ཀྲག་པོ་ ཏེཏ་པ་ཅན་རྒུ་ནི་ སྤེ་།
11
ཏེཏ་པ་རྦོ་, རེ་ཝ་ ཅོ་ཀན་འབོ་ འདྲན་འདྲ་ ཀྲུཔ་ཅེ་ ལོ་ཁྱེལ་ ཡོད་ཅེ་རྦོ་ ནོག་། ཡང་ ཏོ་རྦེ་ ཨ་ཧོ་ལ་ མ་ཐོང་ཀན་རྒུན་ རྡེན་འབའ་ འིན་ཀན་འབོ་ ནེན་ཏེན་ ཅོ་ནོག་། 2 ཏེ་རྒ་ ཏེཏ་པ་རྦོ་ རྒྱུད་ཏེ་, ཨ་ཧོའེ་ ཕ་མེ་པོ་རྒུན་ལ་ ཀོན་འཇོག་རྒེ་ ཆོག་རྐྱོར་ ཐོབ་།3 ཛམ་ལིང་ སོན་ཏེ་ ཀོན་འཇོག་རྒེ་ ཀཱ་ ནང་ཞིན་ལ་ ཆག་, ཏག་ས་ ཨ་ཧོ་རྒུན་ལ་ ཐོང་ངེན་ ཡོ་ཀ་ནེ་ ཛམ་ལིང་འབོ་, ངུལ་ལ་ ཡོ་ཀན་ རིག་རྒེ་ཀ་ནི་ མ་ཞང་ཀན་འབོ་, ཨ་ཧོ་རྒུ་ནི་ ཏེཏ་པ་ ཅོ་ཅེ་རྦོ་ རྒྱུད་ཏེ་ ཧ་ཀོ་ནོག་།
4 ཏེཏ་པ་ ཡོད་ཅེ་རྦེ་, ཨ་འབེལ་ལེ་ ཀོན་འཇོག་ལ་ ཁོ་རང་ངེ་ ཨ་ཅོ་ ཀ་ཡིན་ནེ་སང་ སྲོག་ཆོད་ མང་ངེ་ རྒྱ་ལེ་ པུལ་། ཏེ་རྒ་རྦེ་ ཅོའེ་རྡེ་ ཨ་འབེལ་ལེ་ སྲོག་ཆོད་རྒུན་ལ་ ཆོག་རྐྱོར་ ཛེད་ཏེ་ ཀོན་འཇོག་རྒེ་ ཁོ་ མི་ ཀྲང་པོ་ ཐེའེ་ ཛེད་། ཨ་འབེལ་ མ་ ཏུའི་ མང་པེ་ ངུལ་ལ་ ཤི་རྡེ་ མེད་ནྃ་, ཁོའེ་ ཏེཏ་པ་རྦོ་ ཨ་ཧོ་རྒུ་ནི་ཕི་ ཏ་རུང་ང་ སྤེ་ཞིག་ ནོག་།
5 ཏེཏ་པ་ ཡོད་ཅེ་རྦེ་, ཨེ་ནོག་ ཟེར་ཧ་ནེ་ པུ་ཙ་འབོ་ ཤི་མ་ཤི་ལ་, རྡེ་བ་ཅན་ ཁྱེར་རེ་ ཛེད་ “ཁོ་ འཇིག་རྟེན་ནེ་ན་ མ་ཐོབ་ ཅེ་ཟེར་ནི་ ཀོན་འཇོག་རྒེ་ ཁོ་ ཁྱེར་རེ་ ཛེད་”, རྡེ་བ་ཅན་ ཁྱེར་རེ་སང་ ངུལ་ལ་ ཁོ་ ཀོན་འཇོག་ལ་ ཐུག་ཐེད་ཅུག་ ཛེད་ཀ་ནེ་ མི་ཞིག་ ཐེ་ཡོད་པེན་། 6 ཡང་ ཏེཏ་པ་ མེད་འབེ་ ཀོན་འཇོག་ ཐུག་ཐེད་ ཅུག་ཉེན་ནེ་ མག་། ཁོང་ས་ ཡོང་ཉིན་ ཡོ་ཀན་རྒུ་ནི་, ཀོན་འཇོག་ ཞུ་རྡེ་ ཡོ་ཀན་ འདང་ ཉིང་ནི་ ཙལ་ཧན་རྒུན་ལ་ སོལ་རེ་ སལ་ཅེ་རྦོ་ལ་ ཏེཏ་པ་ ཅོ་རྒོའེ་།
