མ་ཤི་ཀེ་ ཚང་མེ་ ཏོན་ལ་ ལན་ཅིག་ ཁོ་རང་ སྲོག་ཆོད་ལ་ པུ་ལེ་ ཛེད་།
10
མོ་ཤེ་ ཁྲིམ་འབོ་ ཡོང་ཅེ་ཅེན་ནེ་ ཟང་པེ་ ཀྲིབ་ཉག་པོ་ ནོག་ ངོའེ་རྦོ་ མག་། ཏེ་རྒ་རྦེ་ཕི་ལ་ ཁྲིམ་འབེ་, ལོ་རྡང་ ཙོག་སེ་ སྲོག་ཆོད་རྒུན་ པུལ་ཤེ་ རྒྱུད་ཏེ་ ཅོལ་ལེ་ ཡོང་ཀན་རྒུན་, ཅི་ས་ཐོག་ནི་ སང་མ་ ཅོ་ མ་ནི་ མ་ཉེན་ནེ་ ནོག་། 2 ཀལ་ཏེ་ སང་མ་ ཅོ་ཉེན་འབེ་ནི་, ཏེ་ནི་ སྲོག་ཆོད་ པུལ་ཤེའོ་ ཚར་རྡེ་ མེད་ཁྲོ་། ཅེ་ཟེར་ནི་ སྲོག་ཆོད་ ལན་ཅིག་ པུལ་ཅེ་རྦེ་ ཅོལ་ཧན་རྒུན་ ཏུའི་རྒྱུན་ནེ་ཕི་ སང་མ་ སོང་འདེ་ ཡོད་ཁྲོ་། ཡང་ ཁོང་རྒུ་ནི་ན་ ཁོ་རང་རྒུ་ནི་ རྡིག་པེ་ རྐྱོན་འབོ་ ལུའི་རྡེ་ མེད་ཁྲོ་།3 འིན་ན་ ཏེ་ སྲོག་ཆོད་རྒུ་ནི་ ཁོང་རྒུན་ལ་ ལོ་རྡང་ ཁོ་རང་རྒུ་ནི་ རྡིག་པེ་ འི་ཏུ་ ཧུལ་ལེ་ནོག་། 4 ཅེ་ཟེར་ནི་ ལང་ཀྲོ་ རྡང་ ར་མ་རྒུ་ནི་ ཁྲག་རྒེ་, རྡིག་པ་ མེ་ཀན་ མ་ནི་ ཅོ་ཉེན་ནེ་ མག་། 5 ཏེ་རྒ་རྦེ་ཕི་ལ་ ནམ་ མ་ཤི་ཀ་ འཇིག་རྟེན་ནེ་ན་ རྐྱོད་, ཁོང་ངེ་ ཀོན་འཇོག་ལ་ མོལ་,
“ཉེ་རང་ལ་ སེམ་ཅེན་ནེ་ སྲོག་ཆོད་པ་ ཡང་
རྡིག་པེ་ ཆོད་པ་རྒུ་ནི་ ཐུག་འདོད་ མེད་ཏེ་ ནོག་།
འིན་ན་ ཉེ་རང་ངེ་ ང་, ཆོད་པ་ པུལ་ཤེ་ལ་ ཟུྃ་སྤོ་ཞིག་ སལ་།
6 ཉེ་རང་ མེ་ན་ སྲག་ཀ་ནེ་ ཆོད་པ་
ཡ་, ཞེན་ རྡིག་པེ་ ཆོད་པ་རྒུན་ལ་ ཐུག་ཉེ་རྡེ་ མ་ཛེད་།
7 ཏེ་ནི་ ངེ་ ཟེར་རྦེན་ ‘ཟི་རྡང་, ཀྱེ་ ཀོན་འཇོག་,
ང་ ཉེ་རང་ངེ་ ཐུག་འདོད་ ཅོ་ལ་ ཡོྃ་རྦེན་,
ཀ་ཟུག་ ངེ་ ཧོར་ལ་ ཏམ་པེ་ སུང་རབ་རྦེ་ན་ འབྲི་རྡེ་ འདུག་།’”
