Avaana va Ngʉlʉve
3
1 Lolagi ʉmwʉ ʉNgʉlʉve ʉDaada atʉganie ʉwe.
Ikʉtwɨlanga vaana va mwene!
Jɨlweli ewo wʉ tʉlɨwo.
Lɨno avaanu ʉwʉ navikʉmwɨdɨka ʉNgʉlʉve navatʉmanyili ʉwe,
ʉlwakʉva navammanyili ʉmwene.
2 Vagane vango,
lɨno ʉwe tʉlɨ vaana va Ngʉlʉve,
napeene ʉNgʉlʉve navɨɨkili pavʉvalasu ʉvʉlʉti ʉwʉ tʉlaava nawo.
Peene tʉlʉmanyile ʉkʉta ʉnsɨkɨ ʉgwʉ ʉKɨlɨsiti alakilivuka ikange,
tʉlaava ndʉ mwene,
ʉlwakʉva tʉlambona ʉmwaveelye.
3 Ʉmuunu ʉvaveetsaga ʉvɨ ihʉʉvɨla ewo ʉkʉta alaava ndʉ Kɨlɨsiti,
ikɨnotsa pakʉta ave nʼgolosu,
ndʉwʉ ʉKɨlɨsiti jyʉmwene nʼgolosu.
4 Ʉmuunu ʉvaveetsaga ʉvɨ ivomba imbiivi,
ideenya indagɨlo,
ʉlwakʉva ʉkʉvomba imbiivi kwʉ kʉnʼgalʉkɨla ʉNgʉlʉve.
5 Mulʉmanyile ʉkʉta ʉKɨlɨsiti iitsile kuhetsa imbiivi tsiitu,
ikange ʉmwene nitula ɨnongwa ɨjɨveetsaga.
6 Lɨno ʉmuunu ʉvaveetsaga ʉvɨ igendelela ʉkʉva nʉ vʉhange nʉ Kɨlɨsiti,
nigendelela ʉkʉvomba imbiivi.
Lɨno ʉmwene ʉvɨ igendelela ʉkʉvomba imbiivi,
nalɨ nʉ vʉhange nʉ Kɨlɨsiti,
ikange nalʉmanyili ʉkʉta ʉKɨlɨsiti veeni.
7 Lɨno vaana vango,
muleke ʉkwɨdɨka ʉkʉta ʉmuunu ʉvaveetsaga avajatse.
Ʉmuunu ʉvaveetsaga ʉvivomba itsa vʉgolosu,
inʼgolosu ndʉwʉ ʉKɨlɨsiti inʼgolosu.
8 Lɨno ʉmuunu ʉvɨ igendelela ʉkʉvomba imbiivi,
vɨ muunu va Setano,
ʉlwakʉva ʉSetano agendelye ʉkʉvomba imbiivi ʉkʉhʉma kʉ vʉtengʉlɨlo.
Ɨkɨ kyʉ kɨɨnu ʉMwana va Ngʉlʉve iitsile mu kɨlʉnga,
kuvejanga imbombo tsa Setano.
9 Ʉmuunu ʉvaveetsaga ʉvaholilwe nʉ Ngʉlʉve,
nakaweese ʉkʉgendelela ʉkʉvomba imbiivi,
ʉlwakʉva amaka ga Ngʉlʉve agammolile galɨ mu nʼgati mu mwene.
Ikange nakaweese ʉkʉgendelela ʉkʉvomba imbiivi ʉlwakʉva ʉmwene Mwana va Ngʉlʉve.
10 Lɨno ʉmuunu ʉvɨ nivomba itsa vʉgolosu,
evo ʉvɨ nikʉnʼgana ʉnnine,
ʉjwa namwana va Ngʉlʉve.
Ʉmwa mwʉ tukʉlʉmanyila ʉkʉleka ʉkʉhwanana kʉ vaana va Ngʉlʉve,
na va Setano.
Ʉkʉganana
11 Ɨkulongwi ɨjyʉ mwapʉliike ʉkʉhʉma pa vʉtengʉlɨlo jyʉ ɨjɨ:
Patʉnogye tʉgananage.
12 Tʉleke ʉkʉva ndʉ muunu ʉlya ʉKaini,
ʉvɨ aale va Setano,
akamʼbuda ʉnnunaave.
a Kɨki aamʼbudile?
