Avakongi va Yɨɨsʉ pavanogye ʉkʉva kɨɨnu kɨpamato
4
1 Lɨno ʉne ndɨ ndɨlɨ nkʉngwa ʉkʉhʉmana nɨ mbombo ɨjyʉ ndikʉmbombela ʉNtwa ʉYɨɨsʉ,
ndikʉvasiima muve nʉ lʉgendo ʉlukʉmmovosa ʉNgʉlʉve.
Pavanogye mutaamage mu lʉgendo ʉlukʉmmovosa ʉNgʉlʉve ʉlwakʉva ʉmwene avahalile ʉnyie.
2 Mwɨlekelwe lwoni ʉkwɨginia.
Apeene muveetsage vaanu avanyavʉmuunu,
avanya lwɨjiso,
avadeke nʉ wʉ visipilanila nʉ kʉsyɨkɨlanila kʉ lʉgano.
3 Ikange mwɨkupilage ʉnsɨkɨ gwoni ʉkʉvʉloleela ʉvʉhange ʉwʉ atʉpye ʉMepo va Ngʉlʉve.
Vombagi ɨlyo kʉ nzɨla jya kʉtaama nʉ lʉnotsehetso.
4 Ʉwe twɨ vooni tʉlɨ mmana mpamato,
twʉpɨlye ʉMepo mpamato,
ikange twahʉʉvɨtsiiwe ʉkʉta kʉmbele tʉlaava nʉ lʉhekelo ʉlʉlʉti.
5 Tʉlɨ nave ʉNtwa mpamato,
ʉlwɨdɨko lʉpamato nʉ lwotso lʉpamato.
6 ɄNgʉlʉve alɨ mpamato,
ʉmwene vɨ Dadajiitu twɨ vooni.
Ikʉtʉlongotsa,
ikʉtʉpa amaka ga kʉvomba ɨmbombo jya mwene,
ikange alɨ mu numbula tsiitu.
7 Lɨno ʉmuunu nʉ muunu apeevilwe ɨkɨkʉngɨlwa kya mwene ʉkʉkongana nʉ mwʉ ʉKɨlɨsiti aanogilwe ʉkʉmpa.
8 Ɨkɨ kyʉ mene ʉVʉvɨge ʉVʉvalatse wiita,
“Ʉpwʉ aalʉtile kʉkyanya,
aalʉtile na vagalʉlwa vongosu,
ikange akavagavɨla avaanu va mwene isikʉngɨlwa.”a
9 (Lɨno ʉkʉta “aalʉtile kʉkyanya” kwʉ kʉta kɨki?
Kwʉ kʉta ndee,
pa vʉtengʉlɨlo iikile kʉ vʉtsʉʉka.b
10 Pwʉ ʉmwene ʉvɨ iikile kʉ vʉtsʉʉka vɨ aatogile kʉkyanya,
pakʉta avonie ʉkʉta ʉmwene alɨ mwoni mwoni.)
11 Ʉmwene vɨ aavapye avaanu isikʉngɨlwa.
Akagava avange vave vapositili,
avange vanyamalago,
avange valʉmbɨlɨli va Livangɨli,
avange vave vateeketsi na vamanyisi va limenyu lya Ngʉlʉve.
12 Aagavile ewo isikʉngɨlwa isyo sive sya kʉvatetengʼania avɨɨdɨki va Ngʉlʉve pakʉta vagʉvombelage nʉ kʉgʉtsenga ʉmpelela.c
13 Pwʉ lɨno aga gitsiga pwʉgale ʉkʉsikila ʉpwʉ ʉlwɨdɨko lwitu twɨ vooni lwiva lʉpamato nʉ kʉmmanya ʉMwana va Ngʉlʉve,
pakʉta tʉdʉlʉke mu numbula nʉ kʉnogelanila ndʉ Kɨlɨsiti.
14 Apo natʉkajyembeelage ni manyiiso tsa vʉnuasi ʉta vaana.
Ikange,
natʉkasyowaagwe na vaanu ʉwʉ kʉ manyiiso tsa veene,
vikʉvapelela avaanu avange vavombe imbiivi.
Avo vikʉvavɨɨka avaanu vave ʉta waato ʉwʉ ʉnkuluguuto gujʉtsaania kʉnʉ na kʉnʉ mu nyanza.
15 Lɨno tʉvʉbadame ʉwajɨlweli kʉ nzɨla jya kʉganana,
pakʉta ʉwe twɨ vɨɨdɨki va Kɨlɨsiti tʉve ndʉ mwene kʉ siinu syoni.
Ʉmwene vɨ ntwe
16 ni sipagɨka syoni sikwibatana nʉ kʉva mmana mpamato.