8 ཏང་པོ་ མ་ཤི་ཀེ་ མོལ་, “ཉེ་རང་ལ་ སེམ་ཅེན་ནེ་ སྲོག་ཆོད་པ་, ཡང་ རྡིག་པེ་ ཆོད་པ་རྒུན་ ཡང་, མེ་ན་ སྲག་ཀ་ནེ་ ཆོད་པ་ ཡང་, ཞེན་ རྡིག་པེ་ ཆོད་པ་རྒུ་ནི་ ཐུག་འདོད་ མེད་ ཡང་, ཏོ་རྒུན་ལ་ ཐུག་ཉེ་རྡེ་ མ་ཛེད་” ཞེན་ ཏོ་རྒུན་ མོ་ཤེ་ ཁྲིམ་ ནང་ཞིན་ པུལ་རྒོའེ་ནང་། 9 ཏེ་ནི་ ཁོང་ངེ་ མོལ་, “ཟི་རྡང་, ང་ ཉེ་རང་ངེ་ ཐུག་འདོད་ ཅོ་ལ་ ཡོྃ་རྦེན་།” ཁོང་ངེ་ ཆེཏ་ཏོན་ ཉི་སྤ་འབོ་ ལག་ལེན་ནེ་ན་ ཁྱོང་ངེ་ ཛེད་ཅེ་ཕི་ ཆེཏ་ཏོན་ ཏང་པོ་རྦོ་ མེ་ཀན་ ཛེད་། 10 ཅེ་ཟེར་ནི་ ཀོན་འཇོག་རྒེ་ ཐུག་འདོད་འབོ་, ལན་ཅིག་ ཏུའི་རྒྱུན་ནེ་ཕི་ ཡི་ཤུ་ མ་ཤི་ཀེ་ ཧུ་ཟུག་པོ་ སྲོག་ཆོད་ལ་ པུལ་རྡེ་, ཨ་ཧོ་རྒུན་ སང་མ་ ཅོའོ་ ཛེད་ཅེའོ་ ནོག་།
11 ཆེཏ་ཏོན་ ཉིང་པེ་ན་, ལ་མེ་ ཞག་ཏང་ ཆོད་ཁྲི་ འདུན་ལ་ སྲོག་ཆོད་རྒུན་ པུལ་ལེན་ ཞབ་ཏོག་ ཞུ་ནོག་, ཀ་རྦེ་ རྡིག་པ་ མེ་ཀན་ མ་ནི་ ཅོ་ཉེན་ནེ་ མག་། 12 འིན་ན་ ཨ་ཧོ་རྒུ་ནི་ ལ་མ་ ཆོན་མེ་, ཁོ་རང་ ལན་ཅིག་ སྲོག་ཆོད་ པུལ་རྡེ་ ཏུའི་རྒྱུན་ནེ་ཕི་ རྡིག་པ་རྒུན་ མེ་ཀན་ ཅོའོ་ ཛེད་། ཏེ་ནི་ ཁོང་ ཀོན་འཇོག་རྒེ་ ཡོའེ་སྤ་ ཆོག་ལ་ སི་ཝ་ཅེན་ནེ་ མལ་ལེ་ཀ་ ཞུ་རྡེ་ ཛེད་། 13 ཁོང་ ཏུ་རུ་ ཏེ་ཏེ་ཚུག་པ་ ཞུ་རྡེན་ ནམ་ཚུག་པ་ ཁོང་ངེ་ འགྲ་ཝོ་རྒུན་ ཁོ་རང་ངེ་ ཞབ་རྦེ་ ཡོག་ལ་ པོ་རེ་ མི་ཛེད་། 14 ཁོ་རང་ངེ་ སྲོག་, ལེན་ཅིག་ ཆོད་པ་ པུལ་ཤེ་རྦེ་, ཁོང་ངེ་ ཏམ་པ་ ཅོའོ་ ཛེད་ཅེ་ཅེན་རྒུན་ལ་ ཏུའི་རྒྱུན་ནེ་ཕི་ ཕུན་སུམ་ཚོག་སྤེ་ མི་ ཅོའོ་ ཛེད་།
15 ཡང་ ཏམ་པེ་ ཐུག་ཡིད་རྡེ་ལ་ ཏོ་རྦེ་ ཧོར་ལ་ སྤང་པོ་ སལ་, ཏང་པོ་རྦོ་,
16 “ཏེ་ ཞག་ལ་ ངེ་ ང་རང་ངེ་ མི་རྒུན་ ཉམ་པོ་ ཆེཏ་ཏོན་ སོ་མ་ཞིག་ ཅོའེན་།
ང་ ཙོབོ་རྡེ་ ཟེ་འིན་, ངེ་ ང་རང་ངེ་ ཁྲིམ་རྒུན་ ཁོང་རྒུ་ནི་ ཉིང་ངེ་ན་ པོ་རེན་,
