Luuka 18

Ʉkʉnʼdoova ʉNgʉlʉve kɨtsila kʉgatala

1 ɄYɨɨsʉ akavavʉʉla avakongi va mwene ɨkɨhwananitso kya kʉvamanyiisa ʉkʉta wɨgane wa Ngʉlʉve vanʼdoovage ʉNgʉlʉve isigono syoni, kɨtsila kʉgatala. 2 Akavavʉʉla akata, “Aalepwo ʉndamutsi va nongwa mu vʉtsenge vʉpamato. Ʉmuunu ʉjwa, nɨsajage kwa Ngʉlʉve, ikange naavɨɨkɨlage ntɨma avaanu. 3 Lɨno, mu vʉtsenge ʉwa, aalemwo ʉnʼdala ʉnswɨle mpamato. Ʉjwa aalʉtaga kakongosu kukʉnsiima, alɨkʉta, ‘Ndidoova ʉnnyɨgɨle ɨnongwa vʉnonu, pakʉta ndɨntovetse ʉndʉgʉ vango, aleke ʉkʉtoola isiinu syango.’

4 “Isigono syongosu sikalʉtɨngʼania, ʉndamutsi va nongwa ʉlya aagendelelaga ʉkʉbeela ʉkʉntanga ʉnswɨle ʉlya. Pwʉ kʉ vʉmalɨlo, akɨtsosa mu numbula jya mwene akata, ‘Ndavɨ jɨve nandikɨsaja kwa Ngʉlʉve, pange ʉkʉvɨɨkɨla ʉntɨma avaanu, 5 lɨno, pakʉva igendelela ʉkʉnnyanyamika, jʉndɨkʉmmɨgɨla vʉnonu ɨnongwa jya mwene, aleke ʉkʉtsiga ikʉngatatsa.’ ”

6 Pwʉ ʉNtwa ʉYɨɨsʉ akata, “Mwɨmanyiisaage kʉ ndamutsi va nongwa ʉlya ʉnnangi, ndʉwʉ aalamwe ʉkʉvomba! 7 Lɨno! ɄNgʉlʉve, nakavavombele vʉnonu avahalwa va mwene ʉwʉ vikʉnsiima pamuunyi na pakɨlo? Ndeeti, jiisuvalɨla ʉkʉvatanga? 8 Ndikʉvavʉʉla ʉkʉta, ʉNgʉlʉve alavavombela ngʼaningʼaani ʉgwʉ vanogye ʉkʉvombelwa. Lɨno, ʉMwana va Muunu alaava akiliwiike mu kɨlʉnga, alavavona avaanu ʉwʉ vikʉmwɨdɨka?”

Ɨkɨhwananitso kya Falisayo nʉ nsangʉtsi va songo

9 Pwʉ ʉYɨɨsʉ akavavʉʉla kʉ kɨhwananitso avaanu ʉwʉ vɨɨvonaga ʉkʉta vagolosu nʉ kʉvabeda avaanu avange, akata, 10 “Ɨkɨgono kɨpamato avaanu vavɨlɨ vaalʉtile kukɨsaja kʉ tembile, mpamato aale Falisayo, ʉjyʉnge aale nsangʉtsi va songo. 11 ɄFalisayo ʉlya akɨɨma pa kwɨsaja. Akɨsaja mu numbula jya mwene akata, ‘Gwe Ngʉlʉve, ndikʉkʉsaana, ʉlwakʉva ʉne nandɨlɨ nda vaanu avange: avanyambuda, avavombambiivi, avaligu, pange ndʉ nsangʉtsi va songo ʉjʉ! 12 Isigono sivɨlɨ mu ndʉngʉ mpamato, ʉne ndikɨdɨnda ʉkʉlya ɨkyakʉlya kʉ vʉsumbe wa kwɨsaja. Ikange, mu siinu syango syoni, ndilaha isyavʉpe ɨligavo lipamato mu magavo kɨtsigo (10).’

13 “Namwene ʉnsangʉtsi va songo ʉlya, wʉ atsiige ɨmile kʉvʉtale, iniime, kʉnʉ ikɨtovatova pa kɨpambaga kya mwene, akata, ‘Gwe Ngʉlʉve, ʉndɨlɨle ɨkɨsa, ʉne ndɨ ntulanongwa!’ ” 14 ɄYɨɨsʉ akoongeletsa ʉkʉtsova akata, “Ndikʉvavʉʉla ʉkʉta, ʉnsangʉtsi va songo aavujile kʉ nyumba jya mwene, avalɨliilwe ʉvʉgolosu. Lɨno, ʉFalisayo ʉlya, baako, naavalɨlɨlwe ʉvʉgolosu, manya ʉmuunu ʉvaveetsaga ʉvɨ ikɨjɨmɨka jyʉmwene, ʉNgʉlʉve alamwisa. Nʉ muunu ʉvɨ ikɨjisa, ʉNgʉlʉve alamwɨmɨka.”

