ཀོན་འཇོག་རྒེ་ ཁོ་རང་ངེ་ ཕྲུ་རྒུ་རྒུན་ རྐྱོང་ངེ་ ཛེད་།
12
ཏོ་རྦེ་ཕི་ ཨ་ཧོ་རྒུན་ལ་ ཏེཏ་པེ་ན་ མི་ཙེ་ པུད་ཀ་ནེ་ མི་ཚོག་ མང་པོ་ཞིག་རྒེ་ ཧོར་རྡེ་ ཡོད་པེ་, ཨ་ཧོའེ་ ཏེཏ་པེ་ན་ འགྲུལ་ མི་ཅུག་ཀན་ འདང་ ལ་མོ་ ཉམ་པོ་ ཁྲིལ་ཧ་ནེ་ རྡིག་པ་རྒུན་ ཕྃ་རྡེ་ ཀོན་འཇོག་རྒེ་ ཀྲལ་འགྲིག་ ཅོའོ་ ཛེད་ཀ་ནེ་ པང་འབོ་ ཨ་ཧོ་རྒུ་ནི་ ཟོད་པ་ ཉམ་པོ་ ཏང་ངེན་། 2 ཨ་ཧོ་རྒུ་ནི་ མིག་རྒུན་ ཡི་ཤུའི་ཀ་ པོ་རེན་, ཀ་རྦེ་ ཨ་ཧོ་རྒུན་ལ་ འགོ་ཁྲིད་ ཛེད་ཏེ་ ཨ་ཧོ་རྒུ་ནི་ ཏེཏ་པ་རྦོ་ ཕུན་སུམ་ཚོག་པ་ འགྱུར་ཤུག་རྒེ་ ཛེ་རྡེ་ཡོད་། ཁོང་ལ་ སྲུྃ་རྡེ་ ཡོ་ཀ་ནེ་ རྐྱིད་པེ་ ཐུག་རྒྱུའི་ ཡོད་ཅེ་ཀ་ནི་, ཁྲེལ་རྦ་ མ་སམ་མེ་ ཟོད་པ་ ཉམ་པོ་ ཁོང་ངེ་ རྐྱང་ཤིང་ངེ་ རྡུ་ངལ་རྦོ་ ནམ་མེ་ ཛེད་། ཏག་ས་ ཁོང་ ཀོན་འཇོག་རྒེ་ ཞུ་ཁྲིའི་ ཡོའེ་སྤེ་ ཆོག་ལ་ སི་ཝ་ཅེན་ནེ་ མལ་རྦེ་ཀ་ ཞུ་རྡེ་ ཡོད་ཏེ་ ནོག་། 3 སམ་བ་ སལ་ལྃ་ རྡིག་ཅེན་ མི་རྒུ་ནི་ ནག་ ལྟན་ཀན་རྒུན་ ཟོད་པ་ ཉམ་པོ་ སྲན་ནེ་ ཛེད་ཀ་ནེ་ ཡི་ཤུའི་ ཧོར་ལ་, ཏེ་ནི་ ཁྱི་ཞ་རྒུན་ ཧོཔ་ ངལ་མི་ངལ་ ཡང་ ཁྱི་ཞི་ རེ་ཝ་རྦོ་ ཕང་མི་ཕང་! 4 རྡིག་པེ་ རྒྱཔ་འགལ་ལ་ ནོལ་ལེན་, ཁྱི་ཞ་རྒུན་ལ་ ཏ་རུང་ཚུག་པ་ ཤི་ཅེ་ རྡུ་ངལ་རྦོ་ ཐང་ངོམ་ མེད་རྡེ་ ནོག་།5 ཁོ་རང་ངེ་ ཕྲུ་རྒུ་རྒུན་ལ་ སེམ་རུའི་ ས་ལེན་ ཀོན་འཇོག་རྒེ་ མོལ་ཧན་འབོ་ ཁྱི་ཞ་རྒུ་ནི་ ཞེད་ཏེ་?