ཡང་ ཏོ་རྒུན་ ཁོང་རྒུ་ནི་ སེམ་མེ་ན་ འབྲི་འིན་།”
17 ཏེ་ནི་ ཁོང་ངེ་ མོལ་,
“ངེ་ ཁོང་རྒུ་ནི་ རྡིག་པ་རྒུན་ ཞེད་རྡེན་,
ཡང་ ཁོང་རྒུ་ནི་ རྡིག་པ་ རྡང་ ལེ་ཧ་ ངན་པ་རྒུན་, ངེ་ མ་ནི་ འི་ཏུ་ མི་ཅོ་།”
18 རྡིག་པ་རྒུན་ལ་ ཀོན་འཇོག་རྒེ་ ཤག་སྤ་ ཐོབ་ཏེ་ ལྟིང་ནི་, ཡང་ སྲོག་རྒེ་ ཆོད་པ་ པུལ་རྒོའེ་ཤེ་ མེ་ཀག་།
ཟོད་པ་ ཅོའེ་ཧེ་།
19 ཏེ་རྒ་རྦེ་ཕི་ལ་ ངེ་ ཤེ་སྤ་ སྤུན་རྒུན་, ཡི་ཤུའི་ ཧུ་ཁྲག་ རྒྱུད་ཏེ་, ཨ་ཧོ་རྒུན་ རྡེ་བ་ཅན་ནེ་ ཚང་མེ་སང་ མལ་ ཏམ་པ་རྦེ་ན་ ཧམ་བ་ ཉམ་པོ་ ཞུ་ཉེན་ནེ་ནོག་། 20 ཁོང་ ཀྲོང་ཤེ་རྦེ་ ཡི་ཤུའི་ མི་ཙེ་ སལ་ཧ་ནེ་ སོ་མ་ ལམ་ཞིག་ པེ་ ཛེད་པེ་, ཨ་ཧོ་རྒུན་ ཏེ་ ཡོ་ལ་ ཀལ་ཏེ་ ཚང་མེ་སང་ མལ་ ཏམ་པ་རྦེ་ན་ ཆ་ཉེ་ནེ་ནོག་། 21 ཀོན་འཇོག་རྒེ་ ཁང་པ་, ཨ་ཧོ་རྒུ་ནི་ཀ་ ཝང་སྲུལ་ལེ་ ཛེད་ཀ་ནེ་ ལ་མ་ ཆོན་མོ་ ཀྲག་པོ་ཞིག་ ཞུ་རྡེ་ ཡོད་པེ་, 22 ཨ་ཧོ་རྒུན་ ཀྲང་པོ་ ཉིང་ འདང་ རྡེན་ཆེ་ཤེ་ཅེན་ སོན་ཏེ་ ཉམ་པོ་ ཀོན་འཇོག་རྒེ་ ཧུ་འདུན་ལ་ ཆེན་། ཅེ་ཟེར་ནི་ ཨ་ཧོ་རྒུ་ནི་ སེམ་མེ་ན་ ཡོ་ཀ་ནེ་ རྐྱོན་རྒུན་ མ་ཤི་ཀེ་ ཧུ་ཁྲག་ ཉམ་པོ་ སང་མ་ ཡང་ ཨ་ཧོའེ་ ཟུྃ་སྤོ་རྒུན་ ཆུ་ སང་མ་ ཉམ་པོ་ ཁྲུ་ ཛེ་རྡེ་ནོག་།
23 ཏེ་ནི་ སྤང་པོ་ ཏང་ཀ་ནེ་ ཨ་ཧོའེ་ རེ་ཝ་རྦེ་ཀ་ ཐེ་ཚོམ་ མེད་རྡེ་ རྟེམ་པོ་ ཐམ་འདེ་ འདེག་རྡེན་། ཅེ་ཞུ་ནི་ ཀོན་འཇོག་ནི་, ཞལ་ཆེཏ་ ཛེད་ཀན་འབོ་ ཀྲུཔ་ཅུག་རྒེ་ ཛེད་ཅེ་ན་ ལོ་ཁྱེལ་ཅེན་ ཞུ་རྡེ་ནོག་། 24 ཏེ་ནི་ ཤོག་ཧེ་, ཡ་ཤ་ རྡང་ ལེ་ཧ་ ཟང་པོ་ ཅོ་ཅེ་ན་ ཅིག་ ཏང་ ཅིག་ལ་ སེམ་རུའི་ ཀ་ཟུག་རྒེ་ ཏང་ཅེ་ལ་ ཨ་ཧོ་རྒུ་ནི་ སམ་བ་ ཏང་ངེན་། 