ཡོ་ཧཱ་ནན་ནེ་ ཆག་འབྲི་ ཏང་པོ་།
ཡོ་ཧཱ་ནན་ནེ་ ཆག་འབྲི་ ཏང་པེ་ ཧོར་།
འི་ ཆག་འབྲི་ འབྲི་ཛེད་ཀ་ནེ་ ཨ་ཧོ་རྒུན་ལ་ ཁོ་རང་ངེ་ མིང་པོ་ ཤེད་རྡེ་ ཛེད་ཏེ་ མི་འདུག་། འིན་ན་ འི་ ཆག་འབྲི་ འབྲི་ ཚུལ་རྦོ་ ཡོ་ཧཱ་ནན་ནེ་ འབྲི་ཛེད་ཀ་ནེ་ ནེ་ཚུལ་ ཟང་པོ་ རྡང་, ཐུན་ཅེ་, ཡང་ ངུལ་མེ་ ཆོའེ་ཚོག་རྒེ་ འུ་རྐྱོང་རྒུ་ནི་ སྤང་པོ་ ཏང་ཅེ་རྒུ་ནི་, འི་ ཆག་འབྲི་རྦོ་ ཙོབོ་ ཡི་ཤུའི་ ཧུ་ཚབ་ ཡོ་ཧཱ་ནན་ནེ་ འབྲི་ཛེད་ཀན་འབོ་ ཨ་ཧོ་རྒུན་ལ་ ཧ་ཀོ་ནོག་།
ཆོའེ་ཚོག་རྒེ་ན་ ཁེ་སྤ་རྒུ་ནི་, འི་ ཆག་འབྲི་རྦོ་, ཡོ་ཧཱ་ནན་ནེ་ ཡི་ཤུ་ ཀྲོྃ་རྡེ་ སོན་པོ་ ཞྃ་རྡེ་ ལྟིང་ནི་ ལོ་ ངཔ་ཅུ་ང་ཉི་ནི་ ཀྲུག་ཅུ་རག་ཉི་ ཉེ་ཁོར་ལ་ འབྲི་ཛེད་ཀན་འབོ་ ཨ་ཧོ་རྒུན་ལ་ རྒྱུའི་ ཆ་ནོག་།
ཡོ་ཧཱ་ནན་ནེ་ འི་ ཆག་འབྲི་ འབྲི་ཅེ་ རྒྱུ་ཚན་འབོ་, སིལ་ཧན་རྒུན་ལ་ ཏེ་ཏུའི་ ཟུའི་མེ་ ལོབ་རྦོན་རྒུ་ནི་ རྐྱོབ་ཅེ་ འིན་འབེན་། ཏོ་རྒུ་ནི་ ཡི་ཤུ་ནི་ མི་ ཚུལ་ལ་ འི་ འཇིག་རྟེན་ནེ་ན་ མ་ཡོང་ལ་ འིན་ཀན་ ཡང་, ཨ་ཧོ་རྒུ་ནི་ རྡིག་པེ་ན་ མི་ཙེ་ པུད་ན་ འགྲིག་ཅེའོ་ ལབ་རྦེ་ཡོད་པེན་། ཡོ་ཧཱ་ནན་ནེ་ འདོད་པ་རྦོ་, ཏེཏ་པ་ཅན་རྒུན་ལ་ ཁོང་རྒུ་ནི་ ཐར་པ་ མེ་ཀན་ ཅོ་ཀ་ནེ་ ཟུའི་མེ་ ལབ་ཞ་རྒུ་ནི་ རྐྱོབ་རྦེ་ ཛེད་ཅེའོ་ འིན་འབེན་།
ཏོ་རྦེ་ཕི་ ཡོ་ཧཱ་ནན་ནེ་ མ་ སལ་སྤོ་ ཅོའེ་རྡེ་ ཡི་ཤུ་, ཀོན་འཇོག་རྒེ་ སྲེ་ འིན་ཀན་ ཡང་, མི་ ཚུལ་ལ་ འི་ འཇིག་རྟེན་ནེ་ན་ རྐྱོད་རྡེ་ ཛེད་ཀན་འབེ་ སྤང་པོ་ སལ་ལེ་ཡོད་པེན་། ཁོང་ངེ་ ཁོང་ འདང་, ཞེན་ ཧུ་ཚབ་རྒུ་ནི་ ཡི་ཤུ་ ཐོང་ཀན་, ལག་པ་ སེ་ཀན་, ཡང་ ཁོང་ངེ་ མོལ་ཧན་རྒུན་ ཚོར་ཧན་, ཨ་ཧོ་རྒུན་ལ་ འི་ཏུ་ ཧུལ་ལེ་ ཛེད་། ཁོང་ངེ་ ཞེན་མ་ ཟུའི་མེ་ ལབ་ཞ་རྒུན་ལ་, རྒྱཔ་འགལ་ ཅོའེ་རྡེ་ ཨ་ཧོ་རྒུན་ལ་ རྡིག་པེ་ན་ མི་ཙེ་ པུད་རྡེན་ འདེད་ཏེ་ ཐར་པ་ ཐོབ་རྦེན་, སམ་ མི་རྒོ་ཤེའོ་ སལ་སྤོ་ ཅོའེ་རྡེ་ མོལ་ལེ་ ཛེད་། ཏེ་ནི་ ཁོང་ངེ་ ཏེཏ་པ་ཅན་རྒུན་ལ་ ཀ་ཟུག་རྒེ་ རྡེན་འབའ་ རྡང་ ཟུའི་མ་ ལབ་ཞ་རྒུན་ལ་ ལྟག་ཅེད་ ཅོའེན་, ཏོ་ ལབ་རྦེ་ ཛེད་༎