2
ཏེ་རྒ་རྦེ་ཕི་ལ་ ཟུན་ ཏང་ཅེ་, ངའིན་ ཅོ་ཅེ་, ཕྲ་རྡོག་, མི་ ཤོད་པེ་ ཧོར་ལ་ སྤེ་ར་ སོག་པོ་ ཟེར་ཤེ་ ཤོད་པ་ ངན་པ་ ཚང་མ་ ཕང་རྒོའེ་། 2 ཐར་པེ་ ཅིན་ལབ་ སོན་ཏེ་ ཐོབ་ཅེ་ཕི་ ཕྲུ་རྒུ་ ཆུང་ཙེ་ རྐྱེ་ཀན་ ཙོག་སེ་ ཐུག་ཡིད་རྡེ་ འོ་མ་ ལག་མོ་ ཐུང་ཅེ་ལ་ མང་པོ་ འདོད་པ་ ཅོའེ་ཧེ་། 3 ཏ་ ཙོབོ་ ཟང་པོ་ འིན་ཀ་ནེ་ ཀྲོཏ་པོ་ ཁྱི་ཞི་ ཉུང་འདེ་ ནོག་།རྡོ་ སོན་པོ་ རྡང་ མི་ འདམ་མེ་ ཛེད་ཀན་རྒུན་།
4 སོན་པོ་ ཀྲུར་རྡོ་ ཞུ་ཧན་ ཙོབོ་རྡེ་ཀ་ ཁྱི་ཞ་རྒུན་ ཤོག་ཧེ་, ཀའོ་ མི་རྒུ་ནི་ ཕང་ནང་ ཀོན་འཇོག་རྒེ་ འདམ་མེ་ ཛེད་ཏེ་ ཁོང་ངེ་ཕི་ རིན་ཅེན་ འིན་།
5 ཁྱི་ཞ་ རྡོ་ སོན་པོ་ ཀོན་འཇོག་རྒེ་ ཐུག་ཡིད་རྡེ་ ཀོན་འཇོག་རྒེ་ ཁང་པ་ སིག་ཅེ་ལ་ ཀོལ་ལེ་ ཛེད་ཀན་རྒུན་ ནོག་, ཡང་ ཁྱི་ཞ་ ཁོང་ངེ་ ལ་མ་ ཏམ་པ་, ཀའོ་རྒུ་ནི་ ཡི་ཤུ་ མ་ཤི་ཀ་ རྒྱུད་ཏེ་ ཀོན་འཇོག་རྒེ་ ཧུ་འདུན་ལ་ འོའེ་སྤ་ འིན་ཀ་ནེ་ སེམ་ཡིད་རྡེ་ སྲོག་ཆོད་ པུ་ལེ་ནོག་། 6 ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་།
“ལྟོའེ་རྡང་ ཡེ་རུ་ཤ་ལེམ་མེ་a རྒྱལ་སེ་ན་
ངེ་ འདམ་ཀ་ནེ་ ཀྲུར་རྡོ་ རིན་ཅེན་ཞིག་ པོ་རེ་ཡོད་།
སུ་ཞིག་རྒེ་ ཁོང་ངེ་ཀ་ ཏེཏ་པ་ ཅོའེན་
ཏེ་ མིའུ་ མ་ནི་ ཁྲེལ་རྦ་ མི་ཆ་།”
7 ཏ་ ཁྱི་ཞ་ ཏེཏ་པ་ ཅོ་ཀན་རྒུ་ནི་ཕི་ ཏེ་ རྡོ་རྦོ་, མ་ རིན་ཅེན་ཞིག་ འིན་། འིན་ན་ ཏེཏ་པ་ མ་ཅོ་ཀན་རྒུ་ནི་ཕི་,
“ཀ་ རྡོ་རྦོ་ སིག་སྤོན་རྒུ་ནི་ རིན་མེད་ སམ་འདེ་ ཕྃ་ཏྃ་,
