ཡ་ཀུབ་ 1

ཡ་ཀུབ་རྦེ་ ཆོག་ནི་ ཆག་འབྲི་།

ཡ་ཀུབ་རྦེ་ ཆོག་ནི་ འཇུ་།

ང་ ཡ་ཀུབ་, ཀོན་འཇོག་ ཏང་ ཙོབོ་ ཡི་ཤུ་ མ་ཤི་ཀེ་ ཞབ་ཤི་ཞིག་ འིན་།

ངེ་ འི་ ཡི་རྒེ་རྦོ་, འཇིག་རྟེན་ སོན་ཏེ་ན་ ཡན་འདེ་ ཡོ་ཀན་ ཀོན་འཇོག་རྒེ་ མི་རིག་ ཅུག་ཉི་རྒུན་ལ་ འབྲིན་། ཁྱི་ཞ་རྒུན་ལ་ ངེ་ འཇུ་ ཞུ་ཡོད་།

རྡེན་ཆེ་ཤེ་ རྡང་ ཤེ་རབ་།

2 ངེ་ སྤུན་རྒུན་, ཁྱི་ཞ་ ནག་པར་རྡོ་ ཐོང་ངེ་རྡང་, འི་རྦོ་ མ་ རྐྱིད་པོ་ ཡོང་ཅེ་ ཧབ་ཤིག་ ནོག་ སམ་རྒོའེ་། 3 ཅེ་ཟེར་ནི་ ཁྱི་ཞ་རྒུ་ནི་ ཏེཏ་པ་ ཚོད་ལྟ་ཅེ་རྦེ་ ཅོའེ་རྡེ་ ཁྱི་ཞ་ ཟོད་སྲེན་རྒུན་ལ་ འགྱུར་ཤེའོ་ ཁྱི་ཞ་ རྒྱུའི་ནོག་། 4 ཏེ་ནི་ འི་རྦོ་ ལྡན་ཅུག་ ཅེ་ཟེར་ནི་ ནམ་ ཁྱི་ཞ་རྒུ་ནི་ ཟོད་སྲེན་རྒུན་ སོན་ཏེ་ ལྡན་ནེ་ ཁྱི་ཞ་རྒུན་ ཏེཏ་པེ་ནི་ ཆ་ཚང་ ལྡན་འདེ་, ཅང་ རྒོའེ་ཤེ་ མེ་ཀན་ རིག་ འགྱུ་རེན་།

5 ཀལ་ཏེ་ ཁྱི་ཞ་ སུ་ཞིག་ལ་ ཤེ་རབ་ རྒོའེ་ནི་, ཉིང་ པེ་རྡེ་ སལ་ཧ་ནེ་ ཨ་ཧོ་རྒུ་ནི་ ཀོན་འཇོག་ལ་ ཞུའི་། ཁོང་ངེ་ ཏོ་ ཁྱེ་རང་ལ་ སལ་ལེ་ ཛེ་རྡེན་། ཁོང་ངེ་ ཁྱེ་རང་ལ་ ཞུ་ཝ་ པུལ་ཅེ་ཕི་ ཀབ་རྐྱོན་ མི་ཛེད་། 6 འིན་ན་ ཁྱེ་རང་ངེ་ ཞུ་ཝ་ པུལ་ཟ་ནི་, ཐེ་ཚོམ་ མ་ཅོ་ལ་ ཐོབ་རྦེ་ནོག་ སམ་འདེ་ ཏེཏ་པ་ ཅོ་རྒོའེ་, ཅེ་ཟེར་ནི་ ཐེ་ཚོམ་ ཅོ་ཀ་ནེ་ མིའུ་ ཚོའེ་ ཆུལ་རྦག་ ཙོག་སེ་ ནོག་, ཀའོ་ ལུང་ཀྲག་རྒེ་ འི་ངོ་ འ་ངོ་ ཁྲིད་ཏེ་ ཁྱེ་རེ་ནོག་། 7 ཐེ་ཚོམ་ཅེན་ནེ་ མི་རྦེ་ ཙོབོ་རྡེ་ཀ་ནི་ ཅི་ཏོང་ཞིག་ ཐོབ་ཅེ་ སམ་ མི་རྒོའེ་། 8 ཅེ་ཟེར་ནི་ ཁོའེ་ སེམ་འབོ་ ཀོན་འཇོག་ ཏང་ འཇིག་རྟེན་ ཉ་ཧེ་ ཆོག་ལ་ ཡོད་ཏེ་ ནོག་, ཡང་ ལེ་ཧ་ ཚང་མེ་ན་ རྟེམ་པོ་ མེད་ཏེ་ ནོག་།

