Ʉvʉtaamo ʉvʉnonu wa vahotsi na vaana va veene
6
1 Nʉʉnyie nyɨ vaana nyɨ mulɨ vakongi va Ntwa ʉYɨɨsʉ,
vapʉlɨkagi avahotsi viinyo,
manya ɨlyo lyʉ ligolosu ikange lyʉ lɨnogelanie.
2 Ʉlʉlagɨlo ʉlʉtatsi ʉlʉlɨ nɨ nyʉʉve lwita,
“Ʉmwɨmɨkage ʉdadaajo nʉ jyʉva vaako,
3 pakʉta ʉsajiwe nʉ kʉtaama siitso mu kɨlʉnga.”a
4 Najyʉnyie nyɨ vahotsi nyɨ vagoosi,
muleke ʉkʉvaviipitsa avaana viinyo,
apeene muvalelage mu lʉgendo ʉlʉnonu nʉ kʉvamanyiisa ikulongwi tsa Ntwa ʉYɨɨsʉ.
Ʉvʉtaamo ʉvʉnonu wa vavanda na vatwa va veene
5 Ʉnyie nyɨ vavanda pavanogye ʉkʉvapʉlɨka avatwa viinyo ʉwʉ mukʉvavombela mu kɨlʉnga ʉmʉ.
Muvapʉlɨkage nʉ kʉvɨɨmɨka kʉ numbula jyoni,
ndʉwʉ mukʉmpʉlɨka ʉKɨlɨsiti.
6 Muleke ʉkʉvomba vʉnonu peene wʉ vikʉvavona,
pakʉta vavaginie.
Baako!
Apeene vombagi ndʉwʉ ʉNgʉlʉve inogwa,
ʉlwakʉva mulɨ vavanda va Kɨlɨsiti.
7 Muvavombelage kʉ numbula jyoni,
nda vikʉmbombela ʉNtwa ʉYɨɨsʉ,
jɨleke ʉkʉva nda vikʉvavombela avaanu.
8 Pavanogye mulʉmanye ʉkʉta ʉNtwa alampa ʉlʉhombo ʉmuunu nʉ muunu kʉ mbombo jya mwene ɨnonu ɨjyʉ ivomba,
ave mbanda evo mbopolwa.
9 Nʉʉnyie nyɨ vatwa va vavanda,
muvavombelage vʉnonu avavanda viinyo,
mulekage ʉkʉvadwatsa.
Manya ʉnyie nyɨ vooni ʉNtwa viinyo alɨ mpamato,
ʉmwene alɨ kʉkyanya.
Ʉvʉhɨgi wa mwene vʉlʉngiime,
nitengelela ʉmuunu ʉvaveetsaga.
Ɨnzɨla jya kʉlwa ɨligoha lya Setano
10 Kʉ vʉmalɨlo,
munywilile pa kʉmwɨdɨka ʉNtwa ʉYɨɨsʉ nʉ kʉhʉʉvɨla amaka ga mwene amalʉti.
11 Muswalage isilwɨlo syoni sya ligoha isyʉ mupeewa nʉ Ngʉlʉve,
pakʉta mwɨloleelage kʉ vʉsumbe ʉvʉviivi wa Setano.
12 Manya natwilwa ɨligoha na vaanu.
Apeene twilwa ni mepo imbiivi itsinya maka,
itsilongotsa ɨkɨlʉnga ɨkɨ ɨkya ngʼiisi,
ni sipʉga sya mepo imbiivi itsilɨ mu vʉtandaatse.
13 Pwʉ lɨno tooli isilwɨlo syoni sya ligoha isyʉ mupeewa nʉ Ngʉlʉve,
pakʉta nʉpwʉ ɨngave ɨligoha liiva litalamu,
muleke ʉkʉlemwa.
Pwʉ kʉ vʉmalɨlo ɨligoha wʉ lɨsilile,
mutsige vakangasu.
14 Mutaamage miiho kʉ nzɨla jya kʉkonga ʉwajɨlweli wa Ngʉlʉve.
Ʉwajɨlweli ʉwa vuveetsaga ʉta mikanda ɨgyʉ avasikali vikɨpinya mu sivino sya veene.
Ʉvʉtaamo wiinyo wa kʉkonga ʉvʉgolosu vukʉvasigililaga ʉta kɨsigakɨpambaga ɨkya kyʉma.
15 Ikange ɨLivangɨli lya Yɨɨsʉ ɨlipela ʉlʉnotsehetso lɨveetsage ʉta silaatu,
pakʉta mwɨmage mulɨ vakangasu.
16 Paninie niisyo syoni,
mwibatage ʉlwɨdɨko ʉta ngwembe nengaligoha.
Ɨjyene ɨjyo jisigaga isilwɨlo sya ndʉgʉ ʉSetano sileke ʉkʉvalematsa ʉnyie.
17 Ʉpɨlɨlagi ʉvʉpoki ʉvʉlɨ ndɨ kɨtili kya kyʉma.
Ikange mwibatage ɨlimenyu lya Ngʉlʉve,
lɨveetsage ʉta lipanga ɨlyʉ mupeewa nʉ Mepo va Ngʉlʉve.
18 Pwʉ vɨɨdɨkivajyango,
doovagi ʉnsɨkɨ gwoni ndʉwʉ ʉMepo va Ngʉlʉve ikʉvalongotsa.
Munʼdoovage ʉNgʉlʉve pakʉta avatange mu mbombo tsyoni.
Mwɨjʉmɨɨlɨtsaage ʉkʉdoova,
ikange muleke ʉkʉgatala ʉkʉvadoovela avaanu vooni va Ngʉlʉve.
19 Mundoovelage najyʉne pakʉta ʉNgʉlʉve aame amamenyu ga kʉtsova kɨtsila lʉdwado ikulongwi itsisihamiike itsa Livangɨli.
20 Ʉkʉhʉmana nɨ mbombo jya kʉlʉmbɨlɨla ɨLivangɨli,
ʉlʉ lɨno ndɨlɨ mu kɨkʉngwa.
Napeene ndigendelela ʉkʉlʉmbɨlɨla ndʉ mbombi va Ngʉlʉve.
Pwʉ ndoovelagi pakʉta ndɨgendelelage ʉkʉlʉmbɨlɨla kɨtsila kʉdwada kɨɨnu.
Amamenyu ga Paulo ga kʉ vʉmalɨlo
21 Ʉmwɨdɨkinʼjiitu ʉTikiko ʉnʼgane,
ʉmbombi ʉmmʉʉgʉ va Ntwa ʉYɨɨsʉ,
jiikʉvavʉʉla ʉmwʉ ndigendelela ni kulongwi tsyoni itsʉ ndivomba.
22 Ʉvʉsumbe wa kʉnsuungʼa ʉTikiko kwanyie ndinogwa avavʉʉle ʉnyie ikulongwi tsiitu nʉ kʉvanywilitsa ʉnyie mu numbula.