པི་ཏྲ་རེ་ ཆག་འབྲི་ ཏང་པོ་།
པི་ཏྲ་རེ་ འཇུ་ ཞུའི་།
1
ཡི་ཤུ་ མ་ཤི་ཀེ་ ཧུ་ཚབ་ ང་ པི་ཏྲ་རེ་ ཁྱི་ཞ་ ཀོན་འཇོག་རྒེ་ འདམ་མེ་ ཛེད་ཀན་ པོན་ཏུ་, འགཱ་ལ་ཏི་ཡཱ་, ཀ་པ་འདོ་ཀི་ཡཱ་, ཨ་སི་ཨཱ་ རྡང་ འབི་ཏི་ནི་ཡཱ་ ཡུལ་རྒུ་ནི་ན་ ཡན་འདེ་ ཡོ་ཀན་རྒུ་ནི་ཕི་ འབྲི་འིན་། 2 འཇིག་རྟེན་ ཛེ་རྡེ་སང་ ངུལ་ལ་, ཀོན་འཇོག་ ཡབ་རྦེ་ ཁྱི་ཞ་རྒུན་ ཤེ་རྡེ་ འདམ་མེ་ ཛེད་ཏེ་, ཏམ་པེ་ ཐུག་ཡིད་ རྒྱུད་ཏེ་ ཏམ་པ་ ཅོའོ་ ཛེད་། ཏོ་རྦེ་ ཅོའེ་རྡེ་ ཁྱི་ཞ་རྒུ་ནི་ ཡི་ཤུའི་ ཁ་ཉེན་, ཡང་ མ་ཤི་ཀེ་ ཧུ་ཁྲག་རྒེ་ ཁྱི་ཞ་རྒུན་ སང་མ་ ཅོའོ་ ཛེད་།ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ མང་ནི་ མང་ངེ་ ཐོབ་ཤིག་།
ཐར་པེ་ རེ་ཝེ་ཕི་ ཀོན་འཇོག་ལ་ ཐུག་ཞེ་ཆེ་།
3 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཡབ་ ཏང་ ཀོན་འཇོག་ལ་ རྟོད་པ་ པུལ་ཧེ་། ཨ་ཧོ་རྒུན་ལ་ ཁོང་ངེ་ ཉིང་ཞེ་ ཆོན་མོ་ ཛེད་ཏེ་, མི་ཙེ་ སོ་མ་ཞིག་ སལ་ལེ་ ཛེད་, ཅེ་ཟེར་ནི་ ཀོན་འཇོག་རྒེ་ ཡི་ཤུ་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་། ཏ་ ཨ་ཧོ་རྒུ་ནི་ལ་ རེ་ཝ་ ཆོན་མོ་ ཉམ་པོ་ མི་ཙེ་ པུད་རྡེ་ནོག་། 4 ཏོ་ ནོར་ཧལ་ མ་ནི་ མི་རུལ་ཀན་, མ་ནི་ ཀྲིཔ་ མི་ཆ་ཀན་ འདང་ འོད་ འདང་ མ་ནི་ མི་ཡོལ་ཀན་ ཀའོ་ ཨ་ཧོ་རྒུ་ནི་ཕི་ རྡེ་བ་ཅན་ནེ་ན་ པོ་རེ་ ཛེད་ཏེ་ ཡོད་། 5 ཁྱི་ཞ་རྒུ་ནི་ ཏེཏ་པ་ རྒྱུད་ཏེ་ ཀོན་འཇོག་རྒེ་ ཤུག་པེ་ ཁྱི་ཞ་རྒུན་ལ་ ཏེ་ ཐར་པ་ ཐོབ་ཐོབ་ཚུག་པ་ སྲུང་རྐྱོབ་ ཛེད་ཏུག་, ཀའོ་ ལྟིང་འཇུག་རྒེ་ ཏུའི་ལ་, ངོན་ཅུག་རྒེ་ ཛེད་ཅེ་ལ་ ཀྲལ་འགྲིག་ ཡོད་།
