ཀོན་འཇོག་རྒེ་ ཞལ་ཆེཏ་ ཛེད་ཀ་ནེ་ ངལ་ཚོ་།
4
ངལ་ཚོའེ་ མལ་ལེ་ཀ་ ཞུ་ཅེ་ ཀོན་འཇོག་རྒེ་ ཞལ་ཆེཏ་པོ་ ཏ་རུང་ང་ ལུའི་རྡེ་ ཡོད་ཅེ་ཀ་ནི་, ཨ་ཧོ་རྒུ་ནི་ ཕྲོ་ནི་ སུ་ཞི་ལ་ ཏེ་ ངལ་ཚོའེ་ མལ་ལེ་ཀ་ ཞུ་ མ་ཞུ་ལ་, མི་ལུའི་ཤེ་ཕི་, ཤང་ ཅོའེ་ཧེ་། 2 ཅེ་ཟེར་ནི་ ཀོན་འཇོག་རྒེ་ ངལ་ཚོའེ་ མལ་ལ་ ཀྲལ་འགྲིག་ ཅོའོ་ ཛེད་ཀ་ནེ་ ནེ་ཚུལ་ ཟང་པོ་ནི་, ཨ་ཧོའེ་ ཕ་མེ་པོ་རྒུན་ལ་ ཤེད་ཀན་ ཙོག་སེ་ ཨ་ཧོ་རྒུ་ནི་ཕི་ལ་ ཤེད་ཏེ་ ནོག་། འིན་ན་ འི་རྦོ་ ཁོང་རྒུན་ལ་ ཕན་ཏོག་ཅེན་ཞིག་ མ་འགྱུར་, ཅེ་ཟེར་ནི་ ཁོང་རྒུན་ ཀོན་འཇོག་རྒེ་ ཁ་ཉེན་འདེ་ རྡེན་ཆེ་ཤེ་ ཅོ་ཀན་རྒུན་ ཙོག་སེ་ མན་འབེན་། 3 ཨ་ཧོ་ ཏེཏ་པ་ ཅོ་ཀན་རྒུན་ ཅིག་པོ་ ཁོང་ངེ་ ངལ་ཚོའེ་ མལ་ལེ་ཀ་ ཆ་ཉེ་ནེ་ནོག་, ཀ་ཟུག་ ཀོན་འཇོག་རྒེ་ མོལ་རྡེ་ ནོག་,“ངེ་ སྲོའེ་ན་ ནའ་ ཁུར་རྦེན་། ‘ངེ་ ངལ་ཚོའེ་
མལ་ལེ་ཀ་ ཁོང་རྒུན་ མ་ནི་ ཡོང་ མི་ཉེན་།’”
ཞེན་ ཀོན་འཇོག་རྒེ་ འཇིག་རྟེན་ ཛེ་རྡེ་ ཏུའི་ནེ་ཕ་ལ་, འི་ ངལ་ཚོའེ་ མལ་རྦོ་ ཀྲལ་འགྲིག་ ཛེད་ཏེ་ འིན་འབེན་། 4 ཨ་ཧོ་ལ་ འི་ ངལ་ཚོའེ་ མལ་ལ་ ཀྲལ་འགྲིག་ ཡོ་ཀན་འབོ་ རྒྱུའི་ནོག་, ཅེ་ཟེར་ནི་ ཏམ་པེ་ སུང་རབ་རྦེ་ མལ་ཞིག་རྒེ་ཀ་, ཞག་ རྡུན་པེ་ ཞག་རྒེ་ ཧོར་ལ་ འབྲི་ཛེད་ཏེ་ འདུག་, “ཆག་ལེ་ ཚང་མ་ ཛེད་ཏེ་ ལྟིང་ནི་ ཞག་ རྡུན་པེ་ ཞག་ལ་ ཀོན་འཇོག་ ངལ་ཚོ་ ཛེད་།” 5 འིན་ན་ ངུལ་མ་ ངེ་ འབྲི་ཀན་ ཙོག་སེ་ ཀོན་འཇོག་རྒེ་ མོལ་ལེ་ ཛེད་, “ཁོང་རྒུན་ ངེ་ ངལ་ཚོའེ་ མལ་ལ་ མི་ལེབ་།”