“ངེ་ ཕྲུ་རྒུ་, ཙོབོ་རྡེ་ ཆེད་པ་ ཛེད་ཅེ་རྦོ་ལ་ ནང་མེད་ མ་ཅོ་ཧེ་
ཡང་ ཁོང་ངེ་ ཀབ་རྐྱོན་ སལ་ལེ་ ཛེད་ཟ་ནི་,
སེམ་ ཆག་ཏེ་ རེ་ཝ་རྦོ་ མ་ཕང་ཧེ་།
6 ཅེ་ཟེར་ནི་ ཙོབོ་རྡེ་ ཤེ་སྤ་ ཛེད་ཀན་རྒུན་ལ་ ཆེད་པ་ ཛེ་རྡེ་ནོག་
ཡང་ ཁོ་རང་ངེ་ ཕྲུ་རྒུ་ ཐེ་ཀན་རྒུན་ལ་ ཆེད་པ་ སལ་ལེ་ ཛེ་རྡེ་ནོག་།”
7 ཀོན་འཇོག་རྒེ་ ཆེད་པ་ལ་, ཁྱི་ཞ་རྒུ་ནི་ སྲན་འདེ་ འདེད་ཟ་ནི་, ཁོང་ངེ་ ཁྱི་ཞ་ ཁོ་རང་ངེ་ ཕྲུ་རྒུ་ ཙོག་སེ་ ཐེའེ་ ཛེད་ཀན་འབོ་ འི་ཏུ་ ཅོའེ་ཧེ་། ཨ་རྦེ་ ཆེད་པ་ མ་ཕོག་ཀན་ ཕྲུ་རྒུ་ཞིག་ སུ་ ཡོ་ཀག་? 8 ཆེཏ་པ་རྦོ་ ཚང་མེ་ཀ་ ཕོག་རྒེ་ནོག་། ཀོན་འཇོག་རྒེ་ ཆེད་པ་ མ་ཕོག་ཀན་རྒུན་ ཁོང་ངེ་ རྡེན་འབེ་ ཕྲུ་རྒུ་རྒུན་ མན་, ནལ་ཁྲུག་རྒུན་ ནོག་། 9 ཞེན་ ཨ་ཧོ་རྒུན་ ཆེད་པ་ ཕོག་ཀན་ འཇིག་རྟེན་ནེ་ ཨ་རྦ་རྒུན་ལ་ ཨ་ཧོའེ་ སི་ཝ་ ཅོ་ནོག་, ཏེ་ནི་ ཙམ་ཤིག་ མང་ངེ་ ཨ་ཧོ་རྒུན་ ཨ་ཧོ་རང་ངེ་ ཐུག་ཡིད་རྡེ་ ཡབ་རྦ་ ལྟེད་ མི་རྒོའེ་? ཏུ་ཟུག་ ཅོ་ནི་ ཏུའི་རྒྱུན་ སོན་པོ་ ལུའི་རྡེན་།
10 འཇིག་རྟེན་ནེ་ ཨ་རྦ་རྒུ་ནི་ ཏུའི་ ཉུང་ཙེ་ཞིག་རྒེ་ཕི་ ཨ་ཧོ་རྒུན་ལ་ སམ་བ་ རྒྱ་ལེ་ ཉམ་པོ་ ཆེཏ་པ་ ཕོག་རྒེ་ནོག་། འིན་ན་ ཀོན་འཇོག་རྒེ་ ཨ་ཧོ་རང་ངེ་ ཕན་ཏོག་རྡེ་ཕི་ ཨ་ཧོ་རྒུན་ལ་ ཆེད་པ་ ཛེ་རྡེ་ནོག་, ཏོ་ ཛེད་ཅེ་ རྒྱུ་ཚན་འབོ་, ཁོང་ ཏམ་པ་ འིན་ཀན་འབོ་ ཨ་ཧོ་ ཉམ་པོ་ རྒོའོ་ ཛེད་ཅེའོ་ ནོག་། 11 ཆེད་པེ་ ཏུའི་རྦོ་ རྐྱིད་པོ་ མན་ཀན་ རྡུག་ངལ་ཅེན་ཞིག་ ཡོང་ངེ་ནོག་། འིན་ན་ ལྟིང་ནི་ ཡུ་ཙོག་སེ་ ལམ་མེ་ན་ ལོབ་ཞོང་ ཐོབ་ཀན་རྒུན་ལ་ ཀྲང་པོ་ རྡང་ ཞིའི་རྡེ་ འབྲེ་རྦུ་རྒུན་ མི་ནེན་།
12 ཏེ་རྒ་རྦེ་ཕི་ལ་ ངལ་ཧ་ནེ་ ལག་པ་ རྡང་ འུ་ཐུག་ པིག་མོ་རྒུན་ ཤེད་ཅེན་ ཅོའེ་ཧེ་། 13 འུ་ཐུག་ ཏང་ ཞ་འོ་རྒུན་ ཐུ་ མ་ཆ་ ཤེད་ཅེན་ འགྱུར་ཤེ་ཕི་ ལམ་ ཀྲང་པེ་ཀ་ འགྲུལ་ཧེ་།