7 ཏེཏ་པ་ ཡོད་ཅེ་རྦེ་, ནོ་ཨཱེ་ ཁོ་རང་ངེ་ ནང་ཚང་རྒུན་ ཆུ་ལོག་ནི་ རྐྱོབ་ཅེ་ཕི་ ཆུ་རེལ་ཞིག་ ཅོའོ་ ཛེད་། ཁོའེ་ ཡོང་ཅེ་ཅེན་ནེ་ འཇི་སྤ་རྒུན་ནེ་ ཧོར་ལ་ སྤང་པུད་རྡེ་ ཛེད་ཀ་ནེ་ ཀོན་འཇོག་རྒེ་ ཁ་ཉེན་། ཏེཏ་པེ་ ཅོའེ་རྡེ་ ནོ་ཨཱེ་ ཆུ་རེལ་ལེ་ན་ མ་ཞོན་ཀ་ནེ་ འཇིག་རྟེན་པ་རྒུ་ནི་ཀ་ ཀོན་འཇོག་རྒེ་ ཁྲིམ་ཅེད་ ཁྱོྃ་། ཡང་ ཏེཏ་པ་ རྒྱུད་ཏེ་, ཀོན་འཇོག་རྒེ་ ནོ་ཨཱ་ མི་ ཀྲང་པོ་ཞིག་ ཐེའེ་ ཛེད་།
8 ཏེཏ་པ་ ཡོད་ཅེ་རྦེ་, ཨབ་ར་ཧམ་མེ་ ཀོན་འཇོག་རྒེ་ ཁ་ཉེན་, ནམ་ ཀོན་འཇོག་རྒེ་ ཁོ་ རང་ངེ་ རང་ཡུལ་ ཕྃ་རྡེ་, ཁོང་ངེ་ ཁོ་ ནོར་ཧལ་ལ་ སལ་ལེ་ ཛེད་ཅེ་ ཏེ་ མལ་རྦོ་ལ་ སོང་ མོལ་, ཡང་ ཀ་རུ་ ཆ་ཅེ་རྦོ་ རྒྱུའི་མེད་ཏེ་ལ་ ཁོ་ སོང་། 9 ཏེཏ་པ་ ཡོད་ཅེ་རྦེ་ ཨབ་ར་ཧམ་, ཞལ་ཆེཏ་ ཛེད་ཀ་ནེ་ ཡུལ་རྦོ་ལ་ ལེབ་རྦེ་རྡང་, ཞེན་ཡུལ་ལེ་ མི་ ཙོག་སེ་ ཁོ་ ཀུར་རེ་ན་ འདེད་། ཏེ་རྒ་ ཙོག་སེ་ ཨི་སཱག་ ཏང་ ཡ་ཀུབ་རྦེ་ལ་ ཅོའེ་, ཀའོ་རྒུན་ལ་ ཏེ་རྒ་ ཞལ་ཆེཏ་པོ་ ནོར་ཧལ་ལ་ ཐོབ་ཏེ་ ནོག་། 10 ཨབ་ར་ཧམ་མེ་ ལོ་ཁྱེལ་ ཉམ་པོ་ ཏུའི་རྒྱུན་ ལུའི་ཤེ་ཅེན་ནི་ མག་རྡེན་ ཡོ་ཀ་ནེ་ རྒྱལ་ས་, ཀོན་འཇོག་རྒེ་ ཁོ་རང་ངེ་ ཐབ་ ནང་ཞིན་ སིག་རྒེ་ ཛེད་ཀན་འབོ་ ཐོབ་ཅེ་ལ་ ལྟ་ཡོད་པེན་།
11 ཏེཏ་པ་ ཡོད་ཅེ་རྦེ་, ཨབ་ར་ཧམ་, མ་རྒད་པོ་ སོང་འདེ་ ཡང་ སཱ་ར་ མ་ནི་ ཕྲུ་རྒུ་ མ་རྐྱེ་ལ་ ཡིན་འདེ་ལ་, ཀོན་འཇོག་རྒེ་ ཨབ་ར་ཧམ་ ཨ་རྦ་ འགྱུར་ཤུག་རྒེ་ ཛེད་, ཅེ་ཟེར་ནི་ ཁོའེ་ ཞལ་ཆེཏ་ ཛེད་ཀ་ནེ་ ཀོན་འཇོག་ ལོ་ཁྱེལ་ཅེན་ ཞུ་རྡེ་ འིན་ཀན་འབོ་ ཐེའེ་། 12 སོང་པེ་སང་ ཨབ་ར་ཧམ་ རྒད་པོ་ ཤི་ཅེ་ ཉེ་མོ་ལ་ ལེབ་ཏེ་ལ་, ཁོའེ་ ཕར་རྒྱུད་རྒུན་ ནམ་མེ་ ཧར་མ་ ཙོག་སེ་ མང་པོ་ རྡང་ རྒྱམ་ཚོའེ་ ཐ་མེ་ པེ་མ་ ཙོག་སེ་ སི་ མི་ཉེན་ཅེ་ ཕེལ་།
