Ʉlʉlagɨlo lwa vʉtoolani
10
1 Pwʉ ʉYɨɨsʉ akahega kʉ Kapelenaumu,
akalʉta mu kɨlʉnga ɨkya Yuuda,
ikange akalʉta ɨmwambo ɨjyɨnge ɨjya lʉgasi lwa Yolodani.
Ɨkɨpʉga ɨkɨvaha kya vaanu kɨlɨkʉnkonga,
nʉ mwene alɨkʉvamanyiisa ndʉwʉ lwale lwiho lwa mwene.
2 Lola,
aVafalisayo vakiitsa kʉ mwene kukʉnʼgela,
vakambʉʉtsa vakata,
“Ndeeti,
indagɨlo tsikʉntavʉla ʉnʼgoosi ʉkʉndeka ʉnʼdala va mwene?”
3 ɄYɨɨsʉ akavaanda akata,
“ɄMoose aavalagye kɨki pa kulongwi ɨjɨ?”
4 Aveene vakata,
“ɄMoose aatawe ʉmuunu avɨgage ɨkalata ɨjya kʉndeka ʉnʼdala va mwene,
pwʉ anʼgotole.”
5 ɄYɨɨsʉ akavavʉʉla akata,
“ɄMoose aavavɨgye ʉlʉlagɨlo ʉlʉ ʉlwakʉva aakʉweene ʉkʉsita kwɨdɨka kwinyo kwa Ngʉlʉve.
6 Ʉmwene ʉNgʉlʉve pa vʉtengʉlɨlo ʉpwʉ aapelile ɨkɨlʉnga,
‘Aavapelile ʉnʼgoosi nʉ nʼdala.’a
7 ‘Kʉ nongwa ɨjyo ʉnʼgoosi iiva va kʉndeka ʉdadaaje nʉ vanyina,
ikɨhanzaaga nʉ nʼdala va mwene,
8 avaanu avo vavɨlɨ viveetsaga immana mpamato.’
b Pwʉ lɨno,
navakaave vavɨlɨ ikange,
baako,
vibadɨngʼana nʉ kʉva immana mpamato.
9 Kʉ nongwa ɨjɨ,
ɨkyʉ ʉNgʉlʉve abadɨngʼiinie,
aleke ʉkʉvepwo ʉmuunu ʉnya kʉlekengʼania.”
10 Kʉmbele,
wʉ vingye ikange mu nyumba,
avakongi va mwene vakambʉʉtsa ʉYɨɨsʉ ikulongwi tsa limenyu ɨlyo.
11 Ʉmwene akavaanda akata,
“Ʉnʼgoosi ʉvaveetsaga ʉvɨ ikʉndeka ʉnʼdala va mwene nʉ kʉntoola ʉnʼdala ʉjyʉnge,
iiva atulile ɨnongwa jya vʉligu kʉ nʼdala ʉvaatalile.
12 Namwene ʉnʼdala ʉvɨ ikʉndeka ʉnʼgoosi va mwene nʉ kʉvʉʉkɨla mu nʼgoosi ʉjyʉnge,
iiva atulile ɨnongwa jya vʉligu.”
ɄYɨɨsʉ ikʉvʉʉpɨlɨla avaana avadebe
13 Ɨkɨgono kɨpamato avaanu vakavagega avaana va veene kwa Yɨɨsʉ pakʉta avaabaase,
avasaje.
Avakongi va mwene vakavatanila avaanu avo.
14 Ʉmwene ʉYɨɨsʉ wʉ ikʉtsivona itsi akaviipa.
Akavavʉʉla avakongi va mwene akata,
“Valeki avaana avadebe viitsage kwane!
Muleke ʉkʉvasiga,
manya avaanu avalɨ nda vaana ava,
wʉ ʉLʉdeeva lwa Ngʉlʉve lwa veene.
15 Tsa jɨlweli ndikʉvavʉʉla ʉkʉta,
ʉmuunu ʉvaveetsaga ʉvɨ nikʉmmʉʉvɨla ʉNgʉlʉve ndʉ mwana ʉnʼdebe,
c ʉwʉ ikʉmmʉʉvɨla ʉmmotsi va mwene,
nalʉsiku naliingile mu Lʉdeeva lwa Ngʉlʉve.”
