Ʉkʉtaama mu lʉgano
5
1 Pwʉ,
mwɨgɨlɨlage kwa Ngʉlʉve,
ʉlwakʉva mulɨ vaana va mwene ʉwʉ avaganile siitso.
2 Mugananage ʉnsɨkɨ gwoni,
ndʉwʉ ʉKɨlɨsiti aatʉganile nʉ kʉswa kʉ nongwa tsiitu.
Ʉmwene ɨɨhʉmiitse ave neekelo jya kʉmmovosa ʉNgʉlʉve.
3 Kwʉ baako ʉnyie ʉkʉta mutsowaagwe mu mbombo tsa vʉligu,
tsa vʉlami pange ʉkʉva nɨ numbula ɨnya mwojo,
manya imbombo itso natsinogelaniili ʉkʉvombwa na vɨɨdɨki va Ngʉlʉve.
4 Ikange mulekage ʉkʉtsova amamenyu ga soni,
ga vʉtsimu pange ʉkʉtsova isʉngʉ imbiivi,
manya ago gooni naganogelaniili kʉ vakongi va Yɨɨsʉ.
Apeene munsaanage ʉNgʉlʉve ʉnsɨkɨ gwoni.
5 Pavanogye mulʉmanye ʉkʉta ʉmuunu ʉndigu,
evo ʉndami evo ʉnya mwojo,
alɨ ndʉ muunu ʉvɨ ikɨsaja kʉ mingʉlʉve.
Ʉjwa nalaave paninie na vaanu avilongotsiwa nʉ Kɨlɨsiti paninie nʉ Ngʉlʉve.
6 Muleke ʉkwɨdɨka ʉkʉsyowa nʉ muunu kʉ mamenyu ga mwene ga sʉngʉ imbiivi,
manya ʉNgʉlʉve alavapa ʉlʉvʉngʉ ʉlʉkali avaanu ʉwʉ navikʉmwɨdɨkɨla,
apeene vivomba imbombo itso imbiivi.
7 Pwʉ muleke ʉkʉva nʉ vʉnyange na vaanu avatulanongwa.
Ʉvʉtaamo wa vɨɨdɨki vʉveetsage ndʉ lʉmuli
8 Katale ʉnyie mwale mu ngʼiisi jya mbiivi,
lɨno ʉkʉhʉma ʉpwʉ mwɨɨdiike ʉkʉva vakongi va Ntwa ʉYɨɨsʉ,
mulɨ mu lʉmuli lwa wʉʉmi ʉvʉpya ni mbombo tsa vʉgolosu.
9 Avaanu avalɨ mu lʉmuli pavanogye vaveetsage nʉ lʉgendo ʉlʉnonu,
vavombage imbombo tsa vʉgolosu,
nʉ kʉtsova ʉwajɨlweli ʉnsɨkɨ gwoni.
10 Pwʉ lɨno mumanyilage isiinu isikʉmmovosa ʉNtwa,
pakʉta mutaamage ʉta vaanu ʉwʉ valɨ mu lʉmuli jɨlweli.
11 Muleke ʉkwɨhanza na vaanu avalɨ mu ngʼiisi jya mbiivi,
avivomba imbombo imbiivi.
Apeene mutsivɨɨkage pavʉvalasu imbombo itso imbiivi itsʉ vivomba.
12 Jɨlweli,
tsa soni ʉkʉtsova imbombo itsʉ vivomba kʉvʉtiitu avaanu avo.
13 Lɨno tsingavɨɨkwe pavʉvalasu,
tsivonekaga lwoni,
manya ʉlʉmuli lukʉtsimulikaga.
14 Ʉlʉmuli lwʉ lukʉsipelela isiinu sivonekage.
Ɨkɨ kyʉ mene avaanu viita,
“Sisimuka gwe ʉve vɨ ʉgoneelye!
Ʉmulikwe kʉmiiho,
ʉleke ʉkʉva ʉta nsimba.
Ʉmwene ʉKɨlɨsiti ikʉkʉmulikilaga.”
15 Pwʉ mulolage ʉmwʉ vʉveelye ʉvʉtaamo wiinyo.
Muleke ʉkʉtaama nda vatsimu.
Apeene muveetsage vanya lʉhala nʉ kʉvonia ʉlʉgendo ʉlʉnonu.
16 Vombagi imbombo inonu ʉnsɨkɨ ʉgʉveetsaga ʉgwʉ mwiva nʉ vʉlegeesu,
manya isigono isi siviivi.
