Avɨɨdɨki vipokwa kʉ lʉhʉngʉ lwa Ngʉlʉve
2
1 Nʉʉnyie mwale vaanu avaswe kʉ nongwa jya vʉjagi wiinyo ni mbiivi tsiinyo.
2 Ʉnsɨkɨ ʉgwa,
mwakongaga imbombo imbiivi tsa kɨlʉnga nʉ kʉmwɨdɨkɨla ʉSetano.
Ʉjʉ vɨ ndongotsi va mepo imbiivi na vaanu ʉwʉ navikʉnkonga ʉNgʉlʉve.
3 Ʉwe twɨ vooni ʉvʉtaamo wiitu waale nda vaanu avo.
Twakongaga ʉvʉnogwe wiitu wa mbiivi na masaago giitu ga vʉmuunu.
Twɨ vooni twalotsaaga kʉ lʉvʉngʉ ʉlʉkali lwa Ngʉlʉve.
4 Lɨno,
ʉNgʉlʉve alɨ nɨ kɨsa kyongosu.
Ikange kʉ nongwa jya lʉgano lwa mwene ʉlʉlʉti,
5 aatʉpye ʉwʉʉmi wa sikutsooni palya ʉpwʉ aantsʉʉsiitse ʉKɨlɨsiti.
Aavombile ewo nʉpwʉ jɨngave twale nda vaanu avaswe ʉkʉhʉmana nʉ vʉtulanongwa wiitu.
Lɨno,
tʉpokilwe kʉ lʉhʉngʉ lwa Ngʉlʉve.
6 Kʉ nzɨla jya kʉhanzwa nʉ Mesiya ʉYɨɨsʉ,
twatsʉʉsiiwe nʉ kʉpeewa ʉvʉtavʉlɨlwa kʉkyanya wa kʉlongotsa paninie nʉ mwene.
7 ɄNgʉlʉve aavombile imbombo itso tsyoni pakʉta ʉvʉmosu wa mwene ʉvʉlʉti nɨ kɨsa kya mwene ɨkɨtsila kɨgelelo,
sivonekage sikutsooni.
Ʉmwene aatʉkolye ɨkɨsa,
akatʉvonia ʉwiipa wa mwene kʉ nzɨla jya galya ʉgwʉ aatʉvombye ʉMesiya ʉYɨɨsʉ.
8 Mwapokilwe kʉ lʉhʉngʉ lwa Ngʉlʉve ʉpwʉ mwamwɨdiike ʉYɨɨsʉ.
Ʉvʉpoki ʉwa navuhʉmana ni mbombo tsiinyo,
apeene kɨpeetsano vʉvʉle ʉkʉhʉma kwa Ngʉlʉve.
9 Manya ʉvʉpoki ʉwa nalʉhombo lwa mbombo tsiinyo inonu itsʉ muvombile,
ʉmuunu ʉvaveetsaga aleke ʉkwɨginia.
10 Ʉwe tʉlɨ sipeliwa sya Ngʉlʉve,
twɨ atʉhanziitse nʉ Mesiya ʉYɨɨsʉ,
pakʉta tʉvombage imbombo inonu itsʉ aatʉsaagɨlye ʉkʉhʉma katale.
Avaanu vooni avikʉmwɨdɨka ʉYɨɨsʉ valɨ kɨɨnu kɨpamato
11 Pwʉ lɨno,
ʉnyie nyɨ namwaholwe Vayahudi,
mwɨmanye ʉmwʉ muveelye.
Mulʉmanyile ʉkʉta aVayahudi valɨ nɨ kya kwɨginihitsa ɨkihʉma mu kʉtahiliwa kwa veene ʉkʉta wʉ vaanu va Ngʉlʉve.
Aveene vikʉvavonela ʉnyie nyɨ mutava Vayahudi ʉlwakʉva mutsila kɨmanyilo ɨkɨveetsaga ɨkivonia ʉkʉta najyʉnyie mulɨ vaanu va Ngʉlʉve.