13 ཤི་ཅེ་ ཞག་ཚུག་པ་ལ་, ཏེ་ མི་ཚང་མེ་ ཀོན་འཇོག་རྒེ་ ཞལ་ཆེཏ་ ཛེད་ཀན་འབེ་ན་ ཏེཏ་པ་ ཅོ་ཡོད་པེན་། ཁོང་རྒུན་ལ་ ཏེ་ ཞལ་ཆེཏ་ ཛེད་ཀན་འབོ་ མ་ཐོབ་ འིན་ན་ ཁོང་རྒུ་ནི་ ཏོ་ ཐག་རིང་ཞིག་ནེ་ ཐོང་འདེ་ རྒ་སུའི་ ཞུའི་། ཡང་ ཁོང་རྒུན་ལ་ འི་ འཇིག་རྟེན་ནི་ཀ་ ཞེན་མེ་ ཡུལ་ལེ་མི་ རྡང་ འབྲོག་པ་རྒུན་ ཟེ་ཡོད་པེན་། 14 ཏ་ ཏོ་ཙོག་སེ་ སམ་བ་ ཡོད་ཀ་ནེ་ མི་རྒུ་ནི་ རྡེན་འབེ་ རང་ཡུལ་ལ་ ཆ་ཉིན་འགྲོ་ཅེ་རྦོ་ ཞིབ་སལ་ ཅོའེ་རྡེ་ ནོག་། 15 ཀལ་ཏེ་ ཁོང་རྒུ་ནི་ ཕྃ་རྡེ་ ཡོང་ཀ་ནེ་ རང་ཡུལ་རྦོ་ ས་མེ་ཡོད་པེ་ནི་, ཏེ་ནི་ ཁོང་རྒུན་ལ་ ལོག་ཏེ་ ཆ་ཅེ་ ཧབ་ ཐོབ་ཏེ་ ཡོད་ཁྲོ་། 16 འིན་ན་ ཁོང་རྒུ་ནི་ མང་ངེ་ རྒྱ་ལེ་ ཡུལ་ཞིག་རྒེ་ཕི་ འདོད་པ་ ཅོ་ཡོད་པེན་, རྡེ་བ་ཅན་ནེ་ན་ ཡོ་ཀན་འབོ་ལ་། ཏེ་རྒ་རྦེ་ཕི་ལ་ ཀོན་འཇོག་, ཁོང་རྒུ་ནི་ ཀོན་འཇོག་ ཞུ་ཅེ་ལ་, ཁྲེལ་ལེ་ མ་ཛེད་, མ་ཚེད་ ཁོང་ངེ་ ཁོང་རྒུ་ནི་ཕི་ རྒྱལ་ས་ཞིག་ལ་ སིག་རྒེ་ ཛེད་།
17 ཏེཏ་པ་ ཡོད་ཅེ་རྦེ་, ཀོན་འཇོག་རྒེ་ ཨབ་ར་ཧམ་ལ་ ཐི་ཚོད་ལྟ་ ཛེད་ཟ་ནི་, ཁོའེ་ ཨི་སཱག་རྒེ་ལ་ སྲོག་ཆོད་ པུལ་། ཀོན་འཇོག་རྒེ་ ཞལ་ཆེཏ་ ཐོབ་ཀ་ནེ་ ཨབ་ར་ཧམ་, ཁོ་རང་ངེ་ པུ་ཙ་ ཅིག་ཅིག་པོ་ལ་ སྲོག་ཆོད་ པུལ་ཅེ་ལ་ ཀྲལ་འགྲིག་ ཡོད་པེན་། 18 ཞེན་ ཀོན་འཇོག་རྒེ་ ཁོ་ མོལ་ལེ་ ཛེད་ནང་, “ཨི་སཱག་ རྒྱུད་ཏེ་ ཁྱེ་རང་ངེ་ ཕར་རྒྱུད་རྒུན་ ཕེ་ལེན་།” 19 ཨབ་ར་ཧམ་མེ་ སམ་, ཨི་སཱག་ ཤི་ནྃ་ ཀོན་འཇོག་རྒེ་ ཁོ་ ཡང་ སོན་པོ་ ལང་ངེ་ ཛེད་ཉེན་ནེན་། ཡང་ ལྟོའེ་རྡེ་ ཁྱེར་ནི་ ཏོ་ སོང་, ཨབ་ར་ཧམ་ལ་ ཁོ་རང་ངེ་ པུ་ཙ་ ཤི་རྡེ་ ལྟིང་ནི་ ལོག་ཏེ་ ཐོབ་ཀན་ ཙོག་སེ་ ནོག་།
20 ཏེཏ་པ་ ཡོད་ཅེ་རྦེ་, ཨི་སཱག་རྒེ་ ཁོ་རང་ངེ་ པུ་ཙ་ ཡ་ཀུབ་ ཏང་ ཨེ་སུ་ ཉ་ཧ་ ཁོང་རྒུ་ནི་ ཡོང་ཅེ་ཅེན་ནེ་ ཏུའི་རྡེ་ཕི་ ཅིན་ལབ་ སལ་།
21 ཏེཏ་པ་ ཡོད་ཅེ་རྦེ་, ཡ་ཀུབ་ ཤི་ཟ་ནི་, ཁོའེ་ ཡོ་སེབ་རྦེ་ ཕྲུ་རྒུ་ ཉ་ཧ་ ཅིན་ལབ་ སལ་, ཡང་ ཁོ་ རྒད་པོ་ ཆ་རྡང་ ཁོ་རང་ངེ་ འགྲུལ་ཤེ་ པེར་ཧ་ ཀན་འདེ་ ཀོན་འཇོག་ལ་ ཅོལ་།
22 ཏེཏ་པ་ ཡོད་ཅེ་རྦེ་, ཡོ་སེབ་ ཤིན་ ཡོད་རྡེ་ ཏུའི་ལ་, ཁོའེ་ ཨིས་ར་ཡེལ་པ་རྒུན་ ཨི་འཇིབ་རྦེ་ ཡུལ་ནི་ འབིང་འདེ་ ཆ་ཅེ་ ཧོར་ལ་ ཟེར་། ཡང་ ཁོང་རྒུན་ ཆ་ཟ་ནི་ ཁོའེ་ རུའི་སྤ་རྒུན་ ཉམ་པོ་ ཁྱེར་ཤེ་ ལབ་ཞ་ ཏྃ་།
23 ཏེཏ་པ་ ཡོད་ཅེ་རྦེ་, མོ་ཤེ་ ཕ་མ་རྒུ་ནི་ ཁོ་ རྐྱེ་རྡེ་ ལྟིང་ནི་ ལྡ་ སུམ་ཚུག་པ་ རྦེའེ་རྡེ་ པོར་, ཅེ་ཟེར་ནི་ ཁོའེ་ ཕ་མ་རྒུ་ནི་ ཁོ་ ཞེན་ ཕྲུ་རྒུ་རྒུ་ནི་སང་ ཁྱེད་པར་ཅེན་འཇིག་ ཐོང་། ཡང་ ཨི་འཇིབ་རྦེ་ རྒྱ་སྤེ་ ཁ་ མི་ཉེན་ཅེ་ལ་ ཁོང་རྒུན་ མ་འཇིའི་།
24 ཏེཏ་པ་ ཡོད་ཅེ་རྦེ་, མོ་ཤེ་ ལྡན་འདེ་ ལྟིང་ནི་ ཁོའེ་ ཁོ་རང་ལ་ རྒྱ་སྤོ་ ཕེ་རོའེ་ སྲེ་མོའེ་ པུ་ཙ་ ཟེར་ མ་ཤུག་། 25 ཏུའི་ ཉུང་ཙེ་ཞིག་, རྡིག་པེ་ རྐྱིད་པོ་རྒུ་ནི་ན་ ཐེད་པོ་ ཅོའེ་རྡང་ ཨིས་ར་ཡེལ་པ་རྒུན་ ཉམ་པོ་ རྡུ་ངལ་ ཁུར་ཤེའོ་ མོ་ཤེ་རྡེ་ འདམ་། 26 མོ་ཤེ་ ཨི་འཇིབ་རྦེ་ རྒྱུར་ནོར་རྒུ་ནི་སང་ མ་ཤི་ཀེ་ ཏོན་ལ་ རྡུ་ངལ་ ཉོང་ཅེ་རྦོ་ མང་ངེ་ རིན་ཅེན་ འིན་ཀན་འབོ་ ཧ་ཀོ་, ཅེ་ཟེར་ནི་ ཁོའེ་ ཐོབ་ཅེ་ཅེན་ནེ་ ཏེ་ ཀྲག་པོ་ སོལ་རེ་རྦོ་ལ་ ལྟ་ཡོད་པེན་། 27 ཏེཏ་པ་ ཡོད་ཅེ་རྦེ་, རྒྱ་སྤེ་ སྲོ་ མ་འཇིའི་རྡེ་, ཁོ་ ཨི་འཇིབ་རྦེ་ ཡུལ་ ཕྃ་རྡེ་ སོང་། ཁོའེ་ ཟོད་པ་ ཉམ་པོ་ ཏོ་རྒུན་ ཅོའེ་རྡེ་ འིན་འབེན་, ཅེ་ཟེར་ནི་ ཁོའེ་ ཁོ་རང་ངེ་ མིག་པོ་ མ་ཐོང་ཀན་ ཀོན་འཇོག་ ཆོག་ལ་ པོར་། 28 ཏེཏ་པ་ ཡོད་ཅེ་རྦེ་, འགོ་མ་ རྐྱེ་ཀ་ནེ་ པུ་ཚ་རྒུན་ སེད་རྡེ་ལ་ ཡོང་ཀ་ནེ་ ཕོ་ཉེ་ཀ་ནི་ རྐྱོབ་ཅེ་ཕི་, མོ་ཤེ་ ཨིས་ར་ཡེལ་པ་རྒུན་ལ་ པེ་སག་རྒེ་ ཏུའི་ སི་ཅེ་ རྡང་ ལུ་རྒུའི་ ཁྲག་རྒུན་ རྒོའེ་རྟག་རྒེ་ཀ་ ཧུ་ཅེ་ལ་ ཀཱ་ ཏྃ་།
29 ཏེཏ་པ་ ཡོད་ཅེ་རྦེ་, ཨིས་ར་ཡེལ་པ་རྒུན་ ཚོ་ མར་སྤེ་ ཞུང་ནི་ ས་ཀྱེཏ་ ཧམ་པོ་ རྒྱུད་ཏེ་ འགྲུལ་། འིན་ན་ ཨི་འཇིབ་པ་རྒུ་ནི་ ཁོང་རྒུ་ནི་ རྒྱབ་ནི་ ཡོང་ཅེ་ ཙོན་འགྲུའི་ ཅོ་རྡང་, ཁོང་རྒུན་ ཆུའི་ན་ ནུབ་ཏེ་ ཤི་།
30 ཏེཏ་པ་ ཡོད་ཅེ་རྦེ་, ཨིས་ར་ཡེལ་པ་རྒུན་ ཀོན་འཇོག་རྒེ་ ཁ་ཉེན་འདེ་, ཡེ་རི་ཀོའེ་ རྒྱལ་ས་ལ་ ཞག་པོ་ རྡུན་ ཧོར་ར་ ཏྃ་རྦེ་, རྒྱལ་ས་ལ་ ཧོར་རྡེ་ ཡོ་ཀ་ནེ་ སིག་པ་འབོ་ ཞིག་།
31 ཏེཏ་པ་ ཡོད་ཅེ་རྦེ་, འཇང་ཙོ་མ་ ར་ཧབ་, ཁ་ མ་ཉེན་ཀན་ ཁོའེ་ རྒྱལ་ས་པ་རྒུན་ ཉམ་པོ་ ཤི་ མ་ཤི་, ཅེ་ཟེར་ནི་ ཁོའེ་ ཁོ་རང་ངེ་ ཁང་པེ་ན་ འིཔ་ཏེ་ ཡོང་ཀ་ནེ་ ཨིས་ར་ཡེལ་པ་ ཉ་ཧ་ རྒ་སུའི་ ཞུའི་།