16 Pwʉ ʉYɨɨsʉ alɨkʉvatoola avaana,
alɨkʉvakumbatɨla,
alɨkʉvɨɨka isivoko sya mwene pa mitwe gya veene,
nʉ kʉvasaja.
Ikulongwi tsa muunu ʉmmosu
17 ɄYɨɨsʉ wʉ ihega alʉtage kʉvʉnge,
ʉmuunu mpamato akamwitsila kʉnʉ inyila,
akasugama pa mwene,
akambʉʉtsa akata,
“Ndeeti,
vɨ Mmanyisi vɨ nʼgolosu,
pannogye ndɨvombe kɨki pakʉta ndɨkave ʉwʉʉmi wa sikutsooni?”
18 Ʉmwene ʉYɨɨsʉ akamwanda akata,
“Kɨki wiita ʉne ndɨlɨ nʼgolosu?
Nakʉli ʉmuunu ʉnʼgolosu.
Ʉnʼgolosu alɨ mpamato,
vɨ Ngʉlʉve mwene.
19 Ndeeti,
ʉtsimanyile indagɨlo:
‘Ʉlabudaga,
ʉlaligupaga,
ʉlahɨɨtsaga,
ʉlanwangʼilaga ʉnnino,
ʉlasyovaga,
ʉmwɨmɨkage ʉdadaajo nʉ jyʉva vaako?’d”
20 Ʉmwene akambʉʉla akata,
“IMmanyisi,
indagɨlo itso tsyoni ndɨtsibiite ʉkʉhʉma mu vʉdebe wango.”
21 ɄYɨɨsʉ akandola,
akanʼgana,
akambʉʉla akata,
“Ʉdumukiilwe ɨkɨɨnu kɨpamato.
Bɨhaga ʉkagʉtse isiinu syako syoni,
pwʉ indalama itso ʉvagavɨle avagatsu,
pwʉ wiiva wɨvɨɨkye ɨkɨbaana kʉkyanya.
Apo pwʉ wiitse,
ʉngʼongage.”
22 Wʉ apʉliike ago,
ʉmwene akasisivala kʉmiiho,
akahega nʉ lʉsʉsʉvalo pakʉva aale nɨ kyʉma kyongosu.
23 ɄYɨɨsʉ akalola kʉnʉ na kʉnʉ,
akavavʉʉla avakongi va mwene,
akata,
“Kʉtalamu siitso avamosu ʉkwingila kʉ Lʉdeeva lwa Ngʉlʉve!”
24 Avakongi va Yɨɨsʉ vakakenyemuka pa mamenyu ago.
Ʉmwene akavuja akatsova navo akata,
“Vaana,
kʉtalamu siitsoe ʉkwingila kʉ Lʉdeeva lwa Ngʉlʉve!
25 Kwebeepe ɨngamila ʉkʉlʉtɨngʼania mu kiiho ka nyonelo,
ʉkʉlɨngʼaania nʉ mmosu ʉkwingila mu Lʉdeeva lwa Ngʉlʉve.”
26 Avakongi va mwene vakadega siitso.
Vakambʉʉtsa vakata,
“Pwʉ veeni lɨno ʉviweesa ʉkʉpona?”
27 ɄYɨɨsʉ akavalola siitso,
akavaanda akata,
“Itsʉ avaanu vilemwa ʉkʉvomba mu maka ga veene,
kwa Ngʉlʉve tsivombeka.”
28 ɄPetulo akambʉʉla akata,
“Lola,
ʉwe tʉsilekile isiinu siitu syoni,
pa kʉkʉkonga ʉve!”
29 ɄYɨɨsʉ akaanda akata,
“Tsa jɨlweli ndikʉvavʉʉla ʉkʉta,
nakʉli ʉmuunu ʉvɨ ajɨlekile ɨnyumba,
evo avalʉkololwe,
evo avahaatsave,
evo ʉvanyina,
evo ʉdadaaje,
evo avaana,
evo isilɨmɨla pa kʉngʼonga ʉne na pa nongwa jya Livangɨli,
30 ʉvɨ nalapeewe pa kɨgelelo ɨkya ndeevʉlʉ (100) wʉ alɨ mu kɨlʉnga ʉmʉ.
