Luuka 17

Imanyiiso tsa kʉsyɨkɨlanila

(Mataayo 18:6-7, 21-22; Maliko 9:42)

1 ɄYɨɨsʉ akavavʉʉla avakongi va mwene akata, “Ingelo itsikʉvapelela avaanu ʉkʉvomba imbiivi pwile isigono syoni. Lɨno, asue vʉvʉle ʉmuunu ʉvipela ingelo itso! 2 Ɨkaale jiiva hʉba kʉ muunu ʉjwa ʉkʉkʉngɨlwa ʉlwala lwa kʉhevetela mu singo, nʉ kʉtaagwa mu nyanza, ʉkʉlɨngʼaania nʉ vʉkʉvɨlwa ʉvʉlambona, angave ikʉmpelela mpamato mu vadebe ava avombe imbiivi! 3 Lɨno, mwɨlolelage pakʉta muleke ʉkʉvomba ɨlyo!

“Ʉmwɨdɨkinnino angakʉnangɨle, tsova nave, angapele, nsyɨkɨle. 4 Ndavɨ jɨve ikʉkʉnangɨla kavɨlɨ kavɨlɨ mu kɨgono kɨpamato, nʉ kʉkilivuka kwave kavɨlɨ kavɨlɨ kwita, ‘Ndɨpelile,’ ʉve nsyɨkɨle!”

5 Pwʉ avapositili valya vakanʼdoova ʉNtwa vakata, “Tudoova ʉtwongeletse ʉlwɨdɨko!” 6 ɄNtwa ʉYɨɨsʉ akavaanda akata, “Mukaale muve nʉ lwɨdɨko lʉdebe ndavɨ lʉve ndɨ mbeju ɨndebe ʉkʉlʉtɨɨlɨla tsyoni, mukaale mukʉgʉvʉʉla ʉmʼbɨkɨ ʉnkʉjʉ ʉgʉ ʉkʉta, ‘Ngʼongʼovoka ʉkoogame mu nyanza,’ nagwene gʉkaale gukʉvɨɨdɨkɨla!”

Ʉwɨɨdɨhɨtsi mu mbombo

7 “Tʉte mpamato pagati paanyie alɨ nʉ mbanda ʉvɨ ilɨma evo idɨɨma ingʼolo. Veeni ʉvikʉmbʉʉla ʉmbanda wʉ asiike ʉkʉhʉma kuvomba ɨmbombo, ate, ‘Itsa ngʼaningʼaani, taama ʉlye ɨkyakʉlya’? 8 Baako! Apeene jiita, ‘Innotsehetse ɨkyakʉlya, ikange ʉmbombelele ʉkʉsika ʉpwʉ ndimala ʉkʉlya nʉ kʉnywa. Wʉ ndɨmalile, pwʉ najyʉve ʉlye nʉ kʉnywa.’ 9 Ndeeti, jʉvukʉnsaana ʉmbombi, ʉlwakʉva avombile ʉgwʉ ʉkandagye? Baako! 10 Wʉ jɨlɨwo na kwanyie, wʉ mumalile ʉkʉvomba tsyoni itsʉ ʉNgʉlʉve avalagye ʉkʉvomba, pwʉ muteetsage, ‘Ʉwe tʉlɨ vavanda avanavanogiili ʉkʉsaanwa, tʉvombile itsʉ tsitʉnogye ʉkʉvomba.’ ”

ɄYɨɨsʉ iponia avanya bʉʉba kɨtsigo

11 ɄYɨɨsʉ wʉ ilʉta kʉ Yelusalemu, akagendela ɨnzɨla ɨjyalʉtɨngʼiinie pagati pa kɨlʉnga kya Samaliya nɨ kya Galilaya. 12 Wʉ alɨ pa kwingila mu litsumbe lipamato, akaaganila na vaanu kɨtsigo (10) avanya bʉʉba. Avaanu valya, vakɨɨma kʉvʉtale nʉ mwene, 13 vakatotsa ɨlimenyu, vakanʼdoova vakata, “Gwe Mbaha, Yɨɨsʉ, ʉtʉkolele ɨkɨsa!” 14 ɄYɨɨsʉ wʉ avaweene, akavavʉʉla akata, “Bɨhagi mukɨvonie kʉ vateeketsi.” Wʉ valɨ mu nzɨla vilʉta, vakakenyemuka vaponile.

15 Pwʉ impamato pagati pa veene, wʉ aweene aponile, akakilivuka ngʼaningʼaani kwa Yɨɨsʉ, kʉnʉ ikʉnʼginia siitso ʉNgʉlʉve. 16 Wʉ asiike, akɨgwisa kɨvʉgudamo pavʉlongolo pa silʉnde sya Yɨɨsʉ kʉnʉ ikʉnsaana. Ʉmuunu ʉjwa, aale Nsamaliya. 17 ɄYɨɨsʉ akavʉʉtsa akata, “Navavalatsiiwi avaanu vooni kɨtsigo? Avange budikakʉpamato (9) valɨ ndaku? 18 Nakʉli ʉvɨ akiliwiike kukʉnʼginia ʉNgʉlʉve, apeene mwene ʉmpooma ʉjʉ?” 19 Pwʉ ʉYɨɨsʉ akambʉʉla akata, “Ɨma, bɨhaga, ʉNgʉlʉve akʉponiitse kʉ nzɨla jya lwɨdɨko lwako!”

