ཡ་ཀུབ་ 2

ཡ་པེ་རྡེ་ རྒྱཔ་འགལ་ལ་ སྤང་ པུད་།

ངེ་ སྤུན་རྒུན་, ཀལ་ཏེ་ ཁྱི་ཞ་རྒུ་ནི་ ཡ་པེ་ ཅོ་ནི་, ཁྱི་ཞི་ ཨ་ཧོ་རྒུ་ནི་ ཟི་ཞིད་ཅེན་ནེ་ ཙོབོ་ ཡི་ཤུ་ མ་ཤི་ཀེ་ན་ ཏེཏ་པ་ ཡོད་ ཟེར་རྡེ་ ཀ་ཟུག་རྒེ་ ཟེར་ ཉེན་ནེན་།

2 སྤེར་ན་ མི་ཞིག་ སེར་རེ་ སེར་རྡུབ་ ཏག་ཏེ་ རིན་ཅེན་ ཀོའེ་ལག་ ཀོན་འདེ་, ཡང་ མི་ ཉལ་རྦ་ཅེན་འཇིག་ ཉིང་པ་ ཀོའེ་ལག་ ཆེད་ཀན་ ཀོན་འདེ་ ཁྱི་ཞ་རྒུ་ནི་ ཆོའེ་ཚོག་རྒེ་ན་ ཡོང་ནི་, 3 ཁྱི་ཞ་རྒུ་ནི་ མི་ ཆུག་པོ་རྦོ་ལ་ མིག་སལ་ལེ་ ནྃ་ ཏྃ་རྡེ་ ཁོ་, “འཇུ་འཇུ་ འི་ སི་ཝ་ཅེན་ནེ་ ས་ཅེ་ཀ་ ཞུ་རྡེ་ ཛེད་”, འིན་ན་ མི་ ཉལ་རྦ་ཅེན་འབོ་ལ་, “ཁྱེ་རང་ འ་ཀ་ ལྃ་རྡེ་ འདོད་” ཡང་ “ངེ་ ཧང་པེ་ འདུན་ལ་ ཐང་ཀེ་ཀ་ འདོད་” ཟེར་ནི་, 4 ཏེ་ནི་ ཅི་ འི་ ཡ་པེ་རྦེ་, ཁྱི་ཞ་ ཁྱི་ཞ་རང་ངེ་ འདོད་པ་ ངན་པ་རྒུ་ནི་ ཁྲིད་ཏེ་ མ་ནོག་རྒེ་?

5 ངེ་ ཤེ་སྤ་ སྤུན་རྒུན་ ཉོན་ཧེ་, ཅི་ ཀོན་འཇོག་རྒེ་ འི་ འཇིག་རྟེན་ནེ་ན་ ཉལ་རྦ་ཅེན་རྒུན་ ཏེཏ་པེ་ན་ ཆུག་པོ་ འགྱུར་ཤེ་ཕི་ འདམ་མེ་ ཛེད་ཏེ་ མ་ནོག་རྒེ་? ཡང་ ཁོང་རྒུན་ལ་ ཀོན་འཇོག་རྒེ་ རྒྱལ་སྲིད་པོ་ མི་ཐོབ་རྦེ་, ཀའོ་ ཀོན་འཇོག་རྒེ་ ཁོང་ལ་ ཤེ་སྤ་ ཅོ་ཀན་རྒུན་ལ་ སལ་ཅེ་ལ་ ཞལ་ཆེཏ་ ཛེད་ཏེ་ འིན་? 6 འིན་ན་ ཁྱི་ཞ་རྒུ་ནི་ ཉལ་རྦ་ཅེན་རྒུན་ལ་ སི་ཝ་ མ་ཅོ་ལ་ ནོག་། ཅི་ ཁྱི་ཞ་རྒུན་ལ་ འགོབ་ནོན་ ཏྃ་རྡེ་ ཁྲིམ་ཁུང་ལ་ ཁྱེར་ཧན་རྒུན་, ཏེ་ ཆུག་པོ་རྒུན་ མ་ནེ་? 7 ཅི་ ཨ་ཧོའེ་ ཡི་ཤུ་ མ་ཤི་ཀེ་ ཚན་ ཟང་པོ་ལ་ ངན་པ་ ཟེར་ཧན་ ཏེ་རྒ་རྒུན་ མན་ནེ་?

