ཟུའི་མེ་ ལུང་རྟོན་པ་རྒུན་ འདང་ ལོབ་རྦོན་རྒུན་།
2
ཀ་ཟུག་ ངུལ་མ་ ཨིས་ར་ཡེལ་ལེ་ མིར་རྒྱུད་རྡེ་ན་, ཟུའི་མེ་ ལུང་རྟོན་པ་ མང་པོ་ཞིག་ ཡོད་པེན་, ཏེ་རྒ་ ཙོག་སེ་ ཁྱི་ཞ་རྒུ་ནི་ ཆོའེ་ཚོག་རྒེ་ ཕྲོ་ལ་ ཟུའི་མེ་ ལོབ་རྦོན་ མང་པོ་ རིག་ ཐོང་ངེན་, ཀའོ་རྒུ་ནི་ སང་སྤེར་ན་ ཟུའི་མེ་ ལབ་ཞ་རྒུན་ ཏྃ་རྡེ་ ལྟོང་ས་ ཆོག་ལ་ ཁྲིད་རྡེན་། ཡང་ རང་ངེ་ སྤོན་འབོ་ ཙོབོ་ མ་ཤི་ཀེ་ ཁོང་རྒུན་ ཁོ་རང་ངེ་ ཁྲག་རྒེ་ རིན་ ཤལ་རྡེ་ ཉོ་ ཛེད་ཀན་འབོ་ལ་ ཕང་ངེན་། ཏུ་ཟུག་ ཅོ་ཅེའོ་, ཁོང་རྒུ་ནི་ ཁོ་རང་རྒུན་ འགྱོ་སྤ་ མེ་ཀན་ ཆ་ཅེའོ་ ཆ་ཅུག་ཏེ་ ནོག་། 2 མི་ མང་པོ་ཞིག་རྒེ་ ཏོ་རྒུ་ནི་ ཤོད་པ་ ངན་པེ་ ལམ་རྒུ་ནི་ཀ་ འགྲུལ་རྡེ་, རྡེན་འབེ་ ལམ་འབོ་ མ་སི་ཀན་ཞིག་ འགྱུར་ཤུག་རྒེན་། 3 ཡང་ ཏོ་རྒུ་ནི་ ནབ་སེམ་མེ་ན་ སྲུང་ ཅོའེ་མ་རྒུན་ རྒྱུད་ཏེ་, ཁྱི་ཞ་རྒུན་ལ་ འགོམ་ཧོར་ ཏྃ་རྡེ་ ཕན་ཏོག་ ནེ་ནེན་། འིན་ན་ ཏུའི་ཡུན་རིང་ ཞིག་ནི་ ཏེ་རྒུན་ལ་ ཤི་ཅེ་ ཆེད་པ་ ཕོག་ཀན་འབོ་, ཉེ་ཁོར་ལ་ ཁོར་རེན་ ཡོད་། ཡང་ ཁོང་རྒུན་ མེ་ཀན་ ཆེ་ཅེའོ་ འགོར་ མི་ཅུག་།4 ཀོན་འཇོག་རྒེ་ རྡིག་པ་ ཅོ་ཀ་ནེ་ ཕོ་ཉ་རྒུན་ལ་ པུད་རྡེ་ མ་ཛེད་རྡེ་, མུན་ཀྲག་རྒེ་ན་ ལྕག་རོག་ ཅུག་ཏེ་ ཁྲིམ་ཅེད་རྡེ་ ཞག་ཚུག་པ་ ཉ་ཝེ་ན་ ཕང་ངེ་ ཛེད་ཏེ་ ནོག་། 5 ཡང་ ངུལ་མེ་ མིར་རྒྱུད་རྒུན་ལ་, པུད་རྡེ་ མ་ཛེད་རྡེ་, ཀོན་འཇོག་ལ་ མ་འཇིའི་ཧན་རྒུ་ནི་ཕི་ འཇིག་རྟེན་ནེ་ཀ་ ཆུ་ལོག་ ཀ་ལེ་ ཛེད་། འིན་ན་ ལམ་ ཀྲང་པེ་ ཧོར་ལ་ ཆོའེ་ཤེད་ཀན་ ཁོང་ངེ་ ཞབ་རྟོག་པ་, ནོ་ཨཱ་ རྡང་ ཁོའེ་ ནང་མི་ རྡུན་འབོ་ རྐྱོབ་རྦེ་ཛེད་། 6 སོ་འདོམ་ རྡང་ འགའ་མོ་ར་ རྒྱལ་ས་ ངན་པ་ ཉ་ཧ་ ཀོན་འཇོག་རྒེ་ ཤི་ཅེ་ ཁྲིམ་ཅེད་ ཛེད་ཏེ་ མེ་ སྲག་ཏེ་ ཀོག་ཏལ་ལ་ འགྱུར་ཤུག་རྒེ་ ཛེད་། ཏོ་ ཡོང་ཅེ་ཅེན་ནེ་ ཀོན་འཇོག་ལ་ མ་འཇིའི་ཀ་ནེ་ མིར་རྒྱུད་རྒུ་ནི་ཀ་ ཆ་ཅེའོ་ སྤེ་ཞིག་རྒེ་ ཚུལ་ལ་ སལ་ལེ་ ཛེད་། 7 ཡང་ སོ་འདོམ་མེ་ རྒྱལ་སེ་ ཏེ་ ཁྲིམ་མེད་རྡེ་ མི་རྒུ་ནི་ ལུའི་འབྲེལ་ ངན་པེ་ ཤོད་པ་རྒུ་ནི་ ཅོའེ་རྡེ་, མ་སྲན་ཀྲེ་ སེམ་ རྐྱོ་མོ་ སོང་འདེ་ ཡོ་ཀན་ ཀྲང་པོ་ ལོཏ་ ཟེར་ཧན་འབོ་ རྐྱོབ་རྦེ་ཛེད་། 8 ཏེ་ མི་ ཀྲང་པོ་རྦོ་ ཏོ་རྒུ་ནི་ རྐྱིལ་ལ་ འདེད་ཏེ་ ཞག་ཏང་ ཁོང་རྒུ་ནི་ ངན་པ་ ལེ་ཧ་རྒུན་ ཐོང་ཅེ་ རྡང་ ཚོར་ཤེ་རྦེ་, ཁོའེ་ སེམ་ ཀྲང་པོ་ལ་ རྡུ་ངལ་ ཐོང་ངེ་ཡོད་པེན་། 9 ཏེ་ནི་ ཀ་ཟུག་རྒེ་ ཀོན་འཇོག་རྒེ་ ཐུ་ཐེད་རྡེ་ འགྲུལ་ཧན་རྒུན་ ཐི་ཚོད་ལྟ་ཀ་ནེ་ རྐྱོབ་ཅེ་ རྡང་ མི་ངན་རྒུན་ལ་ ཁྲིམ་ཅེད་རྡེ་ ཞག་ཚུག་པ་ ཆེད་མེད་ལ་ ཆེད་པ་ ཀ་ལེན་ པོར་ཤེ་རྒུན་ ཁོང་ངེ་ ཁྱེན་ནེ་ ཛེ་རྡེ་ནོག་། 10 མིག་ས་ལེ་ ཀོན་འཇོག་རྒེ་ ཝང་ལ་ མི་སི་ཀན་ ཅོའེ་རྡེ་ ལུའི་འབྲེལ་ ངན་པེ་ འདོད་པེ་ ལམ་མེ་ཀ་ འགྲུལ་ཧན་རྒུན་ལ་ ཀོན་འཇོག་རྒེ་ ཆེད་པ་ སལ་ལེ་ ཛེ་རྡེན་།
ཏོ་རྒུན་ རང་རྒྱལ་ཅེན་ འདང་ ཕོ་སོ་ཅེན་ ཡོང་ངེ་ནོག་, ཡང་ ཟི་ཞིད་ཅེན་རྒུ་ནི་ ཧོར་ལ་ ངན་པ་ ཟེར་ཤེ་ལ་ ཚབ་རྦེ་ མག་། 11 ཀོན་འཇོག་རྒེ་ ཕོ་ཉ་རྒུན་ ཝང་ འདང་ ཤུག་རྒེ་ན་ ཏེ་ ཟུའི་མེ་ ལོབ་རྦོན་རྒུ་ནི་སང་ ཀྲག་པོ་ ཡོད་ན་, ཙོབོ་ ཀོན་འཇོག་རྒེ་ འདུན་ལ་ ཁོང་རྒུ་ནི་ལ་ ཏོ་རྒུ་ནི་ རྒྱཔ་འགལ་ལ་ ངན་པ་ མོལ་ལེ་ ཛེ་རྡེ་ མི་འདུག་།
