ɄKɨlɨsiti vɨ ikʉvadoovela avɨɨdɨki
2
1 Mwe vaana vango mu lwɨdɨko,
ndikʉvavɨgɨla ikulongwi itsi,
pakʉta muleke ʉkʉvomba imbiivi.
Napeene,
ɨngave ʉmuunu ivomba imbiivi,
ʉNgʉlʉve ikʉnsyɨkɨla ʉlwakʉva tʉlɨ nave ʉntangɨli ʉvɨ ikʉtʉdoovela kwa Daada ʉNgʉlʉve,
ʉjwa vɨ Yɨɨsʉ Kɨlɨsiti.
Ʉmwene iNʼgolosu.
2 ɄYɨɨsʉ ʉjwa vɨ mwene ɨɨhʉmiitse akava neekelo jya kʉtʉswɨla ʉwe.
Akatovelelwa pa kɨdamingʼanie.
Ɨneekelo ɨjyo jyʉ jyene jihetsa imbiivi tsiitu nʉ kʉtʉsajania nʉ Ngʉlʉve.
Apo nakwʉ kʉta jihetsa imbiivi tsiitu ʉwe twɨ veene,
baako,
ɨjyene jihetsa imbiivi tsa vaanu vooni.
3 Ɨngave tukʉtsikonga indagɨlo tsa Ngʉlʉve,
pwʉ twiva tʉmmanyile jɨlweli.
4 Ʉmuunu ʉviita ammanyile ʉNgʉlʉve,
lɨno nikonga indagɨlo tsa mwene,
ʉjwa innuasi,
navʉmanyili ʉwajɨlwelia ʉwʉ ʉNgʉlʉve atʉvoniitse.
5 Apeene ʉmuunu ʉvaveetsaga ʉvɨ ikʉlɨkonga ɨlimenyu lya Ngʉlʉve,
ʉjwa vɨ anʼganile ʉNgʉlʉve jɨlweli.
Ɨjɨ jyʉ nzɨla jya kʉlʉmanya ʉkʉta tʉlɨ nʉ vʉhange nʉ Ngʉlʉve.
6 Ʉmuunu ʉvaveetsaga ʉviita alɨ nʉ vʉhange nʉ Ngʉlʉve,
vɨ avombage ndʉwʉ ʉYɨɨsʉ Kɨlɨsiti aavombaga.
Ʉlʉlagɨlo lwa Yɨɨsʉ lwa kʉganana
7 Mwe vagane vango,
ʉlʉlagɨlo ʉlʉ ʉlwʉ ndikʉvavɨgɨla nakwʉ kʉta lʉpya,
apeene lʉʉlʉlya ʉlʉlaala ʉlwʉ mwale nalwo ʉkʉhʉma ʉpwʉ mwatengwe ʉkʉmwɨdɨka ʉYɨɨsʉ.
b Ʉlʉlagɨlo ʉlʉlaala ʉlwa lyʉ limenyu ɨlya kʉganana ɨlyʉ mwapʉliike.
8 Ʉlʉvasu ʉlʉnge,
ʉlʉlagɨlo ʉlʉ ʉlwʉ ndikʉvavɨgɨla lʉpya ʉlwakʉva ʉwajɨlweli wa lwene vuvoneka mu mwene na mwanyie,
manya,
ʉvʉviivi ʉvʉlɨ ndɨ ngʼiisi wihega,
nʉ lʉgano ʉlʉlɨ ndʉ lʉmuli luvoneka.
9 Ʉmuunu ʉvikɨtsova ʉkʉta ivomba itsa vʉgolosu,
wʉ kʉnʉ igendelela ʉkʉnsʉʉla ʉmwɨdɨkinnine,
apitsiige itaama mu mbiivi itsilɨ ndɨ ngʼiisi.
10 Ʉmuunu ʉvɨ ikʉnʼgana ʉnnine,
ʉjwa itaama mu lʉmuli.
Kange mu nʼgati mu mwene nakɨmuli ɨkɨveetsaga ɨkya kʉmpelela avombe imbiivi.