ཏེ་ རྡོ་རྦོ་ ཀྲུར་རྡོ་ རིན་ཅེན་འབོ་ འགྱུར་།”
8 ཡང་
“ཁོང་ནི་ མི་རྒུན་ རྒག་ ཕུག་ཅུག་ཀ་ནེ་ རྡོ་ རྡང་
ཏོ་རྒུན་ འགྱེལ་ཅུག་ཀ་ནེ་ ཕོ་ལོང་ ཙོག་སེ་ ནོག་།”
ཁོང་རྒུ་ནི་ ཀོན་འཇོག་རྒེ་ ཀའ་ ཁ་ མི་ཉེན་ཅེ་རྦེ་, རྒག་ ཕུག་ཏེ་ ནོག་, ཏེ་རྒ་རྦོ་, ཁོང་རྒུ་ནི་ཕི་ ཀོན་འཇོག་རྒེ་ ཐུག་འདོད་ འིན་འབེན་།
9 འིན་ན་ ཁྱི་ཞ་རྒུ་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མི་རྒུན་, རྒྱལ་རིག་རྒེ་ ལ་མ་, རྒྱལ་ཁབ་ ཏམ་པ་ རྡང་ ཀོན་འཇོག་ ཁོ་རང་ངེ་ མི་རྒུན་ ནོག་, ཏེ་རྒ་རྦེ་ ཅོའེ་རྡེ་ ཁྱི་ཞ་རྒུན་ལ་ མུན་ཀྲག་ནི་ ཁོང་ངེ་ ཧ་ལེ་ཤེ་ འོད་རྡེ་ན་ འབོ་ ཛེད་ཀ་ནེ་ ཀོན་འཇོག་རྒེ་ ཆག་ལེ་ ཟང་པོ་རྒུན་ལ་ ཁྱི་ཞི་ རྟོད་པ་ པུལ་ ཉེན་ནེན་།
10 “ངུལ་ལ་ ཁྱི་ཞ་ ཀོན་འཇོག་རྒེ་ མི་ མན་འབེན་,
ཏ་ ཀོན་འཇོག་རྒེ་ མི་རྒུན་ འགྱུར་རྡེ་ ནོག་།
ངུལ་ལ་ ཁྱི་ཞ་ ཉིང་ཞེ་ མ་ཐོབ་རྦེ་ འིན་འབེན་,
ཏ་ ཉིང་ཞེ་ ཐོབ་ཏེ་ ནོག་།”
11 ཤེ་སྤ་ སྤུན་རྒུན་, ཁྱི་ཞ་རང་རྒུན་ སེམ་ཡིད་རྡེ་ རྒྱཔ་འགལ་ལ་ ནོལ་ལེན་ འདེད་ཀ་ནེ་ རྡིག་པེ་ འདོད་པ་རྒུ་ནི་ ཐག་རིང་ལ་ པོར་རྡེ་ འི་ འཇིག་རྟེན་ནེ་ན་ འགྲོན་པོ་ རྡང་ པེ་སྤ་རྒུན་ ཙོག་སེ་ མི་ཙེ་ པུད་ཅེ་ལ་ སེམ་རུའི་ ཏང་ངེ་ཡོད་། 12 ཏེཏ་པ་ མེ་ཀ་ནེ་ ཁྱིམ་ཙེ་པ་རྒུ་ནི་ ཕྲོ་, ཁྱི་ཞ་རྒུ་ནི་ མི་ཙེ་ ཟང་པོ་ཞིག་ པུད་ཧེ་, ཞེན་ ཁོང་རྒུ་ནི་ ཁྱི་ཞ་རྒུན་ལ་ ངན་པ་ ཅོའེ་རྡེ་ ནོག་ ཟེར་རྡེ་ ཉེད་ཀལ་ ཏང་ན་, ཁོང་རྒུ་ནི་ ཁྱི་ཞ་རྒུ་ནི་ ལེ་ཧ་ ཟང་པོ་རྒུན་ ཐོང་ཅེ་རྦེ་, ཀོན་འཇོག་ལ་ རྟོད་པ་ པུ་ལེན་, ནམ་ ཁོང་ འཇིག་རྟེན་ནེ་ཀ་ ཁྲིམ་ཅེད་ ཛེ་རྡེ་ལ་ རྐྱོད་རྡེན་།
