པི་ཏྲ་རེ་ ཆག་འབྲི་ ཉི་སྤ་།
པི་ཏྲ་རེ་ འཇུ་ ཞུའི་།
1
ང་ ཤི་མོན་པི་ཏྲར་, ཡི་ཤུ་ མ་ཤི་ཀེ་ ཡོག་པོ་ རྡང་ ཧུ་ཚབ་ འིན་།ངེ་ ཨ་ཧོའེ་ ཀོན་འཇོག་ ཏང་ རྐྱབ་འགོན་ ཡི་ཤུ་ མ་ཤི་ཀ་རྒུ་ནི་ ཀྲང་པོ་ ཛེད་ཅེ་རྦེ་, ང་ཞ་ ཙོག་སེ་ ཏེ་རྒ་ རིན་ཅེན་ ཏེཏ་པ་ ཐོབ་ཀན་རྒུན་ལ་ འི་ ཡི་རྒེ་རྦོ་ འབྲི་འིན་།
2 ཁྱི་ཞ་རྒུ་ནི་ ཀོན་འཇོག་རྒེ་ ཤེ་ཤེ་ ཤེ་རྒྱུ་ རྡང་ ཨ་ཧོའེ་ ཙོབོ་ ཡི་ཤུའི་ན་ ལྡ་ནེན་ ཆ་ཟ་ནི་, ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ མང་ངེ་སང་ མང་ངེ་ ཐོབ་ཤིག་།
ཏེཏ་པེ་ན་ ཡར་རྒྱེ་།
3 ཨ་ཧོའེ་ ཀོན་འཇོག་རྒེ་ ཤོད་ལམ་མེ་ན་ འགྲུ་ལེན་ མི་ཙེ་ པུད་ཅེ་ཕི་, ཀོན་འཇོག་རྒེ་ ཧ་ལེ་ཤེ་ ཤེད་རྡེ་, ཨ་ཧོ་རྒུན་ལ་ རྒོའེ་ཤེ་ ཚང་མ་ སལ་ལེ་ ཛེད་། ཨ་ཧོ་རྒུན་ལ་ ཏེ་ ཚང་མ་ ཁོང་ ཤེ་ཤེ་རྦེ་ ཐོབ་ཏེ་ ནོག་, ཁོང་ངེ་ ཨ་ཧོ་ ཁོ་རང་ངེ་ ཟང་པོ་ རྡང་ ཧ་ལེ་ཤེ་ སྤལ་ རྒྱུད་ཏེ་, འབོ་ ཛེད་། 4 ཏོ་རྒུ་ནི་ ཅོའེ་རྡེ་, ཁོང་ངེ་ ཨ་ཧོ་རྒུན་ལ་ ཞལ་ཆེཏ་ མ་ ཆོན་མོ་ རྡང་ རིན་ཅེན་རྒུན་ སལ་ལེ་ ཛེད་། ཏེ་ ཞལ་ཆེཏ་རྒུ་ནི་, ཨ་ཧོ་ལ་ འཇིག་རྟེན་ནེ་ན་ ཡོ་ཀ་ནེ་ འདོད་པ་ ངན་པ་རྒུ་ནི་ ཐར་ཤེ་ རྡང་, ཀོན་འཇོག་རྒེ་ ཤོད་ལམ་མེ་ན་ ཁག་ནེན་ཅུག་རྒེ་ ཛེད་།
5 ཀོན་འཇོག་རྒེ་ ཏེ་ ཚང་མ་ ཅོའོ་ ཛེད་ཅེ་ཀ་ནི་, ཁྱི་ཞ་རྒུ་ནི་ ཏེཏ་པེ་ ནང་ལ་ འི་ ཁྱུད་ ཚང་མ་ ཁྱོང་ཅེ་ མ་ ཙོན་འགྲུའི་ ཅོའེ་ཧེ་། ཁྱི་ཞི་ ཏེཏ་པ་ རྡང་ཉམ་པོ་ ཤོད་པ་ ཟང་པོ་, ཤོད་པ་ ཟང་པོ་ རྡང་ཉམ་པོ་ ཀོན་འཇོག་ ཐུག་ཐེད་ཀན་རྒུན་ ཤེ་ཤེ་ ཤེ་རྒྱུ་, 6 ཀོན་འཇོག་རྒེ་ ཐུག་ཐེད་ ཤེ་ཤེ་ ཤེ་རྒྱུ་ རྡང་ཉམ་པོ་ རང་སེམ་ ཆུན་ཉེན་ཀན་, རང་སེམ་ ཆུན་ཉེན་ཀན་ རྡང་ཉམ་པོ་ ཟོད་སྲེན་, ཟོད་སྲེན་ རྡང་ཉམ་པོ་ ཀོན་འཇོག་རྒེ་ ཤོད་ལམ་མེ་ཀ་ འགྲུལ་ཧ་ནེ་ མི་ཙེ་ཞིག་ པུད་ཉེན་ཀན་, 7 ཀོན་འཇོག་ལ་ ཐུག་ཐེད་རྡེ་ ལམ་ལ་ འགྲུལ་ཧ་ནེ་ མི་ཙེ་ རྡང་ཉམ་པོ་ སྤུན་རྒུན་ལ་ ཤེ་སྤ་, ཡང་ ཏེ་ ཤེ་སྤ་ ཉམ་པོ་ མི་ ཚང་མ་ལ་ ཉིང་ངེ་ ཐིལ་ནི་ ཤེ་སྤ་ ཡོང་རྒོ་ཤེ་ ནོག་།
8 ཏ་ ཀལ་ཏེ་ ཏེ་ ཁྱུད་ ཚང་མ་ ཁྱི་ཞི་ན་ རྐྱེན་ ཆེན་ན་, ཏོ་རྦེ་ ཁྱི་ཞ་རྒུ་ནི་ མི་ཙེ་ ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀ་ ཤེ་ཤེ་ན་ མང་ངེ་ འབྲེ་རྦུ་ མིན་ཀན་ འདང་ ཕན་ཏོག་ཅེན་ འགྱུར་ཤུག་རྒེན་། 9 འིན་ན་ ཏོ་ཙོག་སེ་ ཁྱུད་ མེ་ཀན་རྒུན་ རྒྱ་ལེ་ ཅོའེ་རྡེ་ མ་ཐོང་ཀན་ འདང་ ཞ་ར་ ཙོག་སེ་ ནོག་། ཡང་ ཁོའེ་ ངུལ་ལ་ ཅོའེ་ཧ་ནེ་ རྡིག་པ་རྒུན་ ཏག་ཅུག་རྒེ་ ཛེད་ཀན་འབོ་ ཞེད་ཏེ་ ནོག་།
10 ཏོ་རྦེ་ཕི་ ཁྱི་ཞ་ སྤུན་རྒུ་ནི་ལ་, ཀོན་འཇོག་རྒེ་ འབོ་ ཛེད་ཀན་ འདང་, འདམ་མེ་ ཛེད་ཀན་རྒུ་ནི་ ཕྲོ་ནི་ འིན་ཀན་འབོ་, ལྟན་ཅེ་ལ་ ཙོན་འགྲུའི་ ཅོའེ་ཧེ་། ཏུ་ཟུག་ ཅོ་ནི་, ཀོན་འཇོག་རྒེ་ན་ ཡོ་ཀ་ནེ་ ཏེཏ་པེ་ཀ་ནི་ ཁྱི་ཞ་རྒུན་ མ་ནི་ མི་འགྱེལ་། 11 ཏེ་ནི་ ཨ་ཧོ་རྒུ་ནི་ ཙོབོ་ རྡང་ རྐྱབ་འགོན་ ཞུ་ཧ་ནེ་ ཡི་ཤུ་ མ་ཤི་ཀེ་, ཐ་མེད་པེ་ རྒྱལ་སྲིད་རྡེ་ན་ ཁྱི་ཞ་རྒུན་ལ་ ཧ་ལེ་ཤེ་ རྒ་སུའི་ ཛེད་རྡེན་།
ཏམ་པེ་ སུང་རབ་ལ་ ནྃ་ ཅོ་ཅེ་།
12 ཏོ་རྦེ་ཕི་ ཞེན་ ཁྱི་ཞ་རྒུན་ལ་ ཏེ་ ལབ་ཞ་རྒུན་ ཧ་ཀོ་རྡེ་ ཏེ་ རྡེན་འབའ་རྒུ་ནི་ཀ་ རྟེམ་པོ་ འདེད་ཏེ་ འིན་ན་, ངེ་ ཁྱི་ཞ་རྒུན་ལ་ འི་ ལབ་ཞ་རྒུན་ ཏུའི་རྒྱུན་ འི་ཏུ་ ཧུལ་ལེན་། 13 ང་ སོན་པོ་ ཡོད་ཡོད་པོ་, ཏོ་རྒུན་ འི་ཏུ་ ཧུལ་ཅེ་ ངེ་ འོའེ་སྤ་ ས་མེ་རག་། 14 འིན་ན་ ང་ འགྱོ་སྤ་ འི་ འཇིག་རྟེན་ནི་ ཆ་རྒོ་ཤེ་རྦོ་ རྒྱུའི་ཡོད་, ཅེ་ཟེར་ནི་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ང་ འི་རྦོ་ ངོན་ཅུག་རྒེ་ ཛེད་། 15 ང་ ཤི་རྡེ་ ལྟིང་ནི་ལ་, ཁྱི་ཞ་རྒུ་ནི་ འི་ ལབ་ཞ་རྒུན་ འི་ཏུ་ པོར་ཤེ་ཕི་ ངེ་ ཙོན་འགྲུའི་ ཅོའེན་།