11 Lɨno,
ʉmuunu ʉvɨ ikʉnsʉʉla ʉnnine,
alɨ mu ngʼiisi jya mbiivi.
Igenda mu ngʼiisi kɨtsila kʉlʉmanya ʉkwʉ ilotsa,
ʉlwakʉva ɨngʼiisi ɨjyo jɨmʼboswitse amiiho.
12 Ndikʉvavɨgɨla ʉnyie nyɨ vaana,
ʉlwakʉva imbiivi tsiinyo tsisyɨkɨliiwe nʉ Yɨɨsʉ Kɨlɨsiti.
13 Ndikʉvavɨgɨla ʉnyie nyɨ vadaada,
ʉlwakʉva mummanyile ʉYɨɨsʉ Kɨlɨsiti,
ʉvɨ aalekwo ʉkʉhʉma kʉ vʉtengʉlɨlo.
Ndikʉvavɨgɨla ʉnyie nyɨ vatumbwani,
ʉlwakʉva mundemile ʉSetano.
14 Ndɨvavɨgye ʉnyie nyɨ vaana,
ʉlwakʉva mummanyile ʉDaada ʉNgʉlʉve.
Ndɨvavɨgye ʉnyie nyɨ vadaada,
ʉlwakʉva mummanyile ʉYɨɨsʉ Kɨlɨsiti,
ʉvɨ aalekwo ʉkʉhʉma kʉ vʉtengʉlɨlo.
Ndɨvavɨgye ʉnyie nyɨ vatumbwani,
ʉlwakʉva mulɨ na maka,
mwibiite ɨlimenyu lya Ngʉlʉve,
ikange mundemile ʉSetano.
15 Pwʉ lɨno,
muleke ʉkʉnogwa imbiivi tsa kɨlʉnga,
evo ʉkʉkonga avaanu avaviivi avalɨmwo ʉmwa.
Ɨngave ʉmuunu ikʉtsinogwa imbiivi tsa mu kɨlʉnga,
nanʼganili ʉDaada ʉNgʉlʉve.
16 Imbiivi tsa mu kɨlʉnga tsʉ itsi:
ʉvʉpʉmu wa vʉligu nʉ vʉnogwe ʉvʉviivi wa mmana,
ʉmwojo gwa kʉva nasyo isiinu isiveetsaga isyʉ ʉmuunu ilola nʉ kʉnogwa,
nʉ lwɨginio ʉlwihʉma mu kyʉma ɨkyʉ ʉmuunu alɨ nakyo.
Syoni isyo nasihʉma kwa Daada ʉNgʉlʉve,
apeene sihʉma mu kɨlʉnga ʉmʉ.
17 Ɨkɨlʉnga paninie ni siinu syoni isya vʉnogwe ʉvʉviivi,
siloongomela.
Ʉmwene ʉmuunu ʉvivomba agikʉmmovosa ʉNgʉlʉve,
ʉjwa iiva nʉ wʉʉmi wa sikutsooni.
Ʉkʉva miiho kʉ valʉgʉ va Kɨlɨsiti
18 Mwe vaana vango,
isi syʉ sigono sya kʉ vʉsililo wa kɨlʉnga.
Mukʉmbʉkage ʉkʉta twavavʉʉlile ikulongwi tsa kwitsa kwa ndʉgʉ va Kɨlɨsitic kʉ sigono sya kʉ vʉsililo wa kɨlʉnga.
Lola,
lɨno mukʉvavona avalʉgʉ vongosu va Kɨlɨsiti viitsile.
Ɨlyo lyʉ likʉtʉvɨɨka tʉlʉmanye ʉkʉta tʉlɨ mu sigono sya kʉ vʉsililo.
19 Avalʉgʉ avo vakahegile kʉnʉ,
vakaale paninie nʉʉwe,
nʉpwʉ jɨngave navakaale nʉ vʉhange wa jɨlweli nʉʉwe.