Alapeewa inyumba,
avalʉkololwe,
avahaatsave,
avavanyina,
avaana,
ni silɨmɨla.
Paninie naago ikwaganaga nʉ vʉkʉvɨlwa.
Kʉmbele,
kʉ Lʉdeeva lwa Ngʉlʉve ʉlukwitsa alakavaga ʉwʉʉmi wa sikutsooni.
31 Napeene,
avaanu vongosu ʉwʉ valɨ mbʉlongolo lɨno valaava va kʉnsana,
naveene ʉwʉ valɨ kʉnsana valaava mbʉlongolo.”f
ɄYɨɨsʉ itsova kɨmalago ʉlwa daatu ɨkulongwi jya kʉswa kwa mwene
32 ɄYɨɨsʉ na vakongi va mwene vaale mu nzɨla ʉkʉlʉta kʉ Yelusalemu.
ɄYɨɨsʉ akava igenda kʉvʉlongolo.
Avakongi va mwene valɨkʉdega,
naveene avaanu avange avaavakongaga vakava nʉ lʉdwado.
g ɄYɨɨsʉ akavatoola avakongi va mwene kɨtsigo na vavɨlɨ (12),
akava navo pa lʉkanzi,
akatengʉla akange ʉkʉvavʉʉla ɨkulongwi jya galya ʉgwʉ jʉgikʉmbonekela kʉvʉlongolo.
33 Akata,
“Pʉlɨhɨtsi,
lɨno twilʉta kʉ Yelusalemu.
Ʉkwene ʉkwa ʉMwana va Muunu itsihendamwa nʉ kʉhɨlɨkwa kʉ vavaha va vateeketsi na vamanyisi va ndagɨlo.
Avo vitsikʉmmɨga ʉkʉta abudwe nʉ kʉnsupulila kʉ vaanu avatava Vayahudi.
34 Avo vitsikʉnʼjejevʉla,
vitsikʉmʼbehela amati,
vitsikʉntova ni sikoti,
nʉ kʉmʼbuda.
Napeene,
pa kɨgono ɨkya daatu,
jiitsʉʉka ʉkʉhʉma kʉ vaswe.”
Ʉndongotsi ɨjisaage nʉ kʉvavombela ʉwʉ ilongolela
35 ɄYakobo nʉ Yohana,
avaana va Zebedayo,
vakiitsa kwa Yɨɨsʉ,
vakatsova nave vakata,
“IMmanyisi,
tudoova ʉtʉvombele ɨkɨɨnu kɨninie.”
36 ɄYɨɨsʉ akavavʉʉtsa akata,
“Munogwa ndɨvavombele kɨki?”
37 Vakamwanda vakata,
“Tukʉkʉdoova ʉlaava vutengʉla ʉkʉlongotsa ʉLʉdeeva lwako ʉlwɨmɨkiwa,
wiitse ʉtʉtavʉle ʉkʉva valongotsi paninie nʉʉve,
impamato iitse ataame kʉ kɨvoko kyako ɨkya kʉndyo,
ʉjyʉnge kʉ kɨvoko ɨkya kʉngʼɨgɨ.”
38 Ʉmwene ʉYɨɨsʉ akavavʉʉla akata,
“Namukɨmanyili ɨkyʉ mudoova!
Ndeeti,
jʉmuweesa ʉkʉnywela ɨkɨnywelo kya vʉkʉvɨlwa ʉvʉlʉtih ɨkyʉ ndɨpya ndinywela ʉne evo ʉkwotsiwa ʉlwotso lwa vʉswe ʉlwʉ ndɨpya ndikwotsiwa ʉne?”
39 Vakaanda vakata,
“Eena,
tʉpivomba itso.”
Namwene ʉYɨɨsʉ akavaanda akata,
“Ɨkɨnywelo ɨkyʉ ndɨpya ndinywela,
jʉmunywela,
nalwene ʉlwotso ʉlwʉ ndɨpya ndikwotsiwa,
jʉmukwotsiwa.