9 ཏེཏ་པ་ ཡོ་ཀན་ ཉམ་ཤུང་ ཉལ་རྦ་ཅེན་རྒུ་ནི་, ཐེད་པོ་ ཅོ་རྒོ་ཤེ་ ནོག་ ཅེ་ཟེར་ནི་ ཀོན་འཇོག་རྒེ་ ཁོང་རྒུན་ལ་ སི་ཝ་ ཅོའོ་ ཛེད་ཏེ་ ནོག་། 10 འིན་ན་ ཆུག་པོ་རྒུ་ནི་ལ་, ཀོན་འཇོག་རྒེ་ ཁོང་རྒུན་ ཐུར་ལ་ ཅོའོ་ ཛེད་ཅེ་ཀ་ ཐེད་པོ་ ཅོ་རྒོ་ཤེ་ ནོག་, ཁོང་རྒུན་ ཞིང་ངེ་ མེན་ཏོག་ ཡོལ་རྡེ་ ཆ་ ཙོག་སེ་, མེ་ཀན་ ཆེན་། 11 ཉི་མ་ ཚན་ཏེ་ ཤར་རྡེ་ ས་རྒུན་ མེ་ སྲག་ཏེ་, མེན་ཏོག་ ཆུང་ཙེ་རྦོ་ ཀྲུལ་རྡེ་, ཡང་ ཏོ་རྦེ་ ཛེའེ་སྤོ་རྦོ་ མེ་ཀན་ ཆ་ནོག་། ཏེ་རྒ་ ཙོག་སེ་ ནོར་རེ་ རྒྱབ་ནི་ རྒྱུག་རྒེན་ ཡོད་རྡེ་ ཏུའི་ལ་, ཆུག་པོ་རྒུན་ལ་ མེ་ཀན་ ཆེན་།

12 ཟོད་སྲན་ ཉམ་པོ་ རྡུ་ངལ་ ཁུར་ཧན་རྒུན་ལ་, ཅིན་ལབ་ ས་ལེན་། ཅེ་ཟེར་ནི་ ཐི་ཚོད་ལྟ་ནི་ ཐར་ཁྱེལ་ ཆ་ཀན་རྒུན་ལ་, ཀོན་འཇོག་རྒེ་ ཐ་མེད་པེ་ མི་ཙེ་ ཐོར་ཤོག་པོ་ སལ་ལེ་ ཛེ་རྡེན་, ཀའོ་ ཀོན་འཇོག་རྒེ་ ཁོང་ལ་ ཤེ་སྤ་ ཅོ་ཀན་རྒུན་ལ་ སལ་ཅེ་ ཞལ་ཆེཏ་ ཛེད་ཏེ་ འིན་། 13 ནམ་ཞིག་ ཁྱེ་རང་ལ་ རྡིག་པ་ ཅོ་ཅེ་ འདོད་པ་ རྐྱེ་ནི་ “ཀོན་འཇོག་རྒེ་ ང་ རྡིག་པེ་ན་ འགྱེལ་ཤུག་ཅེ་ ཙོན་འགྲུའི་ ཛེད་ཏེ་ ནོག་” མ་ཟེར་ཧེ་། ཀོན་འཇོག་རྒེ་ ཐུག་འདོད་རྡེ་ན་ ངན་པ་ ཅོ་ཅེའོ་ མ་ནི་ མེ་ཀག་, མ་ཚེད་ ཁོང་ངེ་ སུ་ཞི་ལ་ རྡིག་པ་ ཅོ་ཅེ་ འདོད་པེ་ན་ འགྱེལ་ཅུག་རྒེ་ མ་ནི་ ཛེད་རྡེ་ མག་། 14 མི་ རེ་རེ་ རང་རང་ངེ་ འདོད་པ་ ངན་པེ་ཅོའེ་རྡེ་ ཏེ་ན་ ཁད་ཏེ་ ཁོ་ ཐི་ཚོད་ལྟ་ནི་ འགྱེལ་ལེ་ནོག་། 15 འི་ འདོད་པ་རྒུ་ནི་ རྡིག་པེ་ ལེ་ཧ་རྒུན་ རྐྱེ་ཅུག་རྒེ་ནོག་, ཡང་ རྡིག་པ་རྦོ་ ལྡན་ཅུག་ནི་, ཏོ་རྦེ་ ཤི་ཅེའོ་ རྐྱེ་ཅུག་རྒེ་ནོག་།