25 ཡང་ ཀ་ཟུག་ ཁ་ཅིག་ལ་ ཛོམ་ཅེ་ ལོབ་ མེ་ཀན་ ཙོག་སེ་ ཨ་ཧོ་རྒུན་, ཉམ་པོ་ ཛོམ་ཅེའོ་ ཕང་ མ་ཕང་ངེ་, ཅིག་ ཏང་ ཅིག་ལ་ སེམ་རུའི་ ཏོང་ཧེ་། མིག་ས་ལེ་ ནམ་ ཁོང་ ལོག་ཏེ་ རྐྱོད་ཅེ་ ཞག་པོ་ ཉེ་མོ་ལ་ ལེབ་རྦེན་ ཡོད་།
26 ཤེ་སྤ་ ཡ་ཏོ་རྒུན་, ཀལ་ཏེ་ ཨ་ཧོ་རྒུན་ལ་ རྡེན་འབེ་ ཤེ་རྒྱུ་ ཐོབ་ཏེ་ ལྟིང་ནི་, ནར་རྐྱི་ རྡིག་པ་རྒུན་ ཅོའེན་ འདེད་ནི་, ཏེ་ནི་ ཏོ་རྒུན་ལ་ ཤག་སྤ་ ཐོབ་ཅེ་ལ་ པུལ་ཅེ་ སྲོག་ཆོད་ཤིག་ མེ་ཀག་། 27 ཏོ་ཙོག་སེ་ མི་རྒུན་ལ་ ཀོན་འཇོག་རྒེ་ འཇི་ནང་ཅེན་ནེ་ ཁྲིམ་ཅེད་ ཏང་ ཀྲག་པོ་ འབར་རེན་ ཡོ་ཀ་ནེ་ མེ་, ཀ་རྦེ་ ཁོང་ངེ་ འགྲ་ཝོ་རྒུན་ མེ་ཀན་ ཅོའེན་, ཏེ་རྒ་ རེ་ཝ་རྦོ་ ཅིག་པོ་ ལུའི་རྡེ་ནོག་། 28 མོ་ཤེ་ ཁྲིམ་ ཁ་ མ་ཉེན་ཀ་ནེ་ མི་རྒུན་, སྤང་པོ་ ཉི་ ཡང་ སུམ་མེ་ ལྟིང་ནི་, ཉིང་ཞེ་ མ་ནི་ མེད་རྡེ་ སེད་རྡེ་ཡོད་པེན་། 29 ཏེ་ནི་ སམ་བ་ སལ་ཧེ་! ཀོན་འཇོག་རྒེ་ སྲེ་ ཧང་པེ་ ཡོག་ལ་ ནེན་འདེ་ འགྲུལ་ཧན་ ཡང་ ཆེཏ་ཏོན་ ཛེད་ཀ་ནེ་ ཡི་ཤུའི་ ཧུ་ཁྲག་པོ་ལ་, ཏམ་པ་ མ་སི་, ཡང་ ཏམ་པེ་ ཐུག་ཡིད་ལ་ ཏེཏ་ལོག་ ཅོ་ཀན་རྒུན་ལ་ མང་ངེ་ འཇི་ནང་ཅེན་ནེ་ ཆེད་པ་ ཕོག་རྒོ་ཤེ་ འོའེ་སྤ་ མ་ནོག་རྒེ་? 30 འི་ མོལ་ཧན་འབོ་ ཨ་ཧོ་རྒུ་ནི་ ཤེ་རྡེ་ནོག་,
“ལེན་ ནེན་ཅེ་ ངེ་ ཁག་ འིན་།
ངེ་ ཁོང་རྒུན་ལ་ འོའེ་སྤེ་ ཆེད་པ་ ཏང་ངེན་།”
ཁོང་ངེ་ འི་རྦོ་ལ་ མོལ་,
“ཙོབོ་ ཀོན་འཇོག་རྒེ་ ཁོ་རང་ངེ་ མི་རྒུན་ལ་ ཁྲིམ་ཅེད་ ཛེ་རྡེན་།”
31 སོན་པོ་ ཀོན་འཇོག་རྒེ་ ཁྲིམ་ཅེད་རྡེ་ ཡོག་ལ་ ལེབ་ཅེའོ་ འཇི་ནང་ཅེན་ཞིག་ ནོག་།
