ཀོན་འཇོག་རྒེ་ ཚམ་ལ་ ཡོང་ཅེ་།
4
ཁྱི་ཞ་རྒུ་ནི་ ཕྲོ་ ཁྲུག་པ་ རྡང་ ནོལ་ཤེ་རྒུན་ ཅི་ཕི་ ཡོང་འདུག་? ཅི་ ཏོ་རྒུན་ ཁྱི་ཞ་རྒུ་ནི་ འདོད་པ་རྒུ་ནི་ཀ་ནི་ ཡོང་ངེ་ མ་ནོག་རྒེ་, ཀའོ་རྒུན་ ཁྱི་ཞི་ རྒྱཔ་འགལ་ལ་ ནོལ་ལེན་ ཡོད་? 2 མེ་ཀན་རྒུན་ ཁྱེ་རང་ལ་ རྒོའེ་ཤེ་ཀ་ནི་, ཏོ་ ཐོབ་ཅེ་ཕི་ སེད་རྡེ་ནོག་། ཞེན་མ་རྒུན་ལ་ ཡོ་ཀན་འབེ་ཀ་ ཁྱེ་རང་ལ་ འདོད་པ་ སྲན་ཀྲེ་ ཡོད་ཏེ་ ཏོ་ མི་ཐོབ་ཅེ་ཀ་ནི་, ཁྱེ་རང་ངེ་ ཁོང་རྒུན་ ཉམ་པོ་ ཁྲུག་པ་ ཏྃ་རྡེ་ ནོལ་ལེ་ནོག་། ཁྱེ་རང་ངེ་ འདོད་པ་ ཡོ་ཀན་རྒུན་ ཁྱེ་རང་ལ་ མེ་ཀག་, ཅེ་ཟེར་ནི་ ཁྱེ་རང་ངེ་ ཏོ་རྦེ་ཕི་ ཀོན་འཇོག་ལ་ ཞུ་ཝ་ མ་པུ་ལེ་ ནོག་། 3 ཡང་ ཁྱེ་རང་ངེ་ ཞུ་ཟ་ནི་, ཁྱེ་རང་ལ་ ཐོབ་རྦེ་ མག་ ཅེ་ཟེར་ནི་ ཁྱེ་རང་ངེ་ ཏོན་ ངན་པ་ ཉམ་པོ་ ཞུའི་རྡེ་ ནོག་, ཀའོ་ ཁྱེ་རང་ངེ་ རང་ལ་ རྐྱིད་པོ་ ཐོབ་ཅེ་ན་ ཀོལ་ལེ་ནོག་།4 ཏེཏ་པ་ མེ་ཀ་ནེ་ མི་རྒུན་, འཇིག་རྟེན་ནེ་ འིན་ཀན་རྒུན་ལ་ ཡ་ཤ་ ཅོ་ཅེའོ་ ཀོན་འཇོག་ལ་ སོག་པོ་ ཅོའེ་རྡེ་ འིན་ཀན་འབོ་, ཁྱི་ཞ་རྒུན་ལ་ རྒྱུའི་མེད་རྡེ་? ཡང་ ཟེ་འིན་, འཇིག་རྟེན་ ཉམ་པོ་ ཡ་ཏོ་ ཅོ་ཅེ་ལ་ ཐེད་ཀན་རྒུན་, ཀོན་འཇོག་རྒེ་ འགྲ་ཝོ་ འགྱུར་རྡེ་ ནོག་། 5 ཁྱི་ཞི་ ཏམ་པེ་ སུང་རབ་རྦེ་ན་ “ཀོན་འཇོག་རྒེ་ ཨ་ཧོ་རྒུ་ནི་ན་ སེམ་ཡིད་པོ་ སལ་ལེ་ ཛེད་ཅེ་ཀ་ནི་, ཁོང་ངེ་ ཨ་ཧོ་རྒུན་ ཁོང་ ཅིག་པེ་ འིན་ཅེ་རྦོ་ལ་ མ་མང་པོ་ ཐུག་འདོད་ ཛེ་རྡེ་ནོག་” མོལ་ཧན་འབོ་ལ་ ཏོན་ཏག་ མེ་ཀག་ ས་མེ་ རག་རྒེ་? 