Aamʼbudile ʉlwakʉva imbombo tsa mwene ʉKaini tsyale mbiivi,
wʉ imbombo itsa nnunaave tsyale tsa vʉgolosu.
13 Lɨno,
valʉkololwango mu lwɨdɨko,
muleke ʉkʉdega ɨngave avaanu ʉwʉ navikʉmwɨdɨka ʉNgʉlʉve vikʉvasʉʉla ʉnyie.
14 Kwawe ʉwe,
ʉkʉvagana avɨɨdɨkivajiitu,
kyʉ kɨmanyilo ɨkivonia ʉkʉta tʉhʉmile mu maka ga vʉswe,
nʉ kwingila kʉ wʉʉmi wa sikutsooni.
Tʉlʉmanyile ɨlyo ʉlwakʉva tʉvaganile avajiitu.
Ʉmuunu ʉvɨ nalɨ nalwo ʉlʉgano apitsiige mu vʉswe.b
15 Ʉmuunu ʉvaveetsaga ʉvɨ ikʉnsʉʉla ʉmwɨdɨkinnine,
imʼbudi,
ikange mulʉmanyile ʉkʉta mu mwene namwʉvʉle ʉwʉʉmi wa sikutsooni.c
16 Ʉwe tʉlʉmanyile ʉlʉgano,
ʉlwakʉva ʉKɨlɨsiti aatʉswɨlye ʉwe.
Najyʉwe vʉle vʉle,
gʉngasike ʉnsɨkɨ gwa kʉvapoka avɨɨdɨkivajiitu,
patʉnogye ʉkʉhʉmya ʉwʉʉmi wiitu kʉ nongwa jya veene.
17 Ʉmuunu ʉvaveetsaga ʉnya siinu ʉvɨ ikʉmbona ʉnnine alɨ mu vʉpala,
lɨno niiva nɨ numbula ɨjikola ɨkɨsa,
iteetsaga ndeeti ʉkʉta alɨ nʉ lʉgano lwa Ngʉlʉve?
18 Vaana vango,
tʉleke ʉkʉtsova gʉ ndomo gwene ʉkʉta tʉvaganile avajiitu,
apeene tʉvaganage lweli kʉ nzɨla jya kʉvatanga mu vʉlemwa wa veene.
19 Ʉkʉvagana avajiitu ndavʉle,
kukʉtʉpa ʉkʉlʉmanyila ngʼaani mu numbula ʉkʉta tukonga ʉwajɨlweli,
ikange tʉlɨ mu lʉnotsehetso nʉ Ngʉlʉve.
20 Apo ndajɨve tuhɨgwa ni numbulad tsiitu,
tʉlʉmanyile ʉkʉta ʉNgʉlʉve vɨ mbaha ʉkʉlʉtɨɨlɨla inumbula tsiitu,
ikange ʉmwene agamanyile gooni.
21 Vagane vango,
ɨngave natuhɨgwa ni numbula tsiitu,
pwʉ tuweesa ʉkʉva na maka ga kʉhegelela pamiiho ga Ngʉlʉve.
22 Ikange tukwʉpɨlɨla ʉkʉhʉma kʉ mwene ɨkɨveetsaga ɨkyʉ tukʉnʼdoova,
ʉlwakʉva tukʉtsyɨdɨka indagɨlo tsa mwene nʉ kʉvomba ʉgwʉ gikʉmmovosa.
23 Ʉlʉlagɨlo lwa mwene lwʉ ʉlʉ,
tʉlyɨdɨkage ɨlitaawa lya Mwana va mwene ʉYɨɨsʉ Kɨlɨsiti,
nʉ kʉganana,
ndʉwʉ aatʉlagye.
24 Ʉmuunu ʉvɨ ikʉtsyɨdɨka indagɨlo tsa Ngʉlʉve,
itaama mu vʉhange nʉ Ngʉlʉve,
namwene ʉNgʉlʉve itaama mu vʉhange nʉ mwene.
Tʉlʉmanyile ʉkʉta ʉNgʉlʉve itaama mu vʉhange nʉʉwe kʉ nzɨla jya Mepo ʉMbalatse ʉvɨ atʉpye.