32 ཀོན་འཇོག་རྒེ་ འོད་པོ་ ཁྱི་ཞི་ཀ་ པབ་ཏེ་ ཁྱི་ཞ་རྒུ་ནི་ མ་ཤི་ཀ་ ཏེཏ་པ་ ཅོ་ཀ་ནེ་ ཏེ་ ངུལ་མེ་ ཞག་རྒུན་ འི་ཏུ་ ཅོའེ་ཧེ་། མ་ ཀག་སྤོ་ ཐོང་འདེ་ ཁྱི་ཞ་རྒུན་ ཏེཏ་པེ་ན་ རྟེམ་པོ་ འདེད་ཏེ་ འིན་འབེན་། 33 ལེན་ མང་པོ་, ཁྱི་ཞ་, མི་རྒུ་ནི་ ཕྲོ་ ནག་པར་རྡོ་ ལྟན་འདེ་ ཁྲེལ་རྦ་ ཅོའེ་, ཡང་ ལེན་ མང་པོ་ ཁྱི་ཞ་རྒུ་ནི་ ཏོ་ཙོག་སེ་ ནག་པར་རྡོ་ ཐོང་ཀན་རྒུན་ལ་ ཡ་ཏོ་ ཅོ་ཡོད་པེན་། 34 ཙོན་ཁང་ངེ་ན་ ཧར་ཧན་རྒུན་ ཉམ་པོ་ ཁྱི་ཞ་རྒུ་ནི་ ཉིང་ཞེ་ ལྟན་, ཡང་ ཁྱི་ཞི་ ནོར་ ཀོག་ཏེ་ ཁྱེར་ཧན་རྒུན་ལ་ ཐེད་པོ་ ཉམ་པོ་ ཁྱེར་ཤུག་, ཅེ་ཟེར་ནི་ ཏེ་སང་ ཀྲ་རྒེ་ ཏུའི་རྒྱུན་ ལུའི་ཤེ་ཅེན་ནེ་ རྒྱུ་ནོར་རྒུན་ ཁྱི་ཞི་ཕི་ རྡེ་བ་ཅན་ནེ་ན་ ཡོ་ཀན་འབོ་ ཁྱི་ཞ་རྒུན་ལ་ རྒྱུའི་ནོག་།
35 ཏེ་རྒ་རྦེ་ཕི་ལ་ ཙོབོ་ ཡི་ཤུའི་ན་ ཡོ་ཀ་ནེ་ རྡེན་འབའ་རྦོ་ ཕང་ མ་ཕང་ཧེ་། ཡུ་རྦེ་ ཁྱི་ཞ་རྒུན་ལ་ སོལ་རེ་ ཀྲག་པོ་ ཁྱོང་ཅེའོ་ འི་ཏུ་ ཅོའེ་ཧེ་། 36 ཁྱི་ཞ་རྒུ་ནི་ ཏེཏ་པེ་ན་ ཟོད་པ་ པོར་རྒོ་ཤེ་ ནོག་, ཅེ་ཟེར་ནི་ ཁྱི་ཞི་ ཀོན་འཇོག་རྒེ་ ཐུག་འདོད་ ནང་ཞིན་ ཅོའེ་ ཚར་རེ་རྡང་, ཁྱི་ཞ་རྒུན་ལ་ ཁོང་ངེ་ ཞལ་ཆེཏ་ ཛེད་ཀན་འབོ་ ཐོབ་རྦེན་།
37 ཏམ་པེ་ སུང་རབ་རྦེ་ན་ མོལ་རྡེ་ ནོག་,
“མ་ ཏུའི་ ཉུང་ཙེ་ཞིག་རྒེ་ན་, ཕེབ་ཅེ་ཅེན་འབོ་ ཕེབ་རྦེན་,
ཡང་ འགོར་ཤུག་རྒེ་ མི་ཛེད་།
38 འིན་ན་ ངེ་ མི་ ཀྲང་པོ་རྒུ་ནི་, ཏེཏ་པེ་ན་ མི་ཙེ་ པུད་རྡེན་།
ཡང་ རྒྱབ་འགྱུར་ཧན་རྒུན་ ཉམ་པོ་ ང་ མ་ནི་ མི་ཐེད་།”
39 ཨ་ཧོ་རྒུན་ ཀོན་འཇོག་ལ་ རྒྱབ་འགྱུར་རྡེ་ ལྟོང་ས་ ཆོག་ལ་ ཆ་ཀན་རྒུན་ ཙོག་སེ་ མག་། ཨ་ཧོ་རྒུན་, སེམ་ཡིད་ རྐྱོབ་རྦེ་ ཛེད་ཅེ་ཅེན་ནེ་ ཏེཏ་པ་ཅན་རྒུན་ ནོག་།