ཡ་ཀུབ་ 5

ཆུག་པོ་རྒུན་ལ་ སྤང་ པུད་།

མི་ ཆུག་པོ་རྒུན་ ཉོན་ཧེ་, ཆི་མག་ ཏང་ངེན་ ངུའི་མ་ ཏོང་ཧེ་, ཅེ་ཟེར་ནི་ ཁྱི་ཞ་རྒུན་ལ་ སྲན་ཀྲེ་ ནག་ ཏང་ པར་རྡོ་ ཐོང་ངེན་། 2 ཁྱི་ཞ་རྒུ་ནི་ རྒྱུ་ནོར་རྒུན་ རུལ་རྡེ་, ཡང་ ཁྱི་ཞི་ རིན་ཅེན་ ཀོའེ་རྒུན་ལ་ མུ་སྤ་ ཏབ་ཏེ་ ནོག་། 3 ཁྱི་ཞ་རྒུ་ནི་ སེར་ རྡང་ མུལ་རྒུན་ རིན་མེད་ འགྱུར་རྡེ་ ནོག་། ཁྱི་ཞི་ རེ་ཝ་ པོར་ཧན་ནེ་ ཏེ་རྒ་ རྒྱུ་ནོར་རྦེ་, མེ་ན་ ཚིག་རྒེ་ ཙོག་སེ་ ཁྱི་ཞི་ ཤ་རྒུན་ ཟོའེ་རྡེ་ མེ་ཀན་ ཅོའེན་། ཁྲིམ་ཅེད་རྡེ་ ཞག་ལ་, ཁྱི་ཞི་ སག་རྡེ་ པོར་ཧན་ནེ་ ཏེ་རྒ་ རྒྱུ་ནོར་རྒུ་ནི་ ཁྱི་ཞི་ རྡིག་པེ་ སྤང་པོ་ ཏང་ངེན་། 4 ཏ་ ཞིང་ངེ་ཀ་ ལེ་ཧ་ ཅོ་ཀ་ནེ་ ལ་ཆེ་ན་ ཁྱི་ཞི་ འགོམ་ཧོར་ ཏང་ཀན་རྒུ་ནི་ ཀུ་ཅུ་ རྡང་ ངུ་ཅེ་རྒུན་ལ་ ཉོན་ཧེ་, ཁྱི་ཞི་ མ་ཏྃ་ལ་ པོར་ཧན་ནེ་ ཏེ་ ལ་ཆ་རྒུ་ནི་, ཁྱི་ཞ་རང་ངེ་ རྒྱཔ་འགལ་ལ་ སྤང་པོ་ ཏང་ངེན་ ནོག་། ཁྱི་ཞི་ ཞིང་ ངེ་ཀན་རྒུ་ནི་ ཀུ་ཅུ་ རྡང་ ངུ་ཅེ་རྒུན་, ཙོབོ་ ཀོན་འཇོག་རྒེ་ སན་ནེ་ ཛེ་རྡེ་ནོག་།

5 ཁྱི་ཞ་རྒུ་ནི་ འི་ འཇིག་རྟེན་ནེ་ཀ་ ནོར་ མང་པོ་ རྡང་ རང་རང་ངེ་ འདོད་པ་ ཡོ་ཀན་ ཚང་མ་ འདྲན་འདྲ་ ཀྲུབ་ཅུག་རྒེན་ མི་ཙེ་ པུད་ཏེ་ ནོག་། ར་ལུག་རྒུན་ སེད་ཅེ་ཕི་ རྒྱག་སྤ་ ཆ་ཅུག་ཅེ་ ཙོག་སེ་ ཁྱི་ཞ་རྒུ་ནི་ལ་ སེད་ཅེ་ལ་ ཁྱི་ཞ་རང་ རྒྱག་སྤ་ ཆ་ཅུག་ཏེ་ ནོག་། 6 ཁྱི་ཞ་རྒུ་ནི་ རྐྱོན་མེ་ཀ་ནེ་ མི་རྒུན་ སེད་ཅེ་ ཁྲིམ་ཅེད་ ཏྃ་རྡེ་ སེད་རྡེ་ནོག་, ཀའོ་རྒུ་ནི་ ཁྱི་ཞི་ རྒྱཔ་འགལ་ མ་ཅོའེ་།