ཀོན་འཇོག་རྒེ་ མོལ་ཧན་རྒུན་ ཉེན་ཅེ་ལ་ ཞུ་ཝ་།
14 མི་ཚང་མ་ ཉམ་པོ་ ཞིའི་རྡེ་ན་ འདེད་ཅེ་ ཙོན་འགྲུའི་ ཅོའེ་ཧེ་, ཏམ་པེ་ མི་ཙེ་ཞིག་ པུད་ཧེ་། ཏམ་པ་ མ་འདེད་ཀན་རྒུན་ལ་ ཙོབོ་ འཇལ་ཉེན་ནེ་ མག་། 15 ཀོན་འཇོག་རྒེ་ ཐུག་ཞེ་ མ་ཐོབ་རྦེ་ སུ་ཞི་ལ་ ལུའི་ མི་ལུའི་ཤེ་ལ་ ནྃ་རྟག་ ཅོའེ་ཧེ་། ཡང་ ཏུག་རྒེ་ པ་ཀྲག་ ངན་པ་ རྒྱེ་རྡེ་ ནག་ ལྟན་ཅེ་ རྡང་ མང་པོ་ལ་ ལེ་ངན་རྒུན་ ཅོ་ མི་ཤུག་ཅེ་ལ་ ཤང་ ཅོའེ་ཧེ་། 16 སུ་ཞིག་ལ་ ལུའི་འབྲེལ་ ངན་པེ་ ཤོད་ལམ་ ཡང་ ཨེ་སུ་ ཙོག་སེ་ ཏེཏ་པ་ མེ་ཀ་ནེ་ མི་ཙེ་ མི་པུད་ཅེ་ལ་ ནེན་ཏེན་ ཅོའེ་ཧེ་, ཀ་རྦེ་ ཁོ་རང་ངེ་ འགོ་མ་ རྐྱེ་ཀ་ནེ་ ཐོབ་ཏང་རྒུན་ ཚ་ཛར་ ཅིག་རྒེ་ ཁར་ཞི་ཕི་ ཙོྃ་། 17 ཁྱི་ཞ་རྒུན་ལ་ རྒྱུའི་ཡོད་ཏེ་ ནོག་, ལྟིང་ནི་ ཨེ་སུ་ལ་ ཁོ་རང་ངེ་ ཨ་རྦེ་ ཅིན་ལབ་པོ་ རྒོ་ཟ་ནི་ ཨ་རྦེ་ ཁོ་ མ་ཏྃ་། ཞེན་ ཁོའེ་ འགྱོད་པ་ ཅོའེ་རྡེ་ མ་མང་པོ་ ངུའིན་ ཞུ་ཝ་ པུལ་ནྃ་, ཁོ་ ཁོ་རང་ངེ་ ཨ་རྦེ་ ཐག་ཅེད་རྡེ་ན་ འགྱུར་ཞ་ ཁྱོང་ མ་ཉེན་།
18 ཁྱི་ཞ་རྒུན་ ཏེ་ རི་རྦེ་ཀ་ ལེབ་ཏེ་ མག་ ཀ་ཟུག་ ཨིས་ར་ཡེལ་པ་རྒུན་ སི་ནཱའི་ ཟེར་ཧ་ནི་ རི་, མེ་ འབར་རེན་, མུན་ཀྲག་ ཏང་ ཐིབ་ཐིབ་ འཇིག་ཤེ་ ཡང་ ལུང་སུབ་རྒུ་ནི་ ཀབ་ཀན་འབེ་ཀ་ ལེཔ་། 19 ཏེ་རྒ་ མལ་རྦེ་ཀ་ ཨིས་ར་ཡེལ་པ་རྒུན་ལ་ ཏུང་ཧད་ ཀྲག་པོ་ འདང་, མ་ འཇི་ནང་ཅེན་ནེ་ སུང་ཧད་ཅིག་ ཚོར་རྦེ་, ཁོང་རྒུ་ནི་ ཀོན་འཇོག་ལ་ ཡང་ མི་མོལ་ཅེ་ལ་ འཇུ་འཇུ་ ཞུའི་། 20 ཅེ་ཞུ་ནི་ ཀོན་འཇོག་རྒེ་ ཀཱ་, “ཀལ་ཏེ་ སེམ་ཅེན་ཞིག་ལ་ འི་ རི་རྦོ་ལ་ ཐུག་ནི་, ཏེ་ སེམ་ཅེན་འབོ་ལ་ རྡོ་ རྒྱབ་ཏེ་ སེད་རྒོའེ་”, མོལ་ཧན་འབོ་ ཁོང་རྒུ་ནི་ ནེན་མ་ཉེན་། 21 རི་རྦེ་ཀ་ འཇི་ནང་ཅེན་ སོང་ཀན་རྒུན་ ཐོང་འདེ་, མོ་ཤེ་ མོལ་ “ང་ ཧོཔ་ འཇིའི་རྡེ་ འདར་རེ་རག་།”