6 ཀོན་འཇོག་རྒེ་ ངལ་ཚོ་རྦོ་ ཏ་རུང་ང་ མི་རྒུན་ ཡོང་ཅེ་ལ་ པེ་རྡེ་ ནོག་, འིན་ན་ ཁ་ མི་ཉེན་ཅེ་རྦེ་ ཅོའེ་རྡེ་, ནེ་ཚུལ་ ཟང་པོ་ འགོ་མ་རང་ ཚོར་ཧན་རྒུན་ ཏེ་ན་ ཆ་ མ་ཉེན་། 7 ཀོན་འཇོག་རྒེ་ ངལ་ཚོའེ་ མལ་ལེ་ཀ་ ཆ་ཅེ་ལ་ ཡང་ ཏུའི་ཞིག་ འདམ་མེ་ ཛེད་, ཏེ་ཏུའི་རྦོ་ ཏི་རིང་ ནོག་། ཏུའི་ མང་པེ་ ལྟིང་ནི་ ཀོན་འཇོག་རྒེ་ རྒྱ་སྤོ་ འདཱ་འབིད་ རྒྱུད་ཏེ་ འི་རྦོ་ ཤེད་རྡེ་ ཛེད་, ཀ་ཟུག་རྒེ་ ངེ་ ངུལ་ལེ་ འབྲི་རྡེ་ ཡོད་།
“ཏི་རིང་ ཁྱི་ཞ་རྒུན་ལ་ ཁོང་ངེ་ སུང་ཧད་པོ་ ཚོར་ཟ་ནི་,
ཁྱི་ཞ་རྒུ་ནི་ ཉིང་ ཀྱོང་པོ་ འགྱུར་ མ་ཅུག་ཧེ་།”
8 ཀལ་ཏེ་ ཡོ་ཤུ་ཨ་ ཨིས་ར་ཡེལ་པ་རྒུན་ལ་ ཏེ་ ངལ་ཚོ་རྦོ་ ཏང་ཅེ་ན་ ཁྲང་པོ་ ལུའི་འབེན་ནི་, ཏེ་ནི་ ཀོན་འཇོག་རྒེ་ ཞེན་ཡང་ ཞག་ཤིག་རྒེ་ ཧོར་ལ་ ལྟིང་ནི་ ཞལ་ཏ་ མ་སལ་ལེ་ ཡོད་ཁྲོ་། 9 ཏོ་རྦེ་ཕི་ ངལ་ཚོའེ་ ཏུའི་རྦོ་a ཏ་རུང་ང་ ཀོན་འཇོག་རྒེ་ མི་རྒུ་ནི་ཕི་ ལུའི་རྡེ་ནོག་། 10 ཀོན་འཇོག་རྒེ་ འཇིག་རྟེན་ ཛེ་རྡེ་ ལྟིང་ནི་ ངལ་ཚོ་ ཛད་རྡེ་ ཙོག་སེ་, ཁོང་ངེ་ ངལ་ཚོའེ་ མལ་ལེ་ཀ་ ལེབ་ཀན་ ཚང་མ་, ཁོ་རང་ངེ་ ལེ་ཧ་རྒུ་ནི་ཀ་ནི་ ངལ་ཚོ་ ཐོབ་རྦེན་། 11 སོང་འབེ་སང་ ངལ་ཚོའེ་ མལ་ལེ་ཀ་ ལེབ་ཅེ་ཕི་, ཨ་ཧོ་རྒུ་ནི་ ཙོན་འགྲུའི་ རྒྱལ་ལེ་ ཅོའེན་། འིན་ན་ ཀལ་ཏེ་ ཨ་ཧོ་རྒུ་ནི་ ཀོན་འཇོག་རྒེ་ ཁ་ མ་ཉེན་ནི་, ཏེ་ནི་ ཨ་ཧོ་རྒུན་ལ་ ཨིས་ར་ཡེལ་པ་རྒུན་ ཙོག་སེ་ ཁྲང་པོ་ མི་ལུའི་།
