མག་པ་ རྡང་ ན་མ་རྒུ་ནི་ཕི་ ལབ་ཞ་།
3
ཏེ་རྒ་ ཙོག་སེ་ ན་མ་རྒུན་ རང་ངེ་ མག་པེ་ ཝང་ངེ་ ཡོག་ལ་ འདོད་ཧེ་། ཀལ་ཏེ་ ཁ་ཅིག་རྒེ་ ནེ་ཚུལ་ ཟང་པོ་ལ་ ལོ་ཁྱེལ་ མ་ཅོ་ནི་, ཁྱི་ཞ་རྒུ་ནི་ མི་ཙེ་ པུད་ཚུལ་རྦེ་ ཅོའེ་རྡེ་ ཁྱི་ཞ་ ཤེད་རྒོའེ་ མེད་རྡེ་ ཁོང་རྒུ་ནི་ ཉིང་ངེ་ན་ འགྱུར་ཞ་ ཡོྃ་རྡེ་ ཏེཏ་པ་ ཅོའེན་། 2 ཁྱི་ཞ་རྒུ་ནི་ སེམ་ ལག་མོ་ རྡང་ རང་ངེ་ མག་པ་ སི་ཝ་ ཅོ་ཅེའོ་ ཐོང་འདེ་, ཁོང་རྒུ་ནི་ མ་ཤི་ཀེ་ཀ་ ཏེཏ་པ་ ཅོའེན་།3 སྲ་, སེར་རེ་ རྒྱན་ཆ་ ཡང་ ཀོའེ་ལག་ སོ་སོ་ ཏོ་ཙོག་སེ་ ཕི་ཏེ་ ལུའི་ ཐོག་ནི་ ཛེའེ་མོ་ ཅོ་ཅེ་ ཙོན་འགྲུའི་ མ་ཅོ་། 4 འིན་ན་ སེམ་ ཞི་ཝ་ རྡང་ འཇམ་པོ་ ཅོའེ་རྡེ་ ཁྱི་ཞ་རང་ སེམ་མེ་ན་ ཛེའེ་མོ་ ཅོའེ་ཧེ་, ཡུ་ཙོག་སེ་ ཤོད་ལམ་རྒུན་ ཀོན་འཇོག་རྒེ་ ཧུ་འདུན་ལ་ མ་ རིན་ཅེན་ ནོག་། 5 ཅེ་ཟེར་ནི་ ངུལ་མེ་ ཏུའི་ལ་, ཀོན་འཇོག་རྒེ་ཀ་ ཏེཏ་པ་ པོར་ཧ་ནེ་ པོ་མོ་ ཏམ་པ་རྒུ་ནི་, ཏེ་རྒ་ ཙོག་སེ་ ཟ་རྦེ་ཡོད་པེན་, ཡང་ ཁོ་རང་རྒུན་ རང་ངེ་ མག་པེ་ ཝང་ངེ་ ཡོག་ལ་ པོ་རེ་ཡོད་པེན་། 6 སྤེར་ན་ སཱ་རེ་ མག་པ་ ཨབ་ར་ཧམ་མེ་ ཁ་ཉེན་ཏེ་ ཁོང་ལ་ རང་ངེ་ རྡག་པོ་ ཟེར་རྡེ་ འབོ་ཡོད་པེན་། ཀལ་ཏེ་ ཁྱི་ཞི་ མག་པ་རྒུ་ནི་ ཅི་ཅོའེ་ ཏང་ངེན་ སམ་འདེ་ འཇིའི་ མ་འཇིའི་ འོའེ་སྤ་ འིན་ཀན་འབོ་ ཅོ་ནི་, ཁྱི་ཞ་རྒུན་ལ་ སཱ་རེ་ པོ་མོ་རྒུན་ ཐེའེ་ ཛེ་རྡེན་།
7 ཏེ་རྒ་ ཙོག་སེ་ ཁྱི་ཞ་ མག་པ་རྒུ་ནི་ རང་ངེ་ ན་མ་ ཉམ་པོ་ མི་ཙེ་ པུད་ཟ་ནི་, པོ་མོ་རྒུན་ ཁྱི་ཞི་སང་ ཤེད་མེད་ འིན་ཅེ་ཀ་ནི་, ཁོང་རྒུན་ ཉམ་པོ་ པབ་མོ་ རྡང་ སི་ཝ་ ཅོའེ་ཧེ་། ཅེ་ཟེར་ནི་ ཉ་ཧ་ ཐ་མེད་པེ་ མི་ཙེ་རྦེ་ སོལ་རེ་ ཐོབ་རྦེན་འགྲོ་། ཏུ་ཟུག་ ཅོ་ནི་ ཀོན་འཇོག་རྒེ་ ཁྱི་ཞི་ མོ་ལམ་རྒུན་ སན་ནེ་ ཛེ་རྡེན་།
ཟང་པོ་ ཅོ་ཅེ་ཕི་ རྡུ་ངལ་ ཐོང་ངེན་།
