ɄPaulo ipʉlɨsa ʉvʉsumbe wa Ngʉlʉve
3
1 Ʉne ndɨ Paulo,
ndɨ ndɨlɨ nkʉngwa kʉ nongwa jya kʉpʉlɨsa ɨLivangɨli lya Mesiya ʉYɨɨsʉ kwanyie,
nyɨ vaanu nyɨ mutava Vayahudi,
ndikʉvadoovela kwa Ngʉlʉve.
2 Ndɨlʉmanyile jɨlweli ʉkʉta mwamalile ʉkʉpʉlɨka ʉkʉta ʉNgʉlʉve aamye ʉne ɨmbombo jya kʉlʉmbɨlɨla ikulongwi tsa lʉhʉngʉ lwa mwene kʉ nyɨ mutava Vayahudi.
3 Ndʉwʉ ndyatalile ʉkʉvavʉʉlaa kʉ vʉsupi,
ʉNgʉlʉve aambʉʉlile ʉne ikulongwi tsa mwene itsʉ avaanu navaatsimanye.
4 Mungɨmbe amamenyu aga ʉgwʉ ndɨvavɨgye,
jʉmukʉlʉmanya ʉmwʉ ndɨlʉmanyie ikulongwi itso itsa Kɨlɨsiti itsʉ avaanu navaatsimanye.
5 Ʉkʉhʉma katale ʉNgʉlʉve navɨɨke pavʉvalasu ikulongwi itso.
Avaanu va katale navaatsimanye itsi.
Lɨno kʉmbele,
kʉ nzɨla jya Mepo va mwene,
avavoniitse ikulongwi itso avapositili na vanyamalago va mwene avavalatse.
6 Itsi tsʉ kulongwi itso itsa kʉvʉtiitu tsa Ngʉlʉve:
Ʉkʉvavɨɨka aVayahudi na vatava Vayahudi vave vaana va mwene,
vave sipagɨka sya mmana mpamato.
Pwʉ lɨno avaanu avatava Vayahudi naveene viweesa ʉkʉpeewa isiinu isyʉ ʉNgʉlʉve aavahʉʉviitse avaanu va mwene kʉ nzɨla jya kwɨdɨka ɨLivangɨli lya Mesiya ʉYɨɨsʉ.
7-8 ɄNgʉlʉve aamye ɨmbombo jya kʉpʉlɨsa ɨLivangɨli ɨlyo kʉ vaanu avatava Vayahudi.
Ɨlyene ɨlyo lɨlɨ nʉ vʉmosu ʉvʉtsila kɨgelelo ʉwihʉmya ʉYɨɨsʉ Kɨlɨsiti.
Nʉpwʉ jɨngave nandɨnogiili kʉ vavalatse vooni va Ngʉlʉve,
lɨno ʉNgʉlʉve aavombile ewo kʉ kɨsa na maka ga mwene amalʉti.
9 ɄNgʉlʉve ʉMpeli va siinu syoni,
aannyalile ʉne ndɨvavʉʉlage avaanu vooni ʉmwʉ tsivombekela ikulongwi itsi itsʉ natsyamanyikike kʉ vaanu ʉkʉhʉma katale.
10 Lɨno ʉNgʉlʉve kʉ nzɨla jya vampelela,
ikɨvonia kʉ sipeliwa syoni isilongotsa ni syʉ silɨ nʉ vʉtavʉlɨlwa ʉkʉ kʉkyanya ʉmwʉ aveelye nʉ lʉhala lwongosu.
11 Ʉwa wʉ vʉsumbe wa Ngʉlʉve ʉkʉhʉma kʉ vʉtengʉlɨlo.
Ʉweene ʉwa waavombiike kʉ nzɨla jya mbombo ɨjyavombilwe nʉ Mesiya ʉYɨɨsʉ,
ʉNtwa viitu.
12 Kʉ nzɨla jya kʉmwɨdɨka nʉ kwɨhanza nave,
tʉlʉmanyile jɨlweli ʉkʉta tʉlasika pamiiho pa Ngʉlʉve kɨtsila lʉdwado.
13 Pwʉ muleke ʉkʉnyongʼonyoka amaka mu numbula tsiinyo kʉ vʉkʉvɨlwa ʉwʉ vukʉmbona ʉne pa kulongwi tsyanyie.
b Aga givonia ʉkʉta mulɨ vaanu vɨɨmɨkiwa.
ɄPaulo ikʉvadoovela avɨɨdɨki va Ngʉlʉve
14 Wʉ ndisaaga itso tsyoni itsʉ ʉNgʉlʉve avombile,
ndisugama nʉ kʉnsaana ʉDaada,
15 ʉMpeli va siinu syoni isyʉ silɨ kʉkyanya ni syʉ silɨ mu kɨlʉnga.c
16 Ndikʉnʼdoova ʉNgʉlʉve ʉkʉta,
kʉ maka ga Mepo va mwene,
avape ʉvʉdʉlʉsu wa numbula tsiinyo ʉkʉkongana nʉ wɨɨmɨkiwa wa vʉmosu wa mwene ʉvʉlʉti.
17 Ikange ndikʉvadoovela ʉkʉta,
kʉ nzɨla jya lwɨdɨko,
ʉKɨlɨsiti ataamage mu numbula tsiinyo.
Apo pwʉ ʉlʉgano lwa mwene jʉlukʉvapa amaka ga kʉnywilila ʉngata mʼbɨkɨ ʉgʉtotiike siitso ɨmilela gya gwene pa mmanga,
evo ʉngata nyumba ɨjɨtsengilwe pa lwʉtʉ ʉlʉkangasu.
18 ɄNgʉlʉve avatange ʉnyie paninie na vaanu va mwene vooni ʉkʉlʉmanya ʉlʉgano lwa Kɨlɨsiti ʉmwʉ lʉveelye.
Manya atʉganile kʉ lʉgano ʉlʉtsila kɨgelelo.
19 Ndilonda mwɨpʉlɨke mu wʉʉmi wiinyo ʉlʉgano lwa Kɨlɨsiti ʉmwʉ lʉveelye lʉlʉti kwawe,
nʉpwʉ ndakʉve kʉtalamu kʉ muunu ʉkʉlɨvona ɨlyo.
Ndikʉvadoovela ʉkʉta ʉNgʉlʉve avapeetsage tsyoni itsʉ inogwa avaanu va mwene vave natso.
20 ɄNgʉlʉve aginiwaagwe pa kulongwi jya maka ga mwene ga kʉdega agivomba ɨmbombo mu nʼgati mwawe!
Jɨlweli iweesa ʉkʉtʉvombela isiinu isivaha siitso ʉkʉlʉtɨɨlɨla isyʉ tudoova nʉ kʉsaaga!
21 ɄNgʉlʉve aginiwaagwe na vaanu va mwene pa kulongwi jya mbombo jya Mesiya ʉYɨɨsʉ,
sikutsooni na sikutsooni!
Ameni.