12 ནེན་ཏེན་ལ་ ཀོན་འཇོག་རྒེ་ ཀའ་རྒུན་ སོན་པོ་ རྡང་ ཤེད་ཅན་ ནོག་། འི་རྦོ་ ཚང་མེ་སང་ ཁ་ ནོམ་པོ་ཅན་ནེ་ ཟུར་ཉི་ ཡོ་ཀ་ནེ་ ར་ཡི་སང་ ནོམ་པོ་ ཡོད་ཏེ་ ནོག་, ཏོ་རྦེ་ སེམ་ འདང་ སེམ་ཡིད་ ཡང་ རུའི་སྤེ་ ཚི་ རྡང་ རུའི་སྤེ་ ཧང་རྒུན་ ཅེད་ཏེ་ སོ་སོ་ ཛེད་ ཉེན་ནེ་ནོག་། ཏོ་རྦེ་ ཨ་ཧོ་རྒུ་ནི་ ནང་ཀུའི་ སམ་ཚུལ་ རྡང་ འདོད་པ་རྒུན་ ཕི་ལོག་ལ་ ཕིང་ངེ་ནོག་། 13 ཀོན་འཇོག་རྒེ་ ཞང་ཧན་ ཚང་མེ་ ནང་ནི་ ཅི་ཞིག་ལ་ ཁོང་ཀ་ནི་ རྦེ་རྡེ་ པོར་ མི་ཉེན་། ཁོང་ངེ་ མིག་རྒེ་ འདུན་ལ་ ཅི་ཚང་མ་ ཀབ་ མ་ཀབ་རྦེ་ པེ་རྡེ་ ཡོད་ཏེ་ ནོག་, ཡང་ ཁོང་ངེ་ འདུན་ལ་ ཨ་ཧོ་རྒུ་ནི་ ལེ་ཧ་ ཚང་མེ་ སི་སྲུག་ ཏང་རྒོའེ་རྡེན་།
མ་ཤི་ཀ་རྦོ་ ཨ་ཧོ་རྒུ་ནི་ ལ་མ་ ཆོན་མོ་ ཞུ་རྡེ་ནོག་།
14 ཏེ་ནི་ ཨ་ཧོ་རྒུན་ལ་ རྡེ་བ་ཅན་ནེ་ན་ ཞུ་ཧན་ ཀོན་འཇོག་རྒེ་ སྲེ་ ཡི་ཤུ་, ལ་མ་ ཆོན་མོ་ ཀྲག་པོ་ཞིག་ ཡོད་ཅེ་ཀ་ནི་, ཨ་ཧོའེ་ ཏེཏ་པེ་ སྤང་པོ་ ཏང་ཀན་འབེ་ཀ་ རྟེམ་པོ་ ཐམ་འདེ་ འདོད་ཧེ་། 15 ཨ་ཧོ་རྒུ་ནི་ འི་ ལ་མ་ ཆོན་མེ་, ཨ་ཧོ་རྒུ་ནི་ སེམ་མེ་ན་ འུ་ཐུག་ འིན་ཀན་འབོ་ ཁྱེན་ནེ་ ཛེ་རྡེ་ནོག་། ཅེ་ཟེར་ནི་ ཨ་ཧོ་ ཙོག་སེ་ ཁོང་ངེ་ལ་ ཏེ་རྒ་ ཙོག་སེ་ ཐི་ཚོད་ལྟ་ཅེ་རྒུན་ ཉོང་, འིན་ན་ ཁོང་ངེ་ རྡིག་པ་ ཅོའོ་ མ་ཛེད་། 16 ཏེ་རྒ་རྦེ་ཕི་ལ་ ཨ་ཧོ་རྒུན་ ཉིང་ཞེ་ཅེན་ནེ་ ཀོན་འཇོག་, ཁྲིའི་ཀ་ ཞུ་རྡེ་ ཡོ་ཀན་ ཡོད་ས་ ཧམ་བ་ ཉམ་པོ་ ཤོག་ཧེ་། ཏུ་རུ་ ཁོང་ལ་ ཉིང་ཞེ་ རྐྱེ་རྡེ་ ཨ་ཧོ་རྒུན་ལ་ རྒོའེ་ཤེ་ ཡོད་རྡེ་ ཏུའི་ལ་ ཁོང་ངེ་ ཐུག་ཞེ་ ཡ་ཏོ་རྒུན་ ཐོབ་རྦེན་།