8 ཀལ་ཏེ་ ཁྱི་ཞ་རྒུ་ནི་ ཏམ་པེ་ སུང་རབ་རྦེ་ན་ ཡོ་ཀ་ནེ་ རྒྱལ་ཁྲིམ་ “རང་ལ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ལ་ ཤེ་སྤ་ ཅོའེ་” མོལ་ཧན་འབོ་ རྡེན་འབའ་ ཁ་ཉེན་ནི་, ཏོ་ནི་ ཁྱི་ཞ་རྒུ་ནི་ ཀྲང་པོ་ ཅོའེ་རྡེ་ ནོག་། 9 འིན་ན་ ཀལ་ཏེ་ ཁྱི་ཞ་རྒུ་ནི་ ཡ་པེ་ ཅོ་ནི་ རྡིག་པ་ ཅོའེ་རྡེ་, ཁྱི་ཞ་ ཀོན་འཇོག་རྒེ་ ཁྲིམ་འབོ་ ཅག་ཅེ་ལ་ རྐྱོན་འཇེན་ ནོག་།

10 མི་ཞིག་རྒེ་ ཁྲིམ་ ཅིག་ཅིག་ ཅག་ཏེ་ ཞེན་ ཚང་མ་ ཁ་ཉེན་ནི་ ཁོའེ་ ཀོན་འཇོག་རྒེ་ ཁྲིམ་ ཚང་མ་ ཅག་ཀན་ ཙོག་སེ་ ནོག་། 11 སྤེར་ན་ ཀོན་འཇོག་རྒེ་ མོལ་རྡེ་ ནོག་ “ཞེན་མེ་ ཞི་མེད་ཞིག་ ཉམ་པོ་ ལུའི་འབྲེལ་ མ་ཅོ་” ཡང་ “མི་ མ་སེད་” ཀལ་ཏེ་ ཁྱེ་རང་ངེ་ ཞེན་མེ་ ཞི་མེད་ ཉམ་པོ་ ལུའི་འབྲེལ་ ཅོའོ་ མེད་ཁྲོ་, འིན་ན་ མི་ཞིག་ སེད་ནི་, ཏེ་ནི་ ཀོན་འཇོག་རྒེ་ ཁྲིམ་ ཅག་ཏེ་ ཁྱེ་རང་ རྐྱོན་འཇེན་ འགྱུར་རྡེ་ ནོག་།

12 ཏོ་ནི་ ཟེར་ཧན་ ཡང་ ཅོ་ཀན་རྒུན་ལ་ ར་ཝང་ སལ་ཧ་ནེ་ ཁྲིམ་འབེ་ ཁྱི་ཞ་ ཁྲིམ་ཅེད་ ཏང་ཅེའོ་ འི་ཏུ་ ཅོའེ་ཧེ་། 13 ཉིང་ཞེ་ མ་ལྟན་ཀ་ནེ་ མི་རྒུན་ལ་ ཉིང་ཞེ་ མི་ཐོབ་། འིན་ན་ ཀལ་ཏེ་ ཁྱི་ཞ་རྒུ་ནི་ ཞེན་མ་རྒུན་ལ་ ཉིང་ཞེ་ ལྟན་འདེ་ ཡོད་ནི་, ཀོན་འཇོག་རྒེ་ ཁྱི་ཞ་རྒུན་ལ་, ཁྲིམ་ཅེད་རྡེ་ ཞག་ལ་ ཉིང་ཞེ་ ལྟན་ནེ་ ཛེ་རྡེན་།