12 ཏེ་ ཟུའི་མེ་ ལོབ་རྦོན་རྒུན་ སམ་བ་ མ་ཏང་ལ་ ལེ་ཧ་ ཅོ་ཀ་ནེ་ ནག་ཚོག་རྒེ་ སེམ་ཅེན་རྒུན་ ཙོག་སེ་ ནོག་, ཀའོ་རྒུན་ ཟུམ་འདེ་ མེ་ཀན་ ཅོ་ཅེ་ལ་ རྐྱེ་རྡེ་ འིན་། ཁོང་རྒུན་ལ་ ཧ་མ་ཀོ་ཀན་རྒུ་ནི་ ཧོར་ལ་ ཁོང་རྒུ་ནི་ ཁྲེལ་རྒོད་ ཏང་ངེ་ནོག་, ནག་ཚོག་རྒེ་ སེམ་ཅེན་རྒུན་ ཙོག་སེ་ ཏོ་རྒུན་ལ་ ལྟོང་རྡེ་ ཆེན་། 13 ཏོ་རྒུན་ལ་ རང་ངེ་ ལེ་ཧ་ ངན་པེ་ འབྲེ་རྦུ་ ངན་པ་ ཐོབ་རྦེན་། ཏོ་རྒུན་ ཉི་མེ་ འོད་རྡེ་ན་ ཁོ་རང་རྒུ་ནི་ འདོད་པ་ ངན་པེ་ ལེ་ཧ་ ཅོ་ཅེ་ལ་ ཐེད་རྡེ་ནོག་, ཡང་ ཁོང་རྒུན་ ཀོའེ་ལག་ ཏང་ རྡོང་ངེ་ཀ་ ནག་ཐིག་ ཕོག་ཀན་ ཅོག་སེ་ ནོག་། ཁྱི་ཞ་ ཉམ་པོ་ ཁར་ཞི་ ཟ་ནི་ལ་, ཁོ་རང་རྒུ་ནི་ འདོད་པ་ ནང་ཞིན་ ལེ་ཧ་ ཅོ་ཅེ་ལ་ ཐེད་རྡེ་ནོག་། 14 ཏོ་རྒུ་ནི་ ཏུའི་རྒྱུན་ ལུའི་འབྲེལ་ལེ་ཕི་ འདོད་པ་ ཅོ་ནོག་, ཡང་ རྡིག་པ་ མ་ཅོ་ལ་ མ་ནི་ འདེད་ཉེན་ནེ་ མག་, ཏེཏ་པ་ རྟེམ་པོ་ མེ་ཀན་རྒུན་ལ་ རྡིག་པ་ ཅོ་ཅེ་ ཐི་ཚོད་ལྟ་ ནེ་ ཁྱེ་རེ་ནོག་། ཁོང་རྒུན་ ནབ་སེམ་མེ་ན་ ཁེ་སྤ་ ཡང་ ངན་ ཕོག་ཀ་ནེ་ ཕར་རྒྱུད་ ནོག་། 15 ཏེ་རྒུ་ནི་ ལམ་ ཀྲང་པོ་ ཕང་ཏེ་, འབེ་ཨོར་རེ་ པུ་ཙ་ ལུང་རྟོན་པ་ འབཱ་ལཱམ་མེ་ ལམ་ ངན་པེ་ཀ་ འགྲུལ་རྡེ་ ནོག་, པེ་ནེ་ ཅོ་ཅེ་ འདོད་པེ་, ཁོ་ ངན་པ་ ཅོ་ཅུག་ཏེ་ འིན་འབེན་། 16 འིན་ན་ ཏེ་ ཞག་ལ་, སྤེ་ར་ ཟེར་ མི་ཤེ་ཀ་ནེ་ པུང་ངུ་ལ་ སྤེ་ར་ ཏང་ཉེན་འདེ་ ཁོའེ་ ལེ་ངན་རྒུ་ནི་ཕི་ ཁོ་ ཁར་རྐྱག་ ཏྃ་རྡེ་, ཁོ་ ཉོན་འབེ་ ལེ་ཧ་ ཅོ་ཅེ་ནི་ རྒག་།