6 ཏེ་རྒ་རྦེ་ཕི་ལ་ རྒ་མོ་ ཅོའེ་ཧེ་། ཞེན་ ཏག་ས་ ཏུའི་ ཉུང་ཙེ་ཞིག་, ཁྱི་ཞ་རྒུན་ལ་ ཚོད་ལྟ་ སོ་སེ་ན་ རྡུ་ངལ་ ཐོང་ན་, ཡོང་ཅེ་ཅེན་ནེ་ ཏུའི་ན་ ཧ་ལེ་ཤེ་ ཐེད་པོ་ ཨ་ཧོའེ་ཕི་ སྲུྃ་རྡེ་ ཡོད་། 7 ཏེ་ ཐི་ཚོད་ལྟ་ཀན་རྒུ་ནི་ ཁྱི་ཞི་ ཏེཏ་པ་ རྡེན་འབའ་ འིན་ཀན་འབོ་ ལྟན་ནེ་ནོག་, ཀ་ཟུག་རྒེ་ སེར་ལ་ ལྟག་ཅེད་ མེ་ རྒྱུད་ཏེ་ ཅོའེ་རྡེ་ ལག་མོ་ ཅོ་ནོག་, འིན་ན་ ཁྱི་ཞི་ ཏེཏ་པ་རྒུན་ སེར་རེ་སང་ མང་ངེ་ རིན་ཅེན་ ནོག་། ཀལ་ཏེ་ ཁྱི་ཞ་རྒུ་ནི་ ཏེཏ་པ་རྦོ་, ཐི་ཚོད་ལྟ་ཀན་རྒུ་ནི་ན་ རྟེམ་པོ་ ལུའི་ནི་, ཡི་ཤུ་ མ་ཤི་ཀ་ ལོག་ཏེ་ རྐྱོད་ཟ་ནི་, ཁྱི་ཞ་རྒུན་ལ་ རྟོད་པ་, སྤལ་ རྡང་ སི་ཝ་ ཐོབ་རྦེན་།
8 ཁྱི་ཞ་རྒུ་ནི་ ཡི་ཤུ་ མ་འཇལ་ནྃ་ ཁོང་ལ་ ཤེ་སྤ་ ཅོ་ནོག་, ཡང་ ཏག་ས་ རང་ངེ་ མིག་ནི་ མ་ཐོང་ནྃ་, ཁོང་ལ་ ཏེཏ་པ་ ཅོའེ་རྡེ་ ཧ་ལེ་ཤེ་ རྡང་ ཤེད་ མི་ཉེན་ཅེ་ ཐེད་པོ་ ཅོ་ནོག་། 9 ཡི་ཤུ་ མ་ཤི་ཀེ་ཀ་ ཏེཏ་པ་ ཅོ་ཅེ་ སོལ་རེ་རྦོ་, ཁྱི་ཞ་རྒུན་ལ་ ཐར་པ་ ཐོབ་ཅེའོ་ འིན་།
10 ཁྱི་ཞ་རྒུ་ནི་ཀ་ ངོན་ཅུག་ཅེ་ ཐུག་ཞེ་ ཐར་པེ་ ཧོར་ལ་ ལུང་རྟན་ ཛེད་ཀ་ནེ་ ལུང་རྟོན་པ་རྒུ་ནི་, རྒྱ་ལེ་ ཅོའེ་རྡེ་ སར་ཤོད་ ཅོའོ་ ཛེད་། 11 ཏོ་རྒུན་ལ་ མ་ཤི་ཀ་ རྡུ་ངལ་ ཅུང་འདེ་ སྤལ་ ཐོབ་ཅེ་ ཏུའི་ རྡང་ ནེ་ལུག་རྒུ་ནི་ ཧོར་ལ་ ཧ་ཀོ་ཅེ་ འདོད་པ་ ཡོད་པེན་, ཀའོ་ ཁོང་རྒུ་ནི་ན་ ཡོ་ཀ་ནེ་ མ་ཤི་ཀེ་ ཐུག་ཡིད་རྡེ་ ཁོང་རྒུན་ལ་, ཏོ་རྒུན་ ཆ་སང་ ངུལ་ལ་ ངོན་ཅུག་རྒེ་ ཛེད་ཏེ་ འིན་འབེན་།
