Ɨkalata jya Paulo
kʉ Vaefeso
1
1 Ɨkalata ɨjɨ jɨhʉmile kwane,
ʉne ndɨ Paulo,
ndɨ ʉNgʉlʉve annyɨlangile pa vʉnogwe wa mwene ndɨve mpositili va Mesiya ʉYɨɨsʉ.
Ndikʉvavɨgɨla ʉnyie nyɨ vɨɨdɨki va Ngʉlʉve nyɨ mutaama mu vʉtsenge wa Efeso,
a nyɨ mulɨ vakongi vahʉʉgʉ va Mesiya ʉYɨɨsʉ.
2 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu na kʉ Ntwa ʉYɨɨsʉ Kɨlɨsiti,
siveetsage nʉʉnyie.
ɄNgʉlʉve aginiwaagwe kʉ mbombo jya mwene jya vʉpoki
3 Aginiwaagwe ʉNgʉlʉve ʉDadaaje va Ntwa viitu ʉYɨɨsʉ Kɨlɨsiti ʉvɨ ikʉtʉpa isajo tsyoni ʉkʉhʉma kʉkyanyab itsikʉtʉtanga mu Vʉkɨlɨsiti.
4 ɄNgʉlʉve aatʉhalile tʉve vaanu va Yɨɨsʉ.
Aatʉhalile wʉ akaanale ʉkʉpela ɨkɨlʉnga,
pakʉta tʉve vavalatse ikange tʉtsila vʉviivi pamiiho pa mwene.
5 ɄNgʉlʉve ʉkʉhʉma pa vʉtengʉlɨlo aalamwe ʉkʉtʉvɨɨka tʉve vaana va mwene.
Aavombile ewo kʉ nzɨla jya Yɨɨsʉ Kɨlɨsiti,
manya ɨlyo lyʉ lyankeelye ikange lyʉ lyale wʉ vʉnogwe wa mwene.
6 Pwʉ tʉnʼginie ʉNgʉlʉve kʉ kɨsa ɨkɨlʉti ɨkyʉ atʉpye ʉkʉgendela mu galya ʉgwʉ avombile ʉMwana va mwene ʉnʼgane.
7 Lola,
ʉkʉgendela mwa Yɨɨsʉ ʉvɨ aasue pa kɨdamingʼanie,
tʉgombwilwe nʉ kʉsyɨkɨlwa imbiivi tsiitu.
Aga givonia ʉlʉhʉngʉ ʉlʉlʉti nɨ kɨsa ɨkɨlʉti kya Ngʉlʉve
8 ɨkyʉ aatʉpye kɨtsila kɨgelelo,
ikange mu lʉhala nʉ vʉmanyi wa mwene.
9 Ʉmwene vɨ aatʉpelye tʉgamanye amasaago ga mwene ga kʉvʉtiitu ʉgwʉ aasaagile ʉkʉhʉma katale ʉkʉkongana nʉ mwʉ aaweene jinogelanila kʉ mwene.
Aalamwe ʉkʉta kʉ nzɨla jya Kɨlɨsiti
10 giitse gavombeke amasaago ago wʉ ʉnsɨkɨ gwa geene gʉsiike.
Kwʉ kʉta alalʉndamania isiinu syoni paninie,
isilɨ kʉkyanya ni silɨ mu kɨlʉnga nʉ Kɨlɨsiti vɨ alaava vɨ ndongotsi ʉndʉti va syoni.
11 Isiinu syoni sivombeka ʉkʉkongana nʉ lʉvaatɨko nʉ vʉlamutsi wa Ngʉlʉve.
Ʉmwene aalamwe ʉkʉhʉma katale ʉkʉtʉhala tʉve vaanu va mwene kʉ nzɨla jya kʉtwaganitsa nʉ Yɨɨsʉ.
12 Lɨno ʉwe twɨ Vayahudi twɨ vatatsi pa kʉmwɨdɨka ʉKɨlɨsiti,
patʉnogye ʉkʉnʼginia ʉNgʉlʉve pa wɨɨmɨkiwa wa mwene.