Ʉkwitsa ʉLʉdeeva lwa Ngʉlʉve

(Mataayo 24:23-28, 37-41)

20 Ɨkɨgono kɨpamato, aVafalisayo vakambʉʉtsa ʉYɨɨsʉ vakata, “ɄLʉdeeva lwa Ngʉlʉve lʉliitsa ndali?” ɄYɨɨsʉ akavaanda akata, “ɄLʉdeeva lwa Ngʉlʉve nalukwitsa ni simanyilo isyʉ sivoneka na miiho. 21 Avaanu navakaate, ‘Lola! Lʉlɨ apa’ evo, ‘Lʉlɨ palya,’ manya ʉLʉdeeva lwa Ngʉlʉve lʉlɨ pagati paanyie.”

22 Pwʉ ʉYɨɨsʉ akavavʉʉla avakongi va mwene akata, “Siliitsa isigono isyʉ gʉlanogaga ʉkʉmbona ʉMwana va Muunu pange ndakɨve kɨgono kɨpamato, napeene namulambone. 23 Avaanu valavavʉʉlaga valateetsaga, ‘Lola! Ʉlya palya’ evo ‘Ʉjʉ apa.’ Mwitse muleke ʉkʉvɨɨdɨka pange ʉkʉvakonga. 24 Ndɨvavʉʉlile ago, ʉlwakʉva ʉnsɨkɨ ndɨlaava ndikilivuka ndɨ Mwana va Muunu, ndɨliitsa ʉta nzasi ɨjyʉ jikwitsa ngʼaningʼaani nʉ kʉmulika imbasu tsyoni mu vʉtandaatse. 25 Wɨgane wa Ngʉlʉve ʉkʉta wʉ ago gakaanale ʉkʉhʉmɨla, mbʉlongolo ndɨ Mwana va Muunu, ndɨtale ʉkʉkʉvɨlwa mu mongosu nʉ kʉbeelwa na vaanu va kɨvʉmbʉkʉ ɨkɨ.

26 “Ndʉwʉ jyale mu sigono sya Nwaka, wʉ jɨlaava namu mu sigono sya Mwana va Muunu. 27 Avaanu vaalitsaga nʉ kʉnywa, valɨkʉtegʉla nʉ kʉtegʉlwa, ʉkʉsika ɨkɨgono kɨlya ʉpwʉ ʉNwaka iingye mu ngalava. Apo, ʉlwongometso lʉkiitsa nʉ kwongometsa avaanu vooni.

28 “Ikange mu sigono sya Loti, jyale vʉle vʉle. Avaanu vaalitsaga nʉ kʉnywa, vaagʉlaga nʉ kʉgʉtsa, vaavyalaga nʉ kʉtsenga. 29 Napeene, ɨkɨgono kɨlya ʉLoti wʉ ahʉmile kʉ Sodoma, ʉmwoto na maganga agiviika gʉkiika ndɨ sula ʉkʉhʉma kʉkyanya, gʉkakobosa avaanu vooni. 30 Ewo wʉ jɨlaava ɨkɨgono kɨlya, ʉMwana va Muunu alaava ihʉmɨla pavʉvalasu.

31 “Ɨkɨgono ɨkyo, ʉmuunu angave kʉkyanya kʉ nyumba, aleke ʉkwika paasi nʉ kwingila mu nyumba pakʉta atoole isiinu sya mwene isyʉ silɨ nʼgati, apeene iike nʉ kʉnyila. Namwene ʉvɨ alɨ pa kɨlɨmɨla, aleke ʉkʉkilivuka kʉ nyumba kutoola ɨkɨveetsaga.

32 “Mukʉmbʉhɨtsaage itsʉ tsyahʉmye kʉ nʼdala va Loti. 33 Ʉmuunu ʉvaveetsaga ʉvɨ inogwa ʉkʉponia ʉwʉʉmi wa mwene, ʉjwa alawaambʉtsa. Apeene ʉmuunu ʉvaveetsaga ʉvɨ ikʉwaambʉtsa ʉwʉʉmi wa mwene kʉ nongwa jyane, ʉjwa vɨ alavʉpoka.

34 “Ndikʉvavʉʉla ʉkʉta, ɨkɨgono ɨkyo pakɨlo avaanu vavɨlɨ valaava vagonile pa kɨtanda kɨpamato, mpamato alatoolwa, ʉjyʉnge alasigatswa. 35 Avadala vavɨlɨ valaava pa kʉheveta, mpamato alatoolwa, ʉjyʉnge alasigatswa. 36 Avagoosi vavɨlɨ valalɨmaga ɨkɨlɨmɨla, mpamato alatoolwa, ʉjyʉnge alasigatswa.”

37 Avakongi vakambʉʉtsa vakata, “Ntwa, kwʉ ndaku ʉkwʉ ago galavombeka?” Akavaanda kʉ kɨtsovo akata, “Apoonu apalɨ kɨtuuve, pwʉ peene ingasimula tsilʉndamana paninie.”