17 Pwʉ lɨno mulekage ʉkʉva vatsimu,
apeene pilonda mugamanyage galya ʉgwʉ ʉNtwa inogwa muvombage.
18 Mulagaalaga,
manya ʉvʉgaatsi vunanga ʉwʉʉmi.
Apeene mulongotsiwaagwe nʉ Mepo va Ngʉlʉve.
19 Mumwɨmbɨlage izabuli,
inyɨmbo tsa mu sitabu ni nyɨmbo inyagʉlano.
Mumwɨmbɨlage ʉNtwa ʉYɨɨsʉ ni numbula tsiinyo tsyoni.
20 Ikange munsaanage ʉDaada ʉNgʉlʉve ʉnsɨkɨ gwoni kʉ syoni isyʉ muvomba,
ʉkʉkongana nɨ mbombo ɨjyavombile ʉYɨɨsʉ Kɨlɨsiti,
ʉNtwa viitu.
Ʉvʉtaamo ʉvʉnonu wa muunu nʉ nʼdala va mwene
21 Vɨɨdɨkivajyango,
pavanogye mwɨjisaage nʉ jyʉnge kʉ nnine manya mukʉnʼdwada ʉKɨlɨsiti.
22 Nyɨ vadala vapʉlɨkagi avagoosi viinyo,
ndʉwʉ mukʉmpʉlɨka ʉNtwa ʉYɨɨsʉ.
23 Manya ʉnʼgoosi vɨ mbahaa va nʼdala va mwene ndʉwʉ ʉKɨlɨsiti vɨ mbaha va vaanu va mwene,
ikange vɨ Mpoki va veene.
24 Pwʉ ʉnʼdala ʉvaveetsaga pannogye ampʉlɨkage ʉnʼgoosi va mwene kʉ kɨveetsaga,
ndʉwʉ avakongi va Kɨlɨsiti vikʉmpʉlɨka ʉKɨlɨsiti.
25 Nʉʉnyie nyɨ vagoosi,
vaganagi avadala viinyo ndʉwʉ ʉKɨlɨsiti avaganile avaanu va mwene ʉkʉsikila pa kɨgelelo kya kwɨhʉmya ʉkʉswa pa kʉvapoka.
26 Aasue pakʉta avɨɨmɨke avaanu va mwene kwa Ngʉlʉve,
na kʉ nzɨla jya lwotso nɨ limenyu lya mwene aavavaliitse,
27 vave vavalatse ikange vatsila vʉviivi.
Alavʉʉpɨlɨla avaanu va mwene ndʉwʉ ʉntegʉlanʼdala ikʉmwʉpɨlɨla ʉvitegʉlwa kʉ wɨɨmɨkiwa,
manya atsila vʉviivi ʉvʉveetsaga.
28 Ndʉwʉ ʉYɨɨsʉ avaganile avaanu va mwene,
ʉnʼgoosi ʉvaveetsaga namwene pannogye anʼganage ʉnʼdala va mwene.
Manya ʉvɨ ikʉnʼgana ʉnʼdala va mwene,
ikɨgana jyʉmwene.
29 Nakʉli ʉvɨ agʉsʉʉlile ʉmmana gwa mwene,
apeene ikʉgʉliisa nʉ kʉgʉloleela vʉnonu.
Vʉvʉle vʉle ʉKɨlɨsiti namwene ikʉtʉloleela vʉnonu ʉwe twɨ vaanu va mwene,
30 ʉlwakʉva tʉlɨ sipagɨka sya mmana gwa mwene.
31 Ndʉwʉ ʉVʉvɨge ʉVʉvalatse wiita,
“Ʉnʼgoosi iiva va kʉndeka ʉdadaaje nʉ vanyina,
ikɨhanzaaga nʉ nʼdala va mwene,
avaanu avo vavɨlɨ viveetsaga mmana mpamato.”b
32 Mu mamenyu aga mwʉvʉle ʉwajɨlweli ʉvʉsihamiike,
manya kulongwi tsa Kɨlɨsiti na vaanu va mwene.
33 Pwʉ ndikʉvavʉʉla ndiita,
ʉnʼgoosi ʉvaveetsaga pannogye anʼganage ʉnʼdala va mwene ndʉwʉ ikɨgana jyʉmwene,
namwene ʉnʼdala ʉvaveetsaga pannogye ampʉlɨkage ʉnʼgoosi va mwene.