ཟོད་པ་ རྒོམ་ཅེ་།

7 ངེ་ ཤེ་སྤ་ སྤུན་རྒུན་ ཁྱི་ཞ་རྒུན་ ཙོབོ་ ཡི་ཤུ་ ལོག་ཏེ་ རྐྱོད་ཅེ་ཚུག་པ་ ཟོད་པ་ ཉམ་པོ་ སྲུྃ་རྡེ་ འདོད་ཧེ་། ཞིང་འབད་པ་ ལྟོའེ་ཧེ་, ཀའོ་ ལྟོན་ འདང་ སྤིད་ ཉ་ཧ་ ཟོད་པ་ ཉམ་པོ་ ཆར་སྤ་ སྲུྃ་རྡེ་ ཁོ་རང་ངེ་ རིན་ཅེན་ ལྟོན་ཏོག་རྒུན་ ཚོའེ་རྡེ་ ངེ་ལ་ རིྃ་རྡེ་ཡོད་། 8 ཁྱི་ཞ་རྒུ་ནི་ལ་ ཟོད་པ་ ཅོའེ་རྡེ་ ཉིང་རྒུན་ལ་ རུའི་ རྐྱེ་ཅུག་ཧེ་, ཅེ་ཟེར་ནི་ ཙོབོ་ ཡི་ཤུ་ ལོག་ཏེ་ ཕེབ་ཅེ་ ཏུའི་རྦོ་ ཚམ་ལ་ ལེབ་ཏེ་ ནོག་།

9 སྤུན་རྒུན་ ཅིག་ ཏང་ ཅིག་རྒེ་ རྒྱཔ་འགལ་ལ་ ཟེར་རྒྱུ་ མ་ཏང་ཧེ་། ཀལ་ཏེ་ ཏང་ན་ ཙོབོ་ ཡི་ཤུ་ ཁྱི་ཞ་རྒུན་ལ་ ཁྲིམ་ཅེད་ སལ་ལེ་ ཛེ་རྡེན་། ལྟོའེ་རྡང་ཏ་ ཁྲིམ་ཅེད་ཀན་འབོ་ རྒོའེ་ འདུན་ལ་ ཞྃ་རྡེ་ འདུག་།

10 སྤུན་རྒུན་ རྡུ་ངལ་ལེ་ ནང་ངེ་ལ་ ཟོད་པ་ ཉམ་པོ་ ཙོབོ་ ཀོན་འཇོག་རྒེ་ ཝང་ངེ་ན་ སྤེ་ར་ སལ་ཧ་ནེ་ ལུང་རྟོན་པ་རྒུན་ སྤེ་ཞིག་རྒེ་ ཚུལ་ལ་ ལྟོའེ་ཧེ་། 11 ཁྱི་ཞ་རྒུན་ལ་ རྒྱུའི་ནོག་, ཀོན་འཇོག་རྒེ་ ཟོད་པ་ ཉམ་པོ་ རྡུ་ངལ་ ཁུར་ཧན་རྒུན་ལ་ ཅིན་ལབ་ སལ་ལེ་ ཛེད་ཏེ་ ནོག་། སྤེར་ན་ ཟོད་པ་ཅེན་ནེ་ མི་ ཡོབ་རྦེ་, ཙོབོ་ ཀོན་འཇོག་རྒེ་ ལྟིང་འཇུག་པེ་ཀ་ ངུ་ལེ་སང་ མ་མང་པོ་ སལ་ལེ་ ཛེད་ཀན་འབེ་ ཧོར་ལ་ ཁྱི་ཞ་རྒུ་ནི་ ཚོར་རྡེ་ ནོག་། ཙོབོ་ ཀ་ཀྲིན་ རྡང་ ཉིང་ཞེ་ ཀང་འདེ་ ནོག་།

12 འིན་ན་ ངེ་ སྤུན་རྒུན་, ཚང་མེ་སང་ ཁག་ཅེན་འབོ་, ནམ་ཀ་ ཡང་ འཇིག་རྟེན་ ཡང་ ཞེན་ ཅི་ཞིག་རྒེ་ ནའ་ མ་ནི་ མ་ཁུར་ཧེ་། ཏོ་རྦེ་ ཚབ་ལ་ ཁྱི་ཞ་རྒུ་ནི་ འིན་ནི་ འིན་, ཡ་ མན་ནི་ མན་ ཟེར་ཧེ་, ཏེ་མ་ནི་ ཁྱི་ཞ་རྒུན་ལ་ ཁྲིམ་ཅེད་ ཕོག་རྒེན་།