ལག་ལེན་ མེ་ཀ་ནེ་ ཏེཏ་པ་རྦོ་ ཏོན་མེད་ ནོག་།

14 ངེ་ སྤུན་རྒུན་, ཀལ་ཏེ་ ཁྱི་ཞི་ ཟེར་ནི་ ངེ་ ཏེཏ་པ་ ཅོའེན་ འིན་ན་ ཏོ་ ལག་ལེན་ནེ་ན་ ཁྱོང་ངེ་ མེད་ནི་, ཅི་ ཕན་ཏོག་? ཅི་ ཏོ་ཙོག་སེ་ ཏེཏ་པེ་ ཁྱི་ཞ་རྒུན་ རྐྱོབ་རྦེ་ནེ་? མི་རྐྱོབ་། 15 སྤེར་ན་ ཁྱི་ཞ་རྒུ་ནི་ ཟ་རྒྱུ་ ཡང་ ཀོན་རྒྱུ་ མེ་ཀ་ནེ་ སྤུན་ ཡང་ སྲིང་མོ་ཞིག་ ཐོང་འདེ་, 16 ཁྱི་ཞ་ ཅིག་རྒེ་ ཁོ་ ཟེ་རེན་, “འཇུ་ཧེ་ ཀྲོལ་མོ་ ཅོའེ་རྡེ་ འགྲྃ་འགྲྃ་ ཟོའེ་རྡེ་ ཁམ་ཟང་ ཞིའི་རྡེ་ ཉམ་པོ་ ཞུའུ་”, འིན་ན་ ཁོ་ ཟ་རྒྱུ་ ཡང་ ཀོན་རྒྱུ་ མ་ཏང་ནི་, ཁྱེ་རང་ངེ་ ཁོའེ་ཕི་ ཅི་ ཟང་པོ་ ཅོའེ་རྡེ་ འིན་?

17 ཏེ་རྒ་ ཙོག་སེ་ ལག་ལེན་ མེ་ཀ་ནེ་ ཏེཏ་པ་ ཅིག་པོ་ ཤི་རྡེ་ ནོག་།

18 ཏ་ ཁ་ཅིག་རྒེ་ འི་ ལབ་ཞེ་ རྒྱཔ་འགལ་ ཅོའེ་རྡེ་ ཟེར་སྲིད་ཅེ་ ནོག་, “མི་ ཁ་ཅིག་ལ་ ཏེཏ་པ་ ཡང་ ཁ་ཅིག་ལ་ ལེ་ཧ་ ཟང་པོ་ ཅོ་ཅེའོ་ ཡོ་ཀག་།” འིན་ན་ ངེ་ ཟེ་རེན་, “ཀལ་ཏེ་ ཁྱེ་རང་ངེ་ ལག་ལེན་ མ་ཅོ་ནི་, ཀ་ཟུག་རྒེ་ ཁྱེ་རང་ལ་ ཏེཏ་པ་ ཡོ་ཀན་འབོ་ ང་ ལྟན་ ཉེན་ནེན་? ང་རང་ངེ་ ལག་ལེན་ རྒྱུད་ཏེ་ ངེ་ ཏེཏ་པ་རྦོ་ ཁྱེ་རང་ལ་ ལྟན་ནེན་།”

19 ཁྱེ་རང་ངེ་ ཟེ་རེན་, ཁྱེ་རང་ལ་ ཏེཏ་པ་ ཡོད་, ཅེ་ཟེར་ནི་ ཀོན་འཇོག་ ཅིག་ ཞུ་རྡེ་ འིན་ཀན་འབོ་ ཁྱེ་རང་ངེ་ ཏེཏ་པ་ ཅོ་ནོག་། རྒྱ་ལེ་ རག་! རྡུད་རྒུ་ནི་ལ་, ཏོ་ལ་ ཏེཏ་པ་ ཅོ་ནོག་ ཡང་ ཁོང་ལ་ འཇིའི་རྡེ་ འདར་རེ་ནོག་། 20 ཁྱེ་རང་ ཙམ་ཤིག་རྒེ་ ཧ་འགྲང་ཞིག་ འིན་། ཅི་ ལག་ལེན་ མ་ཅོ་ཀ་ནེ་ ཏེཏ་པ་ ཕན་མི་ཐོག་ འིན་ཀན་འབོ་ ཁྱེ་རང་ལ་ ཐོང་ངེ་ མི་འདུག་རྒེ་?