8 ལྟིང་འཇུག་ལ་, ཁྱི་ཞ་ ཚང་མ་ སེམ་ ཅིག་ སོང་འདེ་ འདོད་ཧེ་, ཅིག་ ཏང་ ཅིག་ལ་ ནྃ་ པོར་, ཤེ་སྤ་, ཉིང་ཞེ་ རྡང་ སེམ་ པབ་མོ་ ཅོའེ་ཧེ་། 9 ངན་པེ་ ལེན་ལ་ ངན་པ་ མ་ཅོ་ཧེ་, ཡང་ སུ་ཞིག་རྒེ་ ཁྱི་ཞི་ ཧོར་ལ་ སྤེ་ར་ སོག་པོ་ ཟེར་ནི་ ཏོ་རྦེ་ ལན་ལ་ ཁྱི་ཞ་རང་ ཏོ་ཙོག་སེ་ མ་ཅོ་ལ་ ཏོ་རྦེ་ ཚབ་ལ་ ཏོ་རྒུན་ལ་ ཅིན་ལབ་ ཏོང་ཧེ་། ཅེ་ཞུ་ནི་ ཀོན་འཇོག་རྒེ་ ཁྱི་ཞ་རྒུན་ ཏེ་རྒ་རྦེ་ཕི་ འབོ་ ཛེད་ཏེ་ ནོག་, ཡང་ ཏུ་ཟུག་ ཅོ་ནི་ ཁོང་ངེ་ ཁྱི་ཞ་རྒུན་ལ་ ཅིན་ལབ་ སལ་ལེ་ ཛེ་རྡེན་། 10 ཏམ་པེ་ སུང་རབ་རྦེ་ན་ མོལ་རྡེ་ འདུག་།
“ཀལ་ཏེ་ ཁྱེ་ཞི་ མི་ཙེ་ན་ རྐྱིད་པོ་ ཡང་
ཞག་ ཟང་པོ་ མང་པོ་ ཐོང་ཅེ་ འདོད་པ་ ཡོད་ནི་,
ཁྱི་ཞ་རྒུ་ནི་ ལྕེ་ སྤེ་ར་ ངན་པ་ ཡང་
ཁལ་སྤག་ལ་ ཟུན་ ཏང་མ་ཅུག་ཧེ་།
11 ངན་པ་ ཕྃ་རྡེ་ ཟང་པོ་ ཅོའེ་ཧེ་།
ཉིང་ནི་ ཞིའི་རྡེ་ ཙལ་རྡེ་ ཏོ་རྦེ་ རྒྱབ་ནི་ རྒྱུག་ཧེ་།
12 ཅེ་ཞུ་ནི་ ཙོབོ་རྡེ་ མི་ ཀྲང་པོ་རྒུན་ལ་ ཟི་རྡེ་
ཏོ་རྒུ་ནི་ མོ་ལམ་རྒུན་ སན་ནེ་ ཛེ་རྡེ་ནོག་།
འིན་ན་ ངན་པ་ ཅོ་ཀན་རྒུ་ནི་,
ཁོང་ངེ་ ཞལ་ འགྱུར་རེ་ ཛེད་ཏུག་།”
13 ཏ་ ཀལ་ཏེ་ ཟང་པོ་ ཅོ་ལ་ རིྃ་རྡེ་ཡོད་ནི་, སུའི་ ཁྱི་ཞ་རྒུན་ལ་ ནོད་པ་ རྐྱལ་ལེན་། 14 ཀལ་ཏེ་ ཁྱི་ཞ་ ལེ་ཧ་ ཟང་པོ་ ཅོ་ཅེ་རྦེ་ རྡུ་ངལ་ ཐོང་ནི་, ཀོན་འཇོག་རྒེ་ ཅིན་ལབ་ སལ་ལེ་ ཛེ་རྡེན་། “ཏེ་ འཇི་ནང་ ལྟན་ཀན་རྒུན་ལ་ མ་འཇིའི་ ཡང་ མ་ཚེར་ཧེ་།” 15 རང་ངེ་ སེམ་མེ་ན་ མ་ཤི་ཀ་རྦོ་, ཙོབོ་ འིན་ཀན་འབོ་ སི་རྒོའེ་། ཡང་ ཀལ་ཏེ་ སུ་ཞིག་རྒེ་ ཁྱི་ཞི་ མ་ཤི་ཀེ་ན་ རེ་ཝ་ ཡོ་ཀ་ནེ་ ཧོར་ལ་ ཧ་ཀོ་ཅེ་ལ་ སར་ཤོད་ ཏང་ནི་, ཏོ་རྒུན་ལ་ ལེན་ཏྃ་ཅེ་ལ་ ཏུའི་རྒྱུན་ ཀྲལ་འགྲིག་ འདོད་ཧེ་། 16 འིན་ན་ ཏོ་རྒུན་ སེམ་ པབ་མོ་ རྡང་ སི་ཝ་ ཉམ་པོ་ ཅོའེ་ཧེ་། མ་ཤི་ཀེ་ན་ ཁྱི་ཞི་ ཟང་པོ་ ཤོད་པེ་ ཧོར་ལ་ སྤེ་ར་ སོག་པོ་ ཟེར་ཧན་རྒུན་, ཁོ་རང་རྒུ་ནི་ ཟེར་ཧ་ནི་ཀ་ ཁྲེལ་རྦ་ ཆ་ཅེ་ཕི་ སེམ་ རྐྱོན་མེད་ པོར་ཧེ་། 17 ཀལ་ཏེ་ ཀོན་འཇོག་རྒེ་ ཐུག་འདོད་ འེ་རྒ་རྦོ་ འིན་ནི་, ཁྱི་ཞ་རྒུན་ལ་ ངན་པ་ ཅོ་སང་ཏེ་ ཟང་པོ་ ཅོའེ་རྡེ་ རྡུ་ངལ་ ཐོང་ན་ རྒྱལ་།
18 མ་ཤི་ཀ་ ཨ་ཧོ་རྒུ་ནི་ རྡིག་པེ་ ཏོན་ལ་ རྡུ་ངལ་ ནམ་འདེ་ ཏུའི་རྒྱུན་ནེ་ཕི་ ལན་ཅིག་ ཀྲོྃ་རྡེ་ ཛེད་། མ་ཤི་ཀ་ ཀྲང་པོ་ ཞུ་རྡེ་ འིན་ན་ ཁོང་ རྡིག་ཅེན་རྒུ་ནི་ཕི་ ཀྲོྃ་རྡེ་ ཛེད་ཏེ་ ཨ་ཧོ་རྒུན་ ཀོན་འཇོག་ ཏང་ ཉེ་མོ་ ཁྱོང་ངེ་ ཛེད་། ཟུྃ་སྤེ་ ཐོག་ནི་ ཁོང་ ཀྲོྃ་རྡེ་ འིན་འབེན་, འིན་ན་ ཐུག་ཡིད་ རྒྱུད་ཏེ་ སོན་པོ་ ལྃ་རྡེ་ ཛེད་ཏེ་ འིན་།
19 ཏེ་ལྟིང་ནི་ ཁོང་ རྐྱོད་ཏེ་ ཙོན་ཁང་ངེ་ན་ ཡོ་ཀ་ནེ་ ཏེ་ སེམ་ཉིད་རྒུན་ལ་ ཆོའེ་ཤེད་རྡེ་ ཛེད་། 20 ཏོ་རྒུན་ ཏུའི་ མང་པོ་ཞིག་རྒེ་ ངུལ་ལ་ ནོ་ཨཱེ་ ཆུ་རེལ་ ཅོའོ་ ཏུའི་, ཀོན་འཇོག་རྒེ་ ཟོད་སྲན་ ཉམ་པོ་ སྲུང་ངེ་ ཛེད་ཟ་ནི་ ཁོང་ངེ་ ཁ་ མ་ཉེན་ཀན་རྒུན་ འིན་འབེན་། མི་ ཁ་ཅིག་, ཡང་ནི་ མིང་འགོ་ རྒྱེད་ འཇི་ནང་ཅེན་ནེ་ ཆུ་ལོག་ནི་ ཐར་རྡེ་ འིན་འབེན་། 21 ཏེ་ ཆུ་ལོག་པོ་ནི་, ཨ་ཧོ་རྒུན་ལ་ ཁྲུའི་ནེན་ཅེ་ སྤེ་ཞིག་ ནོག་, ཀ་རྦེ་ ཏག་ས་ ཁྱི་ཞ་རྒུན་ལ་ ཐར་པ་ ཐོབ་ཏེ་ ནོག་། ཁྲུའི་ནེན་ཅེ་རྦེ་ ཟུྃ་སྤེ་ ཏྲི་མ་ ཁྲུ་ཅེ་ མག་, སེམ་ ལག་མོ་ ཉམ་པོ་ ཀོན་འཇོག་ལ་ ཞལ་ཆེཏ་ ཅོ་ཅུག་རྒེ་ནོག་, ཏེ་ ཐར་པ་ནི་ ཡི་ཤུ་ མ་ཤི་ཀ་ ཧུ་ སོན་པོ་ ཞང་ཤེ་ རྒྱུད་ཏེ་ ཐོབ་ཏེ་ ནོག་།
22 ཡི་ཤུ་ ཁོ་རང་ རྡེ་བ་ཅན་ལ་ རྐྱོད་ཏེ་ ཀོན་འཇོག་རྒེ་ ཆག་ ཡོའེ་སྤ་ ཆོག་ལ་ ཞུ་ཁྲིའི་ཀ་ ཞུ་རྡེ་ ཛེད་ཏེ་ ཕོ་ཉ་ རྡང་ ཤུག་ ཏང་ ཝང་ ཡོ་ཀན་ ཚང་མེ་ཀ་ ཁོང་ངེ་ ཝང་སྲུལ་ལེ་ ཛེ་རྡེ་ནོག་།