ཝང་སྲུལ་པ་རྒུ་ནི་ ཁ་ཉེན་ཅེ་།
13 ཀོན་འཇོག་རྒེ་ སི་ཝེ་ཕི་ ཁྱི་ཞ་རྒུན་ འི་ འཇིག་རྟེན་ནེ་ཀ་ ཝང་ ཡོ་ཀན་རྒུ་ནི་ ཡོག་ལ་ འདོད་ཧེ་: ཚང་མེ་སང་ ཝང་ ཆེ་ཤོག་ ཡོ་ཀན་ རྒྱ་སྤོ་, 14 ཡང་ རྒྱ་སྤེ་ ཀ་ལོན་, ཀའོ་རྒུན་ མི་འོའེ་སྤ་ ཅོ་ཀན་རྒུན་ལ་ ཆེད་པ་ ཅད་ཅེ་ འདང་, འོའེ་སྤ་ ཅོ་ཀན་རྒུན་ལ་ རྟོད་པ་ ཏང་ཅེ་ཕི་ ཁྱི་ཞ་ ཡོད་ས་ ཀལ་རྡེ་ འིན་།
15 ཀོན་འཇོག་རྒེ་ ཐུག་འདོད་འབོ་ ཁྱི་ཞ་རྒུ་ནི་ ལེ་ཧ་ ཟང་པོ་ ཅོའེ་རྡེ་, ཧ་འགྲང་རྒུ་ནི་ ཏོན་ཏག་ མེ་ཀ་ནེ་ སྤེ་ར་རྒུན་ རྒག་ཅེའོ་ ནོག་། 16 ཁྱི་ཞི་ ར་ཝང་ཅེན་ནེ་ མི་རྒུན་ ཙོག་སེ་ མི་ཙེ་ པུད་ཧེ་, འིན་ན་ ཀོན་འཇོག་རྒེ་ ཞབ་རྟོག་པ་ འིན་ཅེ་ཀ་ནི་, ཁྱི་ཞ་རྒུ་ནི་ ར་ཝང་འབོ་ ངན་པ་ ཅོ་ཅེ་ན་ མ་ཀོལ་ཧེ་། 17 ཚང་མ་ལ་ སི་ཝ་, སྤུན་རྒུན་ལ་ ཡ་ཤ་, ཀོན་འཇོག་ལ་ འཇིའི་ཤེ་ རྡང་ རྒྱ་སྤོ་ལ་ སི་ཝ་ ཅོའེ་ཧེ་།
18 ཀོན་འཇོག་ལ་ འཇིའི་ཤེ་ རྡང་ སི་ཝེ་ན་ ཁྱི་ཞ་ ཚེ་ཡོག་རྒུ་ནི་ སྤོན་འབོ་ ཟང་པོ་ རྡང་ ཀ་ཀྲིན་ ཡོ་ཀན་ ཅིག་པོ་ མ་ནོག་ ངན་པ་ སྤོན་པོ་རྒུ་ནི་ ཝང་ངེ་ ཡོག་ལ་ འདོད་ཧེ་། 19 ཀལ་ཏེ་ འོའེ་སྤ་ མན་ཀ་ནེ་ ནག་ ཏང་ པར་རྡོ་རྒུན་ ཟོད་པ་ ཉམ་པོ་ ཁུར་རེན་ ཁྱི་ཞ་རྒུ་ནི་ འོའེ་སྤེ་ ལེ་ཧ་རྦོ་ ཅོ་ནི་, ཀོན་འཇོག་ ཐུག་ཐེད་རྡེ་ ཛེ་རྡེ་ནོག་། 20 འིན་ན་ ཀལ་ཏེ་ ཁྱི་ཞི་ ངན་པ་ ཅོའེ་རྡེ་ ཁྱི་ཞ་ རྡུང་ཀན་འབོ་ ཟོད་པ་ ཉམ་པོ་ ཁུར་ནི་, ཏེ་ནི་ ཁྱི་ཞ་ རྟོད་པ་ ཅེ་ ཐོབ་རྦེན་? ཏ་ ཟང་པོ་ ཅོའེ་རྡེ་ ནག་ ཁུར་རྡེ་ ཟོད་པ་ པོ་རེ་ཡོད་ནི་, ཏེ་རྦོ་ལ་ ཀོན་འཇོག་རྒེ་ རྟོད་པ་ སལ་ལེ་ ཛེ་རྡེན་།
21 ཁྱི་ཞ་རྒུན་ ཏེ་རྒ་ ཙོག་སེ་ མི་ཙེ་ པུད་ཅེ་ལ་ ཀོན་འཇོག་རྒེ་ འབོ་ ཛེད་ཏེ་ ནོག་, ཅེ་ཞུ་ནི་ ཁྱི་ཞ་རྒུ་ནི་ཕི་ མ་ཤི་ཀེ་ རྡུ་ངལ་ ནམ་། ཁོང་, ཁྱི་ཞ་རྒུ་ནི་ཕི་ སྤེ་ཞིག་ འིན་, ཀ་རྦེ་ཀ་ ཁྱི་ཞ་ འགྲུལ་རྒོ་ཤེ་ ནོག་།
22 “ཁོང་ངེ་ ཅང་ རྡིག་པ་ མ་ཛེད་,
ཡང་ ཁོང་ངེ་ སུ་ཞི་ལ་ འགོ་ཧོར་རེ་ མ་ཛེད་།”
23 ཁོང་ལ་ ངན་པ་ ཟེར་ཧན་རྒུ་ནི་ ལེན་ལ་,
ཁོང་ངེ་ ཏེ་རྒ་ ཙོག་སེ་ ཅོའོ་ མ་ཛེད་།
ཡང་ ཁོང་ངེ་ རྡུ་ངལ་ ཐོང་ ཟེར་ནི་
སུ་ཞི་ལ་ ལེན་ཏྃ་ངེན་ མ་མོལ་།
འིན་ན་ ཁོང་ངེ་ ཁོ་རང་ ཀོན་འཇོག་རྒེ་ ཆག་ལ་ ལྟེད་རྡེ་ ཛེད་,
ཀ་རྦེ་ འོའེ་སྤེ་ ཁྲིམ་ཅེད་ ཛེ་རྡེ་ནོག་།
24 ཨ་ཧོ་རྒུ་ནི་ རྡིག་པེ་ འདོད་པ་རྒུན་ མེ་ཀན་ འདང་
མི་ཙེ་ ཀྲང་པོ་ཞིག་ པུད་ཅེ་ཕི་,
ཁོང་ངེ་ ཁོ་རང་ངེ་ ཧུ་ཟུག་རྒེ་ཀ་
ཨ་ཧོ་རྒུ་ནི་ རྡིག་པེ་ ཁུ་རུ་རྦོ་ ནམ་འདེ་,
རྐྱང་ཤིང་ངེ་ཀ་ ཀྲོྃ་།
ཡང་ མ་ཤི་ཀེ་ མ་ཀ་ རྒྱུད་ཏེ་
ཨ་ཧོ་རྒུན་ ཕན་ཅུག་རྒེ་ ཛེད་།
25 ཏུའི་ཞིག་ལ་, ཁྱི་ཞ་རྒུན་ ལམ་ རྐྱལ་ཧ་ནེ་
ལུག་ ཙོག་སེ་ འིན་འབེན་།
འིན་ན་ ཏག་ས་ ཁྱི་ཞ་རྒུ་ནི་ སེམ་མེ་ རྡག་པོ་,
རང་ངེ་ ལུག་ཟི་ ཡི་ཤུ་ མ་ཤི་ཀེ་ འདུན་ལ་ ལོག་ཏེ་ ཡོྃ་རྡེ་ འིན་།