32 ཏ་རུང་ ཙམ་ཤིག་ མང་པོ་ ང་ ཟེར་རྒོའེ་? འགི་འདི་འོན་, འབཱ་རག་, སམ་སོན་, ཡེབ་ཐ་, འདཱ་འབིད་, ཤ་མུ་ཨེལ་ རྡང་, ལུང་རྟོན་པ་རྒུ་ནི་ ཧོར་ལ་ ཤེད་ཅེ་ ཏུའི་ ང་ མེད་། 33 ཀའོ་རྒུ་ནི་ ཏེཏ་པ་ ཡོད་ཅེ་རྦེ་, རྒྱལ་སྲིད་རྒུན་ ང་ཡོག་ལ་ ཁྱོང་, ཀྲང་པེ་ ཐག་ཅེད་རྒུན་ འདང་, ཞལ་ཆེཏ་ ཛེད་ཀན་རྒུན་ ཐོབ་, ཀོན་འཇོག་རྒེ་ སིང་འགེ་ ཁ་རྒུན་ ཀག་རྒེ་ ཛེད་, 34 མེ་ ཀྲག་པོ་ འབར་ཧ་ནེ་ ནང་ནི་ ཐར་, ར་ཡི་ ཉམ་པོ་ ཤི་ཅེ་ནི་ ཐར་, འུ་ཐུག་ ཡོ་ཀན་རྒུན་ ཤེད་ཅེན་ འགྱུར་ ཡང་ མག་རྒེ་ན་ ཤེད་ཅེན་ འགྱུར་རྡེ་ འགྲ་ཝེ་ མག་མི་རྒུན་ ཤོར་ཤུག་, 35 པོ་མོ་རྒུན་ལ་ ཁོ་རང་རྒུ་ནི་ ཤེ་སྤ་ ཤི་ཀན་རྒུན་ སོན་པོ་ ལྃ་རྡེ་ ཐོབ་, ཞེན་རྒུན་ལ་ ནག་ སྲན་ཀྲེ་ ཐོང་, ཏེ་ཀ་ནི་ ཐར་ཤེ་ལ་ ཁོང་རྒུ་ནི་ ཀོན་འཇོག་ མ་ཕྃ་། ཁོང་རྒུ་ནི་ ཤི་རྡེ་ སོན་པོ་ ལྃ་རྡེ་ ལྟིང་ནི་, མི་ཙེ་ རྒྱལ་ལེ་ ཐོབ་ཅེ་རྦེ་ན་ རེ་ཝ་ པོ་རེ་ཡོད་པེན་།
36 ཞེན་རྒུན་ལ་ ཁྲེལ་རྦ་ ཅོའེ་རྡེ་ རྟལ་ལྕག་ མང་པོ་ ཕོག་, ཡང་ ཞེན་རྒུན་ལ་ ལྕ་རྟག་ རྡམ་འདེ་ ཙོན་ཁང་ངེ་ན་ ཧར་། 37 ཁ་ཅིག་ལ་ རྡོ་ རྒྱབ་ཏེ་ སེད་, ཁ་ཅིག་རྒེ་ ཟུྃ་སྤོ་ ཁག་ཉི་ན་ ཤག་, ཞེན་རྒུན་ ར་ཡི་ ཉམ་པོ་ སེད་, ཁ་ཅིག་ལ་ ཀོན་རྒྱུ་ ཅང་ མེད་པེ་, ལུག་ རྡང་ ར་མེ་ པག་སྤ་རྒུན་ ཀོན་འདེ་ འགྲུལ་། ཁོང་རྒུན་ལ་ ཡོ་ཀ་ནེ་ ར་ཝང་འབོ་ ཀོག་ཏེ་ མི་འོའེ་སྤ་ ཅོ་ཡོད་པེན་། 38 འཇིག་རྟེན་པ་རྒུན་ལ་ ཏེ་ ཏེཏ་པ་ཅན་རྒུན་ ཉམ་པོ་ མི་ཙེ་ པུད་ཅེ་ འོའེ་སྤ་ མེད་རྡེ་ ནོག་། ཏེ་ ཏེཏ་པ་ཅན་རྒུ་ནི་ ནང་ནི་ ཁ་ཅིག་ ཐང་རྟོང་ འདང་ རི་རྒུན་ལ་ ཁོར་རེན་ འདེད་, ཁ་ཅིག་ འབའ་ཝོ་ རྡང་ རྒོ་རོང་རྒུ་ནི་ན་ འི་རྦེན་ཞིག་ འདེད་།