ཙོབོ་ ཡི་ཤུ་ ལོག་ཏེ་ ཕེབ་ཅེ་ ཧོར་།
3
ཤེ་སྤ་ སྤུན་རྒུན་, འི་རྦོ་ ངེ་ ཁྱི་ཞ་རྒུན་ལ་ ཡི་རྒེ་ ཉི་སྤ་རྦོ་ འིན་། འི་ ཡི་རྒེ་རྒུན་ རྒྱུད་ཏེ་ སམ་བ་ ལག་མོ་ རྡང་ ཟང་པོ་ ཏང་ཅེ་ཕི་ ཁྱི་ཞ་རྒུན་ནེ་ ངུལ་ལ་ ལོབ་ཏེ་ ཡོ་ཀ་ནེ་ ལབ་ཞ་རྒུན་ འི་ཏུ་ ཧུལ་ལེན་། 2 ཁྱི་ཞ་རྒུ་ནི་ ངུལ་མེ་ ཏམ་པེ་ ལུང་རྟོན་པ་རྒུ་ནི་ མོལ་ཧན་རྒུན་ འདང་ ཡི་ཤུའི་ ཧུ་ཚབ་རྒུན་ རྒྱུད་ཏེ་, ཨ་ཧོའེ་ ཙོབོ་ རྡང་ རྐྱབ་འགོན་ ཡི་ཤུའི་, ཀཱ་ སལ་ཧན་རྒུན་ འི་ཏུ་ པོར་རྒོ་ཤེའོ་ ངེ་ འདོད་པ་ འིན་།3 ཚང་མེ་སང་ ངུལ་ལ་ ཁྱི་ཞ་རྒུན་ལ་ འི་རྦོ་ ཧ་ཀོ་རྒོའེ་, ཐ་མེ་ ཏུའི་ལ་ རྡིག་པེ་ འདོད་པ་ ནང་ཞིན་ རང་ངེ་ མི་ཙེ་ པུད་རྡེན་, ཁྱི་ཞི་ ཏེཏ་པེ་ཀ་ ཁྲེལ་རྒོད་ ཏང་ཀ་ནེ་ མི་རིག་ ཡོང་ངེན་། 4 ཁོང་རྒུ་ནི་ ཟེ་རེན་, “མ་ཤི་ཀ་ ལོག་ཏེ་ རྐྱོད་ཅེ་ ཞལ་ཆེཏ་པོ་ ཀ་རུ་ སོང་” ཡང་ “ང་ཞི་ ཕ་མེ་པོ་རྒུན་ ཤི་ ཚར་རྦེ་ནི་ཕ་ལ་ ཏག་ས་ཚུག་པ་ འི་ འཇིག་རྟེན་ནེ་ ཚིར་རྒུན་, ཏེ་རྒ་ ཙོག་སེ་ འགྲུལ་རྡུག་ ཀ་ཟུག་ འགོ་མ་ འཇིག་རྟེན་ ཛེད་ཟ་ནི་ ཡོད་པེན་།”
5 ཁོང་རྒུ་ནི་ ནར་རྐྱི་ ཡུ་རྒུན་ལ་ ནང་མེད་ ཅོའེ་རྡེ་ ནོག་, ཏང་པོ་, ཏུའི་ མང་པོ་ཞིག་རྒེ་ ངུལ་ལ་ ཀོན་འཇོག་རྒེ་ ཀའ་ ནང་ཞིན་ལ་ ནམ་ཀ་འབོ་ ཅོའོ་ ཛེད་ཏེ་, ས་རྦོ་ ཆུའི་ ཕྲོ་ནི་ ཕི་ལོག་ལ་ ཕིང་ངེ་ ཛེད་ཏེ་ ཏོ་ལ་ ཆུའི་ ཧོར་ཤུག་རྒེ་ ཛེད་། 6 ཉི་སྤ་, ཀོན་འཇོག་རྒེ་ ཞབ་རྟོག་པ་ ནོ་ཨཱེ་ ཏུའི་ལ་ ཀོན་འཇོག་རྒེ་ ཀཱ་ ནང་ཞིན་ ཆུ་ལོག་རྒེ་ ཅོའེ་རྡེ་, ཏེ་ཏུའི་ འཇིག་རྟེན་པ་རྒུན་ མེ་ཀན་ སོང་འདེ་ འིན་འབེན་། 7 ཏེ་རྒ་ ཀོན་འཇོག་རྒེ་ ཀའ་ རྒྱུད་ཏེ་, ས་ རྡང་ ནམ་ཀ་ ཉ་ཧ་, མེ་ན་ སྲག་ཅེ་ལ་ ལུའི་ཤུག་རྒེ་ ཛེད་ཏེ་ ནོག་། ཡང་ ཏོ་རྒུན་ ཏེ་ཏེ་ཚུག་པ་ ཐེན་འདེ་ པོ་རེ་ ཛེད་ཏེ་ ནོག་ ནམ་ཚུག་པ་ འི་ འཇིག་རྟེན་ནེ་ ཏེཏ་པ་ མེ་ཀ་ནེ་ མི་རྒུན་ལ་, ཁོང་ངེ་ ཤའ་ ཅེད་ཏེ་ མེ་ཀན་ ཅོའོ་ མི་ཛེད་།