ɄYɨɨsʉ ikʉvasaja avaana avadebe

(Mataayo 19:13-15; Maliko 10:13-16)

15 Ɨkɨgono kɨpamato avaanu vakavagega avaana va veene kwa Yɨɨsʉ, pakʉta avaabaase, avasaje. Avakongi va mwene wʉ valɨweene ɨlyo, vakatengʉla ʉkʉvatanila avaanu avo. 16 Pwʉ ʉYɨɨsʉ akavɨɨlanga avaanu avo vooni viitse kʉ mwene, akata, “Valeki avaana avadebe viitsage kwane, muleke ʉkʉvasiga, manya avaanu avalɨ nda vaana ava, wʉ ʉLʉdeeva lwa Ngʉlʉve lwa veene. 17 Tsa jɨlweli ndikʉvavʉʉla ʉkʉta, ʉmuunu ʉvaveetsaga ʉvɨ nikʉmmʉʉvɨla ʉNgʉlʉve ndʉ mwana ʉnʼdebe ʉwʉ ikʉmmʉʉvɨla ʉmmotsi va mwene, nalʉsiku naliingile mu Lʉdeeva lwa Ngʉlʉve.”

Ʉlʉpɨnza ʉlʉlɨ mu vʉmosu

(Mataayo 19:16-30; Maliko 10:17-31)

18 Ʉmbaha mpamato, akambʉʉtsa ʉYɨɨsʉ akata, “Gwe Mmanyisi vɨ nʼgolosu, ndɨvombe kɨki pakʉta ndɨkave ʉwʉʉmi wa sikutsooni?” 19 Ʉmwene ʉYɨɨsʉ akamwanda akata, “Kɨki wiita ʉne ndɨlɨ nʼgolosu? Nakʉli ʉmuunu ʉnʼgolosu. Ʉnʼgolosu alɨ mpamato, vɨ Ngʉlʉve mwene. 20 Ndeeti, ʉtsimanyile indagɨlo, ‘Ʉlabudaga, ʉlaligupaga, ʉlahɨɨtsaga, ʉlanwangʼilaga ʉnnino, ʉmwɨmɨkage ʉdadaajo nʉ jyʉva vaako.’” 21 Ʉmwene akata, “Indagɨlo itso tsyoni, ndɨtsibiite ʉkʉhʉma mu vʉdebe wango.”

22 ɄYɨɨsʉ wʉ apʉliike ago, akambʉʉla akata, “Ʉdumukiilwe ɨkɨɨnu kɨpamato. Bɨhaga ʉkagʉtse isiinu syako syoni, pwʉ indalama itso ʉvagavɨle avagatsu, pwʉ wiiva wɨvɨɨkye ɨkɨbaana kʉkyanya. Apo pwʉ wiitse ʉngʼongage.” 23 Ʉmbaha ʉlya, wʉ apʉliike ago, akasʉsʉvala siitso, ʉlwakʉva aale nɨ kyʉma kyongosu. 24 ɄYɨɨsʉ wʉ ambwene ʉkʉta asʉsʉvye, akata, “Kʉtalamu siitso avamosu ʉkwingila kʉ Lʉdeeva lwa Ngʉlʉve! 25 Kwebeepe ɨngamila ʉkʉlʉtɨngʼania mu kiiho ka nyonelo, ʉkʉlɨngʼaania nʉ mmosu ʉkwingila mu Lʉdeeva lwa Ngʉlʉve!”