12 ཏེ་ ལུང་རྟོན་པ་རྒུ་ནི་ ཞབ་རྟོག་པོ་, ཁོ་རང་རྒུ་ནི་ཕི་ མན་, ཁྱི་ཞ་རྒུ་ནི་ཕི་ འིན་ཀན་འབོ་ ཁོང་རྒུན་ལ་ ངོན་ཅུག་རྒེ་ ཛེད་ཏེ་ འིན་འབེན་། ཏ་ ཁྱི་ཞ་རྒུན་ལ་ ནེ་ཚུལ་ ཟང་པོ་ ཤེད་ཀན་རྒུ་ནི་, རྡེ་བ་ཅན་ནི་ ཕེབ་ཀ་ནེ་ ཏམ་པེ་ ཐུག་ཡིད་རྡེ་ ཡ་ཏོ་ ཉམ་པོ་ ཤེད་རྡེ་ནོག་, ཡང་ ཕོ་ཉ་རྒུན་ལ་, ཡུ་རྒུ་ནི་ ཧོར་ལ་ ཧ་ཀོ་ཅེ་ འདོད་པ་ ཆོན་མོ་ ཡོད་པེན་།
མི་ཙེ་ ཏམ་པ་ཞིག་ པུད་།
13 ཏེ་རྒ་རྦེ་ཕི་ལ་ འཇིག་རྟེན་ནེ་ན་ ཡོ་ཀན་རྒུ་ནི་ ཆོག་ལ་ སམ་བ་ མ་ཏང་ངེ་, རང་སེམ་ ཆུན་འདེ་ ཡི་ཤུ་ མ་ཤི་ཀ་ ངོན་ནེ་ ཏུའི་ལ་ ཐོབ་ཅེ་ཅེན་ནེ་ ཐུག་ཞེ་ ཐར་པ་རྦེ་ཀ་ རྟེམ་པོ་ རེ་ཝ་ པོར་ཧེ་། 14 ཁྱི་ཞི་ན་ ཀོན་འཇོག་ མ་ཤེ་སང་ ངུལ་ལ་ ཡོ་ཀ་ནེ་ འདོད་པ་ ངན་པ་རྒུ་ནི་ རྒྱབ་ནི་ མ་འགྲུལ་ལེ་, ཀོན་འཇོག་རྒེ་ ཁ་ ཉེན་ཀ་ནེ་ ཕྲུ་རྒུ་རྒུན་ ཙོག་སེ་ འགྱུར་ཧེ་། 15 མ་ཚེད་ ཁྱི་ཞ་རྒུན་ འབོ་ ཛེད་ཀན་ ཀོན་འཇོག་ ཁོ་རང་ ཏམ་པ་ འིན་ཀན་ ཙོག་སེ་ ཅི་ས་ཐོག་ནི་ ཁྱི་ཞ་རང་ངེ་ མི་ཙེ་ ཏམ་པ་ཞིག་ པུད་ཧེ་། 16 ཅེ་ཟེར་ནི་ ཏམ་པེ་ སུང་རབ་རྦེ་ན་ ཀོན་འཇོག་རྒེ་, “ང་ ཏམ་པ་ འིན་འབེ་ ཁྱི་ཞ་རྒུན་ལ་ ཏམ་པ་ འགྱུར་རྒོའེ་” མོལ་རྡེ་ འདུག་།
17 ཡང་ ཡུ་རྒུན་ འི་ཏུ་ པོར་ཧེ་, ཁྱི་ཞ་རྒུ་ནི་ མོ་ལམ་ ཞུ་ཀན་, རྡེ་བ་ཅན་ནེ་ ཡབ་རྦེ་ ཡ་པེ་ ཛེ་རྡེ་ མག་། ཁྱི་ཞ་རྒུ་ནི་ ཅོ་ཀན་ ནང་ཞིན་ལ་ ཁོང་ངེ་ ཁྲིམ་ཅེད་ ཡ་ སོལ་རེ་ སལ་ཅེ་ འིན་ཅེ་ཀ་ནི་, འཇིག་རྟེན་ནེ་ཀ་ མི་ཙེ་འབོ་ པེ་སྤ་ཞིག་ ཙོག་སེ་ ཀོན་འཇོག་ལ་ སི་ཝ་ རྡང་ ཁོང་ངེ་ འཇི་སྤེ་ན་ པུད་ཧེ་། 18-19 ཁྱི་ཞ་རྒུན་ལ་ རྒྱུའི་ནོག་, ཁྱི་ཞ་རྒུན་ ཁྱི་ཞི་ ཕ་མེ་པོ་རྒུ་ནི་ ཐོབ་ཀ་ནེ་ ཕན་མི་ཐོག་རྡེ་ མི་ཙེ་ནི་ ཐར་རྡེ་ འིན་, འིན་ན་ ཏོ་ མེ་ཀན་ ཆ་ཉེན་ཅེ་ སེར་ ཡ་ མུལ་རྒུན་ རྒྱུད་ཏེ་ མག་, རྡིག་པ་ ཡ་ རྐྱོན་མེ་ཀ་ནེ་ ལུ་རྒུ་, མ་ཤི་ཀེ་ ཧུ་ཁྲག་ རིན་ཅེན་ ཤལ་རྡེ་, ཉོ་ ཛེ་རྡེ་ནོག་། 20 ཁོང་ འཇིག་རྟེན་ མ་ཆག་རྡེ་སང་ ངུལ་ལ་ ཀོན་འཇོག་རྒེ་ འདམ་མེ་ ཛེད་ཏེ་ འིན་འབེན་། འིན་ན་ ཁྱི་ཞ་རྒུ་ནི་ ཕན་ཏོག་རྡེ་ཕི་ འི་ ལྟིང་འཇུག་རྒེ་ ཞག་རྒུ་ནི་ན་ ཁོང་ ངོན་ཅུག་རྒེ་ ཛེད་ཏེ་ འིན་།
21 ཙོབོ་ ཡི་ཤུ་ རྒྱུད་ཏེ་, ཁྱི་ཞ་རྒུ་ནི་ ཀོན་འཇོག་རྒེ་ན་ རྡེན་ཆེ་ཤེ་ ཅོ་ནོག་། ཀོན་འཇོག་རྒེ་ན་ ཁྱི་ཞ་རྒུ་ནི་ ཏེཏ་པ་ རྡང་ རེ་ཝ་ པོ་རེ་ནོག་, ཅེ་ཟེར་ནི་ ཁོང་ངེ་ ཤི་ཀན་རྒུ་ནི་ ཕྲོ་ནི་, ཡི་ཤུ་ སོན་པོ་ ལང་ངེ་ ཛེད་ཏེ་ སྤལ་ སལ་ལེ་ ཛེད་།
22 ཏ་ ཁྱི་ཞ་རྒུ་ནི་ རྡེན་འབའ་རྦོ་ལ་ ཁ་ཉེན་ཅེ་རྦེ་, ཁྱི་ཞ་ སང་མ་ འགྱུར་རྡེ་ ནོག་། ཏོ་རྦེ་ཕི་ མི་སྲིང་ ཙོག་སེ་ ཁྱི་ཞ་ ཅིག་ ཏང་ ཅིག་རྒེ་ན་ རྡེན་འབེ་ ཤེ་སྤ་ ཡོང་རྒོའེ་། ཏ་ ཉིང་ངེ་ ཐིལ་ནི་ ཅིག་ ཏང་ ཅིག་ལ་ ཤེ་སྤ་ ཅོའེ་ཧེ་།
23 ཁྱི་ཞ་རྒུན་ རུལ་ཤེ་ཅེན་ནི་ ས་ངོན་ནི་ མ་རྐྱེ་, སོན་པོ་ རྡང་ ཏུའི་རྒྱུན་ ཞུ་ཧན་ ཀོན་འཇོག་རྒེ་ ཀའ་ རྒྱུད་ཏེ་ མ་ནི་ མི་རུལ་ཤེ་ཅེན་ནེ་ ས་ངོན་ནི་ ཡང་ རྐྱེ་རྡེ་ འིན་། 24 ཏམ་པེ་ སུང་རབ་རྦེ་ མོལ་རྡུག་,
“མི་ཚང་མ་ནི་ ས་ ཙོག་སེ་ འིན་།
ཁོང་རྒུ་ནི་ སྤལ་ ཚང་མ་ སེ་ མེན་ཏོག་ ཙོག་སེ་ འིན་།
ས་ ཧམ་འདེ་ མེན་ཏོག་ ཡོལ་ལེ་ནོག་།
25 འིན་ན་ ཙོབོ་ ཀོན་འཇོག་རྒེ་ ཀའ་ ཏུའི་རྒྱུན་ ལུའི་རྡེན་།”
ཏེ་ ཀའ་འབོ་, ཁྱི་ཞ་རྒུན་ལ་ ཤེད་ཀ་ནེ་ ནེ་ཚུལ་ ཟང་པོ་ ནོག་།