40 Lɨno,
ɨkulongwi jya kʉtaama kʉ kɨvoko kyango ɨkya kʉndyo evo ɨkya kʉngʼɨgɨ nambombo jyango ʉkʉvatavʉla ʉnyie.
ɄNgʉlʉve mwene vɨ alavapa avaanu ʉwʉ avanotsehiitse.”
41 Avakongi avange kɨtsigo (10) wʉ vagapʉliike ago,
vakavaviipila ʉYakobo nʉ Yohana.
42 Pwʉ ʉYɨɨsʉ akavɨɨlanga avakongi va mwene vooni akavavʉʉla akata,
“Mulʉmanyile,
avalongotsi avatava Vayahudi vivonia ʉvʉtwa wa veene,
nʉ kʉvalongotsa avaanu kʉ maka.
43 Napanogiili ʉnyie ʉkʉvomba ewo,
apeene ʉmuunu ʉvaveetsaga ʉvɨ inogwa ʉkʉva indongotsi pagati paanyie,
vɨ aveetsage imbombi viinyo.
44 Ʉvɨ inogwa ʉkʉva kʉvʉlongolo kwanyie,
vɨ aveetsage mbandai va vooni,
45 manya najyʉne ndɨ Mwana va Muunu,
nanditsili kuvombelwa,
ʉne nditsile kukʉvavombela avaanu nʉ kwɨhʉmya ʉwʉʉmi wango ʉkʉta ndɨvapoke avaanu vongosu.”
ɄYɨɨsʉ ikʉmponia ʉBatimayo ʉmʼbosu
46 Pwʉ ʉYɨɨsʉ na vakongi va mwene vakasika mu vʉtsenge ʉwaatambʉlwagwa Yeliko.
Kʉmbele,
wʉ ihega,
ɨkɨpʉga ɨkɨvaha kya vaanu kɨkankonga.
Pa lʉkanzi pa nzɨla,
aataamile ʉmuunu mpamato ʉmʼbosu alɨkʉdoova ʉlʉtangɨlo kʉ valʉtanzɨla.
Ɨlitaawa lya mwene aale vɨ Batimayo (kwʉ kʉta,
ʉnswambe va Timayo).
47 Wʉ apʉliike ʉkʉta vɨ Yɨɨsʉ va mu Nazaleti ʉvaalʉtɨngʼaniaga,
akatengʉla ʉkwɨlanga akata,
“Yɨɨsʉ vɨ Mwana va nkʉlʉdeeva ʉDavʉdi,
j ndidoova ʉngʼolele ɨkɨsa!”
48 Avaanu vongosu wʉ vapʉliike ago,
vakatengʉla ʉkʉntanila ʉBatimayo anuunale.
Ʉmwene akoongeletsa ʉkwɨlanga alɨkʉta,
“Ʉve vɨ Mwana va Davʉdi,
ndidoova ʉngʼolele ɨkɨsa!”
49 ɄYɨɨsʉ akɨɨma,
akavavʉʉla avaanu akata,
“Mwɨlangi iitse apa.”
Pwʉ vakamwɨlanga ʉBatimayo vakata,
“Ɨkangatse!
Ɨmaga,
ʉYɨɨsʉ ikʉkwɨlanga.”
50 Pwʉ ʉBatimayo akataaga ʉnsabwa gwa mwene ʉgwa kwɨswɨka,
akahanyaahanya,
akalʉta kwa Yɨɨsʉ.
51 Ʉmwene ʉYɨɨsʉ akambʉʉtsa akata,
“Vunogwa ndɨkʉvombele kɨki?”
ɄBatimayo akamwanda akata,
“IMmanyisi,
ndidoova ndɨlolage.”
52 ɄYɨɨsʉ akambʉʉla akata,
“Bɨhaga,
ʉNgʉlʉve akʉponiitse kʉ nzɨla jya lwɨdɨko lwako!”
Ʉnsɨkɨ gʉʉgwa ʉBatimayo akatengʉla ʉkʉlola,
akankonga ʉYɨɨsʉ.