Ɨkɨpagɨka nɨ kɨpagɨka kivomba ɨmbombo jya kyene,
kitangana nʉ kʉganana ni sipagɨka isinge,
pakʉta ʉmmana ʉnʼgʉge gʉgendelelage ʉkʉkʉla.
Avakongi va Yɨɨsʉ pavanogye vave nʉ lʉgendo ʉlʉpya
17 Pwʉ vɨɨdɨkivajyango,
ndikʉvapa ɨlivʉngʉ ndʉ mpositili va Ntwa ʉYɨɨsʉ.
Muleke ʉkʉtaama ikange ʉta vaanu ʉwʉ navammanyili ʉNgʉlʉve,
ʉwʉ amasaago ga veene ga vʉtsimu.
18 Mulʉmanye ʉkʉta avaanu va mu ngʼiisi jya vʉtulanongwa navavʉmanyili ʉwajɨlweli wa Ngʉlʉve.
Avaanu avo valɨ kʉvʉtale nʉ wʉʉmi ʉwʉ ʉNgʉlʉve ikʉvapa avaanu va mwene,
manya navatsimanyili inzɨla tsa mwene ikange valɨ na matingo mu numbula tsa veene.
19 Aveene navivona soni napadebe ʉkʉvomba ʉvʉligu ikange vakiliitye mu vʉpʉmu,
valɨ nyango ʉkʉvomba imbombo imbiivi itsinge itsilɨ pongosu.
20 Lɨno ʉnyie namwamanyiisiiwe ewo ʉkʉhʉma kwa Kɨlɨsiti,
21 ʉvɨ vɨ vʉtengʉlɨlo wa wajɨlweli.
Ndɨlʉmanyile jɨlweli ʉkʉta mwamanyiisiiwe nʉ kʉpʉlɨka ikulongwi tsa mwene ʉYɨɨsʉ.
22 Mwamanyiisiiwe mulʉleke ʉlʉgendo ni nzɨla tsiinyo imbiivi tsa vʉmuunu wa katale wa vʉtulanongwa itsʉ mwale natso kʉnsana ʉkwa.
Itso tsyavajatsaaga mukongage ʉvʉnogwe wiinyo ʉvʉviivi ʉvukʉvapelela ʉlwongometso.
23 Pwʉ lɨno mwandʉke inumbula tsiinyo na masaago giinyo,
sive sipya.
24 Ikange muvoniage ʉlʉgendo ʉlʉpya,
manya mwapelilwe kʉ kɨhwani kya Ngʉlʉve,
ʉvɨ inʼgolosu jɨlweli ikange imbalatse.
25 Muleke ʉkʉva vanuasi.
Ʉmuunu nʉ muunu pannogye ambʉʉlage ʉnnine ʉwajɨlweli,
manya twɨ vooni tʉlɨ sipagɨka sya mmana mpamato.d
26 Mungaviipe,
mwɨsigage ʉkʉvomba imbiivi.
e Mulekage ʉkʉtaama nʉ lʉviipo ʉkʉsika ʉpwʉ liseema ɨlitsʉva,
27 ikange muleke ʉkʉmpa ʉnsɨkɨ ʉSetano gwa kʉvalema ʉnyie.
28 Ʉndyasi ɨlekelwe ʉkʉhɨɨtsa ikange,
apeene avombage imbombo inonu,
pakʉta akavage isiinu sya mwene ni sya kʉvapa avikwagɨlwa.
29 Mulekage ʉkʉtsova amamenyu agilematsa avange,
apeene mutsovage amamenyu amanonu agikʉvatsenga avikʉgapʉlɨka,
pakʉta gave nʉ lʉtangɨlo kʉ veene.
30 Muleke ʉkʉmpelela ʉlʉsʉsʉvalo ʉMepo ʉMbalatse va Ngʉlʉve ʉvɨ ʉmwene vɨ kɨɨnu ɨkivonia ʉkʉta mulɨ vɨɨdɨki va Ngʉlʉve.
ɄMepo ʉjwa vɨ ivonia ʉkʉta kɨliitsa ɨkɨgono ɨkyʉ ʉNgʉlʉve alavapoka ʉnyie.
31 Pwʉ mwɨlekelwe lwoni ʉkʉva vaanu avanya lʉviipo,
avanya ligoga,
avanya kɨsilaani,
avanya mbatsa nʉ vʉgalo na vanya madʉsi,
pange ʉkʉvombelanila imbombo imbiivi itsilɨ pongosu.
32 Apeene muveetsage vaanu avikolelanila ɨkɨsa nʉ kʉvombelanila inonu.
Musyɨkɨlanilage ndʉwʉ ʉNgʉlʉve aavasyɨkye ʉnyie kʉ nzɨla jya Kɨlɨsiti.