ལྟིང་འཇུག་རྒེ་ ཧུལ་མ་།
13
ཅིག་ ཏང་ ཅིག་ལ་ མི་སྲིང་ ཙོག་སེ་ ཤེ་སྤ་ ཅོ་ཅེའོ་ མ་ནི་ མ་ཕང་ཧེ་། 2 མ་ཤེ་ཀན་རྒུན་ལ་ རང་ངེ་ ཁང་པ་ རྒ་སུའི་ ཞུ་ཅེ་ལ་ ནྃ་མེད་ མ་ཅོ་ཧེ་། རྒ་སུའི་ ཞུ་ཅེ་རྦེ་, ཁ་ཅིག་རྒེ་ མ་ཤེ་རྡེ་ ཕོ་ཉ་རྒུན་ལ་ རྒ་སུའི་ ཞུའི་རྡེ་ འིན་འབེན་། 3 ཁྱི་ཞ་རང་རྒུན་ ཙོན་ཁང་ལ་ ཡོ་ཀན་ ཙོག་སེ་, ཏེ་ན་ ཡོ་ཀན་ ཏེཏ་པ་ཅན་རྒུན་ འི་ཏུ་ ཅོའེ་ཧེ་, མ་ཚེད་ ཁྱི་ཞ་རང་རྒུན་ལ་ སོང་ཀན་ ཙོག་སེ་, རྡུ་ངལ་ སོང་ཀ་ནེ་ ཏེཏ་པ་ཅན་རྒུན་ལ་ འི་ཏུ་ ཅོའེ་ཧེ་།4 པག་རྟོན་ལ་ ཚང་མེ་ སི་ཝ་ ཅོ་རྒོའེ་, ཡང་ མག་པ་ རྡང་ ན་མ་ ཉ་ཧ་, ཅིག་ ཏང་ ཅིག་ ཉམ་པོ་ ལོ་ཁྱེལ་ཅེན་ ཡོང་རྒོའེ་། ཅེ་ཟེར་ནི་ ཀོན་འཇོག་རྒེ་ ངན་པ་ ལུའི་འབྲེལ་ ཡང་ ཞི་མེད་ མན་ཀན་ ཉམ་པོ་ ལུའི་འབྲེལ་ པོར་ཧན་རྒུན་ལ་ ཁྲིམ་ཅེད་ སལ་ལེ་ ཛེ་རྡེན་། 5 མུལ་ ཤེ་སྤ་ མ་ཅོ་ཧེ་། རང་ལ་ ཡོ་ཀན་འབེ་ཀ་ ཚིམ་འདེ་ འདོད་ཧེ་། ཅེ་ཞུ་ན་ ཀོན་འཇོག་རྒེ་ མོ་ལེ་ ཛེད་,
“ངེ་ ཁྱི་ཞ་རྒུན་ མ་ནི་ མི་ཕང་
ཡང་ ཁྱི་ཞ་རྒུན་ རྒོའེ་ཤེ་ན་ མ་ནི་ མི་པོར་།”
6 ཏོ་རྦེ་ཕི་ ཨ་ཧོ་རྒུ་ནི་ ལོ་ཁྱེལ་ ཉམ་པོ་ ཟེར་ ཉེན་ནེན་,
“ཙོབོ་ནི་ ངེ་ ཡ་ཏོ་ ཛེད་ཀན་འབོ་ འིན་འབེ་,
ང་ འཇིའི་རྒོའེ་ མ་ནི་ མེད་,
ཡང་ མི་རྒུ་ནི་ ང་ ཅི་ ཅོ་ཉེ་ནེན་?”
