʉmbona.
21 Pwʉ lɨno,
ʉNgʉlʉve atʉpye ʉlʉlagɨlo ʉkʉta ʉmuunu ʉvaveetsaga ʉvɨ anʼganile ʉNgʉlʉve,
pannogye anʼganage najyʉ lʉkololwe.b