13 ཅི་ ཁྱི་ཞི་ ཕྲོ་ནི་ སུ་ཞིག་ རྡུག་པེ་ན་ ཡོད་རྡེ་? ཏེ་ནི་ ཀོན་འཇོག་ལ་ མོ་ལམ་ ཞུའི་ཧེ་། ཅི་ ཁྱི་ཞ་རྒུན་ ཐེད་པོ་ འིན་ནེ་? ཏེ་ནི་ ཀོན་འཇོག་ལ་ རྟོད་པེ་ ལུ་ པུལ་ཧེ་། 14 ཅི་ ཁྱི་ཞི་ ཕྲོ་ནི་ སུ་ཞིག་ལ་ ཟུར་མོ་ ཡོད་རྡེ་? ཏེ་ནི་ ཁྱི་ཞ་རྒུ་ནི་ ཆོའེ་ཚོག་རྒེ་ འུ་རྐྱོང་རྒུན་ལ་ འབོའེ་, ཡང་ ཁོང་རྒུན་ལ་ ཁྱེ་རང་ལ་ ཙོབོ་རྡེ་ ཚན་ ཝང་ཅེན་ནེ་ན་ མར་ ཧུའི་རྡེ་ མོ་ལམ་ ཞུ་ཅུག་ཧེ་། 15 ཏོ་ཙོག་སེ་ མོ་ལམ་ ཏེཏ་པ་ ཉམ་པོ་ པུལ་ཧན་འབེ་ ནེད་པོ་ རྒྱལ་རྡེ་ ཙོབོ་རྡེ་ ཁྱེ་རང་ ཕན་ཅུག་རྒེ་ ཛེ་རྡེན་། ཀལ་ཏེ་ ཁྱེ་རང་ངེ་ རྡིག་པ་ ཅོའེ་རྡེ་ ཡོད་ནི་ ཁྱེ་རང་ལ་ ཤག་སྤ་ སལ་ལེ་ ཛེ་རྡེན་།

16 ཁྱི་ཞ་རྒུན་ རྒྱལ་ཤེ་ཕི་ ཁྱི་ཞི་ རྡིག་པ་རྒུན་ ཤེད་ཏེ་ ཅིག་ ཏང་ ཅིག་རྒེ་ཕི་ མོ་ལམ་ ཞུའི་ཧེ་། མི་ ཀྲང་པེ་ མོ་ལམ་ ཞུའི་ཧན་འབོ་ལ་ མ་མང་པོ་ ཁྱུད་ ཡོད་ཏེ་ འབྲེ་རྦུ་ ཧ་ལེ་ཤེ་ མིན་ནེ་ནོག་། 17 ལུང་རྟོན་པ་ ཨེ་ལི་ཡཱ་ འི་ཏུ་ ཅོའེ་ཧེ་, ཁོང་ནི་ ཨ་ཧོ་ ཙོག་སེ་ མི་ཞིག་ ཞུ་རྡེ་ འིན་འབེན་། ནམ་ ཁོང་ངེ་ ཉིང་ནི་ ཀོན་འཇོག་ལ་ ཨིས་ར་ཡེལ་ལེ་ན་ ཆར་སྤ་ མི་པབ་ཅེ་ལ་ མོ་ལམ་ པུལ་རྦེ་, ལོ་ སུམ་འདང་ཕེད་ ཆར་སྤ་ མ་པབ་། 18 ཏེ་ནི་ ཡང་ ཁོང་ངེ་ ཆར་སྤ་ པབ་ཅེ་ལ་ མོ་ལམ་ ཞུ་ཝ་རྡང་, ཆར་སྤ་ ཏང་རྡེ་ ཐང་ཀེ་ཀ་ ལྟོན་ཏོག་ མིན་།

ཏེཏ་པ་ རྐྱལ་ཧན་ ཏེཏ་པེ་ན་ ལོག་ཏེ་ ཁྱོང་ཅེ་།

19 ངེ་ སྤུན་རྒུན་, ཀལ་ཏེ་ ཁྱི་ཞ་རྒུ་ནི་ ཕྲོ་ནི་ སུ་ཞིག་ ཀོན་འཇོག་རྒེ་ རྡེན་འབེ་ ལམ་མེ་ཀ་ནི་ ནུར་རྡེ་ སོང་འདེ་, ཞེན་མ་ཞིག་རྒེ་ ཁོ་ ཏེཏ་པེ་ན་ ལོག་ཏེ་ ཁྱོྃ་རྡེ་ ཡོད་ནི་, 20 ལོག་ཏེ་ ཁྱོང་ཀན་འབེ་ ཏེ་ རྡིག་ཅེན་འབོ་ ཉ་ཝེ་ ནང་ནི་ ཐར་ཤུ་ཏེ་ རྡིག་པ་ མང་པོ་ཞིག་རྒེ་ཀ་ནི་ ཤག་སྤ་ ཐོབ་ཅུག་ཀན་འབོ་ ཁྱི་ཞ་རྒུན་ལ་ ནེན་ཏེན་ རྒྱུའི་ ཡོང་རྒོའེ་༎