13 Ʉnyie nyɨ mutava Vayahudi,
palya ʉpwʉ mwapʉliike amamenyu ga jɨlweli,
kwʉ kʉta ɨLivangɨli ɨlikʉvapa ʉvʉpoki,
mwapelilwe vɨɨdɨki va Ngʉlʉve.
Pwʉ ʉmwene akavɨɨka kwanyie ɨkɨkolekelo kya Mepo va mwene ʉvɨ aatʉhʉʉviitse pa kʉvonia ʉkʉta mulɨ va mwene.
14 ɄNgʉlʉve aatʉpɨngɨkye ʉMepo va mwene ʉkʉsikila ʉpwʉ alatʉgombola lwoni,
tʉve vaanu va mwene,
tʉnʼginiage pa wɨɨmɨkiwa wa mwene.
ɄYɨɨsʉ alɨ na maka ikange alakwɨtsa isiinu syoni
15 Vɨɨdɨkivajyango,
ndɨpʉliike ikulongwi tsa lwɨdɨko lwinyo kʉ Ntwa ʉYɨɨsʉ ni tsa lʉgano lwinyo kʉ vaanu vooni va Ngʉlʉve.
Ʉkʉhʉmana nɨɨlyo
16 nandɨdugili ʉkʉnsaana ʉNgʉlʉve pa kulongwi tsyanyie,
pange ʉkwɨlekelwa ʉkʉvadoovela.
17 Ndikʉnʼdoova ʉNgʉlʉve ʉvɨ ʉNtwa viitu ʉYɨɨsʉ Kɨlɨsiti ikʉmwɨmɨka,
avape ʉMepo ʉMbalatse.
Ʉjwa vɨ mwene jiikʉvapa ʉlʉhala nʉ vʉmanyi wa kʉmmanya ʉmwaveelye.
18 Ikange ndidoova ʉNgʉlʉve avape ʉkʉvʉmanya ʉwajɨlweli wa mwene mu numbula tsiinyo,
pakʉta musimanye silya isyʉ twɨ vɨɨdɨki tuhʉʉvɨla ʉkwʉpɨlɨla,
manya ʉmwene aatʉhalile tʉve va mwene,
kwʉ kʉta mulʉmanye ʉmwʉ ʉNgʉlʉve alavapeela avaanu va mwene ʉvʉhaale wa kʉdega ʉwʉ aavahʉʉviitse.
19 Ikange ndikʉvadoovela mulʉmanye ʉmwʉ ʉNgʉlʉve kʉ maka ga mwene amalʉti ikʉtwɨmɨla twɨ tugendelela ʉkʉmmʉʉvɨla ʉYɨɨsʉ.
Ikʉtwɨmɨla kʉ maka ago amalʉti
20 ndʉwʉ aavombile pa nsɨkɨ ʉpwʉ aantsʉʉsiitse ʉKɨlɨsiti ʉkʉhʉma kʉ vaswe.
Kʉ nzɨla jya maka ago,
aambɨɨkile kʉ kɨvoko kya mwene kya kʉndyo,
apoonu pa wɨɨmɨkiwa ʉvʉlʉti,
ʉkʉ kʉkyanya.
21 Lɨno ʉYɨɨsʉ vɨ ndʉti ʉkʉlʉtɨɨlɨla avatwa vooni,
ʉvʉtavʉlɨlwa wooni,
amaka gooni nʉ vʉlongotsi wooni,
nakwʉ kʉta mu nsɨkɨ ʉgʉ gwene,
apeene lɨno na sikutsooni.
22 ɄNgʉlʉve aampye ʉvʉtavʉlɨlwa wa kʉlongotsa isiinu syoni,
ikange vɨ akambɨɨka ave ndongotsi va mpelela.
23 Ʉmpelela ʉgwa gwʉ mmana gwa mwene.
Naveene avakongi va Yɨɨsʉ vipʉgʉla imbombo tsa mwene,
c ʉvɨ vʉkwɨlanilo wa siinu syoni apoonu apaveetsaga.