Lɨno ʉkʉtahiliwa ʉkwa mbombo vʉvʉle ɨjivombwa na vaanu.a
12 Ʉnsɨkɨ ʉgwa namwammanye ʉKɨlɨsiti.
Mwale ʉta vahenza manya mwale mutsila ligavo mu siinu sya vaanu va Ngʉlʉve,
kwʉ kʉta aVaisilahɨli.
Avaanu avo wʉ vaapeevilwe ʉlʉhʉngʉ nʉ Ngʉlʉve ʉkʉkongana nʉ lwɨdɨngʼano lwa mwene.
Lɨno ʉnyie namwale mu lwɨdɨngʼano ʉlwa.
Ikange mwataamaga mu kɨlʉnga kɨtsila lʉhʉʉvɨlo pange kʉmmanya ʉNgʉlʉve.
13 Mwale kʉvʉtale nʉ Ngʉlʉve.
Lɨno kʉ nongwa jya kʉhanzwa nʉ Mesiya ʉYɨɨsʉ,
ʉvɨ aasue pa kɨdamingʼanie,
muhegeliitswe pawiipi.
14 Pwʉ lɨno,
ʉYɨɨsʉ jyʉmwene aatʉpelye ʉlʉnotsehetso kʉ nzɨla jya kʉvahanza paninie aVayahudi na vatava Vayahudi.
Aatʉvɨɨkile tʉve kɨɨnu kɨpamato kʉ nzɨla jya kʉhetsa ʉvʉsʉʉlani ʉwaale pagati paawe.
15 Indagɨlo tsa Kɨyahudi tsilɨ ni sipagɨka syongosu.
Lɨno,
ʉYɨɨsʉ ʉpwʉ aasue,
aatsijatsiitse lwoni.
Akatʉhanza nʉ mwene pakʉta aVayahudi na valya avatava Vayahudi vave kɨpʉga kɨpamato ɨkɨpya.
Akatʉpa ʉlʉnotsehetso
16 nʉ kʉhetsa ʉvʉsʉʉlani lwoni kʉ nzɨla jya kʉtʉswɨla pa kɨdamingʼanie.
Akatʉsajania nʉ Ngʉlʉve.
17 Ʉmwene iitsile akalʉmbɨlɨla ɨLivangɨli lya lʉnotsehetso kwanyie nyɨ mutava Vayahudi nyɨ mwale kʉvʉtale nʉ Ngʉlʉve paninie na Vayahudi avaale pawiipi nʉ mwene.
18 Manya galya ʉgwʉ aatʉvombye ʉYɨɨsʉ,
gikʉvavɨɨka aVayahudi na vaanu avatava Vayahudi vaweese ʉkʉsika kwa Ngʉlʉve ʉDaada kʉ lʉtangɨlo lwa Mepo jyʉjwa mpamato.
19 Pwʉ,
ʉnyie nyɨ vaanu nyɨ mutava Vayahudi namulɨ vahenza ikange.
Apeene mulɨ vaana va Ngʉlʉve ikange venenyumba paninie na vɨɨdɨki va Ngʉlʉve.
20 Tʉvye ʉngata maganga agaatsengilwe pa waalo wa vanyamalago na vapositili.
ɄMesiya ʉYɨɨsʉ jyʉmwene vɨ liganga lya pa nguto.b
21 Ikange vɨ mwene ikʉjyaganitsa ɨnyumba jyoni nʉ kʉjɨpelela jiibatane.
Ikʉjɨvɨɨka jɨve Vʉtaamo ʉVʉvalatse wa Ntwa ʉNgʉlʉve.
22 Pwʉ,
pa kulongwi jya kʉhanzwa nʉ Ntwa ʉYɨɨsʉ,
ʉnyie nyɨ vaanu nyɨ mutava Vayahudi,
mwaganiitswe mu nyumba ɨjyo ɨjyʉ itaama ʉNgʉlʉve kʉ nzɨla jya Mepo ʉMbalatse va mwene.