Ʉlwɨdɨko ʉlʉlɨ na maka ga kʉtsilema imbiivi tsa mu kɨlʉnga
5
1 Ʉmuunu ʉvaveetsaga ʉvikwɨdɨka ʉkʉta ʉYɨɨsʉ vɨ Mesiya,
ʉjwa aholilwe nʉ Ngʉlʉve.
Ikange ʉmuunu ʉvaveetsaga ʉvanʼganile ʉdadaaje va mwana,
ikʉnʼgana najyʉ mwana va muunu ʉjwa.
2 Wʉ jɨlɨwo najyʉwe,
tʉlʉmanyile ʉkʉta tʉvaganile avaana va Ngʉlʉve,
kʉ nzɨla jya kʉnʼgana ʉmwene ʉNgʉlʉve nʉ kʉkonga indagɨlo tsa mwene.
3 Ʉkʉnʼgana ʉNgʉlʉve kwʉ kʉtsikonga indagɨlo tsa mwene,
ikange indagɨlo tsa mwene nanalamu.
4 Lola,
ʉmuunu ʉvaveetsaga ʉvɨ aholilwe nʉ Ngʉlʉve,
ikʉtsilema imbiivi tsa mu kɨlʉnga.
Wʉ jɨlɨwo najyʉwe,
tukʉtsilema imbiivi tsa mu kɨlʉnga kʉ nzɨla jya lwɨdɨko lwitu kwa Yɨɨsʉ.
5 Ndeeti,
veeni ʉviweesa ʉkʉtsilema imbiivi tsa mu kɨlʉnga?
Vɨ ʉlya ʉvikwɨdɨka ʉkʉta ʉYɨɨsʉ vɨ Mwana va Ngʉlʉve.
Ɨkɨɨnu ɨkivonia ʉkʉta jɨlweli ʉYɨɨsʉ vɨ Kɨlɨsiti
6 ɄYɨɨsʉ Kɨlɨsiti vɨ mwene ʉvɨ iitsile kʉ nzɨla jya magasi ga lwotso na mu nkisa gwa vʉswe wa mwene.
Nootsiwe na magasi kwene,
apeene aaduudile nagʉ nkisa gwa mwene pa kɨdamingʼanie.
Namwene ʉMepo ʉMbalatse ikwoleletsa ʉkʉta ago ga lweli,
ʉlwakʉva ʉMepo ʉMbalatse vɨ wajɨlweli.
7 Lola,
kwʉvale vadatu avikwolelela kʉkyanya:
avo vɨ Daada,
ɨLimenyu nʉ Mepo ʉMbalatse,
avo vadatu valɨ kɨɨnu kɨpamato.
8 Ikange pwʉvale avooleletsi vadatu mu kɨlʉnga:
a ʉMepo ʉMbalatse,
amagasi nʉ nkisa.
Avooleletsi avo vadatu vikʉtʉvonia ʉwe ʉwajɨlweli vʉvʉninie.
9 Ɨngave tukwɨdɨka ʉwooleletsi wa vaanu,
pwʉ kʉlʉti siitso kwawe ʉkwɨdɨka ʉwooleletsi ʉvʉlʉti wa Ngʉlʉve ʉlwakʉva ʉNgʉlʉve ikwolela ikulongwi tsa Mwana va mwene.
10 Ʉmuunu ʉvikʉmwɨdɨka ʉMwana va Ngʉlʉve,
ikwɨdɨka ʉkʉta ʉwooleletsi ʉvʉ wa jɨlweli.
Lɨno ʉmuunu ʉvɨ nikʉmwɨdɨka ʉNgʉlʉve,
ʉjwa iita ʉNgʉlʉve innuasi,
ʉlwakʉva nikwɨdɨka ʉwooleletsi ʉwʉ ʉNgʉlʉve oleliitse pa kulongwi tsa Mwana va mwene.
11 Ʉwooleletsi ʉwa wʉ ʉvʉ:
ɄNgʉlʉve atʉpye ʉwʉʉmi wa sikutsooni.
Ʉwʉʉmi ʉwa tukʉwʉʉpɨlɨla ʉkʉhʉma kʉ Mwana va mwene.