17 ཏེ་ ཟུའི་མེ་ ལོབ་རྦོན་རྒུ་ནི་, ཆུ་ མེ་ཀ་ནེ་ ཆུ་མིག་ ཏང་, ལུང་ཀྲག་ ཀྲག་པེ་ མུ་སྤ་ ཏེད་ཏེ་ ཁྱེར་རེ་ ཙོག་སེ་ འིན་། ཏོ་རྒུ་ནི་ཕི་ མུན་ཀྲག་ ཚང་མེ་སང་ ཐིལ་རྦོ་ འདམ་མེ་ ཛེད་ཏེ་ ཡོད་། 18 ཏོ་རྒུ་ནི་ ཏོན་མེད་རྡེ་ སྤེ་ར་ ཏང་ངེན་ རང་རྟོད་ ཏང་ངེ་ནོག་། ཉེ་ཐུབ་ཤིག་རང་ རྡིག་པེ་ མི་ཙེ་ པུད་ཅེ་ནི་ ཤོར་ཉེན་ཀ་ནེ་ མི་རྒུན་ལ་ ཁོང་རྒུ་ནི་ ཟུྃ་སྤེ་ འདོད་པ་ ངན་པ་ ནང་ཞིན་ ཅོ་ཅེ་ལ་, ཐི་ཚོད་ལྟ་ ཏང་འདུག་། 19 ཏོ་རྒུ་ནི་ ཞེན་མ་རྒུན་ལ་ ར་ཝང་ ཏང་ཅེ་ ཁ་ཅེད་ ཅོ་རུག་, འིན་ན་ ཁོ་རང་རྒུན་ ངན་པེ་ ཚེ་ཡོག་ འགྱུར་རྡེ་ འདུག་, ཅེ་ཟེར་ནི་ མི་ཞིག་ ཁོའེ་ཀ་ ཝང་སྲུལ་ཧན་འབོ་ ཚེ་ཡོག་ འགྱུར་རེ་ནོག་། 20 ཀལ་ཏེ་ ཨ་ཧོའེ་ ཙོབོ་ རྡང་ རྐྱབ་འགོན་, ཡི་ཤུ་ མ་ཤི་ཀ་ ཤེ་ཤེ་རྦེ་ འཇིག་རྟེན་ནེ་ འདོད་པ་ ངན་པ་རྒུ་ནི་ ཤོར་ཉེན་ཀན་རྒུ་ནི་ ཡང་ རྡིག་པ་ ཁོ་རང་རྒུ་ནི་ཀ་ ཁྲིལ་ཅུག་ཏེ་ ཝང་སྲུལ་ཅུག་རྒེ་ཡོད་ནི་, ཏེ་ནི་ ཏོ་རྒུ་ནི་ ནེ་ལུག་པོ་ ངུ་ལེ་སང་ མང་ངེ་ ཐུ་ཆེན་། 21 ཏོ་རྒུ་ནི་ ཏམ་པ་ མི་ཙེ་ པུད་ཅེ་ ཀཱ་ སལ་ཧན་འབོ་ ཧ་ཀོ་རྡེ་ ལྟིང་ནི་ རྒྱབ་ལོག་ ཅེ་སང་, ཏོ་རྒུན་ལ་ ཀྲང་པོ་ མི་ཙེ་ པུད་ཅེ་ ལམ་འབོ་ མ་ནི་ རྒྱུའི་ མ་སོང་འབེན་ནི་, རྒྱལ་ལེ་ ཡོད་ཁྲོ་། 22 ཁོང་རྒུ་ནི་ཕི་ ཏ་ འི་ ཏམ་སྤེ་རྦོ་ ཁྲོད་རྡེ་ནོག་, “ཁྱི་ཞིག་ རང་ངེ་ རྐྱུག་སྤ་ ཟ་ལ་ ལོག་ཏེ་ ཆ་ནོག་།” ཡང་ “ཕག་ ཁྲུའི་རྡེ་ ལྟིང་ནི་ ལྡམ་འབག་རྒེ་ན་ འདྲེའེ་རྡེ་ལ་ ལོག་ཏེ་ ཆ་ནོག་།”