6 འིན་ན་ ཏེ་ཙོག་སེ་ འདོད་པ་ ངན་པེ་ རྒྱཔ་འགལ་ ཅོ་ཉེན་ཅེ་ལ་ ཁོང་ངེ་ ཨ་ཧོ་རྒུན་ལ་ ཐུག་ཞེ་ མང་ངེ་ སལ་རྡེ་ ནོག་, ཀ་ཟུག་ལ་ ཏམ་པེ་ སུང་རབ་རྦེ་ན་ མོལ་རྡེ་ འདུག་།
“ཀོན་འཇོག་ལ་ ཕོ་སོ་ ཅོ་ཀན་རྒུན་ལ་ རྒྱཔ་འགལ་ ཅོའོ་ ཛེད་རྡེ་ནོག་,
འིན་ན་ པབ་མོ་ ཡོ་ཀན་རྒུན་ལ་ ཐུག་ཞེ་ སལ་ལེ་ ཛེ་རྡེ་ནོག་།”
7 ཀོན་འཇོག་རྒེ་ ཧུ་འདུན་ལ་ རང་འདང་རང་ ཁོང་ངེ་ ཝང་ངེ་ ཡོག་ལ་ པོར་ཧེ་, ཡང་ རྡུད་རྡེ་ རྒྱཔ་འགལ་ལ་ ནོལ་ཧེ་, ཏེ་ནི་ ཁོ་ ཁྱི་ཞི་ཀ་ནི་ ཤོར་རྡེ་ ཆེན་། 8 ཀལ་ཏེ་ ཁྱི་ཞ་ ཀོན་འཇོག་རྒེ་ ཚམ་ལ་ ཡོང་ནི་, ཏེ་ནི་ ཀོན་འཇོག་ ཁྱི་ཞ་རྒུ་ནི་ ཚམ་ལ་ རྐྱོད་རྡེན་། ཁྱི་ཞ་ རྡིག་ཅེན་རྒུ་ནི་ རང་ངེ་ ལག་པ་ ཁྲུའི་ཧེ་, ཡང་ འཇིག་རྟེན་ འདང་ ཀོན་འཇོག་ ཉ་ཧེ་ རྒྱབ་ནི་ འགྲུལ་ཧན་རྒུན་, ཁྱི་ཞི་ སེམ་ སང་མ་ ཅོའེ་ཧེ་། 9 སེམ་ རྐྱོ་མོ་ ཅོའེ་རྡེ་, རྡུག་པོ་ ཅོའེན་ ངུའི་ཧེ་། ཧབ་རྒོད་རྡེ་ ཚབ་ལ་ རྡུག་པོ་ ཡང་ རྐྱིད་པེ་ ཚབ་ལ་ རྐྱོ་མོ་ ཅོའེ་ཧེ་། 10 རང་འདང་རང་ ཙོབོ་རྡེ་ ཧུ་འདུན་ལ་ པབ་མོ་ ཅོའེ་, ཏེ་ནི་ ཁོང་ངེ་ ཁྱེ་རང་ལ་ སི་ཝ་ ཀྲག་པོ་ སལ་ལེ་ ཛེ་རྡེན་།
ཞེན་མ་རྒུན་ལ་ ཁྲིམ་ཅེད་ ཏང་ཅེ་ རྒྱཔ་འགལ་ལ་ སྤང་ པུད་།