8 འིན་ན་ ངེ་ ཤེ་སྤ་ སྤུན་རྒུན་, འི་ སྤེ་ར་རྦོ་ མ་ནི་ མ་ཞེད་ཧེ་, ཙོབོ་ ཀོན་འཇོག་རྒེ་ ཧུ་འདུན་ལ་ ཞག་ཅིག་པོ་རྦོ་ ལོ་ ལྟོང་ཅིག་ ཡང་ ལོ་ ལྟོང་ཅིག་པོ་ ཞག་ཅིག་ ཏང་ འདྲན་འདྲ་ ནོག་། 9 མི་ ཁ་ཅིག་རྒེ་ ཙོབོ་ ཁོ་རང་ ལོག་ཏེ་ ཕེབ་ཅེ་ ཞལ་ཆེཏ་པོ་, འགོར་རྡེ་ ནོག་ སམ་འདུག་, འིན་ན་ ངོའེ་སྤོ་ལ་ ཁོང་ འགོར་རྡེ་ མག་, ཅེ་ཟེར་ནི་ ཁོང་ངེ་ ཁྱི་ཞ་རྒུ་ནི་ཕི་ ཟོད་པ་ ཛེད་ཏེ་ ནོག་། ཁོང་ངེ་ སུ་ཞི་ལ་ མེ་ཀན་ ཅོའོ་ མ་ཛེད་རྡེ་, མི་ཚང་མེ་ སེམ་འགྱུར་ཤེ་ འདོད་པ་ ཛེད་རྡེ་ནོག་། 10 འིན་ན་ ཙོབོ་ ཡི་ཤུ་ མ་ཤི་ཀ་ ལོག་ཏེ་ ཕེབ་ཅེ་ ཞག་པོ་, སང་སྤེར་ན་ ཧུན་མ་ ཙོག་སེ་ ལེབ་རྦེན་། ཏེ་ ཞག་ལ་ ནམ་ཀེ་ པར་ནང་འབོ་ མ་ ཀུ་ཅུ་ ཀྲག་པོ་ ཉམ་པོ་ མེ་ཀན་ ཆེན་, ཡང་ ནམ་ཀེ་ན་ ཡོ་ཀན་ ཚང་མ་ ཚེད་ ཀྲག་པེ་ ཞུ་རྡེ་ ཆེན་། ཡང་ སེ་ཀ་ ཡོ་ཀན་ ཚང་མ་ ཚིག་ཏེ་ མེ་ཀན་ ཆེན་།
11-12 ཏ་ ཀལ་ཏེ་ འི་ ཚང་མ་ མེ་ཀན་ ཆ་ནི་, ཁྱི་ཞ་རྒུ་ནི་ མི་ཙེ་འབོ་ ཀ་ཟུག་ལ་ པུད་རྒོའེ་། ཀོན་འཇོག་རྒེ་ ཞག་པོ་ལ་ སྲུྃ་རྡེ་ འགྱོ་སྤ་ ལེབ་ཅུག་ཅེ་ལ་ ཙོན་འགྲུའི་ ཅོའེན་, ཁྱི་ཞ་རྒུ་ནི་ ཀོན་འཇོག་རྒེ་ ཐུ་ཐེད་ཏེ་ འགྲུལ་ཧན་ རྡང་ ཏམ་པ་ མི་ཙེ་ཞིག་ པུད་རྒོ་ཤེ་ ནོག་། ཏེ་ ཞག་ལ་ ནམ་ཀེ་ པར་ནང་ མེ་ ཚིག་ཏེ་, ཡང་ ཏེ་ན་ ཡོ་ཀན་ ཚང་མ་ ཞུ་རྡེ་ མེ་ཀན་ ཆེན་། 13 འིན་ན་ ཨ་ཧོ་རྒུན་ ཀོན་འཇོག་རྒེ་ ཞལ་ཆེཏ་ ནང་ཞིན་ལ་ ནམ་ཀ་ སོ་མ་ཞིག་ ཏང་ ས་ སོ་མ་ཞིག་རྒེ་ཕི་, སྲུྃ་རྡེ་ འདེད་རྡེན་, ཀའོ་ ཀྲང་པེ་ ལམ་མེ་ཀ་ འགྲུལ་ཧན་རྒུ་ནི་ ཁང་པ་ ནོག་།