7 ཁྱི་ཞ་རྒུན་ལ་, ཀོན་འཇོག་རྒེ་ ཀའ་ ལབ་རྦེ་ ཛེད་ཀ་ནེ་ འུ་རྐྱོང་རྒུན་ འི་ཏུ་ ཅོའེ་ཧེ་། ཁོང་རྒུ་ནི་ མི་ཙེ་ པུད་ཚུལ་ལེ་ འབྲེ་རྦུ་ ཟང་པོ་རྒུ་ནི་ ཧོར་ལ་ སམ་བ་ ཏོང་ཧེ་, ཡང་ ཁོང་རྒུ་ནི་ ཏེཏ་པེ་ སྤེ་ཀ་ འགྲུལ་ཧེ་། 8 ཡི་ཤུ་ མ་ཤི་ཀ་རྦོ་ ངུལ་ལ་, ཏག་ས་ ཡང་ ཏུའི་རྒྱུན་ འགྱུར་ཞ་ མེད་རྡེ་ ཙོག་སེ་ ཞུ་རྡེ་ནོག་། 9 མིན་འདྲ་ མིན་འདྲ་ ལབ་ཞ་རྒུ་ནི་ ལྟིང་འགྲྃ་ནི་ མ་ཆ་ཧེ་། ཁར་ཞི་ ཟ་ཅེ་ ཁྲིམ་ སྲུང་ཀན་རྒུན་ལ་ ཅང་ ཕན་ཏོག་ ཐོབ་རྦེ་ མག་། ཏོ་རྦེ་ཕི་ ཏེ་ ཁྲིམ་རྒུན་ མ་ཅོ་ ཀོན་འཇོག་རྒེ་ ཐུག་ཞེ་ རྒྱུད་ཏེ་, ཁྱི་ཞི་ སེམ་རྒུན་ ཤེད་ཅེན་ ཅོའེ་ཧེ་།
10 ཨ་ཧོ་རྒུན་ལ་ ཆོད་ཁྲི་ཞིག་ ཡོད་ཏེ་ ནོག་, ཀ་རྦེ་ཀ་ནི་ ཀུར་རེ་ན་ ཆོད་པ་ པུལ་ཧ་ནེ་ ལ་མ་རྒུན་ལ་ ཟ་ཅེ་ ཐོབ་ཏང་ མེ་ཀག་། 11 ཚིར་ ཉིང་པེ་ན་ ལ་མ་ ཆོན་མེ་ སེམ་ཅེན་རྒུ་ནི་ ཁྲག་པོ་, མལ་ ཏམ་པ་རྦེ་ན་ རྡིག་པེ་ཕི་ སྲོག་ཆོད་རྡེ་ ཚུལ་ལ་ ཁྱོང་ངེ་ཡོད་པེན་། ཡང་ སེམ་ཅེན་ནེ་ ཟུྃ་སྤོ་རྒུན་ ཨིས་ར་ཡེལ་པ་རྒུན་ འདེད་སེ་ ཕི་ལོག་ལ་ མེ་ སྲག་རྒེ་ཡོད་པེན་། 12 ཏོ་རྦེ་ཕི་ ཡི་ཤུའི་ལ་ ཁོ་རང་ངེ་ ཧུ་ཁྲག་ རྒྱུད་ཏེ་ མི་རྒུན་ ཏམ་པ་ ཅོ་ཅེ་ལ་, ཡེ་རུ་ཤ་ལེམ་མེ་ རྒྱལ་སེ་ རྒྱེ་རྒོའེ་ ཕི་ལོག་ལ་ རྡུ་ངལ་ ནམ་། 13 ཏེ་རྒ་ ཙོག་སེ་ ཨ་ཧོ་རྒུན་ལ་ ཕི་ལོག་ལ་ ཡི་ཤུ་ ཞུ་ས་ ཆེན་, ཡང་ ཁོང་ངེ་ ཁྲེལ་རྦེ་ན་ འདྲེའེ་རྡེན་། 14 འི་ འཇིག་རྟེན་ནི་ཀ་ ཨ་ཧོ་ལ་ ཏུའི་རྒྱུན་ འདེད་སེ་ རྒྱལ་ས་ཞིག་ མེ་ཀག་། འིན་ན་ ཨ་ཧོ་རྒུན་ ཏེ་ ཡོང་ཅེ་ཅེན་ནེ་ རྒྱལ་ས་འབོ་ལ་ སྲུྃ་རྡེ་ ནོག་།
15 ཏོ་རྦེ་ཕི་ ཨ་ཧོ་རྒུ་ནི་ ཏུའི་རྒྱུན་ ཡི་ཤུ་ རྒྱུད་ཏེ་ ཀོན་འཇོག་ལ་ རྟོད་པེ་ སྲོག་ཆོད་ པུ་ལེན་, ཚང་མེ་ འདུན་ལ་ ཡི་ཤུའི་ རྒྱབ་ནི་ འགྲང་ཀན་འབོ་ ཤེད་རྡེན་། 16 ལེ་ཧ་ ཟང་པོ་ ཅོ་ཅེ་ རྡང་ རྒོའེ་ཤེ་ཅན་རྒུན་ལ་ རྒོའེ་རྡེ་ ཏང་ཅེ་རྒུན་ ཞེད་ མ་ཞེད་ཧེ་, ཅེ་ཟེར་ནི་ ཡུ་ཙོག་སེ་ སྲོག་ཆོད་རྒུན་ལ་ ཀོན་འཇོག་ ཐུག་ཉེ་ ཛེ་རྡེ་ནོག་།