16 ང་ཞི་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཝང་ ཉམ་པོ་ ཡང་ ལོག་ཏེ་ རྐྱོད་ཅེ་ ཧོར་རྒུན་ ཤེད་ཟ་ནི་, རྐྱོན་འཇེན་ སྲུང་ངུ་རྒུན་ མ་ཅོ་ལ་, ཡི་ཤུའི་ ཟི་ཞིད་ ང་ཞ་རང་ངེ་ མིག་ནི་ འཇལ་རྡེ་ འིན་འབེན་། 17-18 ཀོན་འཇོག་ ཡབ་རྦེ་ ཆོག་ནི་ མ་ཤི་ཀ་ སི་ཝ་ རྡང་ སྤལ་ སལ་ལེ་ ཛེད་ཟ་ནི་, ང་ཞ་ལ་ ཁོང་ ཉམ་པོ་ ཏམ་པེ་ རི་ཀ་ ཡོད་པེན་། ཏེ་ ཟི་ཞིད་པེ་ན་, རྡེ་བ་ཅན་ནེ་ ཀོན་འཇོག་རྒེ་ སུང་ཧད་པེ་, “འི་རྦོ་ ངེ་ ཤེ་སྤ་ པུ་ཙ་ འིན་, ཁོ་ ཉམ་པོ་ ང་ ཧོཔ་ ཐེད་པོ་ འིན་” མོལ་ལེན་ ང་ཞི་ ཚོར་།
19 ཏོ་རྦེ་ ཅོའེ་རྡེ་ ང་ཞ་རྒུན་ལ་ ལུང་རྟོན་པ་རྒུ་ནི་, ཙོབོ་ ཡི་ཤུའི་ ཧོར་ལ་ འབྲི་ཀན་རྒུ་ནི་ན་ མང་ངེ་ ལོ་ཁྱེལ་ རག་། ཡང་ ཁྱི་ཞ་རྒུ་ནི་ལ་ ཏོ་རྒུ་ནི་ཀ་ ནྃ་ མང་ངེ་ ཏང་རྒོ་ཤེ་ ནོག་, ཅེ་ཟེར་ནི་ ཁྱི་ཞ་རྒུ་ནི་ཕི་ ཏོ་རྒུན་ ཉི་མ་ ཤར་ཤར་ཚུག་པ་ལ་ མུན་ཀྲག་རྒེ་ན་, འོད་ འདང་ཤེན་ཞིག་ ཙོག་སེ་ ནོག་། ཏེ་ནི་ ཁྱི་ཞ་རྒུ་ནི་ སེམ་མེ་ན་ ནམ་ལྃ་རྡེ་ ཧར་ཤེན་ མ་ཤི་ཀ་ ཤར་རེ་ ཛེ་རྡེན་། 20 འིན་ན་ ངུལ་ལ་ ཁྱི་ཞ་རྒུན་ལ་ འི་རྦོ་ ཧ་ཀོ་རྒོ་ཤེ་པོ་ ཁག་ཅེན་ ནོག་། ཏམ་པེ་ སུང་རབ་རྦེ་ ལུང་རྟན་ནི་ ཚིག་ཅིག་ལ་ ལུང་རྟོན་པ་ཞིག་རྒེ་ རང་ངེ་ སམ་བ་ ནང་ཞིན་ འབྲི་རྡེ་ མག་། 21 ཅེ་ཟེར་ནི་ ལུང་རྟན་ནི་ ཚིག་ཅིག་ལ་ མི་ སམ་བ་ནི་ མ་ཡོང་ངེ་, ཏམ་པེ་ ཐུག་ཡིད་ རྒྱུད་ཏེ་ ལུང་རྟོན་པ་རྒུ་ནི་ ཀོན་འཇོག་རྒེ་ ཞལ་ཏ་རྒུན་ ཤེད་ཏེ་ ནོག་།