22 འིན་ན་ ཁྱི་ཞ་ ཟི་ཡོན་ ཟེར་ཧ་ནེ་ རི་, རྡེ་བ་ཅན་ནེ་ ཡེ་རུ་ཤ་ལེམ་མེ་ན་ ལེབ་ཏེ་ ནོག་, ཀའོ་ སོན་པོ་ ཀོན་འཇོག་ ཞུ་སེ་ རྒྱལ་ས་འབོ་ འིན་, ཀ་རུ་ ཀྲང་ཧ་ མེ་ཀ་ནེ་ ཕོ་ཉ་རྒུན་ རྐྱིད་པོ་ ཅོ་ཅེ་ལ་ ཛོམ་མེན་ ནོག་། 23 ཁྱི་ཞ་རྒུན་ ཀོན་འཇོག་རྒེ་ འགོ་མ་ རྐྱེ་ཀ་ནེ་ ཕྲུ་རྒུ་རྒུན་ ཛོམ་མེ་ན་ ལེབ་ཏེ་ ནོག་, ཀའོ་རྒུ་ནི་ མིང་རྒུན་ རྡེ་བ་ཅན་ནེ་ན་ འབྲི་རྡེ་ ཡོད་ཏེ་ ནོག་། ཁྱི་ཞ་, མི་ཚང་མེ་ཀ་ ཁྲིམ་ཅེད་རྡེ་ ཛེད་ཀན་ ཀོན་འཇོག་ ཁོ་རང་ས་, ཡང་ ཀྲང་པོ་ མི་རྒུ་ནི་ སེམ་ཡིད་ས་ ལེབ་ཏེ་ ནོག་, ཀའོ་རྒུན་ལ་ ཕུན་སུམ་ཚོག་པ་ ཛེད་། 24 ཁྱི་ཞ་རྒུན་ ཀོན་འཇོག་ ཏང་ མི་རྒུ་ནི་ པར་ལ་ ཆེཏ་ཏོན་ སོ་མེ་ པར་མི་, ཡི་ཤུའི་ ཧུ་འདུན་ལ་ ལེཔ་, ཁོང་ངེ་ ཧུ་ཁྲག་ ཕོའེ་ཧན་འབེ་, ཨ་འབེལ་ལེ་ ཁྲག་ ཙོག་སེ་ སྲོག་རྒེ་ ཚབ་ལ་ སྲོག་ནེན་ཅེ་ མག་, ཤག་སྤ་ ཛེད་ཅེ་ཕི་ མོ་ལེ་ ཛེད་།
25 ཀོན་འཇོག་རྒེ་ མོལ་ལེ་ ཛེད་ཀན་འབོ་ལ་ ནར་རྐྱི་ མི་ཉེན་ཅེ་ནི་ ཤང་ ཅོའེ་ཧེ་། ཀལ་ཏེ་ ཨིས་ར་ཡེལ་པ་རྒུ་ནི་ འཇིག་རྟེན་པ་ ཁྲིན་ཁྱོང་ཀན་, མོ་ཤེ་ སྤང་པུད་ཀན་རྒུན་ལ་ ནང་མེད་ ཅོ་ཅེ་རྦེ་, ཁོང་རྒུན་ ཏེ་ ཁྲིམ་ཅེད་ནི་ ཤོར་ མ་ཉེན་ནེ་ འིན་ནི་, ཏེ་ནི་ ཀལ་ཏེ་ ཨ་ཧོའེ་ རྡེ་བ་ཅན་ནེ་ ཞལ་ཏ་ སལ་ཧན་འབོ་ལ་ ནང་མེད་ ཅོ་ན་, ཨ་ཧོ་རྒུན་ ཀ་ཟུག་རྒེ་ ཐར་ཉེན་ནེན་། 26 ཀོན་འཇོག་རྒེ་ རི་ སི་ནཱའི་ཀ་ནི་ མོལ་ཟ་ནི་, ཁོང་ངེ་ སུང་ཧད་རྡེ་ འཇིག་རྟེན་འབོ་ རྒུལ་ལེ་ ཛེད་། འིན་ན་ ཏག་ས་ ཁོང་ངེ་ ཞལ་ཆེཏ་ཞིག་ ཅོའོ་ ཛེད་, “ཡང་ ལན་ཅིག་ ངེ་ འཇིག་རྟེན་ ཅིག་པོ་ མན་ནེ་ ནམ་ཀེ་ན་ ཡོ་ཀན་རྒུན་ལ་ རྒུལ་ལེན་།” 27 “ཡང་ ལན་ཅིག་” མོལ་ཧ་ནེ་ ཏོན་འབོ་, རྒུལ་ཉེན་ཀན་རྒུན་ མེ་ཀན་ ཛེད་རྡེན་, ཡང་ནི་ ཀོན་འཇོག་རྒེ་ ཛེད་ཀན་ ཚང་མ་། ཏེ་རྒ་རྦེ་ཕི་ལ་ རྒུལ་མ་ཉེན་ཀན་རྒུན་ ཅིག་པོ་ ལུའི་རྡེན་།