16 ངེ་ ཤེ་སྤ་ སྤུན་རྒུན་, འགོམ་ཧོར་ ཏང་མ་ཅུག་ཧེ་། 17 ཟང་པོ་ རྡང་ ཕུན་སུམ་ཚོག་པེ་ རྐྱེ་རྒུན་, ནམ་ཀེ་ འོད་ ཚང་མ་ ཅོའོ་ ཛེད་ཀ་ནེ་, ཨ་ཧོ་རྒུ་ནི་ ཡབ་ ཀོན་འཇོག་ནི་ ཡོང་ངེ་ནོག་། ཏེ་ འོད་རྒུན་ ཡང་ ཏོ་རྒུ་ནི་ ཀྲིབ་ཉག་ ཙོག་སེ་ ཁོང་ངེ་ན་ འགྱུར་ཞ་ ཡོང་ངེ་ མག་། 18 ཁོ་རང་ངེ་ རྡེན་འབེ་ ཀའ་ རྒྱུད་རྡེ་, ཁོང་ངེ་ ཨ་ཧོ་རྒུན་ལ་ མི་ཙེ་ སོ་མ་ཞིག་ སལ་ཤེ་ལ་ འདམ་མེ་ ཛེད་ཏེ་, ཨ་ཧོ་རྒུན་ ཁོང་ངེ་ ཛེད་པ་རྒུ་ནི་ ཕྲོ་ནི་ ཚང་མེ་སང་ རིན་ཅེན་ ཐེའེ་ ཛེད་།

ཉེན་ཅེ་ ཡང་ ལག་ལེན་ ཅོ་ཅེ་།

19 ངེ་ ཤེ་སྤ་ སྤུན་རྒུན་, ཁྱི་ཞ་རྒུ་ནི་ ཞེན་མ་རྒུན་ལ་ རྒྱ་ལེ་ ཅོའེ་རྡེ་ ཉོན་ཧེ་, སམ་བ་ ཏྃ་རྡེ་ སྤེ་ར་ ཏོང་ཧེ་, ཡང་ འགྱོ་སྤ་ སྲོ་ ཡོང་ མི་རྒོའེ་། 20 ཅེ་ཟེར་ནི་ སྲོའེ་ མི་ཞིག་རྒེ་ན་ ཀོན་འཇོག་ ཐུག་ཐེད་ཀ་ནེ་ ཀྲང་པོ་ ལེ་ཧ་རྒུན་ མིན་ཅུག་རྒེ་ མག་། 21 ཏོ་རྦེ་ཕི་ ཁྱི་ཞ་རྒུ་ནི་ མི་ཙེ་ན་ ཡོ་ཀ་ནེ་ སོག་པོ་ རྡང་ ངན་པ་ ཚང་མ་ ཕོང་ཧེ་། ཡང་ པབ་མོ་ ཅོའེ་རྡེ་ ཀོན་འཇོག་རྒེ་ ཁྱི་ཞ་རྒུ་ནི་ སེམ་མེ་ན་ པོ་རེ་ ཛེད་ཀ་ནེ་ ཀའ་རྒུན་ལ་ ཁ་ཉོན་ཧེ་, ཀའོ་ལ་ ཁྱི་ཞ་རྒུན་ ཐར་ཤུག་ཅེ་ ཤེད་ ཡོད་ཏེ་ ནོག་།

