ཡོ་ཧཱ་ནན་ནེ་ ཆག་འབྲི་ ཏང་པོ་།
མི་ཙེ་ ཀའ་།
1
ང་ཞི་ ཁྱི་ཞ་རྒུན་ལ་, འགོ་ཟུག་ནི་ཕ་ལ་ ཡོ་ཀ་ནེ་ མི་ཙེ་ ཀེའེ་ ཧོར་ལ་ ཤེད་ཅེ་འིན་, ཀ་རྦེ་ མོལ་ཧན་རྒུན་ ང་ཞ་རྒུ་ནི་ ཚོར་ ཡང་ འཇལ་། འོ་ནེ་ རང་ངེ་ མིག་ནི་ ཞིབ་སལ་ ཅོའེ་རྡེ་ འཇལ་, མ་ཚེད་ ཁོང་ལ་ ང་ཞ་རང་ངེ་ ལག་པ་ སེ་རྦེན་། 2 ཀོན་འཇོག་རྒེ་ ཏེ་ མི་ཙེ་ ངོན་ཅུག་རྒེ་ ཛེད་, ཡང་ ང་ཞ་རྒུ་ནི་ ཁོང་ འཇལ་། ང་ཞ་རྒུན་ ཏེ་ མི་ཙེ་ སྤང་པོ་ ནོག་, ཡང་ ཁྱི་ཞ་རྒུན་ལ་ ཏེ་རྒ་ ཐ་མེད་པེ་ མི་ཙེ་ ཧོར་ལ་ ཤེད་རྡེ་ཡོད་, ཀའོ་ ཀོན་འཇོག་ ཡབ་ ཉམ་པོ་ ཡོད་པེན་, ཡང་ ང་ཞ་རྒུ་ནི་ཀ་ ངོན་ཅུག་རྒེ་ ཛེད་། 3 ཁྱི་ཞ་རྒུ་ནི་ ང་ཞ་རྒུན་ ཉམ་པོ་ འབྲེལ་ པོར་ཤེ་ཕི་ ང་ཞི་ ཁོང་ངེ་ ཧོར་ལ་ ཚོར་ཧན་ འདང་ ཐོང་ཀན་རྒུན་ ཁྱི་ཞ་ ཤེད་རྡེ་ཡོད་, ཡང་ ང་ཞ་རྒུ་ནི་ འབྲེལ་རྦོ་, ཀོན་འཇོག་ ཡབ་ ཏང་ ཁོང་ངེ་ སྲེ་ ཡི་ཤུ་ མ་ཤི་ཀ་ ཉམ་པོ་ ནོག་། 4 ང་ཞི་ ཐེད་པོ་རྒུན་ འདྲན་འདྲ་ ཁྱི་ཞ་རྒུན་ ཉམ་པོ་ རྒོ་ཅེ་ཕི་ འི་ ཡི་རྒེ་རྦོ་ ང་ཞི་ འབྲི་འིན་།འོད་རྡེ་ན་ འདེད་ཅེ་།
5 འི་ ཁྲིན་འབོ་ ང་ཞ་རྒུན་ལ་ ཡི་ཤུའི་ཀ་ནི་ ཚོར་, ཡང་ ཏ་ ཏག་ས་ ཁྱི་ཞ་རྒུན་ལ་ ཤེད་ཅེ་འིན་། ཀོན་འཇོག་ནི་ འོད་ ནོག་, ཡང་ ཁོང་ངེ་ན་ མུན་ཀྲག་ མ་ནི་ མེ་ཀག་། 6 ཀལ་ཏེ་ ཨ་ཧོ་རྒུ་ནི་ ཀོན་འཇོག་ ཉམ་པོ་ འབྲེལ་ པོ་རེ་ཡོད་ ཟེར་རྡེ་ ཏ་རུང་ང་ ངན་སེམ་ཅེན་ནེ་ མུན་ཀྲག་རྒེ་ན་ འགྲུལ་རྡེ་ཡོད་ནི་, ཏེ་ནི་ ཨ་ཧོ་རྒུ་ནི་ ཟུན་ ཏྃ་རྡེ་ ཀྲང་པེ་ ལམ་མེ་ཀ་ མི་ཙེ་ མ་པུད་རྡེ་ ནོག་། 7 འིན་ན་ ཀལ་ཏེ་ ཨ་ཧོ་རྒུན་ འོད་རྡེ་ན་ འགྲུལ་རྡེ་ཡོད་ནི་, ཀ་ཟུག་ ཀོན་འཇོག་ འོད་རྡེ་ན་ ཞུ་རྡེ་ འིན་, ཏེ་ནི་ ཨ་ཧོ་རྒུན་ ཅིག་ ཏང་ ཅིག་ ཉམ་པོ་ འབྲེལ་རྡེ་ ནོག་, ཡང་ ཁོང་ངེ་ སྲེ་ ཡི་ཤུ་ མ་ཤི་ཀེ་ ཧུ་ཁྲག་རྒེ་, ཨ་ཧོ་རྒུན་ རྡིག་པ་ ཚང་མ་ནི་ སང་མ་ ཛེད་རྡེན་།
8 ཏ་ ཀལ་ཏེ་ ཨ་ཧོ་རྒུ་ནི་ རྡིག་པ་ མ་ནི་ མ་ཅོའེ་རྦེན་ ཟེར་ནི་, ཨ་ཧོའེ་ རང་འདང་རང་ལ་ འགོ་ཧོར་རྡེ་ ནོག་, ཡང་ རྡེན་འབའ་ ཨ་ཧོ་རྒུ་ནི་ན་ མེ་ཀག་། 9 འིན་ན་ ཀལ་ཏེ་ ཨ་ཧོ་རྒུ་ནི་ ཀོན་འཇོག་ལ་ ངེ་ རྡིག་པ་ ཅོའེ་རྦེན་ ཟེར་ནི་, ལོ་ཁྱེལ་ཅེན་ འདང་ ཀྲང་པོ་ ཐག་ཅེད་ ཛེད་ཀན་, ཀོན་འཇོག་རྒེ་ ཨ་ཧོ་རྒུ་ནི་ རྡིག་པ་རྒུན་ལ་ ཤག་སྤ་ སལ་རྡེ་, ཨ་ཧོ་རྒུན་ ཨ་ཧོའེ་ ལེ་ཧ་ ངན་པ་རྒུ་ནི་ སང་མ་ ཛེད་རྡེན་། 10 ཀལ་ཏེ་ ཨ་ཧོ་རྒུ་ནི་ ངེ་ རྡིག་པ་ མ་ནི་ མ་ཅོའེ་རྦོན་ ཟེར་ནི་, ཨ་ཧོའེ་ ཀོན་འཇོག་ ཟུན་ཅེན་ ཐེ་ཅེ་ མ་ཚེད་, ཨ་ཧོ་རྒུ་ནི་ ཉིང་ངེ་ན་ ཀོན་འཇོག་རྒེ་ ཀེའེ་ཕི་ མལ་ མེ་ཀག་།