12 Ʉmuunu ʉvalɨ nʉ vʉhange nʉ Mwana va Ngʉlʉve,
alɨ nʉ wʉʉmi ʉwa.
Lɨno,
ʉmuunu ʉntsila vʉhange nʉ Mwana va Ngʉlʉve,
nalɨ nawo ʉwʉʉmi ʉwa.
Amamenyu ga vʉmalɨlo
13 Ndikʉvavɨgɨla amamenyu ago,
ʉnyie nyɨ mukʉlyɨdɨka ɨlitaawa lya Mwana va Ngʉlʉve,
pakʉta mulʉmanye ʉkʉta mulɨ nʉ wʉʉmi wa sikutsooni.
14 Ʉwe pamiiho ga Ngʉlʉve,
tʉlɨ nɨ nyʉʉve ʉkʉta ʉmwene ikʉtʉpʉlɨka wʉ tukʉnʼdoova ɨkɨveetsaga mu vʉnogwe wa mwene.
15 Pwʉ lɨno,
ɨngave tʉlʉmanyile ʉkʉta ʉmwene ikʉtʉpʉlɨhɨtsa wʉ tukʉnʼdoova,
pwʉ tʉlʉmanyile ʉkʉta atʉpye tsyoni itsʉ tʉnʼdoovile.
16 Ɨngave ʉmuunu inninie mwanyie ikʉmbona ʉmwɨdɨkinnine ivomba ʉvʉgalo ʉvʉnavukʉmpelela ataagwe kʉvʉtale nʉ Ngʉlʉve,
ʉmuunu ʉjwa anʼdoovele kwa Ngʉlʉve ʉmwɨdɨkinnine ʉjwa.
ɄNgʉlʉve jiikʉmpa ʉwʉʉmi ʉnʼgalo ʉjwa.
Ɨlyo liiva ewo kʉ muunu ʉlya ʉvivomba ʉvʉgalo ʉvʉnavukʉmpelela ataagwe kʉvʉtale nʉ Ngʉlʉve.
Lola,
kʉlɨ vʉgalo ʉvukʉmpelela ʉmuunu ataagwe kʉvʉtale nʉ Ngʉlʉve.
b Ʉne nandiita anʼdoovele kwa Ngʉlʉve pa vʉgalo ndʉʉwa.
17 Ʉkʉvomba ɨkɨveetsaga ɨkyʉ nakɨnogelaniili pamiiho ga Ngʉlʉve kwʉ kʉvomba imbiivi.
Lɨno paninie naago,
pwʉtsile imbiivi itsʉ natsikʉmpelela ʉmuunu ataagwe kʉvʉtale nʉ Ngʉlʉve.
18 Tʉlʉmanyile ʉkʉta ʉmuunu ʉvaveetsaga ʉvɨ aholilwe nʉ Ngʉlʉve,
nigendelela ʉkʉvomba imbiivi,
ʉlwakʉva ʉMwana va Ngʉlʉve ikʉmwʉvatɨla.
ɄSetano nakaweese ʉkʉvomba ɨkɨveetsaga ɨkya kʉndematsa ʉmuunu ʉjwa.
19 Tʉlʉmanyile ʉkʉta ʉwe tʉlɨ vaana va Ngʉlʉve,
nʉ kʉta avaanu avange vooni ʉwʉ navammanyili ʉNgʉlʉve vilongotsiwa nʉ Setano.
20 Ikange tʉlʉmanyile ʉkʉta ʉMwana va Ngʉlʉve amalile ʉkwitsa,
vɨ mwene atʉpye ʉvʉmanyi,
pakʉta tʉmmanye ʉNgʉlʉve va jɨlweli.
Pwʉ lɨno tʉlɨ nʉ vʉhange nʉ Ngʉlʉve va jɨlweli,
kʉ nzɨla jya kʉva nʉ vʉhange nʉ Mwana va mwene ʉYɨɨsʉ Kɨlɨsiti.
Ʉjʉ vɨ Ngʉlʉve va jɨlweli,
ikange vɨ wʉʉmi wa sikutsooni.
21 Vaana vango,
muveetsage miiho muleke ʉkwɨsaja kʉ sihwani sya mingʉlʉve.