26 Avaanu ʉwʉ vaapʉliike ago, vakambʉʉtsa vakata, “Pwʉ veeni lɨno ʉviweesa ʉkʉpona?” 27 ɄYɨɨsʉ akavavʉʉla akata, “Itsʉ avaanu vilemwa ʉkʉvomba mu maka ga veene, kwa Ngʉlʉve tsivombeka.” 28 Apo, ʉPetulo akambʉʉla ʉYɨɨsʉ akata, “Lola, ʉwe tʉsilekile isiinu siitu syoni, tukʉkʉkonga ʉve!” 29 ɄYɨɨsʉ akata, “Tsa jɨlweli ndikʉvavʉʉla ʉkʉta, ʉmuunu ʉvaveetsaga ʉvɨ ajɨlekile ɨnyumba jya mwene, evo ʉnʼdala va mwene, evo avalʉkololwe, evo avahotsi va mwene, evo avaana va mwene, kʉ vʉsumbe wa Lʉdeeva lwa Ngʉlʉve, 30 ʉjwa wʉ apitsiige mu kɨlʉnga ʉmʉ jiikwʉpɨlɨla syongosu ʉkʉlʉtɨɨlɨla isyʉ asilekile. Ikange, ʉnsɨkɨ ʉgukwitsa, alakava ʉwʉʉmi wa sikutsooni.”

ɄYɨɨsʉ itsova ʉlwa daatu ʉkʉswa nʉ kʉtsʉʉka kwa mwene

(Mataayo 20:17-19; Maliko 10:32-34)

31 ɄYɨɨsʉ akavatoola avakongi va mwene kɨtsigo na vavɨlɨ (12), akalʉta navo apoonu ʉpwʉ vaatsiiva veene. Akavavʉʉla akata, “Lola! Twilʉta kʉ Yelusalemu. Ʉkwa, tsyoni itsʉ avanyamalago vaavɨgile ʉkʉkongana nʉ Mwana va Muunu, tsikavombeke. 32 Avalʉgʉ va mwene vitsisupulila ʉMwana va Muunu kʉ vaanu avatava Vayahudi. Avo vitsikʉnʼjejevʉla, vitsikʉnʼdʉka, vitsikʉmʼbehela amati, 33 vitsikʉntova ni ngʼwego, na kʉ vʉmalɨlo, vitsikʉmʼbuda. Ɨkɨgono ɨkya daatu jiitsʉʉka.”

34 Napeene, avakongi va mwene navaagamanyage ʉgwʉ aavavʉʉlile, ʉlwakʉva vaasihilwe ɨkɨlɨ nʼgati mu mamenyu aga. Pange valʉmanye ʉkʉta itsova kɨɨnu kɨki.

ɄYɨɨsʉ ikʉmponia ʉmʼbosu

(Mataayo 20:29-34; Maliko 10:46-52)

35 ɄYɨɨsʉ na vakongi va mwene wʉ valɨ pawiipi nʉ vʉtsenge wa Yeliko, ʉmuunu mpamato ʉvɨ aale mʼbosu aataamile pa lʉkanzimbale nɨ nzɨla, alɨkʉdoova isiinu. 36 Wʉ apʉliike avaanu vongosu vilʉtɨngʼania, akavʉʉtsa akata, “Valʉgoosi, kʉlɨ kɨki?” 37 Vakambʉʉla vakata, “ɄYɨɨsʉ va kʉ Nazaleti ilʉtɨngʼania.” 38 Pwʉ akɨɨlanga akata, “Gwe Yɨɨsʉ, Mwana va nkʉlʉdeeva ʉDavʉdi, ndidoova ʉngʼolele ɨkɨsa!” 39 Avaanu ʉwʉ vaale kʉvʉlongolo kwa Yɨɨsʉ, vakava vikʉntanila ʉkʉta anuunale. Ʉmwene akoongeletsa ʉkwɨlanga akata, “Gwe Mwana va nkʉlʉdeeva ʉDavʉdi, ndidoova ʉngʼolele ɨkɨsa!”

40 ɄYɨɨsʉ akɨɨma, akalagɨla ʉkʉta vandeete kʉ mwene. Ʉmʼbosu ʉlya wʉ ahegelye pavʉlongolo pa mwene, ʉYɨɨsʉ akambʉʉtsa akata, 41 “Vunogwa ndɨkʉvombele kɨki?” Akata, “Gwe Ntwa, ndidoova ndɨlolage.” 42 ɄYɨɨsʉ akambʉʉla akata, “Lɨno lolaga! ɄNgʉlʉve akʉponiitse kʉ nzɨla jya lwɨdɨko lwako.” 43 Ʉnsɨkɨ gʉʉgwa ʉgwa ʉmʼbosu ʉlya akatengʉla ʉkʉlola. Pwʉ akava ikʉnʼginia ʉNgʉlʉve. Ikange ʉkʉhʉma apo alɨkʉnkonga ʉYɨɨsʉ. Avaanu vooni, wʉ vagaweene ago, naveene vakanʼginia ʉNgʉlʉve.