Lɨno vakaale vave valɨ nʉ vʉhange wa jɨlweli nʉʉwe,
ndalɨno vatsiige baaha paninie nʉʉwe.
Apeene vakahegile,
pakʉta jɨvoneke pavʉvalasu ʉkʉta vooni avo navakaale vʉhange nʉʉwe.
20 Lɨno ʉnyie ʉNgʉlʉve avapye ʉMepo ʉMbalatse,
d kyʉ mene nyɨ vooni muvʉmanyile ʉwajɨlweli.
21 Ndikʉvavɨgɨla ʉnyie ɨkalata ɨjɨ,
nakwʉ kʉta ndivona namuvʉmanyili ʉwajɨlweli,
baako,
apeene ʉlwakʉva muvʉmanyile.
Ikange mulʉmanyile ʉkʉta ʉvʉnuasi ʉvʉveetsaga nawihʉma mu wajɨlweli.
22 Ʉmuunu ʉnnuasi veeni?
Ʉmuunu ʉnnuasi vɨ ʉlya ʉvɨ ibeetsa ʉkʉta ʉYɨɨsʉ vɨ Kɨlɨsiti.
e Ʉmuunu ndʉʉjwa,
vɨ ndʉgʉ va Kɨlɨsiti,
ikʉmʼbeela ʉDaada ʉNgʉlʉve nʉ Yɨɨsʉ,
ʉMwana va Ngʉlʉve.
23 Ʉmuunu ʉvaveetsaga ʉvikʉmʼbeela ʉMwana va Ngʉlʉve,
ikʉmʼbeela najyʉ Daada ʉNgʉlʉve.
Apeene,
ʉmuunu ʉvaveetsaga ʉvikʉmwɨdɨka ʉMwana va Ngʉlʉve,
ʉjwa vyalɨ nʉ vʉhange nʉ Daada ʉNgʉlʉve.
24 Lɨno,
amamenyu galya ʉgwʉ mwapʉliike ʉkʉhʉma pa vʉtengʉlɨlo wa lwɨdɨko lwinyo,
mugendelelage ʉkʉgavɨɨka mu numbula tsiinyo.
Ɨngave mugendelelaga ʉkʉvomba ewo,
pwʉ najyʉnyie muveetsaga nʉ vʉhange nʉ Mwana va Ngʉlʉve,
najyʉ Daada ʉNgʉlʉve.
25 Ʉlʉ lwʉ lʉhʉʉvɨlo lwa wʉʉmi wa sikutsooni ʉlwʉ ʉKɨlɨsiti aatʉhʉʉviitse ʉkʉta alatʉpa.
26 Ndikʉvavɨgɨla ʉnyie itsi,
pa kulongwi tsa vaanu valya avilonda ʉkʉvajatsa.
27 Lola,
ʉnyie ʉKɨlɨsiti avapye ʉMepo ʉMbalatse ʉvɨ itaama mu nʼgati mwanyie.
Ʉjwa vɨ mwene ikʉvamanyiisa tsyoni,
ikange imanyiiso tsa mwene tsa jɨlweli,
natsa vʉnuasi.
Pwʉ lɨno,
napanogiili ʉkʉta ʉmuunu ʉjyʉnge avamanyiise.
f Ʉnyie mugendelelage ʉkʉva nʉ vʉhange nʉ Kɨlɨsiti ndʉwʉ ʉMepo ʉMbalatse avamanyiise.
28 Pwʉ lɨno vaana vango,
mugendelelage ʉkʉva nʉ vʉhange nʉ Kɨlɨsiti,
pakʉta twitse tʉleke ʉkʉva nʉ lʉdwado pange soni wʉ tukwagana nave pa kɨgono kya kwitsa kwa mwene.
29 Ɨngave mulʉmanyile ʉkʉta ʉKɨlɨsiti inʼgolosu,
pwʉ mulʉmanyage ʉkʉta ʉmuunu ʉvaveetsaga ʉvivomba itsa vʉgolosu,
vɨ mwene Mwana va Ngʉlʉve.