21 ཨ་ཧོ་རྒུ་ནི་ ཕ་མེ་པོ་ ཨབ་ར་ཧམ་, ཀོན་འཇོག་རྒེ་ ཁོ་རང་ངེ་ ཏེཏ་པ་ ལག་ལེན་ནེ་ན་ ཁྱོང་ཅེ་རྦེ་ མི་ ཀྲང་པོ་ཞིག་ ཐེའེ་ མ་ཛེད་རྡེ་, ནམ་ ཁོའེ་ ཁོ་རང་ངེ་ པུ་ཙ་ ཨི་སཱག་ ཆོད་ཁྲི་ཀ་ ཆོད་པ་ པུལ་ཀྱི་ ཡོད་པེན་? 22 ཅི་ ཏེཏ་པ་ རྡང་ ལག་ལེན་རྒུ་ནི་ ཉམ་པོ་ ལེ་ཧ་ ཅོ་ཅེའོ་ ཨབ་ར་ཧམ་ རྒྱུད་ཏེ་, ཁྱི་ཞི་ མ་ཐོང་ངེ་? ཁོའེ་ ལག་ལེན་འབེ་, ཁོའེ་ ཏེཏ་པ་རྦེ་ འདྲན་འདྲ་ ཀྲུབ་ཅུག་ཏེ་ ནོག་། 23 ཏམ་པེ་ སུང་རབ་རྦེ་ན་ “ཨབ་ར་ཧམ་མེ་ ཀོན་འཇོག་རྒེ་ཀ་ རྡེན་ཆེ་ཤེ་ ཅོའེ་རྦེ་, ཁོང་ངེ་ ཁོ་ མི་ ཀྲང་པོ་ཞིག་ ཐེའེ་ ཛེད་” མོལ་ཧན་ ནང་ཞིན་ལ་ སོང་འདེ་ ནོག་, མ་ཚེད་ ཁོ་ ཀོན་འཇོག་རྒེ་ ཛ་འོ་ལ་ ཞུ་ཡོད་པེན་། 24 ཁྱི་ཞི་ ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཏེཏ་པ་ ཅིག་པོ་ མན་ནེ་, ཏེཏ་པ་ རྡང་ ལག་ལེན་ ཉ་ཧ་ རྒྱུད་ཏེ་ ཀྲང་པོ་ ཐེའེ་ ཛེད་ཅེའོ་ མ་ཐོང་ངེ་?

25 ཏེ་རྒ་ ཙོག་སེ་ འཇང་ཙོ་མ་ ར་ཧབ་ ཟེར་ཧན་འབོ་ལ་, ཁོ་རང་ངེ་ ལག་ལེན་རྒུན་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ མ་ཛེད་རྡེ་, ནམ་ ཁོའེ་ ཨིས་ར་ཡེལ་ལེ་ མག་མི་ ཉ་ཧ་ ཁོང་ངེ་ འགྲ་ཝོ་རྒུ་ནི་ཀ་ནི་ རྦེའེ་རྡེ་ ཞེན་ཡང་ ལམ་ སོ་སོ་ཞིག་ནི་ ཁམ་ཟང་ ལམ་ཅུག་། 26 འུག་ མེ་ཀ་ནེ་ ཟུྃ་སྤོ་ ཤི་རྡེ་ འིན་ཀན་ ཙོག་སེ་ ལ་ལེན་ མེ་ཀ་ནེ་ ཏེཏ་པ་རྦོ་ལ་, ཤི་ཀན་ ཙོག་སེ་ ནོག་།