17 ཆོའེ་ཚོག་རྒེ་ འུ་རྐྱོང་རྒུ་ནི་ ཁ་ཉེན་འདེ་ ཁོང་རྒུ་ནི་ ཝང་ངེ་ ཡོག་ལ་ འདོད་ཧེ་། ཁྱི་ཞ་རྒུ་ནི་ ཏེཏ་པེ་ མི་ཙེ་ ལྟ་ཏོག་ ཅོ་ཅེའོ་ ཁོང་རྒུ་ནི་ ཁག་ འིན་ཅེ་ཀ་ནི་, ཁོང་རྒུ་ནི་ ཀོན་འཇོག་ལ་ སི་སྲུག་ ཏང་ རྒོའེ་ནོག་། ཁོང་རྒུན་ལ་ ཡུ་རྒུན་ རྡུག་པོ་ ཉམ་པོ་ ཅོ་ མ་ཅུག་རྒེ་, རྐྱིད་པོ་ ཉམ་པོ་ ཅོ་ཅུག་ཅེ་ལ་ ཁོང་རྒུ་ནི་ ཁ་ཉོན་ཧེ་, ཏོ་ ཁྱི་ཞ་རྒུ་ནི་ ཕན་ཏོག་རྡེ་ཕི་ ནོག་།
18 ང་ཞ་རྒུ་ནི་ཕི་ མོ་ལམ་ ཞུའི་ཧེ་། ང་ཞ་རྒུ་ནི་ སེམ་ རྐྱོན་མེད་ འིན་ཅེའོ་ ང་ཞ་ ནེན་ཏེན་ ལོ་ཁྱེལ་ རག་། ཡང་ ང་ཞི་ འདོད་པ་རྦོ་, ཅི་ས་ཐོག་ནི་ སི་ཝ་ཅེན་ནེ་ མི་ཙེ་ཞིག་ པུད་ཅེ་པོ་ འིན་། 19 མིག་ས་ལེ་ ང་ ཁྱི་ཞ་རྒུན་ས་ འགྱོ་སྤ་ ལོག་ཏེ་ ཡོང་ ཉེན་ཅེ་ལ་ མོ་ལམ་ ཞུའི་ཧེ་།
20 ཏ་ ཞིའི་རྡེ་ ཀོན་འཇོག་, ལུག་རྒུ་ནི་ ལུག་ཟི་ ཀྲག་པོ་,
ཙོབོ་ ཡི་ཤུ་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀན་,
ཀ་རྦེ་ ཧུ་ཁྲག་པེ་ ཐ་མེད་པེ་ ཆེཏ་ཏོན་འབོ་ལ་ ཐེ་ཙེ་ རྒྱབ་རྦེ་ ཛེད་།
21 ཀོན་འཇོག་རྒེ་ ཐུག་འདོད་རྒུན་ ཅོ་ཅེ་ལ་,
རྒོའེ་ཤེ་ ཚང་མ་ ཁྱི་ཞ་རྒུན་ལ་ སལ་ལེ་ ཛེད་ཤིག་།
ཡི་ཤུ་ མ་ཤི་ཀ་ རྒྱུད་ཏེ་ ཀོན་འཇོག་ ཐུག་ཐེད་ཀན་རྒུན་ ཅོ་ཅེ་ལ་,
ཁོང་ངེ་ ཨ་ཧོའེ་ན་ ཆག་ལེ་ ཛེད་ཤིག་།
ཏུའི་རྒྱུན་ནི་ཏུའི་རྒྱུན་ མ་ཤི་ཀ་ སྤལ་ ཐོབ་ཤིག་། ཨ་མེན་།
22 ངེ་ ཡ་ཏོ་རྒུན་ འཇུ་འཇུ་, ངེ་ སེམ་རུའི་ ཏང་ངེན་, འི་ ཡི་རྒེ་ ཆུང་ཙེ་རྦེ་ན་ འབྲི་ཀན་རྒུན་ལ་ ཟོད་པ་ ཉམ་པོ་ ཉེན་ཅེ་ལ་ ཞུ་ཝ་ པུ་ལེ་ཡོད་། 23 ཨ་ཧོ་རྒུ་ནི་ སྤུན་ ཏི་མོ་ཐི་, ཙོན་ཁང་ངེ་ ནང་ནི་ པུད་ཀན་འབོ་, ཁྱི་ཞ་རྒུན་ལ་ རྒྱུའི་ ཆ་རྒོའེ་ ས་མེ་རག་། ཀལ་ཏེ་ ཁོ་ འི་རུ་ འགྱོ་སྤ་ ལེབ་ནི་ ང་ ཁོ་ ཉམ་པོ་ ཁྱི་ཞ་ ཐུག་རྒེ་ལ་ ཡོང་ངེན་། 24 ཁྱི་ཞ་རྒུ་ནི་ འུ་རྐྱོང་རྒུན་ འདང་ ཀོན་འཇོག་རྒེ་ མི་ཚང་མ་ལ་ ངེ་ འཇུ་ ཞུ་རུག་ མོལ་། ཨི་ཏྲ་ལི་པ་ ཏེཏ་པ་ཅན་རྒུ་ནི་ ཁྱི་ཞ་རྒུན་ལ་ འཇུ་ ཀལ་འདུག་། 25 ཀོན་འཇོག་རྒེ་ ཐུག་ཞེ་འབོ་ ཁྱི་ཞ་ ཚང་མ་ ཉམ་པོ་ ལུའི་ཤིག་༎