ལྕེ་ ཆུན་འདེ་ པོར་ཤེ་།
3
ངེ་ སྤུན་རྒུན་, ཁྱི་ཞ་ མང་པེ་ ཆོའེ་ཚོག་རྒེ་ན་ ལབ་ཀན་ འགྱུ་རེན་ སམ་འདེ་ རེ་ཝ་ ཅོ་ མི་རྒོའེ་, ཅེ་ཟེར་ནི་ ཀོན་འཇོག་རྒེ་ ཨ་ཧོ་ ལབ་ཀན་རྒུན་ལ་ ཁྲིམ་ཅེད་ སྲན་ཀྲེ་ ཕོག་ཅེ་འབོ་, ཁྱི་ཞ་ རྒྱུའི་ནོག་། 2 འོ་ནེ་, ཨ་ཧོ་ ཚང་མེ་ རྐྱོན་ མང་པོ་ཞིག་ ཅོ་ནོག་། ཀལ་ཏེ་ མི་ཞིག་རྒེ་ ཟེར་ཧན་ ཚང་མ་ རྐྱོན་མེད་ ཡོད་པེ་ནི་, ཁོ་ ཕུན་སུམ་ཚོག་པ་ཞིག་ ཡོད་ཁྲོ་, ཡང་ ཁོའེ་ ལུའི་ སོན་ཏེ་ ཆུན་འདེ་ པོར་ཉེན་ནེ་ནོག་།3 ལྟེ་ ཁེ་ན་ ཡོ་ཀ་ནེ་ སྲབ་པོ་ རྒྱུད་ཏེ་ ཨ་ཧོ་རྒུན་ ཀ་རུ་ ཆེན་ སམ་ན་, ཏུ་རུ་ ལྟའོ་ ཁྲིད་ཏེ་ ཁྱེར་ ཉེན་ནེ་ནོག་། 4 ཏེ་རྒ་ ཙོག་སེ་ ཤེད་ཅེན་ ལུྃ་སྤེ་ རིལ་ལེན་ ཡོ་ཀན་ ཏེ་ ཆུ་རེལ་རྦོ་ལ་ ཆུ་རེལ་ འཇུག་ལ་ ཡོ་ཀ་ནེ་ ཤིང་ ཆུང་ཙེ་རྦོ་ ཉམ་པོ་, ཆུ་རེལ་ སྲུལ་ཧན་འབེ་ ཀ་རུ་ སྲུལ་རྡེ་ ཁྱེར་རེན་ སམ་ན་, ཁྱེར་ ཉེན་ནེ་ནོག་།
5 ཏེ་རྒ་ ཙོག་སེ་ ལྕེ་འབོ་ ཨ་ཧོའེ་ ཟུྃ་སྤེ་ ཁག་ ཆུང་ཙེ་ཞིག་ འིན་ན་, ཡུ་རྦེ་ ཕོ་སོ་ཅེན་ནེ་ སྤེ་རེ་ མི་ མང་པོ་ཞིག་ལ་ ནོད་རྐྱལ་ ཉེན་ནེ་ནོག་, ཀ་ཟུག་ མེ་ཙག་ ཆུང་ཙེ་ཞིག་རྒེ་ ནག་ཚོག་ ཆོན་མོ་ཞིག་ མེ་ སྤར་ཉེན་ནེན་། 6 ལྕེ་རྦོ་ མེ་ ཙོག་སེ་ ནོག་། ཟུྃ་སྤེ་ ཡན་ལག་རྒུ་ནི་ ཕྲོ་ནི་ ལྕེ་རྦོ་, ངན་པ་ ཀང་ཀ་ནེ་ མལ་ཞིག་ ནོག་། ཡུ་རྦེ་ ཟུྃ་སྤོ་ སོན་ཏེ་ འགྱུར་ཤུག་ཏེ་, ཁོའེ་ མི་ཙེ་ སོན་ཏེ་ མེ་ འབར་ ཤུག་རྒེ་ནོག་, ཅེ་ཟེར་ནི་ ལྕེ་ མེ་ སྤར་ཧན་འབོ་ ཉ་ཝེ་ མེ་ ནོག་།
7 མི་ སེམ་ཅེན་, ཅ་, ས་འཇར་རེ་ འབུ་ཙིག་ ཏང་, ཚོའེ་ སེམ་ཅེན་རྒུན་, ཁོ་རང་རྒུ་ནི་ ཝང་ངེ་ ཡོག་ལ་ ཁྱོང་ ཉེན་ནེ་ནོག་། 8 འིན་ན་ སུ་ཞི་ལ་ ལྕེ་རྦོ་, ཁོ་རང་ངེ་ ཝང་ངེ་ ཡོག་ལ་ ཁྱོང་ མ་ཉེན་ནེ་ ནོག་། ཡུ འདེད་ མ་ནི་ མ་ཉེན་ཀ་ནེ་ ངན་པ་, ཤི་ཅུག་ཀ་ནེ་ ཏུག་རྒེ་ ཀང་འདེ་ ཡོད་ཏེ་ ནོག་། 9 ཨ་ཧོ་རྒུ་ནི་ འེ་རྒ་ ལྕེ་ ཉམ་པོ་ ཨ་ཧོའེ་ ཙོབོ་, ཡབ་ ཀོན་འཇོག་ལ་ རྟོད་པ་ པུ་ལེ་ནོག་། འིན་ན་ ཏེ་རྒ་ ལྕེ་ ཉམ་པོ་ ཀོན་འཇོག་རྒེ་ ཁོ་རང་ ཙོག་སེ་ ཅོའོ་ ཛེད་ཀ་ནེ་ མི་རྒུན་ལ་ ངན་ ཏབ་རྦེ་ནོག་། 10 ཡང་ རྟོད་པ་ རྡང་ ངན་ ཏབ་ཅེ་ ཉ་ཧ་, ཏེ་རྒ་ ཁེ་ ནང་ནི་ འབིང་ངེ་ནོག་། རྡེན་འབའ་ ངེ་ སྤུན་རྒུན་, ཏོ་ཙོག་སེ་ ཆ་ མི་རྒོའེ་། 11 ཅི་ ཆུ་མིག་ཞིག་རྒེ་ ནང་ནི་ ཆུ་ ལག་མོ་ རྡང་ ཚ་ཀུ་ ཉ་ཧ་ འབིང་ངེན་ནེ་? 12 ངེ་ སྤུན་རྒུན་, ཅི་ སྤིག་རྒེ་ ཁ་ཟོའེ་ ལྕང་མེ་ཀ་ནི་ ཨོ་ལིཝ་ ཡང་ རྒུན་འགྲུམ་མེ་ ཁ་ཟོའེ་ ལྕང་མེ་ཀ་ནི་ སྤིག་ མིན་ནེ་ནེ་? མ་ནི་ མི་མིན་། ཏེ་རྒ་ ཙོག་སེ་ ཁྱི་ཞ་རྒུ་ནི་ ཆུ་མིག་རྒེ་ ཆུ་ ཚ་ཀུའི་ ནང་ནི་ ཆུ་ ལག་མོ་ ཕིང་ མི་ཉེན་།
རྡེན་འབེ་ ཤེ་རབ་ ཀོན་འཇོག་ནི་ ཡོང་ངེ་ནོག་།
13 ཁྱི་ཞ་རྒུ་ནི་ ཕྲོ་ནི་ ཤེ་རབ་ཅེན་ འདང་ ཧ་ཀོ་ཅེན་འབོ་ སུ་ འིན་? ཏོ་ཙོག་སེ་ འིན་ཀ་ནེ་ མི་རྦེ་, ཤེ་རབ་ནི་ ཡོང་ཀ་ནེ་ པབ་མོ་ ཉམ་པོ་ ལེ་ཧ་ ཅོའེ་རྡེ་ མི་ཙེ་ ཟང་པོ་ཞིག་ པུད་རྡེ་ ལྟོན་། 14 འིན་ན་ ཀལ་ཏེ་ ཁྱི་ཞི་ སེམ་མེ་ན་ མང་པོ་ ཕྲ་རྡོག་ རྡང་ རང་འདོད་ ཡོད་ནི་, ཤེ་རབ་ཅེན་ ལྟན་ནེན་ རང་རྟོད་ ཏྃ་རྡེ་ ཀོན་འཇོག་རྒེ་ རྡེན་འབེ་ ལབ་ཞེ་ རྒྱཔ་འགལ་ མ་ཅོ་། 15 ཏོ་ཙོག་སེ་ ཤེ་རབ་ ཀོན་འཇོག་རྒེ་ ཆོག་ནི་ མ་ཡོང་ལ་, འཇིག་རྟེན་པ་ ཏེཏ་པ་ མེ་ཀན་རྒུ་ནི་ སམ་ཚུལ་ འདང་ རྡུད་རྒུ་ནི་ ཡོང་ངེ་ནོག་། 16 ཀ་རུ་ ཕྲ་རྡོག་ རྡང་ རང་འདོད་ ཡོད་, ཏུ་རུ་ ཟི་ངིལ་ རྡང་ ཚིར་ཧ་ མེ་ཀན་ ཡང་ ངན་པེ་ན་ ཚང་མ་ ཡོད་ཏེ་ ནོག་།
17 འིན་ན་ ཀོན་འཇོག་ནི་ ཡོང་ཀ་ནེ་ ཤེ་རབ་པོ་, ཏང་པོ་རང་ སེམ་ ལག་མོ་, ཏོ་ནི་ ཞིའི་རྡེ་ ཐེད་ཀན་, སེམ་ འཇམ་པོ་ ཡོ་ཀན་, ཝང་ངེ་ ཡོག་ལ་ འདེད་རྡེ་ལ་ ཐེད་ཀན་, ཉིང་ཞེ་ ཀང་ཀན་, ལེ་ཧ་ ཟང་པོ་ ཅོ་ཀན་, ཡ་པེ་ མི་ཅོ་ཀན་ འདང་ ངའིན་ མི་ཅོ་ཀན་རྒུན་ ནོག་། 18 མི་རྡང་ པར་ལ་ ཞིའི་རྡེ་ ཁྱོང་ཀན་རྒུ་ནི་ ཞེན་མ་རྒུ་ནི་ སེམ་མེ་ན་ ཞིའི་རྡེ་ ས་ངོན་ ཏབ་རྦེ་ནོག་, ཡང་ ཀྲང་པེ་ ལྟོན་ཏོག་ ངེ་ནོག་།