14 ཏོ་རྦེ་ཕི་ ངེ་ ཤེ་སྤ་ སྤུན་རྒུན་, ཁྱི་ཞ་རྒུན་ འི་ ཚང་མ་ ཆ་ཅེ་ཕི་ སྲུྃ་རྡེ་ ཡོད་ཟ་ནི་, ཁྱི་ཞ་རང་ ཀོན་འཇོག་རྒེ་ ཧུ་འདུན་ལ་ སང་མ་, རྐྱོན་མེ་ཀན་ འདང་ ཞིའི་རྡེ་ ཉམ་པོ་ མི་ཙེ་ པུད་ཀན་ཞིག་ ལྟན་ ཉེན་ཅེ་ཕི་ མ་ ཙོན་འགྲུའི་ ཅོའེ་ཧེ་།
15 ཡང་ ཙོབོ་རྡེ་ ཟོད་པ་ ཉམ་པོ་ ཨ་ཧོ་རྒུན་ལ་ ཐར་པ་ ཐོབ་ཅེ་ ཧབ་ སལ་ལེ་ ཛེད་ཀན་འབོ་ ཧ་ཀོ་ རྒོ་ཤེའོ་, མ་ ཁག་ཅེན་ཞིག་ ནོག་། ཨ་ཧོའེ་ ཤེ་སྤ་ སྤུན་ པ་འུ་ལུ་ལ་, ཀོན་འཇོག་རྒེ་ སལ་ལེ་ ཛེད་ཀ་ནེ་ ཤེ་རབ་ ནང་ཞིན་ལ་, ཁྱི་ཞ་རྒུན་ལ་ འབྲི་ཛེད་ཏེ་ ནོག་། 16 ཁོང་ངེ་ རང་ངེ་ ཆག་འབྲི་ ཚང་མེ་ན་, འེ་རྒ་ ཙོག་སེ་ འགོར་རྒྱེན་རྒུ་ནི་ ཧོར་ལ་ འབྲི་ཛེད་ཏེ་ འདུག་། ཁོང་ངེ་ ཆག་འབྲི་ ཁ་ཅིག་རྒེ་ན་ ཧ་ཀོ་ཅེ་ལ་ མ་ ཀག་སྤོ་ ཆ་ཀ་ནེ་ ལབ་ཞ་ རིག་ལ་ ཡོད་ཏེ་ ནོག་། ཡང་ ཧ་འགྲང་ འདང་ ལྟེན་ཞི་ མེ་ཀ་ནེ་ མི་ ཁ་ཅིག་རྒེ་, པ་འུ་ལུའི་ ཆག་འབྲི་རྒུ་ནི་ ཏོན་ཏག་པོ་ ནར་རྐྱི་ རྒྱུར་རྡེ་ ནོག་, ཀ་ཟུག་ ཁོང་རྒུ་ནི་ ཞེན་ ཏམ་པེ་ སུང་རབ་རྒུན་ལ་ ཅོའེན་, ཀ་རྦེ་ ཁོ་རང་རྒུ་ནི་ཕི་ ནོད་རྐྱལ་ ཁྱོང་འདུག་།
པི་ཏྲ་རེ་ ལྟིང་འཇུག་རྒེ་ ལབ་ཞ་།
17 ཏུའི་ ལེབ་རྦེ་སང་ ངུལ་ལ་ ངེ་ ཁྱི་ཞ་རྒུན་ལ་ སྤང་པུད་རྡེ་ཡོད་། ཁྲིམ་མེད་རྡེ་ མི་རྒུ་ནི་ འགོམ་ཧོར་རེ་ན་ ཡོྃ་རྡེ་ ཁྱི་ཞ་རང་ ཏེཏ་པེ་ན་ རྟེམ་པོ་ མེ་ཀན་ མི་འགྱུར་ཤེ་ལ་ ཤང་ ཅོའེ་རྡེ་ འདོད་ཧེ་། 18 མ་ཚེད་པེ་ ཨ་ཧོའེ་ ཙོབོ་ རྡང་ རྐྱབ་འགོན་ ཡི་ཤུ་ མ་ཤི་ཀེ་ ཐུག་ཞེ་ རྡང་ ཁོང་ ཤེ་ཤེ་ན་ ཡར་རྒྱེ་ ཅོའེན་ སོང་ཧེ་།
ཡང་ ཁོང་ལ་ ཏག་ས་ རྡང་ ཏུའི་རྒྱུན་ སྤལ་ ཐོབ་ཤིག་། ཨ་མེན་༎