11 ཤེ་སྤ་ སྤུན་རྒུན་, ཅིག་ ཏང་ ཅིག་རྒེ་ རྒྱཔ་འགལ་ལ་ སྤེ་ར་ ངན་པ་ མ་ཏང་ཧེ་། ཀལ་ཏེ་ ཁྱི་ཞ་རྒུ་ནི་ ཅིག་ ཏང་ ཅིག་རྒེ་ རྒྱཔ་འགལ་ལ་ སྤེ་ར་, ཡང་ ཁྲིམ་ཅེད་ ཏང་ནི་, ཁྱི་ཞ་རྒུ་ནི་ ཞེན་མ་ ཤེ་སྤ་ ཅོ་ཅེ་ ཁྲིམ་འབེ་ རྒྱཔ་འགལ་ལ་ སྤེ་ར་ རྡང་ ཁྲིམ་ཅེད་ ཏྃ་རྡེ་ ནོག་། ཁྱི་ཞ་རྒུ་ནི་ ཁྲིམ་ཅེད་ ཏང་ནི་, ཁྱི་ཞ་རྒུན་ ཁྲིམ་སྤོན་ འགྱུར་རྡེ་ ཁྱི་ཞ་རྒུ་ནི་ ཁྲིམ་འབེ་ ཁ་ མ་ཉེན་ནེ་ ནོག་། 12 ཀོན་འཇོག་ ཅིག་པོ་ནི་, ཁྲིམ་ སལ་ཧན་ འདང་ ཁྲིམ་སྤོན་ ཞུ་རྡེ་ནོག་། ཁོང་ ཅིག་པོ་ལ་ རྐྱོབ་ཅེ་ ཡང་ མི་རྒུན་ ཉ་ཝེ་ན་ ཕང་ངེ་ ཛེད་ཅེ་ ཝང་ ཡོད་ཏེ་ ནོག་། ཏེ་ནི་ ཞེན་མ་ ཁྲིམ་ཅེད་ ཏང་ཀན་ ཁྱི་ཞ་ སུ་ འིན་?
ཕོ་སོའེ་ རྒྱཔ་འགལ་ལ་ སྤང་ པུད་།
13 “མ་ འགྱོ་སྤ་, ང་ཞ་རྒུན་ རྒྱལ་ས་ སོང་འདེ་ ལོ་ ཅིག་ འདེད་ཏེ་ ཚོང་ ཅོའེ་རྡེ་ མུལ་ མང་པོ་ ཅོའེན་” ཟེར་ཧན་རྒུ་ནི་ ཉོན་ཧེ་། 14 ཁྱི་ཞི་ མི་ཙེ་ན་ ཐོ་རེ་ ཅི་ ཆེན་, ཁྱི་ཞ་ ཅི་ རྒྱུའི་ཡོད་? ངེ་ ཁྱི་ཞ་རྒུ་ནི་ མི་ཙེ་འབོ་ ཅི་ ཉམ་པོ་ རྡུར་? འི་རྦོ་ ང་ཏོག་རྒེ་ མུ་སྤ་ ཙོག་སེ་ ནོག་ ཀའོ་ ཏུའི་ ཉུང་ཙེ་ཞིག་ མ་ནི་ ལུའི་རྡེ་ མག་། 15 ཁྱི་ཞ་རྒུ་ནི་ ཟེར་རྒོའེ་, “ཀལ་ཏེ་ ཙོབོ་རྡེ་ ཐུག་འདོད་ ཡོད་ནི་, ཨ་ཧོ་རྒུ་ནི་ མི་ཙེ་ན་ འི་རྦོ་ ཡང་ ཏོ་ ཅོའེན་།” 16 ཏེ་མ་ནི་, ཁྱི་ཞ་རྒུ་ནི་ རང་འདང་རང་ངེ་ ཐབ་ལྡིང་རྒུ་ནི་ན་ ཕོ་སོ་ ཅོའེ་རྡེ་ ནོག་, ཡང་ ཏོ་ཙོག་སེ་ ཕོ་སོ་རྒུན་ ངན་པ་ ནོག་།
17 ཀལ་ཏེ་ སུ་ཞིག་ལ་ ཁོ་རང་ངེ་ ཅོ་རྒོ་ཤེ་ ལེ་ཧ་ ཟང་པོ་རྒུན་ རྒྱུའི་ཡོད་ཏེ་ལ་ མ་ཅོ་ནི་, ཁོའེ་ རྡིག་པ་ ཅོའེ་རྡེ་ ནོག་།