22 འིན་ན་ ཀོན་འཇོག་རྒེ་ ཀའ་རྒུན་ལ་ ཉེན་ཅེ་ ཅིག་པོ་ མག་, ཏོ་རྒུ་ནི་ཀ་ ལག་ལེན་ ཅོ་རྒོའེ་། ཏེ་མ་ནི་, ཁྱི་ཞ་རྒུ་ནི་ རང་འདང་རང་ལ་ འགོ་ཧོར་རྡེ་ ནོག་། 23 ཀལ་ཏེ་ ཁྱི་ཞི་ ཀོན་འཇོག་རྒེ་ ཀའ་རྒུན་ ཉེན་འདེ་ ལག་ལེན་ནེ་ན་ མ་ཁྱོང་ནི་, ཏེ་ མི་ ཙོག་སེ་ ནོག་, ཀ་རྦེ་ མེ་ལོང་ངེ་ན་ ཁོ་རང་ངེ་ རྡོང་ལ་ ལྟ་ཡོད་, 24 ཡང་ ཐོང་འདེ་ ལྟིང་ནི་ ཏེ་ཀ་ནི་ སོང་འདེ་ ཏེ་རྒ་མ་རྒ་ ཁོ་རང་ ཀ་ཟུག་ཤིག་ ཐོང་ཀན་འབོ་ ཞེད་རྡེ་ནོག་། 25 འིན་ན་ ཀལ་ཏེ་ ཁྱི་ཞ་རྒུ་ནི་ ཕུན་སུམ་ཚོག་པ་ ཁྲིམ་པོ་ སལ་སྤོ་ ཅོའེ་རྡེ་ ཧ་ཀོ་ཅེ་ ཙོན་འགྲུའི་ ཅོ་ནི་, ཀ་རྦེ་ ར་ཝང་ ཏང་ངེན་། ཡང་ ཀལ་ཏེ་ ཟེར་རྡེ་ ཡོ་ཀན་རྒུན་ ཅོའེ་རྡེ་ ཚོར་ཧན་རྒུན་ ཞེད་ མ་ཞེད་ནི་, ཀོན་འཇོག་རྒེ་ ཁྱི་ཞ་རྒུན་ལ་ ཏུ་ཟུག་ ཅོ་ཅེ་ཕི་ ཅིན་ལབ་ སལ་ལེ་ ཛེ་རྡེན་།

26 ཀལ་ཏེ་ ཁྱི་ཞ་རྒུན་ ཆོའེ་སྤ་ཞིག་ འིན་ ཟེ་འིན་ནི་ འིན་ན་ རང་ངེ་ ལྕེ་རྦེ་ཀ་ ཉ་ར་ རྒྱབ་ཏེ་ པོ་རེ་ མེད་ནི་, ཁྱི་ཞ་རྒུ་ནི་ རང་འདང་རང་ལ་ འགོ་ཧོར་རྡེ་, ཁྱི་ཞ་རྒུ་ནི་ ཆོའེ་རྦོ་ རིན་མེད་ཞིག་ འགྱུར་རྡེ་ ནོག་། 27 ཀོན་འཇོག་ ཡབ་རྦེ་ ཧུ་འདུན་ལ་ སང་མ་ རྡང་ ངོའེ་སྤེ་ ཆོའེ་རྡེ་ ཏོན་ཏག་པོ་, ཕ་མ་ མེ་ཀ་ནེ་ ཕྲུ་རྒུ་རྒུན་ འདང་ འ་ནེ་ མ་རང་མོ་རྒུན་ལ་, ནག་པར་རྡོའེ་ ཏུའི་ལ་ ལྟ་ཏོག་ ཅོ་ཅེ་, ཡང་ འཇིག་རྟེན་ནེ་ ལེ་ཧ་ ངན་པ་རྒུ་ནི་ན་ མ་འདྲེའེ་ རང་འདང་རང་ རྐྱོབ་ཏེ་ པོར་ཤེའོ་ ནོག་།